1. Jehová aentsnasha itiur pujusarat tusa wakera?

 Jehová aentstinkia ninki enentaimsar warinsha najanawarat tusa iniaitiamsaitji. Tuma asamtai Yuus seakur iik wakera asar aminiu yamaikia sumamsatjai tutainti. Nunis turakur ii yachijiai ii umaijiai iruntrar Yuus enentaimtaji. Jehovaka ashi aents nuna turawarat tusa wakerawai. Nusha urukamtain? Jehovaka ashi aentsun anea asa penker pujusarat tusa wakerawai. Nuyasha ni amikri ajasar tuke iwiaku pujusarat tusash wakerawai (Muis. 30:​19, 20; Gál. 6:​7, 8 TNM).

2. Tunaan najanawarusha warinia turawarat tusa Jehovasha wakera? (1 Juaṉ 2:1).

² Jehovaka winia enentaimtursat tusa yanaksha utsuchuiti. Ninkia aents ninki warinia najanattsa wakera nuna najanat tusa iniainiaiti. Kristu aents ti tunaamak urukamniait? Ni tunaamkamurin ene enentaimia ajaschamtainkia iruntramunmania jiikmia aminiaiti (1 Kur. 5:​12, 13). Jiikmiasha ene enentaimia ajas wini ataksha waketkit tusa Jehová wakerawai. Tuma asamtai Jehová ni uchirin Jesusan ju nunkanam  akupturmakmiaji. Jesús jakamujai tunaa najanawaru ene enentaimia ajasarmatainkia Jehová tsankurniuiti (1 Juaṉ 2:1 aujsata). Ii Yuusri anenkratin asa tunaa najanawarun ene enentaimia ajasarat tusa ikiakainiaiti (Sak. 1:3; Rum. 2:4; San. 4:8).

3. Ju unuimiatnumsha warimpia nekaattaj?

³ Jehovaka tunaan itiur iiniait tura tunaa najanawarun itiur iiya aintsan iisarat tusa wakeriniaiti. Jui itiurkaria nusha aintsar iisminiaitiaj nu nekaattaji. Aujki weakur menaintiu enentai ana nu nekaattaji. Yaunchuk Corintonam tunaa najana pujan itiurkarmia nu tura apóstol Pablo aents tunaamka ene enentaimia ajasu asamtai itiurkatarum timia nusha nekaattaji. Nuyasha Kristu aents tunaa najanamtai Jehovasha itiur iiniait nusha nekaattaji.

NI YACHI TUNAAMKAMTAI KRISTU AENTS CORINTONMAYASHA ITIURKARMIA

4. Corintonam Kristu aents iruntramunam warimpia nankaamamia? (1 Kurintiunam 5:​1, 2).

⁴ (1 Kurintiunam 5:​1, 2 aujsata). Pablo menaintiu wekas iikratuk wekas yama Corinto iruntramu najanamunam itiurchat aan antukmiayi. Nui Kristu aents ni apari nuwejai tsanirmamiayi. “Timianú tunáa tsanirmamu Yus shuarchanumsha nékashtainti” Pablo tu aarmiayi. Kristu aents Corintonmaya armiania nuka Jehová waitnenkratniuana aintsan waitnentratniuitji tusar tunaa najanun pachischarmiayash tumainti, tumaitkiusha Jehovaka ni iruntramurinkia yajauchia nu ain tusa nakitniuiti. Kristu aents tunaa najanu asa Yuusa naarin ti yajauch ujukamiayi. Chikich Kristu aentscha niya aintsan najanawarat tusa utsukarminiuyayi. Tuma asamtai Pablo wari itiurkatarum timia?

5. Pablo Kristu aentsun wari turatarum timia? (1 Kurintiunam 5:13; Nakumkamusha iista).

⁵ (1 Kurintiunam 5:13 aujsata). Pablo Yuus utsuam papiin aarmiania nui tunaa najanuka atumiya jiktiarum timiayi. Kristu aents umin armiania nusha nu aentsnasha itiurkartiniuya? Nijiai nawamnaikiashtiniaitrume Pablo tu timiayi. Pablo warinia turawarat tusa timia? Pablo junis timiayi: “Tura peṉké niji̱a̱i̱ yurumáshtiniaitrume” (1 Kur. 5:11). Watskea yajainsha yurumeakrikia nijiai aujmattainti tura ainis turakur shiir amajnaisatin juarkimniaitji. Nu aentsjainkia penkesha nawamnaikiashtiniaitrume tusa Pablo paant timiayi. Ainis turuiniakka nisha nu aentsua ainis turachartiniuyayi (1 Kur. 5:​5-7). Nuyasha ainis aran amajsam Jehovan  umirkachuyania nuna nekaama natsamak ene enentaimia ajasminiuyayi.

6. a) Pablo Kristu aents Corintonmaya armiania nuna papiin aatar akuptukmiania nui nisha itiurkarmia? b) Pablo papiin aar akupkamiania nui tunaa najanasha urukamia?

⁶ Pablo Kristu aents Corintonam matsamiarmiania nuna papii aatar akupak nuna antukarsha urukawartin tu enentaimmiayi. Arusan Tito chichaman ujakam Pablo ti warasmiayi. Pablo papiin aar akupkauyania nuna Kristu aents Corintonmayanka penker antukaru asar Pablo timiania nuna uminiak tunaa najanan jikiaruyayi (2 Kur. 7:​6, 7). Pablo papiin aar akupkamiania nuyainia aishman tunaa najanauyania nuka yajauch najanmanka iniais ene enentaimia ajasuyayi. Yajauchin najanmanka tura netse ajasmancha iniaisauyayi tura nuyasha Jehovan umirkatniun juarkiniuyayi (2 Kur. 7:​8-11). Tuma asamtai Pablo Kristu aents Corintonmania armiania nuna nu aishmansha itiurkatarum timia?

 ENE ENENTAIMIA AJASUN KRISTU AENTS ARMIANIA NUSHA ITIURKARTINIUYA

7. Tunaa najana jiikmia asa urukamia? (2 Kurintiunam 2:​5-8).

⁷ (2 Kurintiunam 2:​5-8 aujsata). Tunaa najana chicharkarum waitkiasuitrumna nuke makete Pablo tu timiayi. Kristu aents tunaa najanaka ainis aitkiamu asa ene enentaimia ajasuyayi (Isr. 12:11).

8. Kristu aents armiania nuna Pablo wari turatarum timia?

⁸ Tuma asamtai Pablo Kristu aents armiania nuna junis timiayi: “Antsu yamaikia tsaṉkuratniuitrume. Shiir enentáimtikratniuitrume” tu timiayi. Tura junasha timiayi: “ni nekas anearmena nu paant iniaktustarum” timiayi. Tunaamka ene enentaimia ajasuyania nuna Kristu aentska Jehová iruntramurin waketkitniun tsankatkarat tusa Pablo wakerimiayi. Tura aintsan ni tuiniamujai tura najanmajaisha anearmiania nuna nuya tsankuraruyania nunasha paant nekaamtikiawarat tusa Pablo wakerimiayi. Ainis turuiniakui ene enentaimia ajasuka shiir enentaimsatniuyayi.

9. Kristu aents ene enentaimia ajasun tsankuratniuncha urukamtai itiurchat iiyarminiuya?

⁹ Ene enentaimia ajasu Jehovai waketkimtai Kristu aents nuna nakitiainiasha irunmiashia? Yuus papiikia nuna aujmattsui tumaitkiusha ainis nankaamasmiayash tumainti. Ni tunaamkamunam itiurchat nankaamasaru asar tura waitsaru asar nu aents ene enentaimia ajas Jehovai waketkimtai nuna nakitiainiash irunmiayash tumainti. Kristu aentska Yuusan umirkattsar tuke kakararu asar nu aentsnasha urukamtai tsankurar shiir amajainia tu enentaimsarminiuyayi (Rúkas 15:​28-30 nui tana nujai apatkam iista). Tumaitkiusha ene enentaimia ajasu Jehovai waketkimtai Kristu aentscha urukamtai aneasartiniuya?

10, 11. Ene enentaimia ajasun tsankuratniun nakitraruitkiuinkia wari nankaamasminiuya?

¹⁰ Ene enentaimia ajasu Jehovai ataksha waketkit tusar uuntri armiania nu nakitraruitkiuinkia wari nankaamasminiuya? Tura waketkimtaisha Kristu aentska shiir amajchamka urukamniuya? Ene enentaimia ajasu ti kuntuts nekapminiuyayi, winiaka Jehová penke nakitruruiti tu enentaimsamniuyayi. Yuus nakitruru aisha nin umirkattsancha urukamtai kakartiniaitiaj tu enentaimias majat ajasminiuyayi.

¹¹ Kristu aents Corintonmaya ene enentaimia ajasun tsankuracharuitkiuinkia Jehová nakitrarminiuyayi. Urukamtai nusha? Jehová tsankukratniuana ainis turutsuk iwianch yajauch tura anenkratchana ainis turawaru asarmatai nakitrarminiuyayi. Iwianchkia ene enentaimia ajasu ataksha Jehovan enentaimtusain tusa nakitmiayi, tsankuratniun nakitiainiakuinkia iwianch wakeramu uminkiamniuyayi (2 Kur. 2:​10, 11; Ipi. 4:27).

12. Kristu aents Corintonam matsamiarmiania nusha Jehovaya ainis najanattsar warinia itiurkartiniuya?

¹² Nuinkia Kristu aents Corintonam matsamiarmiania nusha iwianchia ainis najantsuk antsu Jehovaya ainis najanattsar warinia itiurkartiniuya? Ene enentaimia ajasun Jehová itiurniuit aitkiasan turawartiniuyayi. Yuusa chichamen aararmiania nu Jehová urukuit nuna warintiarmia nu nekaatai. David junis timiayi: “Warí Uuntá Ámeka péṉkeraitme tura tsaṉkurkartiniaitme” tu timiayi (YKan. 86:5). Miqueassha junis timiayi: “¿Ámiji̱a̱i̱ métek chíkich Yussha áwak? Kame yajauch túrutai̱sha tura Yusa aentsri̱ Nin enentáimtin juákaru ainia nuna tunaarí̱sha  tsaṉkuram kajinmátniuitme” tu timiayi (Mik. 7:18). Isaiassha junis timiayi: “Yusan umircha ainia nusha ni túrutairi̱n iniaisarti núnisaṉ yajauch enentáimin ainia nusha ni enentáimtairi̱nkia iniaisarti. Tura ti waitnenkartin asamtai Uunt Yusai̱ni̱ṉ waketkiarti. Núnisaṉ tsaṉkurkartutai̱ri̱sha tí uunt asamtai ii Yusri̱ni̱ṉ waketkiarti” tu timiayi (Isa. 55:7).

13. Ene enentaimia ajasuncha itiurkartiniuya? ( Corintonmaya aentsun urutaimpia ataksha shiir amajsarmia? tana nui iista).

¹³ Kristu aents Corintonmayanka Jehová ainis turawartasa ene enentaimia ajasunka shiir amajsartiniuyayi tura aneasartiniuyayi. Ashi warinmansha umin asar Pablo timiania nuna umikiarmiayi (2 Kur. 2:9). Tunaa najanuka nukape nantu jiikmia pujuchmiayi. Jiikmia asa ene enentaimia ajasuyayi. Tuma asamtai uuntri armiania nu Jehovai ataksha waketkit tusar nukap nantu nakaschartin armiayi.

JEHOVÁ NAKAK TURINIANA NUNA TURA WAITNENKRATNIUANA NUNANUSHA WARI NEKAAMNIAITIAJ

14, 15. Corintonam Kristu aents tunaamkan itiurkarmia nujaisha wari nekaamniaitiaj? (2 Pedro 3:9 TNM; Nakumkamusha iista).

¹⁴ Corintonam Kristu aents tunaamkan itiurkarmia nunaka iin jintintramatniun aamtramiayi (Rum. 15:4). Nin enentaimtuiniana nuka yajauchin najanu pujuarat tusa Jehovaka penke iniaichuana nuna nekaamniaitji. Ene enentaimia ajachusha waitnenta asarum nawamkatniuitrume turamtsuji. Jehovaka waitnenkratniuiti tumaitkiusha yajauchin  najanu pujuarat tusa iniaikratchaiti nuyasha ni enentaimmian mai yapaj ajachuiti (Jut. 3, 4). Ainis turakka chikich Kristu aentscha tunaa turamnia enentaimprarminiaiti. Tura Jehová waitnenkratin asa ainis turunawarain tusa nakitiawai (Neka. 13:20; 1 Kur. 15:33).

¹⁵ Nuyasha nui aujmatna nuka Jehovaka ashi aents uwemprarat tusa wakerana nuna nekaamniaitji. Yajauch turamun iniaisar nin umirkattsar kakainianka waitnenniuiti (Ezeq. 33:11 TNM; 2 Pedro 3:9 TNM aujsata). Tuma asamtai tunaa najanuka ene enentaimia ajas yajauchin iniaisa asamtai tsankurarum ataksha shiir amajsatarum Pablo Kristu aents Corintonmaya armiania nuna tu timiayi.

16. Kristu aents Corintonmaya tunaamkamtai itiurkarmia nujaisha Jehovanu wari nekaamniaitiaj?

¹⁶ Corintonmaya turawarmiania nuna unuimiatrar Jehovaka anenkratin tura penkera nuna turuiniana nu nekaaji (YKan. 33:5). Jehovaka ainis asamtai iikia ni naari paant awajtustasar wakeraji nekasapi. Ashi aentsti tunaartiniaitji tuma asar ni tsankurturat tusar wakeraji. Ii tumashrin akikmakat tusa ni uchirin akupkamiania nui ti yuminkiaji. Jehovaka nin enentaimtuiniana nunaka aneana tura penker pujuarat tusa wakerana nu neka asar shiir enentaimiaji.

17. Chikich akankamu irunna nuisha wari nekaattaj?

¹⁷ Yamaisha Kristu aents tunaamkamtai itiurtain? Jehová anenkratniuana aitkiasan turuiniak uuntri anairamu ainiana nusha itiura tunaamka ene enentaimia ajasat tusar yainkiarminiait? Uuntri anairamu ainiana nu yanaksha jikiarmatainkia turutskesha ataksha testigo de Jehová ajasai tuiniakuinkia urukatniuitiaj? Nu anintramuka chikich akankamu irunna nui nekaattaji.