1, 2. Yuusa chichame tana nuna uchi warinkisha anintruiniakui uchirtin ainiana nusha itiurkartiniait?

 Nukap aents uchi tsakatmartinkia ti takataiti tiniu ainiawai. Uchi takakkumka Yuusna jintintiattsam kakamna nui shiir enentaimiaji (Muis. 6:​6, 7). Uchikia tsakaki wenak Yuusa chichame tana nuna penker nekaattsar warinkisha anintriarminiaiti, nuyasha warimpia yajauchit warimpia penkerait nunasha nekaattsar wakeriarminiaiti.

² Uchi anintruiniakui Yuusnan majat enentaimta asa ainis anintratsuash uchirtin ainiana nu tu enentaimiarminiaiti. Tumaitkiusha uchisha ninki anintrusar warinkisha nekaawartiniaiti (1 Kur. 13:11). Tuma asamtai Yuusa chichame tana nuna warinkish anintruiniakuisha yajauchi enentaimsashtiniaitji. Antsu ninki enentaimsar nekaawarat tusar jintintiawartiniaitji.

3. Ju unuimiatnumsha wari nekaattaj?

³ Ju unuimiatmanumka uchirtin ainiana nu ni uchiri Yuus nekas awai tu enentaimsarat tusa nuya Yuusa chichame tana nusha nekasaiti tu enentaimsarat tusa itiurkartiniait nu nekaattaji. Uchirtin ainiaka ni uchirin urukamtai Yuusa chichame umikiartiniait nuna penker nekaawarat tusa warinia turawartiniait nu nekaattaji. Uchirtinkia uchi ni nekamun chikich aentsu jintiawarat tusa warinia turawartiniait nusha nekaattaji. Urukamtai uchi anintrusartiniait tura uchirtinkia warinia chikichniash turawartiniait nusha nekaattaji.

 ATUMI UCHIRI YUUS NEKAS AWAI NUYA YUUSA CHICHAME TANA NUSHA NEKASAITI TU ENENTAIMSARAT TUSARUM YAINTARUM

4. a) Atumi uchirisha warintia enentaimiarminiait? b) Urukamtaiya ainis enentaimiarminiait?

⁴ Apari Yuusa enentaimtin ainiakui ni uchirisha Yuusa enentaimtin ajastatui tichamniaitji. Ainis asamtai ni uchirisha Yuus nekasash aa tu enentaimiarminiaiti. Turutskesha Yuus papii tana nu nekasashit ainisha enentaimiarminiaiti. Tuit nekasa nu chikichkimsar nekaatniuitji Yuusa chichame ainis turameaji (Rum. 12:1; 1 Tis. 5:21). Atumi uchirisha Yuusnan penker nekaawarat tusarum itiur yainminiaitrum yamaikia nu nekaatai.

5. Atumi uchiri Yuusa chichame tana nuna nekasaiti tu enentaimsarat tusarum itiurkamniaitrum? (Rúmanam 12:2).

⁵ Yuusa chichame tana nuna nekasaiti tu enentaimsarat tusarum yaintarum (Rúmanam 12:2 aujsata). Yuusa chichame tana nuna warinkisha anintrakuinkia ninki unuimiatar nekaat tusarum yaintarum. Índice de las publicaciones Watch Tower tura Guía de estudio para los testigos de Jehová tana nujai yainminiaitrume. Guía de estudio tana nu papiinium La Biblia tana nui Inspirada por Dios tu aarma awai. Nui wari urukamtai Yuus papiikia nekas Yuusa chichamente timiniaitiaj nuna aujmateawai (1 Tis. 2:13). Nuinkia Nínive matsatkamunu unuimiatramniaitrume. Yaunchuka Yuus papiin unuimiat wearmiania nuka nu irutkamuka atsuyayi tiniu armiayi. Tumaitkiusha urum Nínive irutkamu tsainiaru juakun wainkiarmiayi. Nunaka 1850 uwitin wainkiarmiayash tumainti (Sup. 2:​13-15). Nuna wainkiaru asarmatai Niniveniun Yuus papiinium aujmatna nuka nekasaiti taji. Nuyasha La Atalaya noviembre 2021 uwitiniu ¿Lo sabía? tana nui Nínive amukattawai tamasha itiura uminkiamia nunasha nekaamniaitrume. Atumi uchiri ii papiiri najanamu chikich aents unuimiararu papiin aararuana nujai apatkar unuimiatainiak Yuusa chichame tana nuna nekasaiti tiartatui.

6. Atumi uchirisha Yuusa chichamenka nekasa nuna jintinkrateamun paant nekaawarat tusarum itiur yainminiaitrum? (Nakumkamusha iista).

⁶ Atumi uchirisha Yuusa chichamenka nekasa nuna jintinkrateamun paant nekaawarat tusarum yaintarum. Uchirtin ainiana nu ni uchirijiai warinkish najanainiak Jehovanu ni chichamenusha unuiniararminiaiti. Uchirtin ainiana nuka ni uchirijiai museonam jeawar  nui Yuusnanu aujmattsarminiaiti turutskesha kampuniunam wekainiak nuyanchuka Betelnum jeawar nuisha Yuusnanu aujmattsarminiaiti. Watskea Yuusa chichame jintinkratma nekasaiti tu enentaimsarat tusa papiinium turutskesha videonam yaunchuk irunniuyania nunanu aujmattsarminiaiti. Yaunchunia kayanam Yuusa naari aarma peteana nu atumi uchiri jintintiamniaitrume. Nu kayaka Francianam museonam nui awai. Tura nu kayaka moabita tu nekaamuiti. Aintiaku Betel Warwicknium awai. Museonam La Biblia y el nombre divino tana nui nuka wainkiamniaitji. Yuusa chichame tana aintsan kaya moabita naartinniumka Moabnumia uunt anaikiamu Mesá naartin Israel aentsun kajerkamiania nuna aujmatui (2 Ak. 3:​4-8). Atumi uchirinkia ainis apatkar iiniak Yuusa chichame tana nuka nekasain tawai tu enentaimsartatui (2 Crónicas 9:6 TNM nui tana nujai apatkam iista).

7, 8. a) Ju nunkanam irunna nu iisam wari nekaam? Aujmattsata. (Nakumkamusha iista). b) Ashi irunna nuna Jehová najankaiti tu enentaimsarat tusarum atumi uchiri warintia jintiatniuitrum?

⁷ Atumi uchiri Jehová najankamu iisarat tusarum yaintarum. Kampuniunam wekasam turutskesh takakmakum Yuus najankamu chikich chikich ainiaksha aintiaku ainia nusha jintintiata. Najankamu ainiana nu iiyakur nekas neka najankaiti taji. Nunka tura yaki irunna nuna unuimiatin Yuus najankamuka urukamtai tententra aintiaku ainia tusa unuimiatainiak nukape uwi pujursaru ainiawai. Nunka irunna nuna unuimiatin Nicola Fameli junis tawai: Tententramuri nekapmamka metektaku ainiawai nuka la sucesión de Fibonacci tutainti. Yuus najankamu tententra nukap iruneawai: yaasha tentenar ana ainis awiti nukap iruntranka tura tsuntsusha aintsan tententraiti tura nukasha aniun waintiainti nuya kukujsha aniush irunniuiti. a

⁸ Atumi uchiri nunka irunna nuna unuimiatainiam metektaku ainian unuimiatrarminiaiti. Watskea numikia nukap tsarawearman takuwiti, nunaka fractales tiniu ainiawai. Chikicha aintiakusha irunniuiti. Uchirmesha ya najankait nui enentaimiainiakka nekas Jehová najankaiti tu enentaimsartatui (Isr. 3:4). Uchiram tsakaki weakui urukamtai Yuus umirkatniuitiaj nusha jintiatniuitme. Yuuska ni najakrata asa penker pujusarat tusa jintinkratniuiti tu jintiata, Yuusa chichamen iruneana nu jintiatniuitme.

 ATUMI UCHIRI YUUSA CHICHAME JINTINKRATNA NUNA URUKAMTAI UMIRKIARTINIAIT NU NEKAAWARAT TUSARUM YAINTARUM

9. Atumi uchiri Yuusa chichame jintinkratman nekasashit urukamtai tu enentaimiarminiait?

⁹ Yuusa chichame wari yajauchit tura wari penkerait nuna aujmatna nunasha atumi uchiri nusha nekasashit tu enentaimiainiakui urukamtaiya ainis enentaimiainia nusha nekaatarum. Yuus papii tana nuka nekaschaiti tu enentaimiainiakuash ainis enentaimiainia. Turutskesha Yuusa chichame tana nuna penker jintiatniun jeainiachu asarash ainis enentaimiainia. Jehová tana nu umiktincha urukamtai penkerait nuna nekaawarat tusarum Tuke iwiaku papii unuiniartarum. b

10. Atumi uchiri Jehová amikri tuke arat tusarum itiurkamniaitrum?

¹⁰ Atumi uchirisha Jehová amikri tuke arat tusarum yaintarum. Tuke iwiaku papii unuiniakrum nui anintramu tura warinkish apatak aujmatna nujai atumi uchirisha nekassha itiurak enentaimiainia nuna tiarat tusarum yaintarum (Neka. 20:5). Akankamu 8 nuinkia itiurchat nankaamasain tusa ii amikri warinkisha turamminiaitiajnia aintsankete Jehovasha tu aujmateawai. 1 Juaṉ 5:​3, 4 nu aujtusrum Jehovaka ti penker asamtai ni turatarum turameajnia nusha itiurkatniuitiaj tu aniasminiaitrume. Ainis anintrakruminkia atumi uchirisha Jehová anenmajnia nuna paant nekaawarminiaiti (Is. 48:​17, 18 TNM).

11. Atumi uchirisha Yuusa chichame shiir enentaimtiarat tusarum itiurkamniaitrum? (Nekatai̱n Jintinkiartin 2:​10, 11).

¹¹ Yuusa chichame tana nusha itiur yainmaj nuna aujmattsatarum. Yuusa chichame turutskesha texto diario atumi uchirijiai aujeakrum Yuusa chichame tana nusha itiur yainmarum nu aujmattsatarum. Takakmau atinian tura waitrutsuk titinian atumi uchirisha nekainiawak? (Isr. 13:18). Nuyasha Yuusa chichame shiir nekapratniun tura ii ayashi penker pujustinniasha itiur yainmaj nunasha aujmattsamniaitrume (Neka. 14:​29, 30). Ainis aujmatkurminkia atumi uchirisha Yuusa chichame tana nuna shiir enentaimtiarminiaiti (Nekatai̱n Jintinkiartin 2:​10, 11 aujsata).

12. Ii yachi ni nuarijiai ni uchirin itiur jintin ainia?

¹² Ii yachi ni nuarijiai tura ni uchiri natsamaru Ethan naartinjiai Francia nunkanam pujuiniawai. Ninkia ni nuarijiai ni uchirin itiura jintintin ainia nuna aujmatuk junis tawai: Jui Yuus papiinium jintinkrateana nunasha Jehová urukamtai umikiarat tusa wakera. Tura jui tana nujaisha Jehová anenmajnia nu itiur nekaamniaitiaj. Jui tana nu umiachkumka urukamniaitiam. Ainis ii uchirinkia aniniaitji tu tawai. Aniamka Ethan Jehová tana nuna umiktinian wakeriniaiti. Ni apari junis tawai: Jehová tana nuka aents tuinia nujaisha nankaasana nuna ii uchiri nekaat tusa wakeraji tu tawai.

13. Yuusa chichame tana nuna umikiarat tusarum atumi uchirisha itiura yainminiaitrum?

¹³ Yuusa chichame jintinkrateana nuna umikiarat tusarum yaintarum. Watskea unuikiartin ainiana nu papii aujsatarum tusar akupkainti. Tura nu papiiniumka yaksha penkera nuna najanachu ain penkeran tura ainis aarma ainti. Nuna  Jehová itiurak enentaimta ame uchiram tu aniasminiaitme (Neka. 22:​24, 25; 1 Kur. 15:33; Jir. 4:8). Ainis jintiamka atumi uchirisha warinia aujsait nuna unuimiatainiam aujmatuk Yuusnancha aujmattsatin jeawai.

ATUMI UCHIRI YUUSNA CHIKICH AENTSJAI ITIUR AUJMATTSARMINIAIT NU JINTINTIATARUM

14. Natsamaru wariniuna aujmattsatniun ashamminiait?

¹⁴ Natsamaru ainiana nu Yuusna nekainiamun chikich aentsjai aujmattsatniun ashamainiasha irunminiaiti. Warinkisha aya neachma jintraru ainiawai ainis tiniu ainiana aintsachuiti tusar aujmattsatniun sapijmiarminiaiti. Unuikiartinkia warinkisha aya jintraruiti tiniu ainiana nuka nekasaiti tu timiniaiti. Ni nekainiana nuna ashamtsuk chikich aentsun ujakarat tusarum atumi uchirisha itiura yainminiaitrum?

15. Natsamaru ainiasha warintia enentaimsartiniait?

¹⁵ Atumi uchiri Yuuska nekas awai tu enentaimsarat tusarum yaintarum. Atumi uchirinkia Yuus awai tusar aujmattsatniun ashamkachartiniaiti (2 Ti. 1:8). Unuimiaru ainiana nusha iwiaruka aya neachma jintracharuiti tu tuiniash iruneawai. Iwiaru ainiana nu ti penker najankamu asarmatai nuna iiniak juna najankasha awai tu tiniu ainiawai. Tura aintsan natsamaru ainiana nuka chikich ii yachisha Yuus awai urukamtai tu enentaimsaruit nuna nekaawar nish aitkiasan enentaimsarminiaiti. c

16. Atumi uchiri Yuuska awai tu jintinkratat tusarum wari itiurkamniaitrum? (1 Pítiur 3:15; nakumkamusha iista).

¹⁶ Yuusna penker jintiawarat tusarum yaintarum (1 Pítiur 3:15 aujsata). Internetnum jw.org nui Los jóvenes preguntan nui enkemarum ¿Creación o evolución? tana nuna aarma nukap irunui. Nu aarma irunna nu atumi uchirijiai aujsamniaitrume. Nu aujsarum chikich aents Yuus nekas awai tu jintintiattsam warintia timiniaitiam ame uchiram tu aniasminiaitrume nuyasha itiura jintinkratamniait nuna nekapmamsa iistarum. Ame aimjiai Yuusna aujmateakmesha  jianaikiaip tu titia. Yaksha aujmattsatin wakerakuinkia unuimiatraitmena nuna yupichuch jintintiata tu titia. Ame uchirmin ni ai junis timiniaiti: Wikia wainiajna nunak nekasaiti tiniuitjiai, Yuusnaka wainkiachuitjiai tu timiniaiti. Ainis tutai uchirmeka junis timiniaiti: Kampuniunam wekasam jea jeamkamu wainkiainme. Nu jeaka ninki ainis najanachminiaiti. Nu jeanka aents najana asamtai aminiaiti. Aintsan ashi irunna nuna najankasha awai tu timiniaiti.

17. Atumi uchiri Yuusnan yajainsha aujmattsarat tusarum wari turamniaitrum?

¹⁷ Ame uchiram tuinsha pujuiniaksha Yuusa chichamenu aujmattsarat tusa ikiakararta (Rom. 10:10 TNM). Yuusa chichame aujmattsatin juarkittsarkia junis aminiaiti: watskea uchi yama wekakka emkaka wajaki nuya ishichik ishichik wekatan juarniuiti. Aintsan Yuusna aujmattsattsar aents yupichuch nekaamnia aujmattsatniuiti. Uchi natsamaru junis timiniaiti: Aentska warinkish najanainiak yajasmankesh iisar tura chikinkesh iisar najanin ainiana nu nekamek? Ainis ti video ¿Lo diseñó alguien? tana nui irunun iniaktusminiaiti. Tura ataksha junis aniasminiaiti: Aents warinkish najananka paant ajawiti aintsan ashi najankana nu nekaska paant awajsatniuiashitiaj? Ainis turamka ni aisha Yuusna nukap nekattsa wakerukminiaiti.

YUUSNUM TSAKAKI WEARAT TUSARUM ATUMI UCHIRI YAINTARUM

18. Atumi uchiri Yuusnum tsakaki wearat tusarum wari turamniaitrum?

¹⁸ Aentska Yuus atsawai tiniusha irunui (2 Pit. 3:3). Tuma asamtai atumi uchirijiai Yuusa chichame unuimiatkurmeka ninki penker unuimiatrarat tusarum yaintarum. Nu turamka Yuusa chichame tana nuka nekasaiti tu enentaimsartatui. Ame uchirmijiai Yuus najankamu aujmattsatarum. Atumi uchiri Yuusa chichame aarma uminkiana nunasha penker nekaawarat tusarum yainminiaitrume. Uchirmijiai Yuus seakmeka uchirmesha seatiartiniaitrume. Nu turamna nuna Jehová turuki weti tusa yainmaktatrume (2 Crón. 15:7 TNM).