1. Aents tunaan najana Yuusa chichame tana aintsan urukamniait?

 Nuikkia Kristu aents Corintonmaya aents tunaamka pujakui itiurkartin armia nuna Pablo timiania nu nekaamji. Nu aents ene enentaimia ajascha asamtai nu iruntramunmayanka jikiarmiayi. Tumaitkiusha Rúmanam 2:4 nui tana aintsan ene enentaimiash ajasminiaiti. Jehová aents tunaamkan uuntri ainiana nu yainkiarat tusa itiurniuit?

2, 3. a) Ii yachi tunaa najana nekaarsha itiurkatniuitiaj? b) Nush urukamtai turatniuitiaj?

² Ii yachi tunaa najanu nekaarsha itiurkatniuitiaj? Uuntri ainiaka ni yachin tunaamkan yaintasar emkaka penker nekaawartiniaiti. Tuma asamtai tunaamka chicharkur uuntri ainiana nu yainkiatarum titia titiniaitji (Isa. 1:18; Tur. 20:28; 1 Pit. 5:2).

³ Antsu uuntri ainiana nui we ujakartinian nakitiakuinkia itiurkatniukitiaj? Uuntri ujakartiniaitji yainkiarat tusar. Ii yachi anea asar nu turattaji. Ii yachi ene enentaimia ajachkunka Jehovainianka aran ajasminiaiti tura iruntramuncha yajauch ujukamniaiti. Uuntri ainiana nu ujaktin yupichuchichuitkiuisha ii yachisha tura Jehovasha anea asar ujakartiniaitji (YKan. 27:14).

 TUNAAMKAN YAINTASAR UUNTRI AINIANA NU ITIURIN AINIA

4. Wari enentaijiainia uuntri ainiana nu tunaa najanajai aujmattsattsar irunin ainia?

⁴ Uuntri ainiana nu iruntrar tunaan najanajai aujmattsarat tusar uuntri ainiana nuna menaintiun anain ainiawai. a Uuntri ainiaka tunaa najanan yaintasar wakeruiniaksha ene enentaimia ajasat tusar utsukcharminiaiti (Muis. 30:19). Tura David ene enentaimia ajasmiania ainis mashikia ene enentaimia ajascharminiana nuna nekainiawai (2 Sa. 12:13). Yuusa chichamejai chichaream antincha antuktinian nakitiasha irunin ainiawai (Náṉ. 4:​6-8). Aininiakuisha uuntri ainiaka yaintai tusar warinkish najanin ainiawai. Tura tunaa najanajai aujmattsattsar warinma enentaimin ainia?

5. 2 Timiutéun 2:​24-26 tana aintsan uuntri ainiana nu tunaa najanajai itiurka aujmattsartiniait? (Nakumkamusha iista).

⁵ Uuntri ainiaka tunaa najananka Jehová murikri menkakana ainis iin ainiawai (Ruk. 15:​4, 6). Tuma asamtai tunaa najanajai iruntrar aujmatainiakka kajertsuk shiir ajamujai aujmatin ainiawai. Tunaa najanan urukamtai aitkiamam titiasanka iruncha ainiawai. Antsu 2 Timiutéun 2:​24-26 (aujsata) tana aintsan najanawartasa irunin ainiawai. Enentain ejetuktasar waitnentaimturar shiir chichamjai jintin ainiawai.

6. Uuntri ainiana nu tunaa najanajai iruntsuk emka warinia turin ainia? (Rúmanam 2:4).

⁶ Uuntri ainiana nuka Jehovasha warintiuak tusar emka iwiarnau ainiawai. Tura Pablo timiania aintsan Yuus “Kame ni waitnentrammari̱ ame atak enentáimpratjai turutit tusa nákarma nuka nékatsmek” tana nui enentaimin ainiawai (Rúmanam 2:4 aujsata). Tuma asamtai uuntri ainiasha tunaamkan Yuus waitnenniuana aintsan nisha waitnentin ainiawai. Murikiu wainniuana anin asar Jesús turamiania aintsan iruntramunmasha ni yachin penker wainin ainiawai (Isa. 11:​3, 4; Mat. 18:​18-20). Emkaka tunaa najanajai iruntsuk tunaa najana ene enentaimia ajasat tusar Yuusan seatin ainiawai. Nuyasha penker nekaattsar Yuusa chichamen aujin ainiawai tura papii Yuusna irununcha aujin ainiawai. Jehová wakerana aintsan najanattsar nin seau ainiawai. Urukamtain aitkiama tusar nekaattsar iruntrar aujmatin ainiawai (Neka. 20:5).

7, 8. Tunaamkan yaintaj tusar uuntri ainiana nusha Jehová aintsan warinia turin ainia?

⁷ Uuntri ainiaka Jehová aintsan katsuntas nakau ainiawai. Yaunchuk tunaamkarun  Jehová itiurkarmia nui enentaimin ainiawai. Jehová Cainkian chicharuk yapajniakminkia shiir amajsattajme antsu yapajniatsuk kajekam pujakminkia nakitrattajme tusa aujsamiayi (Náṉ. 4:​6, 7). David tunaamka asamtai yapajniat tusa wakera asa Jehová Natankan akupkamiayi. Davidtian enentai antinkiattsa Natanka apatak aujmattsamiayi (2 Sa. 12:​1-7). Israel aents armiania nunasha Jehová umichu asarmatai niniu etserin armiania nuna kashi kashinin awakeki akuptiarmiayi (Jrm. 7:​24, 25). Aents tunaamka ene enentaimia ajasmatai tsankuratjai tusa Jehovaka nakaschamiayi antsu tunaan najanu pujakuisha ene enentaimia ajasat tusa warinkisha turiniuyayi.

⁸ Tunaamkan yaintaj tusar uuntri ainiana nusha Jehová aintsan warinia turin ainia? 2 Timiutéun 4:2 nui tana aintsan uuntri ainiana nuka yaintaj tusar wakeruinia asar katsuntrartiniaiti. Penkera nuna turatniun utsuktaj tusar kajekchamujai turawartiniaiti. Uuntri ainiana nu kajekmajai tuiniamka tunaa najanaka antuktinian nakitminiaiti tura ene enentaimia ajastinniasha nakitminiaiti.

9, 10. Tunaa najanamun nekaamat tusar uuntri ainiana nusha warinia itiurin ainia?

⁹ Uuntri ainiana nuka tunaamkasha tunaamtsuk warinia turatniun juarkimia tusar amamkesar enentaimin ainiawai. Yuusa chichamen aujsatniun turutskesha Yuusa chichamen etserkatniun iniaisa asa nuna tura? Yuusan tuke seatniun tura penker enentaimias seatniun iniaisakai? Yajauchia nu ni enentain enkemat tusa iniaisakai? Yajauch aentsjai tsanin wekas turutskesha yajauchia nuna iisu asa ainis tumayik? Yajauchin najana asa Jehovan kuntuts enentaimtiksana nuna nekaamawak? Uuntri ainiana nuka tu animiasartiniaiti.

¹⁰ Itiura tunaanumsha iniarma nuna nekaamat tusar uuntri ainiana nuka nu tunaanmasha itiura iniamam tusar aniasarminiaiti. Nuna anintruiniaksha aneasmajai anintrusartiniaiti tura ame najanamu tishipsam mash aujmattsata tu tichartatui (Neka. 20:5). Natán David turamiania nuna nekaamat tusa itiurkamia aintsan uuntri anaikiamu ainiana nusha tunaamkajai aujmatainiak ni najanana nuka yajauchiana nuna nekaamat tusar warijiainsha apatkar aujmattsarminiaiti. Yama aujeamak ni yajauch najanamun nekaama itiurchat enentaimsatniun juarkimniaiti tura aintsan ene enentaimia ajasminiaiti.

11. Uuntri anaikiamu ainiana nusha Jesús turiniuyania aitkiasan warinia turawarminiait?

¹¹ Uuntri anairamu ainiana nuka Jesús urukuya ainis atai tusar kakainiawai. Jesús Saulon junis timiayi: “Sauru, Sauru, ¿urukamtai yajauch awajtústaj tusam imiá pataaturam?” tu timiayi. Saulo yajauch najanman nekaamat tusa aini aniasmiayi (Tur. 9:​3-6). Tura Apukarípsis 2:​20, 21 nuisha Jesús Jezabelan pachis junis timiayi: “Nisha ni tunaari̱n enentáimiar iniaisat tusan nákasuitjiai” tu timiayi.

12, 13. Tunaamka ene enentaimia ajasat tusar nakainiak uuntri ainiana nu warinia turawarminiait? (Nakumkamusha iista).

¹² Jesús itiurniuya aintsan uuntri anairamusha tunaan najanajai yama aujmatainia ene enentaimia ajaschamtaisha ninkia ene enentaimia ajastinian nakitiawai tu ticha ainiawai. Uuntri ainiana nu yama aujeamak ene enentaimia ajausha irunniuiti tura chikichkia warik ene enentaimia ajachush irunniuiti. Ainis asamtai uuntri ainiana nuka tunaa najanajai nukape awainkiar aujmattsarminiaiti. Yama nankamtaik uuntri ainiajai aujmattsamunam enentaimias juakminiaiti tura nankaamantu enentaimtsuk Jehovan seak tsankurturta  tusha timiniaiti (YKan. 32:5; 38:18). Atak awainki uuntri ainiajai aujmatuk tunaa najanamun nekaama asa kuntuts enentaimminiaiti.

¹³ Tunaamka ene enentaimia ajasat tusar uuntri ainiana nuka nijiai aujmatainiak waitneasmajai arantamujai aujsartiniaiti. Uuntri ainiana nuka tunaamkan yaintai tusar warinkish turuiniamunam Jehová yainkratkat tusar seau ainiawai (2 Ti. 2:​25, 26).

14. Tunaamka ene enentaimia ajasat tusa yaki nekassha yainiait?

¹⁴ Tunaa najana ene enentaimia ajasmatainkia ti waratainti (Ruk. 15:​7, 10). Ya yainkiam ene enentaimia ajasminiait? Uuntri ainiana nu yainmash? Tunaa najananka Yuus ni enentain yapajtiuamniaiti Pablo tu timiayi (2 Ti. 2:25). Tunaamka ene enentaimia ajana nuka uuntri yayam ainis turichu ainiawai antsu Jehová ni enentain yapajiatniun yayam ainis turin ainiawai. Tunaamka ene enentaimia ajas urukamniait nuna Pablo timiayi: Tunaamkaka Yuusa chichamen amamkes penker nekaamniaiti, penker enentaimsamniaiti nuyasha iwianch warinkish aepar takakeana nuyainia uwempramniaiti (2 Ti. 2:26).

15. Ene enentaimia ajasun yaintaj tusar uuntri ainiana nu warinia turawarminiait?

¹⁵ Tunaamka ene enentaimia ajasmatainkia uuntri ainiana nuka Yuusnum kakarat tusar tura iwianch tunaanum ujuataj tamasha katsuntrat tusar nuya Yuusan tuke umirkat tusar ni jeen weriar ikiakartinian iniaisachartatui (Isr. 12:​12, 13). Ene enentaimia ajasu wari tunaana turait nunaka uuntri ainiana nuka yanaksha ujakchartatui. Antsu uuntri ainiana nusha warinia etserkarminiait?

“ASHÍ IRUNTRAMUNAM CHICHARKARTA”

16. 1 Timiutéun 5:20 tana aintsan “ashí iruntramunam chicharkarta” Pablo timiania nusha mashiniun ujakat tusayash ainis timia?

¹⁶ (1 Timiutéun 5:20 aujsata). Tunaamka ainiana nuka “ashí iruntramunam chicharkarta” Pablo Timoteon uuntri anaikiamu asamtai tu timiayi. Pablo timiania nusha  iruntramunam tuke etserkatniuitji tusayash ainis timia? Atsaa, tunaa najanan nekainian ujakat tusa tu timiayi. Nakak tunaan najanun wainkiaruana nu turutskesha tunaamkajai tusa yana ujakuit nusha ujakarta tusa ainis timiayi. Uuntri ainiana nuka tunaamka warinia turait nuna nekainianak tunaamkajainkia aujmattsaitji tura chicharkaitji tusar ujakartatui.

17. Tunaa najanamun chikitcha nekaawaruitkiuinkia turutskesha arum nekaawarminiaitkiuinkia uuntri ainiasha itiurkartata?

¹⁷ Antsu tunaamka wari tunaana najanait nuna nukap nekaawarusha aminiaiti turutskesha arumkesha nekaawarminiaiti. “Ashí iruntramunam chicharkarta” Pablo timiayi. Nuinkia ii yachin turutskesha ii umain uuntri ainiana nu iruntrar chicharkaruiti tusa uuntri anaikiamuka ii iruntairin etserkattawai. Urukamtai ainis etsernaktiniait? Nuna antukar chikitcha aneararat tusar tura tunaan turawarain tusar ainis etsernaktatui Pablo tu timiayi.

18. Kristu aents 18 uwin ejeyachu tunaamkamtainkia uuntri ainiana nu itiurkartiniait? (Nakumkamusha iista).

¹⁸ Kristu aents 18 uwin ejeyachu tunaamkamtainkia uuntri ainiana nu itiurkartiniait? Iruntrar uchi natsamaru tunaamkajai ya aujmattsartata nuna jimiaran anain ainiawai. Uuntri anaikiamu jimiar ainiaka uchi natsamaru tunaamkajai, ni aparijiai, ni nukurijiaisha testigo de Jehová ainiakuinkia nijiai metek iruntrartatui. b Tura uchirtinian atumi uchiri yapajniat tusarum tura ene enetaimiasha ajasat tusarum wari itiurkaitrum tusar aniasartatui. Uchi natsamaru tunaamka apari  tuiniamun antakuinkia uuntri anaikiamu jimiar ainiaka atakka nijiai iruntrachartatui. Uchirtin ainiana nunaka ni uchirin aneasmajai chicharkar tsakatmararat tusa Jehová takatan susaiti (Muis. 6:​6, 7; Neka. 6:20; 22:6; Ipi. 6:​2-4). Uuntri anaikiamu ainiana nuka uchirtin ainiana nuna atumi uchiri yaintai tusarum wari itiurarum tusar aniasartatui. Uchi natsamaru testigo de Jehovayaitiat yapajniatniun nakitiakuinkia tura ene enentaimia ajachkuinkia itiurtain? Nu uchi natsamarujai tura ni apari ni nukurijiaisha testigo de Jehová ainiakuinkia, menain uuntri anairamu iruntrar nijiai aujmattsartatui.

JEHOVAKA WAITNENKRATNIUITI

19. Uuntri ainiana nusha tunaamkan yayainiak Jehová aintsan itiura turin ainia?

¹⁹ Comité de ancianos nui pachiniainiaka yajauchia nu najanma ain tusar amamkesar iin ainiawai, ainis turatniun Jehová takatan susaruiti (1 Kur. 5:7). Tumaitkiusha tunaamka ene enentaimia ajasat tusar wakerin ainiawai, tuma asar ninkia yapajniattawai tu enentaimsar nijiai aujmatin ainiawai, nuna turuiniak Jehová waitnenkratniuana aitkiasan turuiniawai (San. 5:11). Apóstol Juan uuntmantuyana nui timiania nuna nekaatai. “Yus shuartiram tunaanum iniaara̱i̱rum tusan ju̱ papí áateajrume. Túrasha Yus shuar yajauch túramtaiṉkia ii Aparí̱i̱n iin chichamprútma takakji. Nuka Jesukrístuiti. Nisha nekasa nuja̱i̱ métek ayamprutmaitji”Juan tu timiayi (1 Juaṉ 2:1).

20. Chikich atsakamutincha wari nekaattaj?

²⁰ Tunaan najana ene enentaimia ajastinian nakitniusha irunniuiti. Ainis iniakmamkuinkia nu aentska jiktiniaitji. Uuntri ainiana nu nunasha itiura ainis turin ainia? Nuka chikich atsakamutin nekaattaji.