Apóstol Pablo Kristu aents Tesalonicanmaya armiania nuna aatuk junis timiayi: “Ju̱ papinium ii tájinia nuna, shuar umiktinian nakitiakuiṉkia ‘umichuiti’ tákuram ni natsa̱a̱rat tusarum ikiuktiarum” tu timiayi (2 Tis. 3:14). Yaunchukka nu chichamnaka uuntri ainiana nu ainis turawartiniaiti tusa tawai tu wemiaji. Tuma asamtai yaksha awakeki jintiamaitiat antuktinian nakitiakuinkia uuntri ainiaka nu aents natsarat tusar iruntramunam jintinkrat wearmiayi. Uuntri ainis jintinkratawarmatainkia Kristu aentska shiir nankaamastai tusar warinkish najanainiakka nu aentsun ipiachartin armiayi antsu ii iruntairin tura Yuusa chichame etsermanumsha nijiai aujmattsarmin armiayi.

Tumaitkiusha yamaikia ainis turutainkia yapajiattaji. Pablo timiania nuka Kristu aents nu aentsun itiurkartiniuya nuna ninki enentaimsarat tusa ainis timiayi. Tuma asamtai yamaikia uuntri ainiana nuka umichu natsarat tusar iruntramunam jintinkratachartatui. Urukamtai yamaikia ainis najanachartata? Pablo nu chichaman timiania nuisha wariniuna aujmatuk ainis timia nu nekaatai.

Kristu aents armiania nu umichusha iruniarmiania nuna Pablo nekaamiayi. Yuusa chichamejai Pablo chicharkarmaitiat nu aentska umiktinian nakitiarmiayi. Kristu aents Tesalonicanmania armiania nuna iyuwartasa wemiania nui junis timiayi: “Takastinian nakitiana nuka yurumáshti” tu timiayi. Tumaitkiusha ainis tutaisha takakmastinian jeainiayat takakmastinian nakitiainiasha irunmiayi. Nuyasha chikich najanainiamun aujmatkartin armiayi. Umichu armiania nunasha Kristu aentscha itiurkartiniuya? (2 Tis. 3:​6, 10-12).

Shuar umiktinian nakitiakuinkia umichuiti titiarum Pablo tu timiayi. Pablo timiania nuka griego chichamjainkia umichu ainiana nu nekaar iisha niya aintsan umichu aij tusar aneartinian timiayi. Pablo timiania nuka aya uuntri armiania nunakka tichamiayi antsu ashi Kristu aents armiania nuna timiayi (2 Tis. 1:1; 3:6). Tuma asamtai Kristu aentska yaksha Yuusa chichame jintinkratman umiktinian nakitian nekaanka ninki enentaimias nijiainkia nawamnaikiatjash tu enentaimsartiniuyayi.

Kristu aentska nu aentsun jiikmia ainis iisartiniash armia? Atsaa. Pablo junis timiayi: “Áyatik jintintrata tura ame nekas yátsumea áitkiasmek Yusai̱ enentáimtikrata” tu timiayi. Tuma asamtai Kristu aents chikichkimias iruntramunam tura Yuusa chichame etsermanum nu aentsjai nawamnaikiarminiuyayi, antsu iruntrar shiir nankaamastasar warinkish najanainiakka nu aentsnaka ipiachartin armiayi. Urukamtai ainis turawartiniuya? Ni natsarat tusarum aini turatarum Pablo tu timiayi. Ainis turam umichuka natsaru asa yapajniamniuyayi (2 Tis. 3:​14, 15).

Yamaisha Kristu aentstisha Pablo timiania nu itiura umikminiaitiaj? Pablo timiania aintsan nu aents nekasash umichuit tusar amamkesar enentaimsatniuitji. Pablo umichun timiania nunaka chikich Kristu aents iiya aintsan metek najancha turutskesha metek enentaimcha ainiana nuna tichamiayi. Turutskesha yaksha urutainsha itiurchat enentaimtikramsaitiajnia nunasha tichamiayi. Antsu ninki wakerusar Yuus tana nuna umiktinian wakeruiniatsna nuna Pablo timiayi.

Yamaiya jui warastai tusar warinkisha najankur ii yachi ii umainsha Yuus papii tana nuna umiktinian nakitiakuinkia a iik enentaimsar nijiainkia nawamnaikiashtatjai tu titiatji. Nuka iik enentaimsar turatin asar ayataik ii jeen pujuiniana nujai nunanuka aujmattsamniaitji. Antsu iruntramunam tura Yuusa chichame etsermanum nu aentsjainkia nawamnaikiamniaitji. Yuus tana nuna umiakui ataksha nijiainkia ashi warinmansha shiir amajnaisamniaitji.