1. Yaunchuksha panjaisha itiurin armia?

 Yaunchunia aentska ashi warinkisha panjai yu wearmiayi (Náṉ. 14:18; Luc. 4:4 TNM). Pannaka nukap aents nekainia asarmatai Yuusa chichamenka ashi yurumkan takusha pan tu tawai (Mat. 6:11 TNM; Hech. 20:7 TNM). Jesuska pankan aentska najanachminian jimiara ayurkamamiayi (Mat. 16:​9, 10). Juan akankamu 6 nui Jesús turamiania nu chikichik nekaatai, tura nujaisha yamaiya juisha wari nekaamniaitiaj nuna nekaatai.

2. Aents warinia pujursara tsukamiarmia?

² Jesusa unuiniamurinkia aran wear Yuusa chichamen etseruwar taaruyayi tuma asar ayampratniun wakeriarmiayi. Tuma asamtai Jesuska ni unuiniamuri armiania nuna yaruak kanunam enkemar nayants Galilean katitki yaksha atsamunam Betsaida irutkamu nuntumas nui wearmiayi (Mar. 6:​7, 30-32; Ruk. 9:10). Tumaitkiusha arusan untsuri aents Jesusan iistai tusar kaunkarmiayi. Jesuska pachitsuk iniaisashmiayi antsu waitnentainia asa Yuusa chichamen ujakarmiayi tura jainiancha tsuarmiayi. Jesusa unuiniamurinkia penke kiarai ajatesmatai ju aentscha wariniak yuawarat tu enentaimiarmiayi. Apatkun ishichik takurmainiasha irunchamiashia tura chikichkia irutkamunam sumarmaktasa weartiniuyayi (Mat. 14:15; Juaṉ 6:​3-5). Jesús nuna nekaa wariniak turamia.

 AENTSKA TURACHMINIA NAJANA JESÚS NUKAP AENTSUN AYURKAMAMIAYI

3. Jesús ni unuiniamuri armiania nuna itiurkatarum timia? (Juareamunam nakumkamusha iista).

³ Jesuska ni unuiniamuri armiania nuna junis timiayi: “¿Urukamtaik wéarat? Antsu atumek ayuratarum” timiayi (Mat. 14:16). Tumaitkiusha 5 mil aishman ayuratin apatuk atsumiayi. Nuwasha uchisha nekapmarmaka 15 mil aents irunar pujuarmiayash tumainti (Mat. 14:21). Andressha “‘Uchi ju̱i̱ seṉku páṉkan jimiará namakja̱i̱ takakui. Ausha timiá untsurínmasha jeatpiash’ tímiayi” (Juaṉ 6:9). Pan cebadajai najanamun aentska yu armiayi. Namak uchichisha ikiaramu tura jeaku armiayash tumainti. Uchikia warumchik pankan tura warumchik namakan takaku asamtai mashi ashi aentsnaka ayuracharminiuyayi.

4. Juaṉ 6:​11-13 nui aujmatna nuna wari nekaamniaitiaj? (Nakumkamusha iista).

⁴ Jesuska ayurkamatniun wakera asa akanairum pujutar waintarum timiayi (Mar. 6:​39, 40; Juaṉ 6:​11-13 aujsata). Yuus papiikia Jesuska pankan tura namakan takakainia asar Yuusan yuminsamiayi tawai. Jesús Yuusan yuminsamiania nuka penkerauyayi, Yuus yurumatniunka sukartusmiayi. Iisha aintsan iik turutskesha yajainsha yurumattsar pujakur Yuus seatniuitji. Jesús Yuusan sea amik yurumawarat tusa pankan namakjai aentsun susarmiayi. Aentska yurumawar ejemararmiayi, nuyasha Jesuska ampiniararainia nuka mash juuktarum tu timiayi. Ampiniarumka arum sukartustasa ainis timiayash tumainti. Warinkisha wasurkashtiniaitiajnia nuna Jesús jintintramamiaji. Amesha uchirtiniaitkiumka  ame uchirmijiai nunanu aujmatkum Yuus seatniunu tsanka atinnia tura warinkish ajamastinnia nuna aujmattsamniaitme.

5. a) Jesús warinkish turan wainiainiak aentscha itiurkartasa wakeriarmia? b) Ainis turattaj tutaisha Jesussha itiurkamia?

⁵ Jesús penker jintinkratman antukar tura tsuakratun wainiainiak aentska shiir enentaimiarmiayi. Moisés Mesías tatiniaiti timiania nuna aentska nekarmiayi tuma asar Jesuschashit tu enentaimiarmiayi (Muis. 18:​15-18). Jesusaitkiunka uuntri ajas ashi aentsun ayurkamamniaiti tu enentaimiarmiayi. Tu enentaimiainia asar Jesusan uunt anaikiamu awajsartasar wakeriarmiayi (Juaṉ 6:​14, 15). Uuntri anaikiamka nisha politicanam pachitkia ayi. Tumaitkiusha ninkia nui pachinkiachmiayi. Yuusa chichamen tawai uuntri anaikiattaj tutai nekaama nainniumani wemiayi. Uuntri amasattaj tutaisha politicanam pachinkiachmiayi. Iisha Jesús turamiania nunisrik turatniuitji.

6. Jesús turamiania aitkiasrik najanattsar wari itiurkamniaitiaj? (Nakumkamusha iista).

⁶ Ame kakarmarmijiai pan najanata tura aents tsuarta yaksha turamchartatji. Turutskesha uunt anaikiamu ajas ekemsat tusar anaitiamkachartatji. Tumaitkiusha yanaksha ni penker yainmakminiaitji tu enentaimsar iincha yaimkiarat turutskesha nuna ajapruawarat tusar utsutmakarminiaitji. Tumaitkiusha Jesuska politicanam pachinkiatniun penke nakitramiayi. Ni junis timiayi: “Wi jú̱ nuṉkanam akupniuchuitjiai” tu timiayi (Juaṉ  17:14; 18:36). Kristu aentstikia Jesús turamiania aitkiasrik iisha turatniuitji. Iikia Yuus anaikiamu uunt ajas eketeana nu yayaji tura niniu chikich aentscha ujainiaji nuyasha nu tati tusar Yuus seaji (Mat. 6:10). Jesús panjai ayurkamamiania nuna wari nekaamniaitiaj nu nekaatai.

JESÚS AENTSKA NAJANACHMINIAN NAJANA PANJAI AYURKAMAMIANIA NUNA WARI NEKAAMNIAITIAJ

7. a) Jesús warinia aentska turachminian turamia? b) Jesusa unuiniamurisha wari tiarmia? (Juaṉ 6:​16-20).

⁷ Jesuska aentsun ayurkama amik ni unuiniamuri armiania nunaka kanunam enkemprarum Capernaumnum waketkitiarum tinia ninkia uunt anaikiamu awajtusarain tusa nainniumani ninki wemiayi (Juaṉ 6:​16-20 aujsata). Jesusa unuiniamurinkia kanunam enkemprar waketainiai nase chichimi tampa tampa ajamiayi. Tumamunam Jesús nayantsanam wekas winimiayi tura Pedron chicharuk amesha wekasam winitia timiayi (Mat. 14:​22-31). Jesús kanunam enkempramtai nase ajamuka mash menkakamiayi. Ainis turunamtai Jesusa unuiniamurinkia junis tiarmiayi: “‘Nekas Ámeka Yusa Uchirí̱nme’ tiármiayi” (Mat. 14:33). a Urukamtai ainis tiarmia nuna Marcos junis timiayi: “Ni unuiniamuri̱nkia enentái̱ kiritia áintsaṉ ásarmatai Jesus yurumkan núkap awajsámia núja̱i̱sha núnaka paant nekaatniun tujintkiarmiayi” (Mar. 6:​50-52). Jehová Jesusan aentska najanachminia turat tusa kakarman susauyania nuna ni unuiniamurinkia paant nekaatniun tujintiaruyayi. Arusan Jesús pankan nukap amajsamiania nuna awakeasan aujmatas jintinkratamiayi.

8, 9. Untsuri aentscha urukamtaiya Jesusan wainkiatai tusar weriarmia? (Juaṉ 6:​26, 27).

⁸ Jesús untsuri aentsun ayurkamamiania nuka ayatek yurumattsaran tura tsuamartaj tusa ninkia apapeyarmiayi. Kashi tsawarar Jesús tura ni unuiniamurijiai wearu asarmatai nisha kanu Tiberianmaya wininiajai enkemprar Capernaumnum Jesusan eaktai tusar wearmiayi (Juaṉ 6:​22-24). Jesús Yuusa chichamen etsereakui anturkataj tusan turawarmia? Atsaa. Jesús yurumatniun sukartakui yurumatai tusar wekaiyarmiayi. Urukamtai ainis taji?

⁹ Capernaúm nuntumas untsuri aents Jesusjai inkiukarmiania nui wari nankaamasmia nu nekaatai. Jesuska atumka aya apatkun surusat tusarum eatearme timiayi. “Aya paṉ yuárum jémaru asarum e̱a̱ttrume. Ju̱yá̱ yurumak amuukatin asamtai ti enentáimtuschatnuitrume̱. Antsu amuukashtin yurumak tuke iwiaaku pujustinian amaana nu takarsatniuiti” Jesús tu timiayi (Juaṉ 6:​26, 27 aujsata). Winia apar nu yurumkan amastattrume Jesús tu timiayi. Amukashtin yurumkaka tuke iwiaku pujustinian amastattrume Jesús ainis tutai enentaimsar juakcharmiashia. Nu yurumkasha warinkiya tura nu yurumkan yuataj tusar wariniak turawartiniuya?

10. Judío aents tuke iwiaku pujustaj tuiniakka warinia turawartin armia?

¹⁰ Judío aentska warinkisha turawakrin nu yurumkanka amaschartajiash tu enentaimiarmiayi. Moisés akupkamu chichamnum turu wearmiania aitkiasrik turashtiniashitiaj tu enentaimiarmiayi. Tumaitkiusha Jesuska junis timiayi:  “‘Yus akupta asa Winia enentáimtursarat tusa wakerawai’ tímiayi” (Juaṉ 6:​28, 29). Tuke iwiaku pujutaj takurkia Jesuska nekas Yuusa uchirinti tu enentaimsatniuitji. Jesús nuik nuna aujmattsauyayi (Juaṉ 3:​16-18, 36 TNM). Tuma asa tuke iwiaku pujustaj tusar wari itiurkatniuitiaj nuna ataksha aujmattsamiayi (Juaṉ 17:3).

11. Judío aentska aya apatkun yuawartaj tusar wakeruinia asar wari tiarmia? (Yus Kanta 78:​23-25).

¹¹ Judío aentska Jesús ainis takui “¿Aentsti tujintiamuka ii iisar Ámin nekas enentáimtustin warí túrattam?” tu tiarmiayi (Juaṉ 6:30). Ninkia Moisés pujumiania nu tsawantin ii apashrin Yuus manan yuawarat tusar susarmiania nuna tatsuash tu enentaimsarmiayi (Neh. 9:15 TNM; Yus Kanta 78:​23-25 aujsata). Ninkia pankan yuawar ejemartinian nunak enentaimiarmiayi. Judío aentska Jesús nayaimpinmaya apatkun aujmattsamiania nuisha wari takum ainis tame tusarkesha aniascharmiayi (Juaṉ 6:32). Ninkia aya yuruma ejemartinniak enentaimsar pujuinia asar Jesús Yuusa chichamen jintinkratkuisha paant nekaatniun tujinkiarmiayi. Iisha nuna aujmatna nujaisha wari nekaamniaitiaj?

NEKASKA EMKA WARINMA ENENTAIMSATNIUITIAJ

12. Jesussha warinia jintintramameaj?

¹² Juan akankamu 6 nui aujmatna nu iincha warinia jintintrameaj? Jehovanu nekaatin tura ni chichame umiktincha emka enentaimsatniuitiajnia nuna jintintramji. Jesussha iwianchin nakitramiania nui nunak jintintramamiaji (Mat. 4:​3, 4). Tura nainnium jintinkratuk Yuusna nu nekaatniuitiajnia nuna jintinkratmiayi (Mat. 5:3 TNM). Tuma asamtai winia iwiakmaruin Yuusna nuna imiankaska najanatniun enentaimiajak tu enentaimsatniuiti.

13. a) Yurumatin yajauchiashit? b) Warinma enentaimsar pujutniuitiaj? (1 Kurintiunam 10:​6, 7, 11).

¹³ Yuus ii utsumamun sean amasakrin ti waratainti (Ruk. 11:3). Ti takakmasar yurumatniunka umartinniaka Yuus amasuiti Yuusa chichame tawai (Ecl. 2:24 TNM; 8:15 TNM; San. 1:17). Utsumajnia nuna takustin penkeraiti tumaitkiusha Yuusna nu najanatin imia penkeraiti. Apóstol Pablo Kristu aentsun waritmia nuna nekaatai. Sinaí nainnium nuni ayamach pujusar Israel aents urukawarmia nuna Pablo aujmattsamiayi. Israel aentsna aujmatuk junis timiayi: “Iikia ni wakeriarmia áintsar yajauchia nu wakerukchatniuitji” (1 Kurintiunam 10:​6, 7, 11 aujsata). Israel aents atsuu nunkanam pujuarmiania nui Jehovaka aentska najanachminian najana ayurkamamiayi tumaitkiusha ninkia aya yurumatniunak enentaimiainia asar yajauchia nuna turawarmiayi (Wek. 11:​4-6, 31-34). Tura aintsan Israel aents iruntrar yurumainiak umuiniak waakan kurijiai najanawar tikishmatrarmiayi (Jiin. 32:​4-6). Jerusalén emeskamu atiniuyayi, nuka 70 uwitin nankaamastiniuyayi. Nu tsawan jeatsain Pabloka Kristu aentsun aneararat tusa Israel aents nankaamasmarin aujmattsamiayi. Iisha amukatin tsawan nuntumsamunam pujaji, tuma asamtai Pablo timiania nui enentaimsar pujaji.

14. Yuus papii shiiram nunkanam yurumkasha uruku artatui ta?

¹⁴ Yuus seakrum yurumak sukartusta tu seatarum Jesús timiayi tura nuyasha  nayaimpinmasha tura ju nunkanmasha ame wakeramna aintsan najannat tu seatniuncha jintintramameaji (Mat. 6:​9-11). Nu mash uminiakui uruksan ati? Yuus papiikia turamji yurumkasha ti penker artatui tawai. Isayas 25:​6-8 nui yurumak penker iruntiatui tawai. Yus Kanta 72:16 nuisha aujmatui nain irunmanum arak nukap iruntiatui tawai. Amesha nu tsawantai ame wakerutai iniareakum itiur enentaimminiaitiam? Shuinia aramush mukuneakum itiur enentaimminiaitiam? (Isa. 65:​21, 22). Nu tsawantinkia ii wakeramu takuttaji.

15. Aents jakaru nantakiarsha warinia nekaawartata? (Juaṉ 6:35).

¹⁵ (Juaṉ 6:35 aujsata). Jesús aentsun pankan namakan nukap amajas ayurkamamiania nu aentscha urukawartin? Jakaru nantaktin jeamtai nu aentscha wainkiartajiash? Iwiaku pujuarmiania nui Yuusan umirkacharuitkiuisha nantakiarminiaiti (Juan 5:​28, 29 TNM). Jesús junis timiayi: “Witjiai nu apatuk nekas iwiaakman súana nu. Winí̱ winiana nú shuar peṉké tsukamáshtatui” Jesús timia nuna nekaawartiniaiti. Jesús iininiapi jakaitia tu enentaimsartiniaiti. Shiiram nunkanam aents jakaru nantakiaruka tura uchisha akiniawaruka Yuusnan unuimiarartatui. Nu aents iisha unuiniakrikia ti warashtajiash. Shiiram nunkanam yurumak penker iruntiatna auncha nankaamas Jehovajai shiir amajnaisar pujusarat tusar aents yayamuka timia penker atatui.

16. Chikich akankamunmasha wari nekaattaj?

¹⁶ Juan akankamu 6 nui ishichik unuimiatraji. Nu akankamunmank tuke iwiaku pujustin uruksait nuna Jesús jintintiamiayi. Judío aents nuna nekaattsar wakerukarmiayi. Iisha yamaisha nu nekaattsar wakeraji. Chikich akankamunam Juan akankamu 6 nunanu nekaattaji.