1. Aents nekas ene enentaimia ajasuka itiurniuit?

 Tunaamkarkia ene enentaimia ajastiniaitji. Aents nekas ene enentaimia ajasuka yajauchia nuna penke nakitiak ni yajauch najantairincha iniainiaiti tura ni turamiania nunasha ataksha najanatniun penke nakitniuiti.

2. Ashi aentsti ene enentaimia ajamusha uruksait nusha urukamtai penker nekaatniuitiaj? (Neemías 8:​9-11).

² Ashi aentsti ene enentaimia ajamusha uruksait nu penker nekaatniuitji. Urukamtai? Tuke tsawan awajin asar nuna penker nekaatniuitji. Adán tura Evanmania akinia asar tunaarintin asar jatainti (Rum. 3:23; 5:12). Ashi aentsti tunaa jurumakniuitji. Apóstol Pablo tura yaunchunia aents Yuusan penker enentaimtin armiania nusha tunaarintin asar ti kakararmiayi (Rum. 7:​21-24). Tumaitkiusha tunaartiniaitjiai tusar itiurchat enentaimiu pujushtiniaitji. Jehovaka wait anenkartin asa warasar pujuarat tusa wakerawai. Nehemías pujumiania nu tsawantin judío aents matsamiarmiania nuna nekaawartai (Neemías 8:​9-11 aujsata). Jehovaka judío aents armiania nuka yaunchuk tunaamkamunam ti itiurchat enentaimiu pujuarat tusanka nakitmiayi, antsu nin enentaimtuiniak warasar pujuarat tusa wakerimiayi. Ninkia ene enentaimia ajasrikia shiir nekapramniaitiajnia nuna neka asa ene enentaimia ajastincha urukamtai penkerait nuna jintintramniuitji. Ene enentaimia ajasakrinkia Jehová ti waitnenkartin asamtai ii awajirmancha nekas tsankurtamprattaji.

3. Ju unuimiateamunmasha wari nekaattaj?

³ Ju unuimiateamunmanka ene enentaimia ajastinnia penker nekaattaji. Jehová Israel aentsun ene enentaimia ajastinniasha  timiania nuna emka nekaattaji. Aents ene enentaimia ajasarat tusa Jehovasha warinia turait nusha nekaattaji. Tura amuakur Jesusan nemarniuri armiania nusha ene enentaimia ajastincha uruksait nuna nekaawarmiania nusha nekaattaji.

JEHOVÁ ISRAEL AENTSUN ENE ENENTAIMIA AJASTINNIASHA WARINIA JINTINTIAWARMIA

4. Jehová Israel aentsun ene enentaimia ajastinniasha waritmia?

⁴ Jehová Israel aentsun winiaru arat tusa jukmiania nui nijiai chichaman najanamiayi. Wi tama umiakrumninkia penker wainkiattajrume tura penkera nuna susattajrume Jehová tu timiayi. Tura junasha timiayi: “Tura ti nekas tájarme, ju̱ akupkámu chichaman yamái wi tájarmena ju̱sha átum nekaatniuka tikia itiurchatchaiti tura yajá ikiuschamu asa wáinkiachminchaiti” tu timiayi (Muis. 30:​11, 16). Tumaitkiusha Yuusan umirainiachkunka turutskesha chikich yuusan enentaimtuiniakka ti itiurchat nankaamasartin armiayi. Israel aentska uminiashkunka Yuus penkesha tsankurachma artiniash armia? Yuus akupkamu chichamnumka Yuusai ataksha waketkiarminiaiti tu aarma amiayi (Muis. 30:​1-3, 17-20). Ene enentaimia ajasarka ataksha Jehovai waketkiarminiuyayi. Ainis turuiniakuinkia Jehová ataksha penkera nuna susarminiuyayi.

5. Israel aents yajauchin turuiniakuisha Jehovasha itiurkamia? (2 Akupin 17:​13, 14).

⁵ Israel aentska Jehová winiaru arat tusa jukmaitiat nukape nakitrarmiayi. Antar yuusnash enentaimtiarmiayi tura chikich yajauchincha najanawarmiayi. Nuna turawaru asar waitsarmiayi. Jehovaka ajapa iniaisacharmiayi antsu ene enentaimia ajasarat tusa niniun etserin armiania nuna nukape akupkarmiayi (2 Akupin 17:​13, 14 aujsata).

6. Israel aentsun urukamtai ene enentaimia ajasartiniuya nunanu jintintiawartasa Jehová warinia itiurkamia? (Nakumkamusha iista).

⁶ Israel aents antuiniachkunka urukawartiniuya nuna ujakartasa tura yapajniawarat tusa niniu etserin armia nuna Jehová akup  wemiayi. Jeremías Yuus utsuam junis timiayi: “Yusan enentáimtichu Israerá Wini̱i̱ṉ waketkitia. Túramka waitnenkartin asamtai Winia kajetái̱rka wáinkiashtatme. Ántsanak kajeknásha túkeka pujuschattajai. Antsu áyatik ame yajauch túramuram ‘nekasaiti’ titiá. Warí Uunt Yus ame Yúsrum kajerkam umirkachuitme” tu timiayi (Jrm. 3:​12, 13). Yuusna etserin Joel naartincha Yuus utsuam junis timiayi: “Yamaikia atumí nekas kúntuts enentái̱ji̱a̱i̱ ijiarma útrum Winí̱ waketkitiarum” tu timiayi (Juir 2:​12, 13). Isaiassha Jehová utsuam junis timiayi: “Antsu átumka nijiamarum japimiarmena núnisrum tura atumí yajauch túrutai̱ Wi íimmianumka iniaisatarum. Nuyá̱ yajauch túrutai̱sha nekas iniaisatarum” tu timiayi (Isa. 1:​16-19). Ezequielsha Yuus utsuam junis timiayi: “Kame Yusa enentáimtichu jakati tusan ¿Wi wakerajak? Antsu Wikia áyatik ni yajauch túrutairi̱ya̱ kanakí̱ iwiaaku pujusat tusan ¿wakeratsjak?” tu timiayi. Tura junasha timiayi: “Kame jáiniana nunasha jákara̱i̱ṉ tusan Wikia peṉké nakitiajai. Antsu ené enentáimiu ajasrum atumí tunaarí̱ iniaisatarum. Túrakrumka iwiaaku pujustatrume” tu timiayi (Isk. 18:​23, 32). Aentska tuke iwiaku pujuarat tusa wakera asa ene enentaimia ajainiakui Jehovaka warawiti. Tura aents ninki ene enentaimia ajas wini waketki tusa Jehovaka pachitsuk pujukai? Nunanu nekaatai.

7. Oseas ni nuarin Gomeran itiurkamiania nujai Jehová Israel aentsun warinia jintintiawarmia?

⁷ Oseas ni nuarin Gomeran itiurkamiania nujai Jehová Israel aentsun warinia jintintiawarmia nuna nekaatai. Ninkia tsanirmamiayi tura chikich aishmanjaisha anankeak Oseasan ajapa ikiukmiayi. Jehovasha wari itiurkamia? Ninkia ashi aentsu enentain nekareawai. Tura Oseasan junis timiayi: “Weme, nuwa̱ chíkich tsanirmakur aneamuk aneata. Kame Uunt Yus Israer shuar uwa nanekman yurumpruawar tura najankamu yusan wararainian wáiniat anea núnismek aneata” tu timiayi (Use. 3:1; Neka. 16:2). Oseasa nuwenka tunaan najanmanum Jehová ainis timiayi. Jehová Oseasan chicharuk ame nuwem tsankuram nijiai waketkitia tu timiayi. a Oseas ni nuwen tsankuramiania nujai Jehovaka Israel aentsun anemiania nuna jintintiawarmiayi. Israel aentska tunaan najanainiakuisha anena asar ene enentaimia ajasar ni iwiakmarin yapajniawarat tusa niniu etserin armiania nuna Jehovaka akuptu wearmiayi. Nujainkia ju nekaamniaitji: Aents tunaan najanean ni urukuit nuna mash neka asa ene enentaimia ajas yapajniat tusa Jehová yainiaiti (Neka. 17:3). Nunanu nekaatai.

AENTS ENE ENENTAIMIA AJASARAT TUSA JEHOVA ITIURNIUIT

8. Caín ene enentaimia ajasat tusa Jehová itiurkamia? (Náṉkammari 4:​3-7; Nakumkamusha iista).

⁸ Caín naartinkia Adán tura Eva uchiri iwiairiyayi. Caín naartinkia ni apari uruku armia aitkiasan yajauchin najanatniun wakeriniuyayi. Yuus papiiniumka Cainkia yajauchiyayi tawai (1 Juaṉ 3:12). Tuma asamtai Caín Yuusan suak aestuamiania nuna Jehovaka penker iischamiayi. Cainkia ni enentaimmian yapajiashmiayi. “Kainkia ti kajek nusháa iira ajasmiayi”. Jehovasha itiurkamia? Cainjiai aujmattsamiayi (Náṉkammari 4:​3-7 aujsata). Aneasmajai chicharkamiayi. Penkera nu najaneakminkia shiir enentaimtittiajme Jehová tu timiayi. Nuyasha kajekam pujakmeka tunaamkamniaitme tu timiayi. Ene enentaimia ajasat tusa Jehová yaintaj tutaisha Cainkia nakitramiayi. Caín antukchamtaisha Jehovaka  yamaikia yanaksha ene enentaimia ajasat tusan warinkish itiurkashtatjai ainis enentaimsachmiayi.

9. David ene enentaimia ajasat tusa Jehovasha itiurkamia?

⁹ Jehovaka Davidtian ti anenmiayi. Davidkia enentairui shiir enentaimtikriniaiti Jehová tu timiayi (Tur. 13:22). Tumaitkiusha Davidkia ti tunaamkamiayi. Tsanirmamiayi tura mankartuamiayi. Ainis tura asa Moisés akatramu chichamnum aarma amiania aintsan ninkia jakatniuyayi (Riw. 20:10; Núm. 35:31 TNM). Tumaitkiusha Jehovaka ti penker asa Davidkia ene enentaimia ajascha asamtaisha Jehová Davidjiai aujmattsat tusa Natankan akupkamiayi. b Natanka Davidtian enentain antinkiattsa apatak aujmattsamiayi. Ainis turan Davidkia tunaamkauyania nuna nekaama ene enentaimia ajasmiayi (2 Sa. 12:​1-14). Davidkia ti kuntuts nekapea asa Yus Kanta 51 nuna aarmiayi (YKan. 51). Nui tana nuka tunaamkaru ainiana nu ene enentaimia ajastinian yainkiaruiti. Jehová Davidtian anea asa yainmiania nuka shiirapitia.

10. Jehovaka katsuntin tura tsankukratin asamtai amesha itiur enentaimiam?

¹⁰ Jehovaka mash tunaan penke nakitniuiti (YKan. 5:​4, 5). Tunaartiniaitiajnia nuna neka asa tura iin anenkratu asa tunaa najanawakrincha yainkratkattsa wakerawai. Ti tunaamkaru ainiana nunasha ene enentaimia ajasar wini weamkarat tusa Jehovaka warinkish turiniaiti. Nu neka asar shiir enentaimiaji. Jehová katsuntin tura tsankukratniuana nui enentaimiakur ni tuke umirkattsar wakeraji tura tunaamkarsha warik ene enentaimia ajastin wakeraji. Yamaikia Jesusa unuiniamuri armiania nusha ene enentaimia ajastinnia warinia nekaawarmia nu nekaatai.

JESUSAN NEMAR WEARMIANIA NU ENE ENENTAIMIA AJAMUSHA URUKSAIT NUNA PAANT NEKAAWARMIAYI

11, 12. Jesussha winia aparka tsankurkartiniaiti tusa warinia apatak aujmattsamia? (nakumkamu iista).

¹¹ Jehová timiania aintsan ashi aentsun uwemtikrartiniuyania nu tamiayi. Aents  urukamtaiya ene enentaimia ajasartiniait nunaka Imiakratin Juan nuya Jesussha jintinkratawarmiayi (Mat. 3:​1, 2; 4:17).

¹² Jesuska Yuusa chichamen etseruk aparka atumi tunaarinkia tsankurattsa wakerawai tu unuikiartu wemiayi. Nuna paant nekaamtikiattsa aishman natsa menkakan aujmattsamiayi. Nu aishmanka ni wakeramu najanattaj tusa ni jeenian jinki wemiayi. Tumaitkiusha tsawan nankaamaki weakui penker enentaimiar ataksha aparin waketkimiayi. Aparisha itiurkamia? Jesús timiayi: “Tura ni aparí̱sha jeachat winian wainiak waitnentramai. Aparí̱ tsékeṉki̱ iṉkiuṉ miniakak mukunamai” tu timiayi. Uchirinkia ni aparin chicharuk wikia ame takarniuram atajai timiayi. Tumaitkiusha aparinkia tsankura asa ataksha ni jeen awayamiayi. Tura chichaak uchir menkaka nu wainkiaji timiayi (Ruk. 15:​11-32). Jesuska ju nunkanam tatsuk nayaimpiniam pujumiania nui aents tunaamka ene enentaimia ajasunka Jehová tsankurarmiania nuna wainkiamiayi. Tuma asa winia aparka tsankukratniuiti tusa ti penker apatak aujmattsamiayi.

13, 14. a) Pedro warinia paant nekaamia? b) Ene enentaimia ajastiniaitji tusa waritmia? (Nakumkamusha iista).

¹³ Ene enentaimia ajainianka Jehová itiura tsankukratniuit Jesús jintinkratamiania nuna Pedro paant nekaamiayi. Pedro nukape awajirmataisha Jesuska tuke tsankuramiayi. Menaintiu Jesusnaka nekatsjai tu timiayi tura arum ainis tiniu asa ti itiurchat nekapmiayi (Mat. 26:​34, 35, 69-75). Tumaitkiusha Jesús nantakmiania nui Pedron wantintiukmiayi. Pedro ninki pujakui nui wantintiukmiayash tumainti (Ruk. 24:​33, 34; 1 Kur. 15:​3-5). Jesuska Pedro ene enentaimia ajasuyania nuna nekaamiayi. Nuna neka asa wantintiukmiania nui ikiakarmiayi tura tsankurauyania nuna nekamtikiamiayi (Márkus 16:7).

¹⁴ Ene enentaimia ajastincha uruksait tura tsankuramu atincha uruksait nuna Pedro  paant nekaamiayi. Tuma asa nuna chikich aentsnasha jintintiawarmiayi. Pentecostés namperan najanawaru ai judío aents iruntrar pujuiniai Pedro jintinkrateak: Atumka Jesús maitrume tu timiayi. Tumaitkiusha aneasmajai “Wats, yamaikia atumí yajauchiri̱ya̱ ené enentáimia ajasrum kanaktiarum. Túrarum tunaarun asakárat tusarum Yusai̱ni̱ apajá̱rtarum” tu timiayi (Tur. 3:​14, 15, 17, 19, 20). Nu chichamjai ene enentaimia ajaka ni enentaimmian yapajiatniuiti, yajauchin najanman iniais Yuus penker iiyamun najanatniun juarkitniuiti tusa ainis apóstol Pedro timiayi. Jehová atumi tunaarin japirtamprattawai Pedro tu timiayi. Tura urum nukape uwi nankaamasu ai Pedro Jehovanun junis timiayi: Ninkia chikichkiksha menkakain tusa nakitiawai tuma asa warik kajechuiti, antsu ashi aents ene enentaimia ajasarat tusa wakerawai tu timiayi (2 Pit. 3:9). Ti tunaamkakrincha Jehovaka ii tunaarin tsankurtampramniaitji.

15, 16. a) Yuus nekas tsankukratniuana nuna Pablo itiura nekaamia? (1 Timiutéun 1:​12-15). b) Chikich atsakamutincha wariniua unuimiatrattaj?

¹⁵ Pablo ti yajauchin nukap najanamiayi. Ninkia Jesusa nemarin armiania nunaka ti waitkiasmiayi. Ainis asamtai ninkia penkesha yapajniachminiaiti tu tiarminiuyayi. Tumaitkiusha Jesuska aininkia enentaimchamiayi. Jesús Jehovajainkia Pablon penkeriniak iirsarmiayi. Jesús junis timiayi: “Jú̱ aishmaṉkan winia etserniur atí tusan Wi achikjiai” tu timiayi (Tur. 9:15). Jesuska Pablo ene enentaimia ajasat tusa wantintiukmiayi (Tur. 7:58–8:3; 9:​1-9, 17-20). Arum Kristu aents ajas apóstol Pabloka Jehová Jesusjai waitnentrarmiania nuna tuke aujmat wemiayi (1 Timiutéun 1:​12-15 aujsata). Ninkia junis aarmiayi: “Kame ni waitnentrammari̱ ame atak enentáimpratjai turutit tusa nákarma nuka nékatsmek” tu aarmiayi (Rum. 2:4).

¹⁶ Kristu aents Corintonam matsamiarmiania nuyainia tsanirman nekaawar nuna aujmatainian Pablo antukmiayi. Pablo nu itiurchat aa asamtai itiurkamia? Ni turamiania nuka Jehová anenkratniuana tura chichartamniuitiajnia nu nekaamniaitji. Nuyasha chikich aentscha waitnentrartiniaitiajnia nusha nekaamniaitji. Chikich atsakamutin nuna nekaattaji.