1, 2. a) Tunaan najana ene enentaimia ajainiatsna nunasha Jehová itiur enentaimtuinia? b) Jehovasha urukawarat tusa wakera?

 Yajauchin najanainiakui Jehovaka pachitsuk iniaichaiti (YKan. 5:​4-6). Ii wari itiurkatniuitiaj nuna ni chichamen aamtikrana nunaka umikiarat tusa wakerawai. Tumaitkiusha penke awajichu arat tuka enentaimchaiti antsu tunaartiniaitiajnia nuna ninkia nekawai (YKan. 130:​3, 4). Tumaitkiusha Jehovaka yajauch shuar Yuus ti anenkratin asamtai pachitsuk tunaa najanamniaitji tu enentaimiainianka penke nakitniuiti (Jut. 3, 4). Tunaan najanainiana nunaka Armagedontin Yuus amuktatui Yuus papii tu tawai (2 Pit. 3:7; Apu. 16:16).

² Jehovaka ashi aents ewemprarat tusa wakerawai. Nuik atsakamutin unuimiarmajnia aintsan Jehovaka “ashí shuar enentái̱n yapaji̱áwarat tusa wakerawai” tawai Yuusa chichame (2 Pit. 3:9). Uuntri ainiana nuka Jehová aintsan tunaamka ene enentaimia ajas Jehovai waketkit tusar yain ainiawai. Tumaitkiusha tunaamka ene enentaimia ajastinian  nakitniusha irunniuiti (Isa. 6:9). Tura chikichkia tunaamka ene enentaimia ajasat tusar uuntri ainiana nu warinkisha turuiniakuisha ene enentaimia ajachush irunniuiti. Ene enentaimia ajachkuinkia uuntri ainiana nu itiurkartiniait?

“TUMA ASAMTAI NU SHUAR TUNAARINTIN ATUMÍIYA̱ AKANKATARUM”

3. a) Tunaamka ene enentaimia ajastinian nakitiakuinkia Yuusa chichamesha wari turatniuitrume ta? b) Ene enentaimia ajastinian nakitiaka nekas nekamka ninki wakerus jinniuiti urukamtai ainis taji?

³ Tunaamka ene enentaimia ajastinian nakitiakuinkia uuntri ainiana nuka 1 Kurintiunam 5:​12, 13 nui “nu shuar tunaarintin atumíiya̱ akankatarum” tana aitkiasan turin ainiawai. Tunaamkaka ene enentaimia ajastinian nakitia asa nekas nekamka ninki wakerus jinniuiti (Kar. 6:7). Urukamtaiya? Uuntri yaintaj tutaisha nakitra asa ainis nankaamasminiaiti (2 Ak. 17:​12-15). Ni najanmajai yajauchin najanatniun iniaiyachu asa Jehová tana nuna umiktinian nakitiawai (Muis. 30:​19, 20).

4. Tunaamkan jikiarmatainkia urukamtai etsertain?

⁴ Ene enentaimia ajastinian nakitia asamtai tunaamkan jikiarmatainkia naari anaitiukar yamaikia testigo de Jehovachuiti iruntramunam tu etserniuitji. a Tunaamka natsan ujukatai tusar ainis tichaitji antsu Yuus papii tana aintsan testigos de Jehová ainiana nuka tunaamkajainkia shiir amajnaisatniun iniaisarat tusar ainis etsertainti (1 Kur. 5:​9-11). Nu aentsjai urukamtai nawamnaikiashtiniaitiaj nuna Jehová paant timiayi. Apóstol Pablo junis timiayi: “Karía ishichik yuminnium eṉketam mash karimtiktsuk” ainis timiayi (1 Kur. 5:6). Tunaamka ene enentaimia ajastinian nakitiana nu testigo de Jehová ati tusar iniaiyakrinkia Yuusan umirkattsar kakainiana nusha Yuusan umireamun iniaisarminiaiti (Neka. 13:20; 1 Kur. 15:33).

5. Testigo de Jehovachuiti tusar etserkarmatai nu aentscha itiurkatniuitiaj?

⁵ Testigo de Jehovachuiti tusar etserkarmatai nu aentscha itiurkatniuitiaj? Nu aentsjai shiir amajnaiyachkursha murik menkaka ataksha waketkimniana ainis iistiniaitji. Nu aentscha testigo de Jehová ajak Jehovan aminiak tuke enentaimtustatjame tu tiniuana nu kajinmatkishtiniaitji. Nu aentska ainis tiniuana nuna umikcha asa ti itiurchat pujawai (Isk. 18:31). Tumaitkiusha Jehová tsawantan sua asamtai tura waitnenkratin asamtai ukunmatainkia ataksha ninin waketkimniaiti tu enentaimiaji. Ainis asamtai uuntri ainiana nusha testigo de Jehová ajasman iniaisancha yaintai tusar itiurkarminiait?

JIIKMIA AINIANA NUNA YAINTAI TUSAR UUNTRI AINIANA NUSHA ITIURIN AINIA

6. Testigo de Jehová ajasman iniaisan yaintai tusar uuntri anairamu ainiana nusha warinia turin ainia?

⁶ Yaksha testigo de Jehová ajasman iniaisamtainkia uuntri ainiana nuka ajapa iniaisartiniashit? Tura Jehovai waketkinti tusar warinkisha turuiniamun iniaisartiniashit? Atsaa. Tunaamkajai iruntrar uuntri aujmatainiana nuka yamaikia testigo de Jehovaka achattame tuiniak, ataksha Jehovai waketkitiaj takumka ju turatniuitme tusar ujakartatui. Tura aya nunak tichartatui antsu warumchik nantu nankaamasmatai warintiak enentaimiam nu nekatai tusar ataksha amijiai aujmattsattaji tiarminiaiti. Tunaamka ataksha aujmattsatniun wakerakuinkia ene enentaimia ajas Jehovai waketkit tusar uuntri ainiana nu yainkiartatui. Ene enentaimia  ajaschaitkiuinkia uuntri ainiana nuka nijiai nukape iruntrarminiaiti.

7. Testigo de Jehová ajasman iniaisan Jehová aintsan waitnentainia asar uuntri ainiana nusha warinia turin ainia? (Jirimías 3:12).

⁷ Testigo de Jehová ajasman iniaisan Jehová aintsan waitnentratai tusar uuntri ainiana nuka kakarartiniaiti. Israel aents umikcharmatai ni wakeruiniak waketkiarti tusa Jehová warinkisha turutsuk pujuchuyayi. Antsu ene enentaimia ajainiachmanmank ataksha nini waketkiarat tusa warinkish turiniuyayi. Jehová waitnenkratniuana nuna nekaamtikiattsa Oseasan waritmia nuna nuik nekaamji. Jehová Oseasan chicharuk ame nuwem chikich aishmanjai tsanirma pujakuisha tsakuram nijiai waketkitia tu timiayi (Use. 3:1; Mks. 3:7). Jehová enentaimiana aintsan uuntri ainiana nusha aents tunaamka ene enentaimia ajas Jehovai waketkit tusar wakeruiniawai tuma asar yaintai tusar warinkish turin ainiawai (Jirimías 3:12 aujsata).

8. Natsamaru menkakan Jesús aujmattsamiania nusha Jehová waitnenkratniuana nu penker nekaatniuncha itiur yainmaj? (Rúkas 15:7).

⁸ Natsamaru menkakan Jesús aujmattsamiania nuna nuik unuimiarmaji. Aparinkia uchiri winian wainiak tsekenki we inkiun miniakak shiit mejeasmiayi (Ruk. 15:20). Ti anea asa uchirka tsankurturta turutti tu enentaimsashmiayi. Uuntri ainiana nuka testigo de Jehová ajasman iniaisaru ainiana nuna ainis enentaimtuinia asar ataksha Jehovai waketkit tusar yaintasar kakainiawai (Ruk. 15:​22-24, 32). Tunaamka Jehovai waketkuinkia nayaimpiniam tura ju nunkanmasha warasma awiti (Rúkas 15:7 aujsata).

9. Jiikmia ainiana nuna waketkiarat tusa Jehová wari ta?

⁹ Tunaa najana ene enentaimia ajastinian nakitiana nunaka Jehová ni iruntramurin pachitkia ati tusa iniaichuana nu nekaaji. Nuyasha jiikmia ainiana nunaka ajapa iniaichuana tura ataksha wini waketkit tusa wakerana nusha nekaaji. Useas 14:4 nui ene enentaimia ajainianka Jehová itiurniuit nuna aujmatuk junis tawai: “Wi kajerkámiaj núnaka Wikia kajinmátkiniaitjiai. Tuma asan ántichu ainia nunasha tsuártatjai túran ti aneawartatjai” tu tawai. Uuntri ainiana nuka tunaamka ene enentaimia ajan nekaatai tusar anermak pujuartiniaiti. Testigo de Jehová ajasman iniaisaruana nusha Jehovai ataksha waketkittsar warinia turawartiniait nuna kakarar turawartiniaiti.

10, 11. Yaunchuk jiikmia ainiana nuna yaintai tusar uuntri ainiana nusha itiurin ainia?

¹⁰ Yaunchuk jiikmia pujuiniana nusha uruksara pujuarminiait? Wari tunaana najanu asamtai jikiarmia nunaka najanu pujachusha turutskesha urukamtai jikiarmia nunaka kajinmatkincha arminiaiti. Uuntri ainiana nuka yaunchuk jiikmia ainiana nunasha eakar wainkiartiniaiti. Nu aentsun wainkiar nijiai aujmatainiak Yuusan seatiarminiaiti tura ataksha waketkittsa wakerakka itiurkatniuit nuna tiartiniaiti. Yaunchuk jikmiaitkiunka Yuusnaka kajinmatkisha pujumniaiti. Tuma asamtai Jehovai waketkittsan wakerajai takuinkia Yuusa chichamen unuimiarat tusar uuntri chichamprukarminiaiti, nunaka ataksha testigo de Jehová ajasai tu etserchamunmansha Yuusa chichamen unuimiatratniun juarkimniaiti. Tumaitkiusha ya Yuusa chichamen unuiniartata nunaka uuntri anaikiamu ainiana nuke tiartatui.

¹¹ Uuntri ainiana nuka Jehová waitnenkratniuana aitkiasan turin asar jiikmia ainiana nuna tuinsha eakar wainkiatai tusar wakeruiniawai nuyasha waketkiarat tusar yayainiawai  tura jiikmia ainiana nuna waketkitiaj takunka waketkimniaiti tu tiniu ainiawai. Testigo de Jehová ajasman iniaisa ene enentaimia ajas tunaa najanman iniaisaitkiuinkia iruntramunam ataksha testigo de Jehová ajasat tusar warik awakettiniaitji (2 Kur. 2:​6-8).

12. a) Urutainia uuntri ainiana nusha jiikmia nekasash ene enentaimia ajasuit tusar amamkesar nekaawartiniait? b) Ti tunaamkanka Jehovaka penkesha waitnentrashminiaiti urukamtai tichatniuitiaj? (Nota tana nusha iista).

¹² Uuntri ainiana nuka ataksha testigo de Jehová ajasat tusar awaketsuk uchin ti waitkiasu asamtai jikmiaitkiuinkia, antar religionnum pachiniu asamtai nuwen turutskesha aishrinkesha ajapa chikichjiai nuatnaikiattsa tunaamkaitkiuinkia uuntri ainiana nuka nekasash ene enentaimia ajasuit tusar penker nekaawartiniaiti (Mks. 2:14; 2 Ti. 3:6). Uuntri ainiana nuka ni yachin ni umain ayamprukartiniaiti. Jehovaka jiikmia ainiana nu ene enentaimia ajas yajauchin turamun iniaisamtainkia Jehová ataksha wini waketkit tusa wakerana nu kajinmatkishtiniaitji. Uuntri ainiana nu yaunchuk  ti yajauchin najanawaru turutskesha ni nuwen ni aishrinkesha anankawarun nekas ene enentaimia ajasuashit tusar iiniak nu aentsnaka Yuuska penkesha waitnentrashminiaiti tu tichartiniaiti (1 Pit. 2:10). b

KRISTU AENTSCHA WARINIA TURAWARMINIAIT

13. a) Yanaksha uuntri irunturar chicharkarai tusar etserkarmatai nu aentscha itiurkatniuitiaj? b) Yanaksha yamaikia testigo de Jehovachuiti tusar etserkarmatai nu aentscha itiurkatniuitiaj?

¹³ Nuik unuimiatramajnia nui timiania aintsan yaksha tunaamkamtai ene enentaimia ajasmatainkia uuntri iruntrar chicharkaruiti tusar etsertainti. Ainis etserkarmatai nu aents ene enentaimia ajas yajauch najanmanka iniaisa asamtai shiir amajnaisamniaitji (1 Tim. 5:20 TNM). Jehová iruntramurin pachitkia asamtai tura penkera nuna turuki weti tusar ikiakartiniaitji (Isr. 10:​24, 25). Antsu yanaksha yamaikia testigo de Jehovachuiti tusar etserkarmatainkia nu aentsjainkia shiir amajnaisatin tura yurumatniusha iniaiyaji (1 Kur. 5:11).

14. Testigo de Jehová ajasman iniaisa iruntainiam tamatainkia chikichkimsar warinma enentaimsatniuitiaj? (Nakumkamusha iista).

¹⁴ Jiikmia ainiana nuka penkesha pachischatniuitji tusarik ainis taji? Atsaa, nu enentaijiainkia ainis tatsuji. Antsu nijiai nawamnaikiashtatji tusar ainis taji. Tumaitkiusha ii shuar turutskesha ii amikri jikmiaitkiuinkia iruntainiam weti tusar iik enentaimsar ipiamniaitji. Iruntainiam takuinkia itiurkatniuitiaj? Yaunchukka jiikmia iruntainiam tamatainkia amikma wechamiaji. Tumaitkiusha yamaikia amikmatjiash tusar iik enentaimsatniuitji. Tumaitkiusha nu aentsjai aujmatuuka wajashtatji turutskesha warinkish nijiai metek iruntrar najanashtatji.

15. 2 Juaṉ 9-11 nui tana nusha yana taku ainis ta? ( Juan tura Pablojai nu tunaanak aujmatainiakuash ainis tiarmia? tana nu iista).

¹⁵ Tumaitkiusha jiikmia ainiana nuna amikmainiaka ni yajauch turamun jimiarui Yuusa chichame ainis tatsuk yaksha tu enentaimsamniaiti (2 Juaṉ 9-11 aujsata). Nui tana nuka Yuusan nakitraru ainiana nuna tura  yajauchia nuna najanainiana nuna taku ainis tawai (Apu. 2:20). Tuma asamtai jiikmia antar religión najanainiana nuna najanunka tura chikich tunaancha najanunka uuntri ainiana nuka nijiainkia aujmattsachartiniaiti. Nu aentska ukunmatainkia yapajniawarminiaiti. Tumaitkiusha amikmachartatji tura iruntainiam tati tusar ipiashtatji.

JEHOVÁ WAITNENKRATNIUANA AITKIASRIK TURAWARTAI

16, 17. a) Tunaa najanasha warinia turat tusa Jehová wakera? (Isekiár 18:32). b) Uuntri ainiana nusha warinia turuiniakua Jehovan yainkiarmianiait?

¹⁶ Ju papiiniumka Jehová yaksha jakain tusa penke nakitiana nuna nekaaji (Isekiár 18:32 aujsata). Ninkia tunaartin ainiana nu nini waketkiarat tusa wakerawai (2 Kur. 5:20). Tuma asamtai nin umirkatniun iniaisaruana nuna ene enentaimia ajasar wini waketkiarat tusa Jehovaka tuke wakeriniaiti. Uuntri ainiana nuka ainis turawarat tusar Jehovan yayainiawai (Rum. 2:4; 1 Kur. 3:9).

¹⁷ Tunaamka ene enentaimia ajasmatainkia nayaimpiniam waramu awiti. Tunaamka Jehovai ataksha waketkuinkia Jehová ti warawiti. Jehová anenkratniuana tura penkera nuna turiniana nuyasha waitnenkartiniana nui enentaimsartai, nu turakrikia Jehová tuke ti aneastatji (Ruk. 1:​78, 79).