1927 uwitin Chicago (Illinois, Estados Unidos) ayamach irutkamu amanum nui akiniamiajai. Winia umarka Jetha nuya Joy naartin ainiawai, yatsurka ju ainiawai: Don tura Karl. Mashiniuti nekaska emka Jehovanu najanattsar wakerimiaji. Umar Jetha naartinian 1943 uwitin Galaadnum ipiawarmiayi. Winia yatsur Donnaka 1944 uwitin Betelnum ipiawarmiayi. Karl naartinian 1947 uwitin ipiawarmiayi antsu umar Joy naartinianka 1951 uwitin ipiawarmiayi. Wi shuar Yuusnan takakmainiakui wisha nunisnak turamiajai.

Winia aparka nukurjai Yuusa chichame aujin armiayi nuya Yuusan nekaattsa wakerin armiayi tuma asa Yuusa chichamen iincha jintintramawarmiaji. Aparka mesetnum we religionnan nekaatniun penke nakitmiayi. Winia nukurka apar mesetnumia waketki tau asamtai Yuusan yuminkiattsa winia aparun junis timiayi: Iglesianam wetai timiayi. Winia apar chicharuk: Ayu, nemarsattajme tumaitkiusha waniashtatjai timiayi. Ainis tutai urukamtai waniashtatam nukur tu timiayi. Winia apar chichaak: Mesetnum wemajna nui religionka uuntri ainia nu religionkak ainiayat mai maani ajarmiayi timiayi .

Nukurka iglesianam wemanum ii jeen testigo de Jehová tarmiayi. Winia aparun jimiara papii Apocalipsisnan aujmatun susarmiayi, nu papiinkia Luz tiniu armiayi. Nu papiinkia winia aparka aujsattsa wakera asa achikmiayi. Winia nukurka nuna aujtan nankaamamiayi. Chikich tsawantin Yuusa chichame nekatasa wakeratirmeka winitiarum tusa papiinium aarman aujsamiayi. Nuna aujsa asa nui wemiayi. Nui jea juin Yuusa chichame unuimiainia tu timiayi. Nukuach chichaak: Ee, nawantru waniata timiayi. Nuyanka winia nukurjai iruntramunam wetin nankaamamiaji.

Iruntramunam jintinkratuk chichartak Yus Kanta 144:15 aujsata turutmiayi, nui junis tawai: Yuusa umirainiana nuka warasar pujusartatui tawai. Nuna aujsan shiir enentaimpramiajai. Tura chikitcha Yuusa chichame 1 Timoteo 1:11 TNM Yuuska warawiti tana nu nuya Ipisiunam 5:1 Yuus enentaimna ainis enentaimsatniuiti tana nusha ikiakatramiayi. Nuna antukan Jehovanun shiir enentaimsan takakmastiniaitjiai nuyasha  yuminsatniuitjiai tu enentaimpramiajai. Yamaikia tuke nuna turajai.

Yuus enentaimtutai jeaka 32 kilómetros timianu aran Chicagonam amiayi. Ti arantaitkiuisha iruntramunmanka tuke weuyaji. Nui Yuusna nukap unuimiatki wemiajai. Umar chichaktiniun pachinkiamtai nunaka wisha nekaitjiai ewejrun takumai ajakjai tu enentaimsamiajai. Nuyanka wisha iruntramunam aujmattiasan iwiarna wemiajai. Winia umar tura yatsursha Yuusna takakmarmiayi, wisha aintsanak Yuusna takakmastasan kakaki wemiajai. Nuya 1941 uwitin imiannimiajai.

Cleveland nunkanam 1942 uwitin uunt tuakmanum pachinkiamiajna nui enentaimniuitjiai. Nukap aents chikich irutkamunmayasha uunt tuakmanum jintinkratman telefononmani antukarmiayi. Uunt tuakma najanmanum nuni tijiuch ii yachi ii umai tura iisha uunt tuakma antuktai tusar akmakar kanarmiaji. Meset aa asamtai testigos de Jehovan ti kajertan nankaamawarmiayi. Tuma asamtai ii yachi kashi ajasmatai carro luzri ekemakar iniai wearmiayi. Chikichik carronam ekemas iikrattsati tu tiaruyayi. Warinkish nankaamakuinkia warik etserkartiniuyayi. Warichik etserkamtai chikichkia luza carrori nuchamtaik mashiniu warik enkemarartiniuyayi tura bocinancha ichiachkiartiniuyayi. Ainis turuiniakuinkia chikitcha nui pujuinia warichik yaimkiarminiuyayi. Jehová iruntramurinkia iinkia penker iwiarnawiti tu enentaimmiajai. Warinkisha itiurchat nankaamascha asamtai nu tsawantinkia penker kanarmiajai.

Nu tsawantinkia winia nukurka nekas penke sapijmiachmiayi. Jehová yainkiattawapi nuya ni iruntramurinia yainmakartatji tu enentaimmiayi. Nunaka kajinmatchaitjiai.

Uunt tuakma jeatsain nukurka precursora regular ajasmiayi. Tuma asa uunt tuakmanum Yuusna ti nukap takakmainia nunanu jintiniakuinkia amamkes antu pujumiayi. Jea wakettsar nukur chichaak: Precursora ajastinian iniaisaij jea warinsha najanatin yainkiatarum turammiaji. Iisha yaimkiatji timiaji. Kashik yurumtsuk mashiniutiram chikichik tesarma japimprarum ikiuktiarum turammiaji. Unuimiatainiam weakrin winia nukurka japimprarash ikiukiara tusa iis ikiuak Yuusa chichame etserkattsa wuyayi. Winia nukurka ankan pujachiat iincha penker iirmauyaji. Unuimiatainmaya taakrincha iijiai yurumniuyayi. Nuyasha Yuusa chichame etserkattsa weak nemartustarum takuinkia nemarniuyaji. Tuma asar precursor ainia itiur takakmainia nu nekaamji.

16 uwi takumiajna nui precursor ajasmiajai. Winia aparka testigo de Jehovachuitiatcha Yuusa chichame etserumtainkia itiurak nankaamasat tusa nekaattsa wakeriniuyayi. Etserkattsan kakaknasha aents Yuusa chichame unuimiatrattsa wakera  waintsujai timiajai. Nuna antuk mitia juakmiayi. Turamtai winia aparu chicharkun: Yuusa chichamen wi unuiniartajme timiajai. Enentaimia ajasan maaj unuitiurta turutmiayi. Winia aparun Yuusa chichame unuiyatan juarkimiajai tuma asan ti warasmiajai.

Papii La verdad os hará libres tiniu armia nu nujai unuimiat juarkimiaji. Aparun Yuusa chichame unuinia asan ti nekaki wemiajai. Kashi unuimia pujusar winia apar chichartak: Ju papiinium tana nusha urukamtai nekasaiti tu enentaimtam turutmiayi. Ainis turutkui nunaka unuimiatrachu asan chikich tsawantin unuimiatran jintiatajme timiajai. Nuyanka winia apar turutmia nuna ti nukap unuimiatramiajai. Unuimiatu pujusan Yuusa chichame aarma wainkiamiajai. Nuyanka ti unuimiatu asan winia aparun jintiaknasha penker unuiniuyajai. Tuma asar aparjai Yuusna nukap unuimiatki wemiaji. Aparka Yuusa chichame unuimiamurin umiki wemiayi nuyanka 1952 uwitin imiannimiayi.

Jearuinianka 17 uwi takaku wemiajai. Nu uwitinin Jetha a misionera ajasmiayi nuya Donnaka Betelnum ipiawarmiayi. Yatsurjai umarka Yuusnan ti takakmastasa wakerin armiayi, wisha nuna iisan aintsanak turattsan wakerukmiajai. Tuma asan Betelnum takakmasaintiajtai tusan turutskesha Galaadnum wentajtai tusan papii aaran akupkamiajai. Nuna turan Jehová iisti tusan nakasmiajai. Nuyanka 1946 uwitin Betelnum ipiatawarmiayi.

Betelnum pujusan ti takakmasuitjiai tuma asan warinkish najanatniun nekajai. Papii jirtinniash unuimiatraitjiai, kuit juktiniasha nekajai, nuyasha warinkish utsumamu sumaktinian tura warinkish tuinkish akupkatniuncha nunasha unuimiatraitjiai. Betelnumka 75 uwi pujajai, nui Yuusa chichame kashik unuimiatajnia nuna tura nukap jintinkratma antakun shiir enentaimniuitjiai.

Winia yatsur Karl naartinniasha 1947 uwitin Betelnum ipiawarmiayi. Nisha nukap jintintruamiayi. Ninkia ti nukap Yuusa chichamen unuimiatniuyayi tuma asa ti penker jintinkratniuyayi. Wi jintinkratin asan nukap enentai unuimiatramiajai nuna turan yatsurun yainkiata timiajai. Tutai chichartak: Wari enentaiya jintinkratattam turutmiayi. Turutkui aya warinia jintinkratatniuitiaj nunak unuimiatratniuapitjia tu enentaimsamiajai. Yamaisha nunisnak turajai.

 Betelnum pujakrisha Yuusa chichame etsereakrikia shiir enentaimtiatji nuya kakaki wetatji. Nueva Yorknum kashi Yuusa chichame etserkattsar jinkir Yuusnumia yatsurjai nuik nukuach La Atalaya nuya ¡Despertad! ikiurkimiajnia nu iyutai tusar wemiaji. Yuusa chichamejai ikiakainiakur wekaaji timiaji. Nu tutai Yuusa chichamen antuktasa wakera asa waniatarum timiayi. Yuusa anaikiamuri ju nunkan shiiram amajsattana nunanu Yuusa chichamenia nukap aujmattsamji. Chikich tsawantin ataksha iistasa waketrukmiaji, nuinkia ni amikri nukap pujuarmiayi tuma asamtai Yuusa chichame nekaattsa wakerawapi tu enentaimsamiaji. Nuyanka ni aishrijiai imianniar testigos de Jehová ajasarmiayi.

Nuatkattsa wakerimiajai tumaitkiusha nuattsuk 10 uwi pujusmiajai. Nuatkattaj tu enentaimiu asan nuwa penkeran wainkiattsan Yuusan seamiajai tura aintsan nuatkancha itiurak pujustaj tu enentaimiajai.

1953 uwitin Yankees nakurutainiam uunt tuakma najanainiakui wemiajai. Nui nuar atinian Mary naartinian nekaamiajai. Mary winia umarjainkia Galaadnum maimtaik wearuyayi tuma asamtai chikich nunkanam etserutarum tusa akupkarmiayi. Mary Caribenam pujus Yuusa chichamen etsereak shiir enentaimiania nuna tura aentsu yainmia nunasha aujmatmiayi. Maryjainkia Yuusna nukap yaimkiattsar wakerimji. 1955 uwitin nuatnaikiamiaji. Marynkia Jehová surusuiti tajai. Niniu nukap unuimiatraitjiai. Jehovanu warinmansha takakmaksha shiir enentaimias takakmauyayi. Yuusna emka najanniuyayi nuya chikichniasha yainiuyayi (Mat. 6:33). Menaintiu uwi wekasar iikrattsamji. 1958 uwitin Betelnum ipiatmawarmiaji.

Mary nukap jintintruamiayi. Yama nuatnaikiarkia Yuusa chichame kashi kashinin 15 versículos aujniuyaji. Tura aujsar amikiar wari unuimiatraj nu aujmatniuyaji. Mary Galaadnum unuimiatramun nuya misionera pujus nankaamasmarincha aujmatniuyayi. Mary jintintruamia nu penker jintinkratatniun tura Yuusnumia umar ikiakarartinian yainkiamiayi (Neka. 25:11).

2013 uwitin nuarka jakamiayi. Nunka shiiram ajasmatai jakaru nantakiartatna nui nantakmiatai wainkiattsan nakajai. Nu tsawan jeamam Jehovanu nu nukap nekaki wetasan wakerajai tura nekas ni yainkiattawai tu enentaimiajai (Neka. 3:​5, 6). Jehová umirutikia nunka shiiram ajasmatai aya penkera nuke turattajnia nui enentaimsan shiir nekapeajai. Nu tsawantinkia Jehová nekas penker jintinkratu asamtai niniusha nukap nekaki wetatji. Jehovaka nukap jintintrua asamtai tura anenta asamtai ti yuminkiajai.