1, 2. Wari akui utminiait?

 Ya utchait. Mashiniu utniuitji. Warakrisha uttainti. Watskea uchi akiniamtai ya utchait. Penker nankaamasma enentaimsarsha uttainti. Ii amikri yaunchu waintiai wainkiar uttainti.

² Nekaska itiurchat nekapeakur uttainti. Yaksha anankruamtai, tsuamarchamnia sunkur achiakeakur, ii shuarkesh jakamtai uttainti. Ainis nankaamakrikia Jeremías enentaimsamiania ainis iisha enentaimsamniaitji. Jeremías Babilonianmania aents Jerusalenkan amukarmatai kuntuts enentaimpramiayi. Jeremías junis timiayi: Winia jiruinia neajik entsa jiniana timiainiawai. Mijiatsuk uteajai (Lam. 3:​48, 49 TNM).

3. Jehovasha waitiakrin itiur nekapea? (Isaías 63:9 TNM).

³ Warinmansha utman Jehová nekawai. Yuusa chichame tawai Jehovaka ii waitiakrin waitiajnia nuna nekawai tuma asa yainkiata tutaisha anturtameaji (YKan. 34:15). Jehovaka aya antuu pujatsui antsu kuntuts pujakrin nisha aintsan kuntuts nekapeawai. Tuma asa warik yainkratniuiti (Isaías 63:9 TNM aujsata).

4. a) Yuusa chichamen yananuna aujmatea? b) Ni nankaamasarmia nu aujsar wari nekaattaj?

 ⁴ Yaunchuk Yuusan umirin armiania nu waitiainiakui Yuus itiur nekapmia nuna Yuusa chichamen aujmateana nu nekaatai. Ana naartiniu, Davidnia nuya Ezequiasna aujmattsatai. Urukamtai utiarmia, Jehová itiur yainkiarmia, ii shuarkesh jakamtai, yaksha anankruamtai, tsuamarchamnia sunkur achiakeakur, yaunchuk nankaamasarmiania nu itiur yainmakminiaitiaj?

II SHUAR JAKAMTAI UTKURIN JEHOVÁ WAITMAJI

5. Ana itiur nekapmia?

⁵ Ana waitiak itiurchat nekapeak ti utmiayi. Ni aishrinkia chikichniash nuatkauyayi, Peniná naartinian. Ninkia Anan kajermiayi. Anaka uchin takuschamniuyayi antsu Peninaka ninkia uchin nukap takumiayi (1 Sa. 1:​1, 2). Tuma asa Anan wishikmiayi. Amesha aintsam nankaamakmeka warintiak enentaimsam. Ana ti kuntuts pujak utuk yurumchauyayi (1 Sa. 1:​6, 7, 10).

6. Ana shiir nekapramij tusa warinia turamia?

⁶ Ana kuntuts puja asa shiir enentaimpramij tusa Yuus enentaimtutainiam wemiayi. Nui jea “Ánaka tí kuntuts enentáimias útkamaikia Uunt Yusan seamiayi”. Yuusan chicharuk waitiamur iirtusta timiayi (1 Sa. 1:​10, 11). Anaka ni itiur nekapmia nuna Jehovan mashiniu ujakmiayi. Jehovaka Ana utean wainiuk nisha kuntuts enentaimpramiayi.

7. Ana ni itiur nekapmia nuna Jehová sea itiur enentaimpramia?

⁷ Ana Yuusan sea tura Elí chicharkam itiur nekapramia? Yuusa chichame tawai: “Nuya̱ṉka waketki̱ yurumá atakka kúntutska pujuschamiayi” (1 Sa. 1:​17, 18). Chikich nuwa kajeramsha tura wishikiamsha ni itiurchat nekapmarin Jehovan ujaku asa shiir enentaimmiayi. Jehovaka Ana waitian wainiu asa ni taman anturkamiayi nuyanka Anaka ajaprukmiayi (1 Sa. 1:​19, 20; 2:21 TNM).

8, 9. Israernum 10:​24, 25 iruntramunam urukamtai wetiniaitji ta? (Nakumkamusha iista).

⁸ Iisha wari unuimiatramniaitiaj. Itiurchat wainkiam kuntuts pujamek. Amee shuarkesh turutskesh amikrumkesh jakamtai kuntuts pujatsmeash. Kuntuts puja asam yajainsha aujmattsatin nakitiatsmeash. Ana kuntuts pujayat Yuus enentaimtutai  jeanam wemiayi nui Jehová ikiakarmiayi. Amesha kuntuts pujayatam iruntramunam weakminkia Jehová ikiakatmartatui (Israernum 10:​24, 25 aujsata). Nuinkia Yuusa chichame jintinkratainiakui kakaatainti. Yuusa chichame jintinkratma antukar kuntuts enentaimmiaka iniaisar shiir enentaimprattaji. Itiurchat warik nankaamachkuisha shiir enentaimprattaji.

⁹ Iruntramunam ii yachi ii umai ikiakatmainiakrin kakarminiaitji (1 Tis. 5:​11, 14). Precursor especial ni nuari ajakar itiura enentaimpramia nu nekaatai. Ni junis tawai: Nuarun aneakun tuke uteajai. Yajainsha aujmattsatniun nakitniuitjiai. Iruntramunam jintinkratma antakun kakaki weajai. Iruntramunam eweje takuiyar aujmatainiakui tura yatsur umar ikiakatainiakui shiir enentaimiajai. Kuntuts pujaknasha iruntramunam jean shiir enentaimniuitjiai. Iruntramunam weakrinkia Jehová ii yachin ii umain yainkratkarat tusa utsuwiti.

10. Kuntuts enentaimiakrikia Ana turamia aintsan iisha wari turatniuitiaj?

¹⁰ Anaka itiurchat pujamurin Jehovan ujak shiir enentaimpramiayi. Amesha 1 Pítiur 5:7 tana nunismek turamniaitme. Jehová nekas anturtuktatui tu enentaimsam seamniaitme. Ii umai ni aishrin kasa maawarmatai itiur nankaamasmia nuna aujmateawai: Wiiya junisan nankaamastiniuj tu enentaimmiajai. Umachin wari yainmia? Ni junis tawai: Jehová yainkiata kakarmij tu seamiajai. Wi itiur nekapmia nuna ujaktinian jeachmiajai tumaitkiusha Jehovaka nekartimiayi. Ti kuntuts pujaknaka tura itiurchat nekapeaknaka shiir enentaimsamij tusan Yuusan sea wemiajai. Nuna turanka shiir tura kakaram enentaim wemiajai. Jehová itiur nekapeam nu mash ujakmaka nisha itiur enentaimiam nuna nekartamui tura nisha kuntuts enentaimniuiti. Kuntuts enentaimmiaka warik menkachuiti tumaitkiusha Jehová shiir enentaimpratniun yainmaktatui (YKan. 94:19; Jir. 4:​6, 7). Nuyasha katsuntra asakmin Jehová yainmaktatui (Isr. 11:6).

YAKSHA ANANKRUAMTAI UTKURIN JEHOVÁ WAITMAJI

11. David aents waitkiainiam itiur nekapmia?

¹¹ David itiurchat nankaamak waitiak utmiayi. Nukap kajeriarmiayi ni shuarsha tura amikrisha anankainiasha irunmiayi (1 Sam. 19:​10, 11 TNM; 2 Sa. 15:​10-14, 30). “Winia enentái̱rja̱i̱ṉ uutu asan kakarmachu nekapeajai. Nu arant tuke kashi ti útkun peakrunka winia nea̱jkirja̱i̱ iniji̱á̱jai. Winia kúntutsruja̱i̱ winia jí̱ruka úu uutu yawe̱kní̱ núnisaṉ winia kajertuinia nuja̱i̱ winia jí̱ruka íi ii ju̱ju̱kní̱” David tu timiayi (YKan. 6:​6, 7). Aents Davidtian waitkiasarmiayi tuma asa ti utmiayi.

12. Yus Kanta 56:8 nui David warintia enentaimmiayi ta?

¹² Davidkia itiurchat wainkiusha Jehová anentawapi tu enentaimmiayi. Tuma asa junis timiayi: “Warí Uunt Yus wi útman anturtukai” (YKan. 6:8). Tura chikichniash Yus Kanta  56:8 (aujsata) nui shiir chichaman aarmiayi. Salmo papii aujkur Jehová anenmajnia nu tura ii waitiakrin nisha kuntuts enentaimmia nekaattaji. Jehovaka ii utmarin neajkin mutiniun enkeana tura papiinium aana aintsaiti David timiayi. Nekas Jehovaka wi waitiamun nekawai tura kajinmatrukchattawai nuyasha waitkiarainiakui itiur enentaimmiaj nunasha nekarttawai tu enentaimmiayi.

13. Yaksha anankruamtai warinma enentaimsatniuitiaj? (Nakumkamusha iista).

¹³ Iisha wari unuimiatramniaitiaj. Yaksha anankramakait. Ame aishrumkesh turutskesha nuarmeksha nuyanchuka anajmarmarmeksha ikiurmiakmatai kuntuts pujamek. Amee shuarkesh turutskesha amikrumkesh Jehovainia aran ajas pujawak. Ii yachi ni nuari ikiukmia asa nuya anankamu asa junis timiayi: Autsuk aitkiaratti tu enentaimchauyajai. Anankruamtai ti kajekmiajai nuya kuntuts enentaimmiajai. Yaksha anankramamtai itiur kakarminiaitiam? Jehovaka penke ikiukratchana nui enentaimsata. Ii yachi junis timiayi: Aentska ikiukratniuiti antsu Jehovaka penke ikiukratchaiti tu enentaimmiajai. Warinsha nankaamakuisha ninkia tuke yainmaktatji. Jehová umireamka penkesha ikiurmakchattaji (YKan. 37:28). Jehová imiankaska nekas anenmawai. Anankramawaruitkiuisha nuinki enentaimtsuk Jehová anenmana nui enentaimsata (Rum. 8:​38, 39). Yaksha itiurchat amajtameakuisha Jehová anentawapi tu enentaimsata.

14. Salmo 34:18 TNM wari tawa?

¹⁴ Yaksha anankramaitkiuinkia Salmo 34:18 TNM (aujsata) yainmakminiaiti. Papii Yuusa chichame aujmatu junis tawai: Majat pujuiniaka aya nuinki enentaimia puju ainiawai. Ainis nekapainian Jehová itiur yainiait. Salmo 34:18 TNM tawai Jehovaka anankamu ainiana nunaka penkesha ikiuchuiti. Apa ni uchiri utean miniakas atsanniuiti. Jehovasha aintsan ii waitiakrin warik yainmaji. Yuuska waitiakur itiurchat enentaimiakrin shiir enentaimsat tusa wakeriniaiti nuyasha aruma nui penker pujuttajnia nuna jintintramji tura nu nekakur itiurchatcha katsunteaji (Isa. 65:17).

 JAKUR UTEAKRIN JEHOVÁ WAITMAJI

15. Ezequiassha urukamtai utmia?

¹⁵ Ezequías 39 uwi takumiania nui janinsamiayi. Yuuska niniu etserin Isaiasan Ezequías chicham ujauta tusa akuptukmiayi. Isaías Ezequiasa jeari chicharuk jaamna nujai jakattame timiayi (2 Ak. 20:1). Ezequiaska penkesha tsuamarchattajai tu enentaimiak ti utmiayi nuya Jehovan yainkiata tusa seamiayi (2 Ak. 20:​2, 3).

16. Jehová Ezequiasan utun anturak itiur yainmia?

¹⁶ Jehová Ezequías seam anturak nuya utun wainiak junis timiayi: “Ame seatmena nuna anturkajme tura ame nea̱jkirmincha wainkiajai. Nekaata tsuártatjame”. Jehová Ezequiasa waitnentar jakashtatme timiayi tura Asirianmaya suntar awaktamkairum tusan yaintattajrume timiayi (2 Ak. 20:​4-6).

17. Jehovasha ti jaakrincha itiur yainmaj? (Yus Kanta 41:3; Nakumkamusha iista).

¹⁷ Iisha wari unuimiatramniaitiaj. Ti jaakum tsuamarchattajapi tu enentaimiamek. Tsuamarchattajapi tu enentaimiakmeka utmaikiash Jehová seata. Yuusa chichame junis tawai: “Nisha ii Aparí̱nti. Iin waitnentramaji. Tura Nisha ii Yúsri̱nti. Tuma asa iin tuke atsaṉtamji”(2 Kur. 1:​3, 4). Yamaiya juinkia Jehovaka sunkurnasha tsuarmarchattaji antsu ayap ajastinian tura kakartinian yainmaktatji (Yus Kanta 41:3 aujsata). Yuuska ni kakarmarin amakrin kakartatji tura shiir enentaimsattaji nuyasha penker enentaimsar najanatniuncha yainmaktatji (Neka. 18:14; Filip. 4:13 TNM) Tura aintsan sunkurka atsuttawai turamji (Is. 33:24 TNM).

18. Amesha itiurchat pujakum Yuusa chichame tua aujniuitiam? ( Jehová ni chichamejai ikiakatmaji tana nui iista).

¹⁸ Ezequiasan Yuus timia nu ikiakarmiayi. Iincha aintsan Yuusa chichame tana nu ikiakatmarminiaitji. Itiurchat pujakur kakartin Yuusa chichame awai (Rum. 15:4). Ii umai Africanmaya cáncer sunkur achiakme tutai ti waitniuyania nu nekaatai. Ni junis tawai: Itiurchat nekapeamu asakarchamniaitkiuisha Jehová yainmakrin katsuntrattaji. Yuus papiinium Isaías 26:3 TNM tana nu ikiakatniuiti. Amesha itiurchat pujakum Yuusa chichame tua aujniuitiam.

19. Ukunmatai itiur pujuttaj?

 ¹⁹ Ju nunkanam itiurchat irunna nu amukatin penke ishichik ajasu asamtai itiurchatka nuran ajaki weawai. Yaunchuksha Ana, David tura Ezequías ti kuntuts pujuiniakuish Jehovasha kuntuts enentaimmiayi nuyasha yainmiayi. Iisha kuntuts pujakur uteakrin Jehovasha kuntuts pujawai nuyasha yainmaji. Tuma asamtai itiurchat pujakmeka itiur nekapeam nu Jehová ujakta. Nuyasha ame yatsumjiai ame umaimjiai shiir amajnaisam pujustin iniaisaip. Kuntuts pujakmeka kakartasam Yuusa chichame unuimiatrata. Kuntuts pujamu katsunteakminkia Jehová yainmaktatui. Uruma nuinkia Jehová kuntuts pujakur utmash atsuttui tawai (Apu. 21:4). Nunka shiiram ajasmatainkia warakur uttiatji.