1. Yamaiya jui shiiram nunka ainis amanum pujaji tajinia nusha wari takur ainis taji?

 Yamaiya jui shiiram nunka ainis amanum shiir amajnaisar takakmainiawai. Nuinkia untsuri aents shiir amajnaisar pujuiniawai. Tura nui pujuinia asar nuyainia kanaktinian penke enentaimiainiatsui. Tura nui pujuiniaka chikitcha nui pachitkia arat tusar wakeruiniawai. Warimpia takur ainis taji? Jehovajai tura ii yachijiaisha shiir amajnaisar pujajnia nuna taji. a

2. Ju nunkanam itiur pujuiniamunma iisha shiir amajnaisar pujaj?

² Aentska mai kajernai tura itiurchat amajnai pujuiniamunam Jehová iinkia shiir amajnaisar pujustinian yainmakuitji (1 Juaṉ 5:19; Apu. 12:12). Aentska mai kajernai ajainia asar itiurchat amajkartusarminiana nuna neka asa Jehovaka shiir amajnaisar penker pujuarat tusa yainmaji. Shiir amajnaisar pujajnia nuna Yuus papiikia ejamtai mikintra ainis tura kukuj ti penker kukujruk irunna ainis apatak aujmateawai (Is. 4:6; 58:11 TNM). Yamaiya jui amuukatin tsawan pujajnia jui ti itiurchat akuisha shiir amajnaisar pujuinia nuka Jehová yayam sapijmiatsuk penker pujuiniawai (Isa. 54:14; 2 Ti. 3:1).

3. Isaías akankamu 65 nui tana nusha itiura uminkiamia?

³ Isaías akankamu 65 nui shiir amajnaisar pujamusha uruku atiniuya nuna Jehová timiayi. 537 uwi Jesús taatsain Jehová timiania nuka turunamiayi. Nu uwitin judío aents ene enentaimia ajasaru armiania nuka Babilonianmania jiinkiar ni nunken waketrarmiayi. Jehová yayam Jerusalennum mash meser irunun ataksha iwiarar ti penker amajsarmiayi.  Nuyasha Israel aentska ataksha Jehovan enentaimtusarat tusar Jehová enentaimtutai jean iwiararmiayi (Is. 51:11 TNM; Sak. 8:3).

4. Isaías akankamu 65 nui tana nusha yamaiya juisha itiura uminnia?

⁴ Isaías akankamu 65 nui tana nusha ataksha uminkiamiayi. 1919 uwitin Jehovan enentaimtiarmiania nu antar religionnumia jiinkiarmiania nui uminkiamiayi. Nuyainia juarki Yuusa chichame etsernakui Kristu aentstikia tui tuinsha iruntrar shiir amajnaisar pujaji. Aishman tura aintsan nuwasha yaunchuka kajen ainiayat turutskesha tsanirmatniun wakerin ainiayat nunaka iniaisar ni iwiakmarin yapajiawar Yuus wakerana aitkiasan turatniun juarkiaruiti (Ipi. 4:24). Isaías timiania nuka chikichkimias shiiram nunkanam mash uminkiattawai. Yamaisha ti penker nankaamaji. Shiir amajnaisar pujustincha urukamtai penkerait tura nuyainia urukamtai kanakchatniuitiaj nu nekaawartai.

SHIIR AMAJNAISAR PUJA ASAR ITIUR NEKAPEAJ

5. Isayas 65:13 nui tana aintsan shiir amajnaisar pujamunam pachitkiatikia itiur pujaj?

⁵ Yuusna ti penker nekaar shiir enentaimiaji. Shiir amajnaisar pujakrikia itiur pujuttaj tura shiir amajnaitsuk pujakrisha itiur pujuttaj nuna Isaías timiayi (Isayas 65:13 aujsata). Jehovaka nin enentaimtuiniana nuka waras pujuarat tusa ni kakarmarijiai, ni chichamejai tura niniun nekaawarat tusa warinkisha suawai (Apukarípsis 22:17 nui tana nujai apatkam iista). Shiir amajnaitsuk pujuiniamunam pachitkiainiaka tsukai, kitiaki, natsantisha waitiainia ainis pujuiniawai. Yuusnan nekaatniun wakeruiniaksha penker jintintiachma ainiawai (Amós 8:11 TNM).

6. a) Juir 2:​21-24 wari yurumkana aujmatea? b) Yurumkan aujmatna nusha warinia taku ainis ta? c) Joel timiania nusha yamaiya jui itiur uminnia?

⁶ Nin enentaimtuiniana nunaka Jehová yurumkan, vinon tura aceitencha susartatui Yuusna etserin Joel tu timiayi (Juir 2:​21-24). Yuusna etserin Joel timiania nuka Jehová nin enentaimtuiniana nunaka ashi ni utsumainiana nuna mash susartatui tura enentaimtursarat tusa yainkiartatui taku ainis timiayi. Yamaisha itiur yainmaj? Yuusa chichamejai tura papii Yuusna nekaatin ainiana nujai, internetnumani Yuusna nekaatin takakeajnia nujaisha nuya iruntramu najanmajai tura uunt tuakma najanmajaisha niniu nekaatniun yainmaji. Ainis yainmakrin Yuusna penker nekaaki wea asar shiir enentaimsamniaitji.

7. Ii enentaijiaisha urukamtai ti waraj? (Isayas 65:14).

⁷ Wara warat tura shiir nekapeaji. Kristu aents ainiaka Jehovan yuminsajme tu tuinia asar ti warainiawai (Isayas 65:14 aujsata). Ni enentaijiaisha urukamtaiya warainia? Yuusa chichamen ti penker jintinkratma tura uruma nui turunattana nunasha nekaawar warainiawai. Jesús turamiania nujai uruma nui penker pujuttaji tusha enentaimin ainiawai. Ni yachi ni umaijiaisha nuna mash aujmatainiak ti warainiawai (YKan. 34:8; 133:​1-3).

8. Testigos de Jehovatisha itiur amajnaisar pujuwitiaj?

⁸ Testigos de Jehovatikia mai anenai ajawitji nuya iruntrar pujuwitji. Anenaiya asar uruma nuisha uruku artataj nusha nekaamniaitji. Nuinkia yamaiya juijiaisha iniankas mai anenai ajattaji tura iruntrarsha matsamsattaji (Kurs. 3:14). Ii umai testigos de Jehovan nekaamiania nui itiur enentaimsamia nuna aujmateak  junis tawai: Wi shuarjaisha warasan pujustinniaka nekachuyajai. Tumaitkiusha testigos de Jehová mai anenai ajainian nekaamiajai tu tawai. Yaksha waras pujustaj takunka testigos de Jehová shiir amajnaisar pujuiniana nui pachitkia atiniaiti. Chikich aents yajauch aujmatkartuiniakuisha Jehovan enentaimtuiniana nujai iismaka tura Jehovajai iismasha iikia penkeraitji (Isa. 65:15).

9. Ukunmataisha warinmansha enentaimsar kuntuts pujutjiash? (Isayas 65:​16, 17).

⁹ Warinmansha ti enentaimsar pujachua asar shiir enentaimiaji. Isayas 65:14 nui shiir amajnaisar pujajnia nui pachitkiainiachuka enentain najaimiainiak kakaram uutiartatui tawai. Jehová umirniusha urukawartin? Jehová junis turameaji: “Warí yaunchu wáitsamuka kajinmátkimiu ártatui núnisnak Winia jí̱ruja̱i̱sha atakka íischattajai” tu tawai (Isayas 65:​16, 17 aujsata). Uruma nuinkia Jehová waitiamunka amuktatui nuya warinma enentaimsar waitiaj nunasha kajinmatkiarat tusa Jehová yainmaktatji.

10. Ii yachi ii umaijiai iruntrar pujustinkia ti penkeraiti urukamtai ainis timiniaitiam? (Nakumkamusha iista).

¹⁰ Yamaiya juisha iruntainiam pujakur shiir enentaimniuitji. Nui pujakur ii itiurchatrin enentaimiu pujuchuitji. Shiir amajnaisar pujustai tusar wari itiurkatniuitiaj? Yuus yainmakrin anenkratin nuya warau atiniaitji, chikich aentsjaisha shiir amajnaisar pujutniuitji, yainkratin atiniaitji nuya shiir ajau atiniaitji (Kar. 5:​22, 23). Testigos de Jehová shiir amajnaisar matsatainiamunam pachitkia atinkia ti penkeraiti. Shiir amajnaisar matsateajnia nuyainia kanachkurkia ju nunka shiiram ajasmanum Jehová ni chichakuana nuna ukunmatai timiatrusan umiktatna nui iisha pujuttaji.

11. Shiir amajnaisar pujamu ana nui pachitkia asar itiur nekapeaj? (Isayas 65:​18, 19).

¹¹ Yuus yuminsatin wakera asar warinkish najanattsar wakerusar pujaji. Jehovan enentaimtatikia urukamtaiya warasar pujumniaitiaj nuna Isaías timiayi. Jehová shiir nawamnaikiar matsamsarat tusa aitkiaiti (Isayas 65:​18, 19 aujsata). Chikich aents ju nunkanam iruntramu irunna nui pachitkiainiana nuyainia jiinkitniun yainkiarat tusa Jehová takatan amasuitji. Aentska nuyainia jiinkiarka shiir amajnaisar pujajnia nui pachitkia artatui. Jehová iruntramurin pachitkia asar ti waraji. Tuma asar nuna chikich aents ujaktasar wakeraji (Jrm. 31:12).

12. Isayas 65:​20-24 nui tana nu aujkum itiur nekapeam?

 ¹² Uruma nui penker pujuttajnia nui enentaimiakur shiir enentaimniuitji. Shiiram nunkanam waintiatmena nui enentaimsata nuyasha warinkish najantiatmena nuisha enentaimsata. Yuusa chichame tawai: “Warí nuiṉkia uchi aya ishichik tsawant iwiaaku pujaaka atsuttawai. Núnisaṉ úuntach ainia nusha tsawantri̱ jeatsa̱i̱ṉkia jákachartatui” tu tawai. Nuyasha tawai: “Tura je̱a̱n je̱a̱mkar nui̱ṉ pujusártatui núnisaṉ úwan arakaar nuya̱nak neren yurumiartatui” tu tawai. “Tura takatan takainiaksha ántar takaschartatui” tu tawai. Nuyasha sapijmiatsuk penker pujuttarme Yuus tu tawai. “Tura untsurainiatsa̱i̱ṉ Wikia ái̱kiartatjai” ainis tawai. Nuyasha ni utsumainian Yuuska neka asa ashi warinkisha susartatui (Isa. 65:​20-24; YKan. 145:16).

13. Jehová enentaimtustai tusar yapajniatniuitiajnia nuna Isayas 65:25 nuisha warijiai apatak aujmatea?

¹³ Shiir amajnaisar penker pujaji. Yaunchuka ti kajen ainiayat Yuusa kakarmari yayam nukap aents yapajniawaruiti (Isayas 65:25 aujsata). Kajetairin iniaisatai tusar ti kakararuiti (Rum. 12:2; Ipi. 4:​22-24). Jehová enentaimtatisha maakchartin asar urutainsha awajirtatji. Maakchartiniaitkiurnincha chikich aents ainiaksha shiir amajnaisar penker pujuarat tusa Jehová yainkratkaiti (Tit. 2:11). Aya Yuusak kakaram asa ainis turamniaiti.

14. Isayas 65:25 nui tana aintsan ii yachisha itiura yapajniamia?

¹⁴ Nekasash ii urukuitiaj nu yapajiamniaitiaj? Ee yapajiamniaitji. Watskea aents 20 uwi takaku ti kajen tura tsanirmau carron tura warinkisha kasamka asamtai sepunam nukape enkeawaruyayi. Nuyasha yajainsha maniktinian wakeriniuyayi. Yuusa chichamen ujakam iruntramunam wetinian nankaamamiania nui juinkia ti shiir nawamnaikiar pujutainti tu enentaimsamiayi. Imiani pujus Isayas 65:25 nui tana nusha ni iwiakmarin itiur uminkiamia nui enentaimniuyayi. Uunt yawa ainis kajenaitiat murikiu ainis warik kajechu ajasmiayi.

15. a) Shiir amajnaisar pujajnia nui chikich aentscha pachitkia arat tusar urukamtai yaintasar wakeraj? b) Shiir amajnaisar pujajnia nui chikitcha pachitkia arat tusar wari turaj?

¹⁵ Isaías 65:13 TNM juareak junis tawai: “ashi nankaamaku uunt Yuus Jehová junis tawai” tu tawai. Tura akantramuri 25 nui amuak Jehová tawai ainis tawai. Ni tana nunaka tuke uminiaiti (Isa. 55:​10, 11). Yamaiya jui nekas shiir nawamnaikiar pujaji. Jehová ainis turatniun timiania nuna umikiuiti. Ju nunkanmanka mai kajernai ajainiamunam ii yachi ii umaijiai penker shiir amajnaisar pujustinian Jehová yainmaji (YKan. 72:7). Ainis asamtai ii yachi ii umaijiai shiir amajnaisar pujajnia nui chikich aentscha pachitkia arat tusar yaintin wakeraji. Nu turattsar wari itiurkatniuitiaj? Kristu aents ajasarat tusar Yuusa chichame unuiniarartiniaitji (Mat. 28:​19, 20).

SHIIR AMAJNAISAR PUJAJNIA NUI CHIKICH AENTSCHA PACHITKIA ARAT TUSAR ITIURKAMNIAITIAJ

16. Shiir amajnaisar pujajnia nui chikich aentscha urukamtaiya pachitkia atinian wakeruinia?

¹⁶ Shiir nawamnaikiar pujajnia nui chikitcha pachitkia arat tusar chikichkimsar iisha warinkisha turatniuitji. Nusha itiura ainis turattaj? Jehová ainis najankur. Ninkia nui pachitkia arat tusa naki  nakitiainiak yanaksha utsuchuiti antsu shiir enentaijiai ninin weamkarat tusa yainiaiti (Jer. 31:3; Juaṉ 6:44). Penker enentain achiakuka Jehovanu nekaawar shiir enentaimiainiak ninin weamin ainiawai. Shiir amajnaisar pujajnia nui chikich aentscha pachitkia atinian wakerukarat tusar iisha wari turatniuitiaj?

17. Chikich aentscha shiir amajnaisar pujajnia nui pachitkia atinian wakerukarat tusar wari itiurkamniaitiaj?

¹⁷ Shiir amajnaisar pujajnia nui chikitcha pachitkia arat takurkia ii yachi ii umai aneastiniaitji tura shiir amajsartiniaitji. Yaunchunia aents Corintonmaya tiarmiania aintsan aents iruntainiam tainiasha “nekas Yus atumji̱a̱i̱ pujawai” ainis tiarat tusar wakeraji (1 Kur. 14:​24, 25; Sak. 8:23). “Tura yajauch awajnaitsuk ti shiir nawamnaikiarum matsamsatarum” Yuusa chichame tana nu umiktiniaitji (1 Tis. 5:13).

18. Aentscha urukamtaiya shiir amajnaisar pujajnia nui pachitkia atinniash wakeriarminiait?

¹⁸ Tura aintsan ii yachin ii umaincha Jehová itiur enentaimtuinia aitkiasrik iisha enentaimtusartai tusar kakartiniaitji. Ukunmatainkia awajichu artatna nui enentaimsar aya penker najanmarin iirniuitji. Ii yachi ii umaijiai urutainsha kajernaikiarsha anenaiya asar ju turatniuitji: “Antsu shiir awajkartin ajasrum waitnennairarum Kristu jakamuja̱i̱ Yus atumí tunaari̱n tsaṉkurtampra nútiksarmek tsaṉkurnáiratarum” (Ipi. 4:32). Ainis shiir amajtusarat tusar wakeruiniaka shiir amajnaisar pujajnia nui pachitkia atinian wakeriartatui. b

 SHIIR AMAJNAISAR PUJAJNIA NUNIA PENKESHA KANAKCHARTAI

19. a) Shiir amajnaisar pujajnia nui ataksha pachitkia ajasaruana nusha warintiainia? ( Weariat waketkiarmiayi tana nui iista). b) Urukamtai kakartiniaitiaj? (Nakumkamusha iista).

¹⁹ Shiir amajnaisar pujajnia nui pachitkia atinkia ti penkeraiti. Nui pachitkiainiaka ti nukap ainiawai. Shiir amajnaisar pujusarat tusa Jehová yainkratka asamtai yuminsartai. Penker pujuartasa wakeruiniana nuka shiir amajnaisar pujuiniana nui pachitkia artiniaiti tura nuyainia penkesha kanakchartiniaiti. Tumaitkiusha aneartiniaitji, shiir amajnaisar pujamunam pachitkiajnia nunia aran ajasarat tusa iwianchkia anankartuatasa wakerawai (1 Pit. 5:8; Apu. 12:9). Iwianch ainis turattsa wakerana nuna najanat tusar iniaisachartai. Shiir amajnaisar pujajnia nu emeskaij tusar tura ti penker ati tusar kakarartai.