AKANKAMU 57

Ti yajauch najanamsha wari itiurkatniuitiam?

ANTUKTIN, IISTIN

Jehová aneakmesha tura tunaanum iniaraij tusam kakakmesha urutainsha awajirminiaitme. Tunaa ti yajauchisha awai (1 Kurintiunam 6:9, 10). Ti yajauch najanawakmincha Jehovaka tuke anenmattawai. Ninkia tsankurkartiniaiti tuma asa yainmaktatui.

1. Jehová tsankurturat takurkia wari turatniuitiaj?

Yaksha Yuusan enentaimtin ti tunaamkamtainkia kuntuts enentaimniuiti. Tumaitkiusha Jehová Israel aentsun timiania nui enentaimsamniaiti. Jehová junis timiayi: “Tura atumí tunaarí̱ ti kapa̱a̱kuitkiuisha murikiú ure̱ya imianú puju awajtústatjarme” (Isayas 1:18). Nekas enentaijiai ene enentaimia ajasakrinkia Jehovasha tsankurtameaji. Ene enentaimia ajasrikia wari turatniuitiaj? Nekas ene enentaimia ajasar yajauchia nuka atakka najanashtiniaitji nuya Jehová tsankurturta tu titiniaitji. Nuya ii enentaimmiasha yapajiattsar kakartiniaitji tura tunaanum ujunmarminiaitiajnia nuka iniaisatniuitji nuya Jehová tana nu umikir wetiniaitji (Isayas 55:6, 7 aujsata).

2. Ti yajauch najanawakrincha Jehová uuntri anairamu ainiajaisha itiura yainmaj?

Ti yajauch najaneana nuna Jehová junis tawai: “Uuntri ainiana nuna untsukti” (Santiago 5:14, 15 TNM aujsata). Nu aishman uuntri anairamuka Kristu aents ainian tura Jehovancha anenawai. Awajiakrincha Jehovan ataksha umirkarat tusar jintinkratin ainiawai (Karaseanam [Gálatas] 6:1).

Ti yajauch najanawakrin uuntri anairamu ainiana nusha itiura yainmakarminiaitiaj? Uuntri anairamu jimiar turutskesha menain, ii ti yajauch najanamu urukamtai penkerchait nuna Yuusa chichamejai jintintramawartatji. Ataksha tunaamkain tusar jintintramawartatji nuyasha ikiakatmarartatji. Yaksha ti yajauch najanman iniaisatniun nakitiakuinkia uuntri anaikiamu ainiana nuka jiiktin ainiawai. Chikich Kristu aents nijiai nawamnainiak tunaamkarain tusar nunaka turawartatui.

PENKER NEKAATAI

Ti yajauch najanawakrin Jehová yainkratkattsa najaneana nu nekaata.

3. Ataksha Yuus umirkattsarkia ii tunaa najanamu etserkatniuitji

Ti yajauch najanawakrinkia Jehová kuntuts enentaimniuiti tuma asamtai ii tunaa najanamu ujaktiniaitji. Yus Kanta [Salmo] 32:1-5 aujsarum juna aujmattsatarum:

Tunaamkarsha uutsuk Jehová urukamtai ujaktiniaitiaj?

Ii tunaari Jehová ujakrisha uuntri anairamusha ujakartiniaitji. Turarkia shiir enentaimprattaji. VIDEO iisrum juna aujmattsatarum:

VIDEO: ‘Jehová ni aneana nunaka’ jintinniuiti (3:01)

Canon ataksha Jehovan umirkat tusar uuntri anairamusha warinia itiurkarmia?

Uuntri anairamu ainiana nuka iin yainkratkattsar pujuinia asarmatai uutsuk mash ujaktiniaitji. Sántiak 5:16 aujsarum juna aujmattsatarum:

Mash etsereashkurninkia uuntri anairamu yainmakarminiashitiaj? Urukamtai tu enentaimiam?

Tunaa najanamu Yuus etserkata, uuntri anairamujai aujmatkum uutsuk mash ujakta, nuya Jehová anenma asa chichartameana nusha anturkata.

4. Tunaa najana ene enentaimia ajasunka Jehová waitnenniuiti

Yaksha ti yajauchin najana Yuusan umirkatniun nakitiakuinkia jiikmia atiniaiti. Tura nijiai iruntrar warinkisha turashtiniaitji. 1 Kurintiunam 5:6, 11 aujsarum juna aujmattsatarum:

Karin yuminnium enkeam mashiniu karimtikiana nunisan tunaamka ene enentaimia ajachujai tsaniakrikia iisha yajauch ajasminiashitiaj? Urukamtai tu enentaimiam?

Jehová anenkratniuana ainis turuiniak jiikmia ainiana nuna uuntri ainiana nuka Jehovai waketkit tusar aujin ainiawai. Yuusan umirkatin nakitiakui jiikmia puja ataksha waketkiaru nukap iruneawai. Urukamtai waketkiaruit? Jiikmia ainiaksha ene enentaimia ajasar waketin ainiawai (Yus Kanta [Salmo] 141:5).

Jehovaka waitnenkratniuiti tura anenmawitji urukamtai tusha taji?

5. Ene enentaimia ajasakrinkia Jehová tsankukratniuiti

Yaksha ene enentaimia ajasmatainkia Jehová itiur enentaimniuit nuna jintinkratattsa apatak aujmattsamiayi. Rúkas [Lucas] 15:1-7 aujsarum juna aujmattsatarum: