1. Yuusa chichamen etserkattsa jiiniainiak chikichkia itiur enentaimiainia? (Nakumkamusha iista).

 Jehová enentaimtatikia Jehová anea asar nuya chikich aentscha Jehovanu nekaawarat tusar Yuusa chichame etserniuitji. Yuusa chichamen etserainiak wara warat ajainiash irunui tumaitkiusha wara warat ajainiachusha irunainiawai. Urukamtai ainis arminiait? Chicharpatcha arminiaiti turutskesha wikia jeatsjai tu enentaimiarminiaiti. Tura ipiashmaitiat chikich aentsun iiyutniunka itiurchat enentaimiainiasha irunui. Nuyasha anturtukchartatui tu enentaimniusha irunui. Tura aintsan chikich aentsjai itiurchatan wainkiatniun nakitniush irunniuiti. Jehovan anenaksha nekashtain Yuusa chichamen ujaktinian itiurchat iin ainiawai. Yuusa chichame etserkatin urukamtai imia penkerait nuna neka asar Yuusa chichamen etserkattsar kakainiawai. Jehová nin enentaimtuiniana nu Yuusa chichamen etserkatai tusar kakainian iiyak warawai.

2. Amijiaisha Yuusa chichame etserkatin yupichuchichuitkiusha urukamtai majat enentaimprashtiniaitiam?

² Amijiaisha Yuusa chichame etserkatin yupichuchikiait? Yupichuchichu iiyakmeka kakarta. Nankaamantu enentaimcha asam aini enentaimminiaitme. Yajainsha kajernaikiatin nakitia asam ainis enentaimminiaitme. Yaksha antar warinkisha turutit tusar nakitin asar ainis enentaimminiaitji tumaitkiusha iikia aya yaintasar wakera asar ainis turamainiakrin itiurchat enentaimminiaitji. Ii itiur nekapeaj nuna Jehovaka nekawai tuma asa yainkratkattsa  wakerawai (Isa. 41:13). Ainis nekapeakrisha wari itiurkamniaitiaj nuyasha Yuusa chichame wara warat etserkatai tusar wari najanamniaitiaj nuka ju akankamunam nekaattaji.

YUUSA CHICHAME UNUIMIATKUM KAKARTATME

3. Jeremías warinma enentaimias kakaram nekapramia?

³ Warinkish itiurchat najanachmin wainkiarsha Jehovan enentaimtuiniaka Yuusa chichamejai kakararuiti. Watskea Jeremías nankaamasmiania nui enentaimsartai, Jehová etserkata tutai ninkia jeatsjai tusa junis timiayi: “Maa winia Uunt Yusá wisha uchi asan péṉker chichastinian jeatsjai” tu timiayi (Jrm. 1:6). Itiurchat enentaimsashtinian wari yainmia? Yuus papii yainmiayi. Jeremiaska Yuusa chichameniu aujmatuk junis timiayi: “Tura winia enentái̱rui̱ ji kapá̱a̱ ukunchrui̱ wayá̱ núnis nekapeajai. Katsuntrataj tukamán tujintiajai” tu timiayi (Jrm. 20:​8, 9). Aents antuktinian nakitiainiamunam Jeremías etserniuyayi. Yuusa chichamen etserkatniuyania nui enentaimias kakaram nekapramiayi.

4. Yuusa chichame aujeakur nuya aujeajnia nuisha enentaimiakur wari nekaattaj? (Colosenses 1:​9, 10 TNM).

⁴ Yuus papiinium aujmatna nu neka asar Kristu aentstikia kakainiaitji. Pablo Colosasnumia Kristu aentsun papiin aateak Yuusa chichame penker nekaarum Jehová wakerana aintsan wekasattarme nuya ashi warinmansha penkera nuke najanattarme tu timiayi (Colosenses 1:​9, 10 TNM aujsata). Yuusa chichame etserkur penkera nu najaneaji. Yuus papii aujkur nuya aujsajnia nuisha enentaimiakur Jehová tuke yainkratniuana nu nekaattaji nuyasha Yuusa chichamesha urukamtai etserkatniuitiaj nusha paant nekaattaji.

5. Yuusa chichame penker nekaatai tusar wari itiurkatniuitiaj?

⁵ Yuusa chichame penker nekaatai takurkia waurtusar aujtsuk unuimiajnia nuisha enentaimsatniuitji. Yuus papii auju pujusam nekaachmin wainkiam wari itiurkatniuitiam? Nekatsjai tusam nuin iniaisaip antsu nunanu nekattsam Índice de las publicaciones Watch Tower tana nui turutskesha Testigos de Jehová unuimiatai papii tana nuisha eakam  unuimiatrata. Ankan sumamsam Yuusa chichame unuimiakmeka Yuus papiinium aujmatna nuka nekasaiti tu enentaimsattame (1 Tis. 5:21). Nuyasha tu enentaimiu asam ame unuimiarma chikich aents ujakum ti warastatme.

YUUSA CHICHAME ETSERKATTSAM PENKER IWIARNARTA

6. Yuusa chichame etserkatai tusar urukamtai iinkia iwiarnartiniaitiaj?

⁶ Yuusa chichame etserkattsam emka iwiarnakmeka etserkatin ashamchattame. Jesús ni unuiniamurin Yuusa chichamen etserkarat tusa akuptsuk warinia itiurkartiniuya nuna emka jintintiawarmiayi (Ruk. 10:​1-11). Jesusa unuiniamurisha Jesús timiania aitkiasan najanawaru asar ti warasarmiayi (Ruk. 10:17).

7. Yuusa chichame etserkatai tusar itiura emka iwiarnarminiaitiaj? (Nakumkamusha iista).

⁷ Yuusa chichame etserkatai tusar iwiarnakur wari itiurkatniuitiaj? Yuusa chichame etserkur ii enentaijiain warintiataj nui enentaimsatniuitji. Aents warinkish tuiniakui warintiataj nuisha enentaimsamniaitji. Ainis iwiarnarar weakrikia aentsjai aujmatkur yupichuch aujmattsattaji tura wara warat ajattaji.

8. Kristu aentstisha urukua aintsaitiaj?

⁸ Pabloka Yuusa chichame etseru asar urukua aintsaitiaj nuna timiayi pininkia aniunam warinkish ti penker enkerar apujsamua aintsaitji Pablo tu timiayi (2 Kur. 4:7). Pininkia aniunam ti penker enkerman Pablo timiania nusha warinkit? Jesús nayaimpiniam uunt anaikiamu ajas ekemsaiti tusar etsereajnia nuiti (2 Kur. 4:1). Pinin aintiakun Pablo aujmattsamiania nusha warinia timia? Kristu aentstin turammiaji. Pablo pujumiania nu tsawantinkia warinkisha surin armiania nuka nuwejain najanamunam vinon, yurumkan turutskesha kuitian nui enkea ju wearmiayi. Yamaisha Jehová ti penkeran nuna tsankatramkaitji. Penker chicham etserkatniun tsankatramkaitji. Jehová yainmakrin kakaram ajasar nu chicham etserkattaji.

YUUS YAINMAKAT TUSAM SEATA

9. Chikich aentscha warintiak turamiartaj tu enentaimiakrikia itiurkatniuitiaj? (Nakumkamusha iista).

⁹ Chikich aentscha warintiak turamiartaj tu enentaimsar sapijmiamniaitji. Ainis enentaimiakrikia wari itiurkamniaitiaj? Jesusa unuiniamuri Yuusa chichame  etserkairap tu tuiniam Yuusan seawarmiania nui enentaimsartai. Sapijmia pujutsuk kakaram ajasar Yuusa chichamen etserkatai tusar Yuusan seawarmiayi. Ainis seawarmatai Yuuska ni kakarmarijiai yainkiarmiayi (Tur. 4:​18, 29, 31). Aentscha warintiartin tu enentaimiakrikia Jehová seawartai. Tura aents anena asar ashamtsuk etserkatai tusarsha seawartai.

10. Jehovasha ni chichamen etserkarat tusa itiur yainmaj? (Isaías 43:​10-12 TNM).

¹⁰ Atumka winia etserniuitrume Jehová tu turamniuitji (Isaías 43:​10-12 TNM aujsata). Ninkia kakaram aku tusan wi yaintatjarme turameaji. Ainis tiniu asa itiur yainmaj nu nekaatai. Yuusa chichame etsereakrin Jesús iijiai pujawai (Mat. 28:​18-20). Jehová ni suntarinkia iin yainkratkarat tusa apujsaruiti (Apu. 14:6). Yuus ni kakarmarijiai yainmakrin Yuusa chichame unuimiarma nui enentaimsatin jeaji (Juan 14:​25, 26 TNM). Ii yachi ii umaincha iin yainkratkarat tusa Jehová amasuitji. Jehová yainmakrin tura ii yachi ii umai yainmainiakrin sapijmiatsuk etserkattaji.

AENTSUI ENENTAIMSARTAI NUYASHA MAJAT ENENTAIMSACHARTAI

11. Untsuri aents Yuusa chichame ujaktaj tusam wari itiurkamniaitiam? (Nakumkamusha iista).

¹¹ Yuusa chichame etserkattsam jiinkim aents ni jeen pujuiniashkui itiurchat nekapniukaitiam? Ainis nekapeakmeka yamaisha tuin pujuinia? Takatnumash pujuinia turutskesha warinkish sumarmainiak wekainiawash? tu enentaimsata (Tur. 16:13). Paasanam etserkatin enentaimsamniaitme. Ii yachi Joshua naartin junis tawai: Surutai irunmanum nuni wekakun tura carro tepenamunmani wekasan Yuusa chichamen etserkaitjiai tu tawai. Ninkia ni nuwe Bridget naartinjiai kiarai Yuusa chichamen etserkattsar jiinkiar turutskesha Tumintin kiarai aentsun ni jeen wainkiaruiti (Ipi. 5:​15, 16).

12. Aents warintia enentaimiainia tura warinia nekaataj tusar wakerin ainia nu nekaaratai tusar warinminiaitiaj?

¹² Aents Yuusa chichamen antuktasar wakeruiniachu asar itiura enentaimin ainia nuyasha wari itiurchatna wainin ainia tu enentaimsartai. Ii yachi Joshua ni  nuari Bridgetjai tratado papiinium juarmanum anintramu ana ainis anintrusar aujmattsatniun juarin ainiawai. Watskea tratado Amijiaisha Yuus Papiish wariyaiti tame? nuna suiniak junis tiniu ainiawai: Yuus papiinkia Yuus aamtikramiayi tu enentaimniusha irunui. Tumaitkiusha chikichkia aini enentaimiainiachush irunui. Amesha warintia enentaimiam? Tu anintrusar aujmattsatniun juarin ainiawai.

13. Yaksha anturtamainiachkurnincha wari urukamtaiya shiir enentaimminiaitiaj? (Nekatai̱n Jintinkiartin 27:11).

¹³ Aents anturtamainiachkurnincha Jehová Jesusjai wakeruiniana nu najana asar shiir enentaimsamniaitji (Tur. 10:42). Etserkatai tusar jiinkir aents wainkiachrisha turutskesha antuktinian nakitiainiakuisha majat enentaimsachartai. Jehovanu najanea asar shiir enentaimsatniuitji (Nekatai̱n Jintinkiartin 27:11 aujsata).

14. Yuusna nekaatniun wakeran wainkiarmatai urukamtai warawitiaj?

¹⁴ Yaksha aents Yuusa chichamen antuktasa wakeran wainkiamtaisha warasminiaitji. Yuusa chichame etsereajnia nunaka Etserma papiikia uchi menkaaka eajnia nujai apatak aujmattsaiti. Nu uchin eainiaka nukap arminiaiti, enetkar eakarminiaiti. Uchin wainkiarmatai aya wainkia nuke waratsui antsu mash eaktinian yaimkiarusha warau ainiawai. Aintsan aents Yuusnan nekaattsar wakeruinia wainkiatai tusar mash Kristu aentsti Yuusa chichamenka etsereaji. Tui tuinsha etsernaktin asamtai mash etserkatniuka yaimkiamniaitji. Yaksha iruntainiam tatinian juareakuinkia warawitji.

JEHOVÁ TURA CHIKICH AENTSCHA ANEASARTA

15. Wari turakria ti warastataj? (Mateo 22:​37-39 TNM; nakumkamusha iista).

¹⁵ Jehová tura aents anea asar Yuusa chichame etsereakrikia ti warastatji (Mateo 22:​37-39 TNM aujsata). Ni chichame etsereakrin Jehová ti warana nui enentaimsata. Nuyasha aents Yuusa chichame unuimiatratniun juarainia warasartatna nuisha enentaimsata. Tura aintsan Yuusa chichamen antukar uminiana nuka uwemprartatna nuisha enentaimsata (Juaṉ 6:40; 1 Ti. 4:16).

16. Ii jeenia jiinkishminiaitkiursha Yuusa chichame etserkatai tusar itiurkamniaitiaj?

 ¹⁶ Ame jeeminia jinkishminiaitkiumsha wari itiurkamniaitiam? Jehová tura aentscha anena asam wari itiurkamniaitiam nui enentaimsata. COVID-19 sunkur amania nuinkia Samuel ni nuari Dania naartinjiai nii jeenia jiintsuk pujuarmiayi. Tumainiaksha ni jeenin pujusar papiin aa wearmiayi, telefononmaninsha etser wearmiayi tura aintsan Zoomnumani Yuusa chichamencha unuinia wearmiayi. Tura aintsan Samuel cáncer sunkuran takaku asa tsuamatainiam weak nuisha etser wemiayi. Ninkia junis tawai: Warinkish itiurchat wainiakur kakarmachu nekapminiaitji turutskesha majat enentaimpramniaitji, nuyasha Yuusnasha najanachmin nekapminiaitji. Tumaitkiusha Jehová enentaimtakur wara warat nekaptiatji tu tawai. Ni nuari Daniasha akaiki iniaru asa manaintiu nantu teper pujumiayi. Tura arum silla de ruedajai 6 nantu pujumiayi. Daniasha junis tawai: Wi jeamunak Yuusa chichamen etsermiajai. Enfermera iirsattsa taakui tura warinkisha sumakman jea ikiuittsa tainiancha Yuusnan ujakarmiajai. Nuyasha tsuamatainiam takakmajaisha telefononmani aujmatkun Yuusa chichamen ujakmiajai tu tawai. Samuel nuari Daniajai itiurchatan wainiainiaksha ni jeamunka najanainiak wararmiayi.

17. Yuusa chichame etsermanum wara warat ajattsar wari itiurkatniuitiaj?

¹⁷ Watskea iniareakur wari apujtustiniaitiaj nu mashiniu apujtusmaka ti kunturam narukminiaiti. Aintsan jui aujmatna nu chikichkimsar mash najankurkia majat enentaimiakrisha kakartatji tura Yuusa chichame etserkur shiir enentaimsattaji.