1. Nukap aentscha tuke iwiaku pujustinian itiur enentaimtin ainia?

 Nukap aents warik sunkurmakaij tusar nankamas warinkish yucha ainiawai tura ejercicioncha tuke najanin ainiawai. Ainis turuiniaksha tuke iwiaku pujutniuitjiai tu enentaimcha ainiawai. Tura chikichkia uuntach ajasnaka waitsamniaitjiai tu enentaimiainia asar tuke iwiaku pujustinniaka wakerichu ainiawai. Tumaitkiusha Juan 3:16 TNM tura 5:24 nuisha tana aintsan Jesuska tuke iwiaku pujustinian aujmattsamiayi.

2. Juan akankamu 6 nuisha tuke iwiaku pujustinniasha wari ta? (Juaṉ 6:​39, 40).

² Jesús panjai tura namakjai untsuri aentsun ayurkamamiayi. a Ainis turamiania nuka ti penkerauyayi tura kashi tsawar timiania nusha ti penkerauyayi. Untsuri aentsun Jesús ayurkamamiania nu aentska Jesusan apapekiar Capernaumnum jeawarmiayi, tura nui jeawarmatai Jesús jintinkratuk aentska nantakiar tuke iwiaku pujuarminiaiti tu timiayi (Juaṉ 6:​39, 40 aujsata). Watskea amee shuar turutskesha amikrumkesha jakaruana nui enentaimsakia. Jesús timiania aintsan nukap aents jakaru ainiana nuka nantakiartatui. Amesha amee shuarmijiai tuke iwiaku pujumniaitme. Juan akankamu 6 nui Jesús timiania nuna nukap aents penker nekaatniun tujintin ainiawai. Jesús timiania nunanu tishipsar nekaatai.

3. Juaṉ 6:51 nuisha Jesús niniun warinia aujmattsamia?

 ³ Jesús ayurkamamiania nui aentska Jehová Israel aentsun atsuu nunkanam manan ayurkamamiania nui enentaimsarmiayi. Yuusa chichamenka mananka nayaimpinmaya yurumak tawai (YKan. 105:40; Juaṉ 6:31). Jesuska manan pachis jintinkratamiayi. Mananka Yuus sukartusmiayi tumaitkiusha manan yuawarmiania nuka mash jakarmiayi (Juaṉ 6:49). Jesuska witjiai nayaimpinmaya yurumkaka ainis timiayi tura nuyasha tuke iwiaku pujutai yurumkaitjiai tusha timiayi (Juaṉ 6:​32, 33, 35). Jesuska manajai metekchaitjiai nunasha timiayi. Jesús junis timiayi: “Wikia nayaimpinmaya̱ tara iwiaaku apatkuitjiai. Nu apatkun shuar yúakka tuke iwiaaku átiniaiti” tu timiayi (Juaṉ 6:51 aujsata). Jesús ainis takui judío aentska wariniak takun tusha ta tu enentaimsarmiayi. Wikia manancha iniankasaitjiai Jesús takui urukamtai tusha ta tu enentaimiarmiayi. Jesuska paant nekaawarat tusa “Nu apatkun Wi susattaj nusha winia aya̱shruiti” tu timiayi. Jesussha warinia takun ainis timia? Nu anintramu penker nekaatniuitji. Nu turakrikia iisha tura ii shuarsha urukamtaiya tuke iwiaku pujuarminiaitiaj nuna paant nekaattaji. Jesussha warinia takun ainis timia nu nekaawartai.

IWIAKU APATKUKA WINIA AYASHRUITI

4. Jesús timiania nuna antukarsha urukamtaiya awakmamkarmia?

⁴ Winia ayashrun sukartustajna nujai aents tuke iwiaku pujuarminiaiti Jesús ainis takui aents nui pujuarmia nuka wariniak ta tu enentaimsar awakmamkarmiayi. Nekasan Jesusa ayashi yuattaj tura yukartin achattajik tu enentaimsacharmiashia (Juaṉ 6:52). Tura Jesús chichaak: “Winia aya̱shur yúachmeka tura winia numpar umarchamka nekas iwiaaku pujatsrume” tu tiarmiayi (Juaṉ 6:53).

5. Jesussha numpar umartarum tusayash ainis timia?

⁵ Noé tsawantinkia Jehová naman numpartiuk yuashtiniaitrume tu timiayi (Náṉ. 9:​3, 4). Tura nu chichamnak Moisés akupkamu chichamnumsha sukartusmiayi. Yaksha namanken numpentiuk yuakuinkia maawartin armiayi (Lev. 7:27 TNM). Moisés akupkamu chichamnum amiania nuna Jesussha awakeasan timiayi (Mat. 5:​17-19). Tuma asa Jesussha judío aentsun namankur yuatarum tura numpar umartarum nunaka penkesha tichamniuyayi. Tuke iwiaku pujuartasa warinia turawartiniuya nuna Jesuska jintinkratattsa wakerimiayi (Juaṉ 6:54).

6. Jesussha apatak aujmattsamiayi urukamtai ainis taji?

⁶ Jesuska aya apatak aujmatuk ainis timiayi. Jesuska tuke apatak jintinkratniuyayi tuma asa Samarianmaya nuwancha junis timiayi: “Antsu Wi súajna nú entsan umarka atakka peṉké kitiamchattawai. Antsu nu entsaka ni enentái̱n púkuni̱ya̱ ántsaṉ tuke pajamtitiawai tura nuja̱i̱ tuke iwiaaku pujustatui” tu timiayi (Juaṉ 4:​7, 14). b Jesús ainis takui aya entsan umar tuke iwiaku pujustatui tusanka tichamiayi. Junisan Jesús namankur yuatarum numpar umartarum timiania nuka ayatik apatak chichasmiayi.

 JESÚS APATAK AUJMATTSAMIANIA NUNA WARI NEKAAMNIAITIAJ

7. Juaṉ 6:53 Jesús timiania nu chikitcha warintia enentaimin ainia?

⁷ Juaṉ 6:53 Jesús timiania nuna ni jakamu enentaimtamunam wari itiurkartiniuya nunak aujmattsamiayi tu tiniush iruneawai. Nuik Jesús aujmattsamiania nunak timiayi tu enentaimin ainiawai (Mat. 26:​26-28). Nu aentska Jesusan jakamu enentaimtamunam pan yuatniuitji tura vinoncha umartiniaitji tu enentaimin ainiawai. Urukamtai nusha penker nekaatniuitiaj? Tuke uwitin untsuri aents ashi nunkanmaya Jesús jakamu enentaimtustai tusar irunniuitji tuma asar penker nekaatniuitji. Juaṉ 6:53 tana nu nuya Jesús pankan tura vinon iniankeak timiania nujai urukamtai metekchait nu nekaattaji.

8. Juan akankamu 6 nui Jesús timiania nusha yana timia? (Nakumkamusha iista).

⁸ Juaṉ 6:​53-56 nui tana nusha tuimpia tura urutainia nunasha timia? Nu emka nekaatai. Jesuska Galileanam pujus 32 uwitin nunaka timiayi. Jesús jasattuk ajas ni unuiniamurijiai yurumamiania nuka chikichik uwi ajasmanum nuna timiayi. Tura nuyasha Juan akankamu 6 nui Jesús timiania nusha yana timia? Judío aents Galileanam pujuarmiania nuka Yuusna nekaatniun wakerichiarmiayi aya yurumatniunak enentaimiarmiayi (Juaṉ 6:26). Jesús  jintinkratkui penker nekaatniun tujinkiar Jesusan nemarsatniun iniaisarmiayi (Juaṉ 6:​14, 36, 42, 60, 64, 66) Ainis nankaamasmiania nuka Jesús jasattuk ajas ni unuiniamurijiai yurumamiania nu wari nankaamasmia nujai apatkar nekaatai. 33 uwitin Jesús ni unuiniamurijiai pankan yuawarmiania nui Jesús nu tsawantin timiania nuna paant nekaacharuitkiusha ajapa ikiukcharmiayi. Jesusa unuiniamurinkia Jesuska nekas Yuusa uchirinti tura nayaimpinmaya ju nunkanam tawiti tu enentaimiarmiayi (Mat. 16:16). Tuma asamtai Jesuska junis timiayi: “Winia itiurchatrun wáinmiaj nui̱ atumsha Wiji̱a̱i̱ tuke pujumarme” tu timiayi (Ruk. 22:28). Jesuska Juaṉ 6:53 nuinkia uruma nui turunattana nuna taku ainis tichamiania nu paant nekaamniaitji.

JESÚS TIMIANIA NUNA AMESHA WARI NEKAAMNIAITIAM

9. Jesús pankan tura vinon sukartak yajaiya chichaman najanuk ainis timia?

⁹ Jesús ni unuiniamurin ayurkamamiania nuinkia pan levadura apujtuschamun yuawarat tusa suiniak juka winia ayashrun nakumui tu timiayi. Tura vinon suiniak juka yamaram chicham atumjiai najaneajna nuna nakumui timiayi (Mar. 14:​22-25; Ruk. 22:20; 1 Kur. 11:24). Yamaram chichaman Jesús najanamiania nuka ashi aentsjai turachmiayi antsu nayaimpiniam Jesusjai uunt anaikiamu artatna nujai najanamiayi (Isr. 8:​6, 10; 9:15). Jesús timiania nunaka ni unuiniamurinkia ti paantka nekacharmiayi. Jesusa unuiniamurinkia arusan Yuusa kakarmarijiai anaikiamu artiniuyayi. Nuna turawar yamaram chicham najanamunam nui pachitkia ajasaru asar Jesusjai nayaimpiniam pujuartiniuyayi (Juaṉ 14:​2, 3).

10. Galileanam pujus timiania nusha tura ni unuiniamurijiai pujus timiania nunasha urukamtai metekchait? (Nakumkamusha iista).

¹⁰ Jesús ni unuiniamurin ayurkamamiania nui warumchik murikiun aujmattsamiayi. Yama juarkunka warumchik murikniumka Jesusa unuiniamuri Jesusjai yurumawarmiania nu armiayi (Ruk. 12:32). Jesusa unuiniamuri armiania nu tura chikitcha warumchik muriknium pachitkia ajainiaka pankan yuawartiniuyayi tura vinoncha umarartiniuyayi. Nui warumchik muriknium pachitkiainiaka Jesusjai metek nayaimpiniam pujuartatui. Jesús Galileanam aents pujuarmiania nuna timiania nujai metek ni unuiniamurinkia tichamiayi. Galilea nunkanmanka untsuri iruntrar pujuinian timiayi.

11. Jesús Galileanam timiania nuka warumchiniak tichamiayi urukamtai ainis taji?

¹¹ 32 uwitin Jesús Galileanam pujumiania nui pankan amakrattsat tusar iruntrar pujuinian chicharkarmiayi. Ninkia yurumkajaisha nankaamas tuke iwiaku pujustinian yainkiarminiuyania nuna aujmattsamiayi. Nuyasha jakartatna nusha ukunmatainkia nantakiar tuke iwiaku pujuartatui tu timiayi. Jesús ni unuiniamurin pankan vinojai sukartusmiania nui warumchijiai chichaman najanamiania aintsan tichamiayi. Antsu untsuri aentsun tuke iwiaku pujuttarme timiayi. Jesús Galileanam timiania aintsan ashi aents tuke iwiaku pujuarminiaiti. Tuma asa ni junis timiayi: “Nu apatkun shuar yúakka tuke iwiaaku átiniaiti. Nu apatkun Wi susattaj nusha  winia aya̱shruiti. Ashí shuar Yusai̱ iwiaaku pujusárti tusan winia aya̱shrun susattajai’ tímiayi Jesus” (Juaṉ 6:51).

12. Tuke iwiaku pujustai takurkia wari itiurkatniuitiaj?

¹² Yaunchuk pujuarmiania nusha tura ukunmatai akiniawartiniuyania nusha warinkisha turutsuk tuke iwiaku pujuartatui Jesuska Galileanam aents iruntrar pujuinian ainis tichamiayi. Jesús turamiania aitkiasan najanainiana nuke tuke iwiaku pujuartatui timiayi. Nukap aents Kristu aentsuitjiai tiniu ainiana nuka Jesús ju nunkanam ii tumashrin akikmaktasa tamiayi tu enentaimiakrikia uwemprattaji tiniu ainiawai (Juaṉ 6:29). Yama nankamtaikkia Jesuska Yuusa uchirinti tu enentaimiainiasha irunmiayi. Tu enentaimiainiayat arumka ajapa ikiukiarmiayi. Urukamtai ainis turawarmia?

13. Nekas Jesús nemarsatai tuiniakka warinia itiurkartiniuya?

¹³ Jesusan nemar wearmiania nuka Jesús aentska najanachminia najanu asamtai yurumkan sukartakui tura Jesús jintinkratkui ni antuktasar wakeriarmiania nunak shiir antuinia asar nemaras wekai armiayi. Tumaitkiusha Jesuska nekas nin nemarin ainiaka urukua artiniait nuna timiayi. Jesuska aya yurumkanak sukartustasa ju nunkanmanka tachauyayi. Ninkia Jesusan nemarainiakka Jesús jintinkratmiania nuna chikichkimias mashiniun umikiartiniuyayi (Juaṉ 5:40; 6:44).

14. Jesús turamiania nu neka asar warintia enentaimsatniuitiaj?

 ¹⁴ Jesús ni ayashin surumakmatai aentska tuke iwiaku pujuartiniuyayi. Tuma asamtai aentska Jesús nekas ainis turamiayi tu enentaimsatin armiayi. Iisha aitkiasrik tu enentaimsatniuitji (Juaṉ 6:40) Juaṉ 6:53 tana aintsan tuke iwiaku pujuttaj takurkia Jesús ni ayashin surumak ii tumashrin akikmakmiayi tu enentaimsatniuitji. Jesús turamiania nujai ashi aents tuke iwiaku pujuarminiaiti (Ipi. 1:7).

15, 16. Juan akankamu 6 nuisha wari nekaaj?

¹⁵ Juan akankamu 6 nui aujmatna nuka iincha tura ii shuar ainiana nunasha yainmakminiaitji. Juan akankamu 6 nuinkia Jesús aentsun anenana nuna aujmatui. Galileanmanka jainian tsuarmiayi, Yuus anaikiamunun aents nui pujuarmiania nuna ujakarmiayi, tsukamainiancha ayurkamamiayi (Ruk. 9:11; Juaṉ 6:​2, 11, 12). Nuyasha “Witjiai nu apatuk nekas iwiaakman súana nu” Jesús tu timiayi (Juaṉ 6:​35, 48).

¹⁶ Jesús chikich murikiun aujmattsamiania nui pachitkiainiaka Jesús jakamu enentaimtamunam pankan yuachartiniaiti tura vinon umarchartiniaiti (Juaṉ 10:16). Tumaitkiusha Jesús jakamujai nisha tuke iwiaku pujuarminiaiti. Jesús ii tumashrin akikmakmiayi tu enentaimiainiana nuka tuke iwiaku pujuarminiaiti (Juaṉ 6:53). Antsu pankan yuiniana nuka tura vinon umuiniana nuka nayaimpiniam uuntri ajasar pujuarat tusa juukma asar ainis turin ainiawai. Nayaimpiniam weartin ainiana nusha tura ju nunkanam pujuartiniaitiajnia nusha Juan akankamu 6 tana nuka penker nekaatniuitji. Tuke iwiaku pujustaj takurkia Jesús ii tumashrin nekas akikmatramkamiaji tu enentaimsatniuitji.