1. Kristu aents yaunchuksha itiur iruntrar pujuarmia?

 Jehová niniu ainiana nuna takatan susanka penker chichamprukar najanawarat tusa wakeriniaiti (1 Kur. 14:33). Jehová ni chichamenka ashi nunkanam etsernakat tusa wakerawai (Mat. 24:14). Jesusan nu takatan emtukit tusa anaikiaiti. Jesussha nu takatan najanatasa penker chichamprukuiti. Apóstol armia nu tura uuntri armiania nujai Jerusalennum pujusar chikich Kristu aents armiania nu warinia turawartiniuya nuna chichampru wearmiayi (Tur. 15:2; 16:4). Kristu aents iruntraru armiania nui uuntri anaikiamu iruniarmiayi, ninkia Kristu aents armiania nuna wainin armiayi tura Jerusalennum apóstol nuya uuntri anairamu matsamiarmiania nu ni tuiniamun uja wearmiayi (Tur. 14:23). Kristu aentska umin asar “Yus shuar nú arant Yusan enentáimturar kaka̱rarmiayi. Tura ashí tsawant kaweṉki̱ wéarmiayi” (Tur. 16:5).

2. 1919 uwitin wari turunamia?

² Jehovaka nin enentaimtin ainiana nu penker iruntraru arat tusa yainkiaruiti. Jesussha Yuusa chichame etserkatniun chichamprukarat tusa nuya chikich Kristu aentsun unuiniararat tusa nayaimpiniam weartin ainiana nunian warumchiniak anaikiaruiti nunaka 1919 uwitin anaikiaiti (Ruk. 12:42). a Jehovasha nu aishmankan tuke yayainiawai (Is. 60:22 TNM; 65:​13, 14).

3, 4. a) Penker iruntrar pujachkurkia urukamniaitiaj? b) Juisha wari unuimiatrattaj?

 ³ Penker iruntrachuitkiurkia Jesús takatan sukartusmiania nu umiktin tujinkiamniaitji (Mat. 28:​19, 20). Ii pujajnia nui penker iruntrar pujachkurkia nankamsar tuinsha etserkamniaitji. Tumakrikia nuin awainki awainkir etserminiaitji tura chikichniumka etsertsuk pujumniaitji. Yuusna najanattsar penker chichamprukar najanatniuka penkeraiti urukamtai timiniaitiam nui enentaimsamniaitme.

⁴ Kristu aentska penker iruntraru arat tusa Jesús chichampriniaiti, yaunchuk turamiania aintsan chichamprukuiti. Ju unuimiatmanum Jesús itiurkamia aintsan testigos de Jehovati itiur iruntrar pujaj nunanu nekaattaji. Nuyasha Jehová iruntramurin turamainiajnia nuka nekas aintsaiti tu enentaimsatai tusar wari itiurkatniuitiaj nusha unuimiatrattaji.

JEHOVÁ IRUNTRAMURINKIA JESÚS TURAMIANIA AITKIASAN NAJANUI

5. Jehová iruntramurincha Jesusa aintsan itiurin ainia? (Juaṉ 8:28).

⁵ Jesuska ni apariniun unuimiatramun nunak najanmiayi tura nunak timiayi. Aintsan Jehová iruntramuri tana nuka Yuus papiinmayan jintintrameaji (Juaṉ 8:28 aujsata; 2 Ti. 3:​16, 17). Nuyasha Yuusa chichame unuimiatratarum tura nekaki wearmena aitkiasrumek turatarum turam wearmaji. Iisha aitkiasrik turakrikia urukattaj?

6. Yuusa chichame unuimiartincha urukamtai penkerait?

⁶ Papii Yuusna aujmatainiamu achiakeajnia nujai Yuusa chichame unuimiatratniuka ti penkeraiti. Ainis Yuus papii unuimiatkur Jehová iruntramurin turamainiajnia nuka nekas aintsaiti timiniaitji (Rum. 12:2).

7. a) Jesús wari chichamna imiankaska etserniuya? b) Yamaisha wari chichama etserniuitiaj?

⁷ “Untsurí péprunam Jesus wekaráktak Yus akupeana nuna shiir chichaman etserkiní̱ wekaimiayi” (Ruk. 8:1). Ni unuiniamuri armiania nunasha Yuusa chichamen etserkarat tusa akupkarmiayi (Ruk. 9:​1, 2; 10:​8, 9). Yamaisha Kristu aents ainiaka tui tuinsha Yuusa chichame etserainiawai tura warinkish turatniun achiakainiaksha mashiniu Yuusa chichamenka etserin ainiawai.

8. Wari takat ti penkera tsankatkamuitiaj?

⁸ Yuus nayaimpiniam anaikiamun takakeana nuna etserkatniuka ti penkeraiti. Nankamas aents nu takatan najanachminiaiti. Tuma asamtai iwianchi suntari Jesusan ameka Yuusa uchirinme tuiniam takamattsatarum timiayi (Ruk. 4:41). Yaksha testigos de Jehovajai Yuusa chichamen etserkattsa wakerakka Yuusa chichame tana nuna emka umiktiniaiti. Yuusa chichame etserkatin tsankatkamu asar itiurkatniuitiaj? Tui tuinsha Yuusa chichamenka tuke etserkatniuitji. Jesús turamiania aintsan chikich aents Yuusa chichame ujakur Yuusna nekaki weti tusar yainkiarminiaitji (Mat. 13:​3, 23; 1 Kur. 3:6).

9. Yuusa naari nekamtikiatai tusa Jehová iruntramurisha itiurkait?

⁹ Jesuska chikich aentsun Yuusa naarin nekamtikiamiayi. Jesuska Yuusan seak junis timiayi: “Nú shuaran Ame Náarmin nekaawarti tusan jintintiáitjiai” tu timiayi (Juaṉ 17:26). Jehová iruntramurincha aintsan chikich aentscha Jehová naarin nekaawarat tusar jintintin ainiawai. Tuma asamtai testigos de  Jehovatikia Yuus papiin Traducción del Nuevo Mundo tajinia nu achiakeaji, nu Yuus papii najanamuka 270 timianu chichamjai najanamuiti. Chikich aents Yuus papiinium Yuusa naarin japiraruitkiuisha Traducción del Nuevo Mundo achiakeajnia nuinkia ataksha Yuusa naari apujsaitji. Nu Yuus papiinium najanamuka apéndices A4 nuya A5 awai tura nuinkia urukamtai Traducción del Nuevo Mundo nui ataksha Yuusa naari apujsaitiajnia nuna aujmateawai. Nuyasha Biblia de Estudio nui apéndice C ana nui, Escrituras Griegas nuisha Yuusa naari 237 timianu apujsaitiajnia nuna aujmateawai.

10. Myanmar nunkanmaya nuwa urukamia nu nekaar wari unuimiatramniaitiaj?

¹⁰ Jesús itiurkamia aitkiasrik chikich aents Yuusa naari ujakartasar wakeraji. Myanmar nunkanam ii umai nukuachin 67 uwin achiakun Yuuska Jehová naartiniaiti tu jintintiamiayi. Nu nukuachikia Yuusa naarin nekaa uteak chichaak Yuusa naarinkia penke antukchaitjiai, Yuusa naari jintintrua asakmin ti yuminkiajme timiayi. Ainis nankaamasmanum enentaimkiur wari unuimiatramniaitiaj? Aents penker enentain achiakainiaka Yuusa naarin antuiniak yapajniawarminiaiti.

JEHOVÁ IRUNTRAMURI TANA NUKA NEKASAITI TU ENENTAIMSARTAI

11. Uuntri anairamusha Jehová iruntramurin turameajnia nuka nekasaiti tusar itiurin ainia? (Nakumkamusha iista).

¹¹ Uuntri anairamusha Jehová iruntramuri turameajnia nuka nekasaiti tusar itiurin ainia? Jehová iruntramurin warinkish itiura najantain nuna aarman aujsar imiatrusan najanin ainiawai. Iruntramunam pachiniainiak tura Yuusan seainiaksha itiur turawartiniait nuna unuiniarma ainiawai, nuyasha ni yachi ni umaincha itiura wainkiartiniait nunanush jintintiamu ainiawai. Uuntri anairamu Jehová iruntramuri tana aintsan najanainiakuinkia ni yachi ni umaisha Jehová penker waitmaji tusar shiir enentaimin ainiawai.

12. a) Uuntri anairamu ni tuiniamu urukamtai umirkartiniaitiaj? (Israernum 13:​7, 17). b) Uuntri anairamu ainiana nuna ni yajauchirin iirtsuk urukamtain ni penkerin enentaimtusartiniaitiaj?

¹² Uuntri warinsha turamainiakrin anturkar umirkartiniaitji. Ainis turakrin nisha ni takatrin penker umikiartatui. Yuus papiiniumka antukrum umirkartiniaitrume tu tawai (Israernum 13:​7, 17 aujsata). Tumaitkiusha uuntri anairamu tunaarintin asarmatai ni umirkartin yupichuchichu aminiaiti. Tura ni penkeri iirtsuk aya ni awajeamurin enentaimiakrikia iin kajertamainiajnia nu warasartatui. Watskea uuntri anairamu turamainiajnia nuka nekas aintsashit tu enentaimminiaitji. Tumaitkiusha tu enentaimiakrikia nekaska Jehová iruntramurisha turamainiajnia nu nekas aintsashit tu enentaimiajnia aintsaiti. Iin kajertamainiajnia nu waitruiniamusha itiur nekaamamniaitiaj nuyasha iisha ni waitruiniamu kishmaktai tusar wari itiurkatniuitiaj nu nekaatai.

YAKSHA NANKAMAS TUINIAKUI MAJAT ENENTAIMPRACHARTAI

13. Jehová iruntramuri yajauchiti tusar iin kajertamainiajnia nusha warintia turam wearma?

¹³ Iin kajertamainiajnia nu aentska Jehová iruntramurinkia yajauchiti tu enentaimsarat tusar warinkish najanin ainiawai. Watskea Yuus papiinmanka ashi warinmansha aya penkera nuke najanatniuitji tu aarmaiti. Tuma asamtai Jehová iruntramurin yaksha tunaa najanea  ene enentaimia ajachkuinkia jiiki akupkatniuitji, ainis turatniun Yuus papiinmasha aarmaiti (1 Kur. 5:​11-13; 6:​9, 10). Tura Yuus papiinium tana aintsan najanu asakrin iin kajertamainiajnia nuka atumka chikich aents najanma iisrum kajerarme nuyasha iik nekaska penkeraitji tu enentaimiarme tu turamin ainiaji.

14. Iiniun waitruawar tsanumprarat tusa ya utsukratea?

¹⁴ Ya ainis kajerkarat tusa utsua nui enentaimsartai. Iwianchkia “waitia uuntri̱ asa tuke wáitriniaiti” (Juaṉ 8:44; Naṉ. 3:​1-5). Tuma asa chikich aents testigos de Jehovanu waitruawar tsanumprarat tusa ni utsuawai. Yaunchuksha Kristu aents pujuarmiania nuisha ainis najanamiayi.

15. Jesusan tura Jesusa unuiniamurincha itiurkarmia?

¹⁵ Jesusan tsanumprarat tusa iwianchkia nukap aentsun utsuarmiayi. Judío aentsu jintinniuri armiania nu Jesusan junis tiarmiayi “iwianchi uuntri̱ kakarmari̱ji̱a̱i̱ iwianchin ji̱i̱ki̱ akupeawai” tu tiarmiayi (Mar. 3:22). Tura urum Yuusnan pujurin uuntri armiania nusha nuya Israel shuara uuntri armiania nusha Jesuska Yuusan yajauch aujmattsaiti, mantamnati tu titiarum tusar aentsun utsukarmiayi (Mat. 27:20). Jesusa unuiniamuri armiania nu Yuusa chichamen etserkatniun juarkiarmatai ni nemasrinkia “Yus shuaran kajerkarat tusar Israer shuarchan yajauch enentáimtikrarmiayi” (Tur. 14:​2, 19). La Atalaya del 1 de diciembre 1998 uwiniu Túramuri̱ 14:2 nuna aujmatuk junis timiayi: Kristu aents Yuusa chichamen etserainiamun judío aents armiania nu antuktinian nakitrarmiayi, tura chikich nunkanmaya aentscha Kristu aentsun kajerkarat tusar chichaman najanawarmiayi.

16. Antar tuiniamu antakrikia warinma enentaimsatniuitiaj?

¹⁶ Yaunchunia juarkin iwianchkia waitriniaiti nuya “Ashí nuṉkanmaya̱ shuaran anaṉniuiti” (Apu. 12:9). Tuma asamtai iin  kajertamainiajnia nu Jehová iruntramuriniun nuya uuntri anairamu ainiana nuna yajauch aujmatainiakuinkia yaunchuksha Jesusan nuya ni unuiniamurincha kajeriarmiania nu itiurkarmia nui enentaimsartai. Yamaisha testigos de Jehovan kajerkar waitkiainiasha nuya tsanumainiasha irunui, ainis atatui tusa Yuus papiinium aarmaiti (Mat. 5:​11, 12). Iin kajertamainiajnia nu ni tuiniamun antukar iwianch utsuamu asar ainis tuiniawai tu enentaimiakrikia nuya ni tuiniamu warik kishmakrikia anankramachartatji. Ni tuiniamu kishmaktai tusar wari itiurkatniuitiaj?

17. Antar tuiniamu antukrisha wari itiurkatniuitiaj? (2 Timiutéun 1:13;  Antar tuiniamun akupturmakarmatai itiurkatniuitiam? tana nuisha iista).

¹⁷ Antar tuiniamu antukchartai. Nu chicham antukar wari itiurkatniuitiaj nuna apóstol Pablo paant timiayi. 1 Timiutéun 1:​3, 4 nui antar tuiniamu antukairap tu timiayi. Pablo Timoteon antar chichamsha tura netse chichamsha enentaimtusaip tu timiayi (1 Ti. 4:7). Watskea uchikia warinkisha tepa wainiak wenunam apamniati tumaitkiusha uuntka nunka iniarun apanka sunkurmakminiana nuna neka asa nunaka turachminiaiti. Aintsan iisha antar tuiniamuka antuktin nakitniuitji antsu penker chicham Yuus papiinmania nuke antiniaitji (2 Timiutéun 1:13 aujsata).

18. Jehová iruntramuri shiir enentaimtakrikia wari itiurkatniuitiaj?

¹⁸ Jesús itiurkamia aintsan Jehová iruntramurincha najantainti nu nekaaji. Nuyasha Yuus papii unuimiakum warimpia chikitcha najaneaj nu nekaattame. Jehová iruntramuri jintintramjinia nu nekas aintsaiti tu enentaimsarat tusam ame yatsum umaimsha yainta. Jehová tuke umirkim weta nuya ni iruntramurinia kanakij tusam tuke kakarta (YKan. 37:28). Mai anenai ajainiajai Jehová umirkatniuka ti penkeraiti. Tuma asamtai Jehová iruntramurinia penke kanakchartai.