1, 2. a) Tunaasha warimpiait tura itiura nupetkamniaitiaj? (Paant nekaatin tana nuisha iista). b) Ju unuimiateamunmasha tura chikich unuimiatratin irunna nuisha wari nekaattaj? (Ju papiinium Ju aujsata tana nusha aujsata).

 Jehová anenmana nu nekattsam wakeramek? Tunaanumia tura jakatniunmaya uwemprarat tusa warinia najanait nuna unuimiakum nekaamniaitme. Tunaaka a ii nemasri iikia nupetkachmin aniuiti. Ashi aentsti tunaartiniaitji, tunaartin asar jatainti (Rum. 5:12). Tumaitkiusha tunaaka nupetkamniaitji, Jehová yainmakrin nupetkatin jeaji.

² Jehovaka tunaan katsuntrarat tusa yaunchunia juarkin nukape uwi yainmakuitji. Urukamtaiya? Anenkratin asa ainis yainmakuitji. Jehovaka tunaan katsuntrarat tusa yainkratkattsa warinkisha turaiti. Tunaaka jakatniunam jurameaji tura Yuuska jakarain tusa nakitiawai, ninkia tuke iwiaku pujuarat tusa wakerawai (Rum. 6:23). Jehovaka amincha tuke iwiaku pujut tusa wakerawai. Ju unuimiateamunam menaintiu anintramu nekaattaji: Tunaartin arininsha Jehová iin yainkratkattsa warinia turait? Tura aintsan yaunchunia aents tunaartin ainiayat itiura Jehová amikrisha ajasarmia? Nuya Jesús tunaartin arinin iin uwemtikiarturtasa warinia turamia?

 TUNAARTIN ARININSHA JEHOVÁ IIN YAINKRATKATTSA WARINIA TURAIT?

3. Edén nunkanam wari turunamia?

³ Jehová Adán Evancha najanamiania nui waras pujuarat tusa wakerimiayi. Tura shiiram nunkanam apujsarmiayi, nuyasha nuatmamtikiamiayi, tura aintsan ti penker takatan susarmiayi, pamparar ashi nunkan shiiram nunka amajsartiniuyayi. Tura warinia itiurkartiniuya nunasha timiayi. Yuus timiania nuna uminiashkunka jakartiniuyania nunasha timiayi. Wari turunamia nu nekaji, iwianch Adán Evancha tunaa najanawarat tusa utsukarmiayi, iwianch wakerimiania nuna Adán Evajai najanawarmiayi. Jehovanka kajinmatkiar tunaamkarmiayi. Nuyainia juarkiar tunaamkaru asar uuntach ajasar jakarmiayi. Jehová timiania nuna umikmiayi nuyasha jakar nunka ajasarmiayi (Náṉ. 1:​28, 29; 2:​8, 9, 16-18; 3:​1-6, 17-19, 24; 5:5).

4. Jehovasha urukamtai tunaan penke nakitniuit? (Rúmanam 8:​20, 21).

⁴ Adán Evajai turawarmiania nuna nekaawarat tusa ni chichamen Jehová aamtikramiayi. Tunaan urukamtaiya nakitniuit nuna nekatniun yainmaji. Tunaartin asar Jehovainia aran ajasu asar jatainti (Isa. 59:2). Iwianchkia aentstin ti kajertamniuitji. Tuma asa Adán Evancha anankawarmiayi tura yamaisha aintsan iincha anankartuattsa wakerawai. Adán Evajai tunaamkarmatai Yuus wakeramun emestukjai iwianchkia tu enentaimsachmiashia. Tumaitkiusha Jehová anenkratniuana nui iwianchkia enentaimsachmiayi. Adán tura Evanmania akiniawartiniuyania nuna Yuus itiurkatniuya nunaka yapajiachmiayi. Ninkia aentsun anen asa ukunam penker pujuarat tusa warinia itiurkatta nuna timiayi (Rúmanam 8:​20, 21 aujsata). Adannumia akiniawartiniuyania nusha nin anena asar umirkartiniuyania nuna Jehová nekamiayi. Tunaanumia tura jakatniunmaya uwemprarat tusa Jehová chichamprukmiayi. Itiura nunasha ainis turamia?

5. Aents uwemprarat tusa Jehovasha wari turunattawai timia? Aujmattsata (Náṉkammari 3:15).

⁵ (Náṉkammari 3:15 aujsata). Iwianch urukatniuya nuna Jehová yaunchuk timiayi. Nuwanu atatna nu aentsun uwemtikrattawai Jehová tu timiayi. Nuka Edennum turunamiania nuna iwiarattawai tura iwianchin amuktatui tu timiayi (1 Juaṉ 3:8). Tumaitkiusha nuwanu atiniuyania nuka nuna turattsa itiurchat nankaamastiniuyayi. Iwianch maatniuyayi ainis nankaamasmatai Jehovasha najaimiaktiniuyayi. Tumaitkiusha ainis turunamtai untsuri aents tunaanumia tura jakatniunmaya uwemprartiniuyayi.

YAUNCHUNIA AENTSCHA TUNAARTIN AINIAYAT ITIURA JEHOVÁ AMIKRI AJASARMIA?

6. Abel tura Noesha nuya chikich armiania nusha Jehovai weamkatai tusar itiurkarmia?

⁶ Tsawan nankaamaki weakui aents tunaarintin ainiayat itiura ninin weamkarminiuya nuna Jehová paant amajsamiayi. Edén nunkanam turunamiania nu nankaamasu ai Adanka uchiri Abel naartin Jehovan enentaimtin ajasmiayi. Abelka Jehovan anea asa tura nin enentaimtustasa wakera asa ni takakmarin penkeran Yuusan susamiayi. Murikiun wainniuyayi tuma asa nuna maa Yuusan aestuamiayi. Jehovasha itiurkamia? “Yus nuna iis Awirnaka péṉker enentáimtusmiayi tura susamuri̱ncha ‘péṉkeraiti’ tímiayi” (Náṉ. 4:4). Noé tura chikich armiania  nusha Jehovan enentaimtuiniak aestu wearmiania nuna Jehovaka ti penker iismiayi (Náṉ. 8:​20, 21). Jehová ainis ti penker iiyak aentscha tunaartin ainiayat wini weamkarminiaiti tusa ainis turamiayi. b

7. Abrahán ni uchirin maatniun enentaimsamiania nuna wari nekaamniaitiaj?

⁷ Abrahanka Jehovan ti penker enentaimniuyayi. Jehová Abrahankan ame uchiram Isaac maam winia enentaimturkum aesata tu timiayi. Nu turatniuka ti itiurchatchashia? Tumaitkiusha Abrahanka Jehová timiania nuna nekas umiktinian enentaimsamiayi. Abrahanka ni uchirin maataj tusa pujai Jehová tsurinkiamiayi. Jehová enentaimtatisha nu ainis nankaamasmajaisha wari nekaamniaitiaj? Jehovasha ii tumashrin akikmakat tusa ni uchirin akupkatniuyayi. Jehovaka aentstin ti anenmaji (Náṉ. 22:​1-18).

8. Tankun aesawar Yuusan su wearmiania nuna wari nekaamniaitiaj? (Riwiitikia 4:​27-29; 17:11).

⁸ Tsawan nankaamaki weakui Yuuska Israel aentsun umiktin chichaman susarmiayi, Yuus tsankurturat tuiniakka tankun aesawar Yuusan susartin armiayi (Riwiitikia 4:​27-29; 17:11 aujsata). Tankun aesawar Yuusan su wearmiania nuka ukunmatai Jehová aentsun uwemtikrartasa itiurkatniuya nuna nakummiayi. Nu turamujai aentsu tunaarinkia asakarma atiniuyayi. Niniun etserin armiania nuna Yuuska nuwanu atatui timiania nunanu aamtikrarmiayi, Yuusnan etserin armiania nuka chikichik Yuusa uchiri aentsu tumashrin akikmaktaj tusa jakatniuiti tu tiarmiayi. Ninkia murik maamua ainis atiniuyayi (Isa. 53:​1-12). Watskea enentaimsatai Jehová amincha tunaanumia tura jakatniunmaya uwemtikramprattsa ni uchirin sukartustiniuyayi.

JESÚS TUNAARTIN ARININ IIN UWEMTIKIARTURTASA WARINIA TURAMIA?

9. Imiakratin Juansha Jesusnan aujmatuk wari timia? (Israernum 9:22; 10:​1-4, 12).

⁹ Imiakratin Juanka Jesusna aujmatuk junis timiayi: “Iistarum. Núiti Yusa Murikrí̱ ashí aentsu yajauchiri̱n asakána nu” tu timiayi (Juaṉ 1:29). Yaunchuk nuwanu atatui Yuus timiania nuka Jesusaiti tusa Juan aini timiayi. Aentsu tumashrin akikmaktin tatiniaiti Jehová timiania nuka nui paant nekanamiayi (Israernum 9:22; 10:​1-4, 12 aujsata).

10. Jesussha tunaartin ainia yaintasa tau asa itiurkamia?

¹⁰ Tunaartiniaitjiai tusar itiurchat enentaimiarmiania nuna Jesús yaintasa wakeriarmiayi tura winia nemartustarum timiayi. Aentska tunaartin akiniawaru asar waitin ainiana nuna ninkia nekamiayi. Jesuska aishman turutskesha nuwasha tunaa najanin armiania nuna nekaska yainmiayi. Ninkia junis timiayi: “Péṉker ainia nuka tsuákratniun atsumainiatsui. Antsu jainia nu tsuákratniun atsumainiawai” tu timiayi. Tura junasha timiayi: “Wikia ‘péṉkeraitjiai’ tuinian untsuktaj tusan táchaitjiai. Antsu tunáa shuar ni enentái̱n yapaji̱áwarat tusan táwitjiai” timiayi (Mat. 9:​12, 13). Jesuska ainis turamiayi. Nuwa ni neajkirijiai Jesusa nawen nijiatramiania nuna Jesús waitnentas tsankuramiayi (Ruk. 7:​37-50). Samarianmaya nuwancha entsa shikitiainiam wainkiamiania nu nuwan tsanirmau asamtaisha Yuusna nuna jintintiamiayi (Juaṉ  4:​7, 17-19, 25, 26). Nuya Jehovasha Jesusan jakarun iniankit tusa kakarman susamiayi. Jesuska nuwancha aishmannasha uchincha tura uuntnasha iniankimiayi (Mat. 11:5).

11. Aentscha urukamtaiya Jesusai weamkattsar wakeriarmia?

¹¹ Aents ti yajauchin najanawarusha Jesusai weamkattsar wakeriarmiayi. Nu aents itiur nekapiarmia nuna Jesuska nekamiayi tuma asa waitnentrarmiayi (Ruk. 15:​1, 2). Ninkia Yuusa uchirinti tu enentaimiainia asarmatai Jesuska wararsarmiayi (Ruk. 19:​1-10). Jesuska ni apari urukuya ainis waitnenkratniuyayi (Juaṉ 14:9). Jehovaka anenkratin asa tunaa nupetkatniun yainkratkattsa wakerana nuna Jesús ni najanmajai tura ni timiania nujaisha jintintramamiaji. Jesús urukuya nuna iisar aentska ni iwiakmari yapajniawar nemarsatniun wakeru wearmiayi (Ruk. 5:​27, 28).

12. Jesús jakatniuitjiai tusa waritmia?

¹² Jesuska wari urukatniuya nuna paant nekamiayi. Tuma asa nin nemariarmiania nuna anankruawar paunam ajia mantuawartatui tu timiayi (Mat. 17:22; 20:​18, 19). Nuyasha Juan tura chikich Yuusna etserin armiania nusha tiarmiania aintsan ninkia aentsu tunaari asakarma ati tusa jakatniuitjiai tu enentaimniuyayi. Tura wi jakamtai ashi nunkanmaya aents ninkia nekas Yuusa uchirinti tu enentaimturiartatui ainis  timiayi (Juaṉ 12:32). Jesuska Yuusa uchirinti tu enentaimiainia asar ni turamiania ainis turuinianka Jehovajainkia shiir iisma arminiaiti tura tunaanumiasha ankan ajasarminiaiti (Rum. 6:​14, 18, 22; Juaṉ 8:32). Jesuska aentsun uwemtikrattaj tusa kakaram ajas waitias jarutramkamiaji (Juaṉ 10:​17, 18).

13. a) Jesussha itiura mantamnamia? b) Ainis nankaamasat tusa Jehovasha urukamtai iniaisamia? (Nakumkamusha iista).

¹³ Jesusnaka anankawarmiayi, maatai tusar achikiarmiayi, katsekkarmiayi, tsanumpruawarmiayi, tura asutrar ti waitkiasarmiayi. Nuyasha suntar maatai tusar paunam ajiawar awajawarmiayi. Jesuska ainis waitkiamsha katsuntramiayi. Jesusan ainis turuiniakui Jehovaka ti najaimiakmiayi. Ninkia ti kakarmaitiatcha ni uchirin waitkiainiakuisha waitkiasarat tusa iniaisamiayi. Urukamtai iniaisamia? Aentstin anenkratu asa ainis nankaamasat tusa iniaisamiayi. Jesús junis timiayi: “Yuuska ashi aentsun ti anea asa, ni Uchiri chikichkiniak akupkamiayi. Ni tana nuka nekasaiti tusar umirainia tuke iwiaku pujuarat tusa akupkamiayi” (Juan 3:16 TNM).

14. Jesús waitias jarutramkamiajnia nui enentaimkium itiur nekapeam?

¹⁴ Jehová anenkratin asa ni uchirin akupturmakmiaji. Tura amincha anenma asa ainis turaiti. Jesús anenma asa waitias jarutramkamiania nui enentaimsam itiur enentaimiam? (1 Juaṉ 4:​9, 10). Ninkia tunaa nupetkatniun chikichkimias yainkratkattsa wakerawai.

15. Jesús ii tumashrin akikmaku asamtai Jehová tsankurturat takurkia wari itiurkatniuitiaj?

¹⁵ Jehová ni uchirin sukartusmiania nujai ii tumashrin tsankurtampraitji. Imiakratin Juan tura Jesussha wari turatniuitiaj nuna tiarmiayi: “Ené enentáimia ajastarum. Tsawant ishichik ajasái Yus ju̱i̱ akupin ajastin” tu etserkarmiayi (Mat. 3:​1, 2; 4:17). Tuma asamtai ii apari Jehovai weamkataj takurkia ene enentaimia ajastiniaitji. Tumaitkiusha ene enentaimia ajamusha uruksait? Tura tunaartiniaitkiursha ene enentaimia ajakrikia Jehovai weamkamniaitiajnia nuna chikich atsakamutin nekaattaji.