1, 2. Ya itiurchat amajtamainiakrin waitsamniaitiaj?

 Jesús jintinkratkattsa waje uunt akupniun chicham iwiarturata tusa waketru pujumiania nujai jintiamiayi. Jesús nuwanun aujmatsamtai ni nemarniuka nui enentaimsacharmiashia, nu tsawanka chichamnash penker iwiarcha asarmataiya (Ruk. 18:​1-5). Yamaiya juisha iisha itiurchat wainiu asar nu nuwasha itiurak enentaimsamia tu enentaimsamniaitji.

² Iisha aents nankaamaku enentaimin ainiamunam, shiir ajachunam, kajen ainiamunam puja asar itiurchatka wainkiamniaitji (Ecl. 5:8 TNM). Nekaska ii yachintiat ii umaintiat itiurchat amajtamainiakrin nu penkercha aminiaiti. Tumaitkiusha iin kajertamainiajnia nujaisha nankaamasar itiurchatka amajtamsachartatji. Turasha tunaartin asar itiurchat amajtamiarminiaitji. Jesús tura chikitcha ni nemasri armiania nu itiurchat amajainiam itiurkarmia nu unuimiatrarminiaitji. Ii nemasri itiurchat amajtamainiakrin katsunchatainkiait. Aitkiasrik ii yachi ii umaisha itiurchat amajtamainiakrin katsuntratniuitji. Ii nemasri turutskesha ii yachi itiurchat amajtamainiakrin Jehovasha itiurak nekapniuit? Iincha enentaimturmashitiaj?

3. Itiurchat amajtamainiakrin Jehovaka kajinmatramtsuji urukamtai tu enentaimsatniuitiaj?

³ Jehovaka itiurchat amajtamainiakrincha ninkia nunaka nekawiti. Yuusa chichame junis tawai “Warí Jiuwaka naka wekaana núnaka anenaiti” tawai (YKan. 37:28). Jesús timiayi Yuuska yainmake iniaitiamsattarme timiayi  (Ruk. 18:​7, 8). Yuuska jukerusan waitiamun tura itiurchat amajkartuiniana nunasha warik asa asaku amajsattawai (YKan. 72:​1, 2).

4. Itiurchat awajtamainiakrin Jehovasha itiurka yainmaj?

⁴ Itiurchat amajkartamu mash amumam Jehová yamai itiurchat amajkartuiniakui itiurkatniuit nuna jintintramji (2 Pit. 3:13). Nuran itiurchat ain tusa jintintramji. Tura Jesús itiurkamia aitkiasrik najanatniuncha jintintramji. Tura aintsan Yuusa chichamen itiurchat amajtamainiakrin itiurkatniuitiaj nunasha jintintramji.

ITIURCHAT AMAJKRATAINIAKUI NANKAMSAR ENENTAIMSASHTINIAITJI

5. Urukamtai itiurchat amajkartuiniakui anearartiniaitiaj?

⁵ Itiurchat amajtamainiakrin kuntuts penkercha nekapminiaitji (Ecl. 7:7 TNM). Job tura Habacucsha ainis nekaprarmiayi (Juup 6:​2, 3; Awa. 1:​1-3). Aintsar nekapeakrisha anearartiniaitji yajauchia nu najanawaij tusar.

6. Absalón najanamiania nuna iincha warinia jintintrameaj? (Nakumkamusha iista).

⁶ Yanaksha itiurchat awajea wainkiarkia nunaka auka wiki iwiarattajai tu enentaimsamniaitji. Nunis enentaimia turakrikia itiurchatka nuran amajsamniaitji. Davidtia uchiri Absalón turamia nui enentaimsartai. Absalonka ni yachi Amnón Tamaram turamtai ti kajerkamiayi. Moisés akupkamu chichamnumka ainis turakka jakatniuiti tu aarmauyayi, tuma asamtai Amnonka jakatniuyayi (Lev. 20:17 TNM). Kame Absalonka kajetka kajekminiuyayi tumaitkiusha yapajmiaktaj tusa maashtiniuyayi (2 Sa. 13:​20-23, 28, 29).

7. Salmo papiin aarusha warintia enentaimmia?

⁷ Junisar enentaimsamniaitji aents itiurchat amajkasha penker pujatsuk wisha aintsanak itiurchat amajkuncha penker pujumniaitjiai tu enentaimsamniaitji. Salmo papiin aaru aents itiurchat amajainiayat penker pujuiniana ainis iiya asa junis timiayi: Yuusan umircha ainia nuka tuke itit awajsachma pujuiniawai tu timiayi (YKan. 73:12). Ainis enentaimiu asa Yuusna najanatniunka kajinmatninsamayi. Tura timiayi: “Ju̱na nekaataj tusan enentáimsataj tukamán  tí itiurchatauyi” timiayi (YKan. 73:​14, 16). Nuya junash timiayi: “Antsu wíji̱a̱i̱ṉkia nawer atajkinninkramai. Wi wekaaj tukamán atajkininkramjai” timiayi (YKan. 73:2). Aintiaku nankaamatsamiayi ii yachi Alberto naartin. a

8. Ii yachi itiurchat amajkam warinia turamia?

⁸ Albertoka kuitniaka achikchan, Alberto iruntramunmanian kuitian kasamkayi tiarmiayi. Ainis tuiniam uuntri atinkia iniaisata tutai iniaisamiayi. Tura nuna nekainiakka nekaschashit tu enentaimiania asar arantak awajiarmiayi. Ni tawai: Aintsan nankaamakun kajemiajai, itiurchat tura ti kuntuts nekapmiajai tawai. Itiurchat nekapu asa Jehovainianka cinco uwi aran ajas pujumiayi. Iisha aintsar nankaamakur penker enentaimtsuk najankurkia iisha ainkiamniaitji.

JESÚS TURAMIANIA AITKIASRIK TURAWARTAI

9. Jesusha wari itiurchatna katsuntramia? (Nakumkamusha iista).

⁹ Jesús itiurchat amajtamainiakrin itiurkatniuitiaj nuna jintintramaitji. Ni shuari chichainiak Yuusa uchirinchuiti,  waurui tiarmiayi. Yuusan enentaimtajai tuiniayat judío aents armiania nu Jesusnaka iwianchi kakarmari takakeawai tiarmiayi. Romanmaya suntar armiania nu Jesusan wishikrar, awatrar maawarmiayi (Mar. 3:​21, 22; 14:55; 15:​16-20, 35-37). Nunisar turamsha Jesuska katsuntramiayi tura yapajmiaktaj tu enentaimsachmiayi. Jesús najanamiania nunanusha warimpia unuimiatramniaitiaj?

10. Jesuska itiurchat amajeamsha itiurniuya? (1 Pítiur 2:​21-23).

¹⁰ (1 Pítiur 2:​21-23 aujsata). b Jesús itiurchat amajtamainiakrin itiurkatniuitiaj nuna jintinkrata ikiurmatniuitji. Ninkia urutai chichaktiniuya chichakchatniuya nunash nekamiayi (Mat. 26:​62-64). Waitruawar tuiniamsha takamatcha juwa wemiayi (Mat. 11:19). Kajeramsha kajetsuk chicha wemiayi tura yapajmiaktaj tusash enentaimchauyayi. “Antsu ‘winia Apar Yus iistí’ tímiayi Yus péṉker túrin asamtai”. Nuyasha itiurchat amajainiamsha Jehovaka nunaka wainiawapi aruma nuinkia iwiarattawapi tu enentaimmiayi.

11. Yajauch chichakaij tusar itiurkamniaitiaj? (Nakumkamusha iista).

¹¹ Jesús turamiania aitkiasrik yajauch chichakaij tusar anearartiniaitji. Itiurchatcha aniu iiyakrikia iniaisamniaitji. Tura itiurchat nuran ajaki ween tusar takamat juakminiaitji (Ecl. 3:7 TNM; San. 1:​19, 20). Antsu yanaksha itiurchat amajainiakui turutskesha Yuusna  ana nu surimkiatin akuinkia chichakminiaitji (Tur. 6:​1, 2). Nu turattsarkia arantamujai kajetsuk turatniuitji (1 Pit. 3:15). c

12. Itiurchat amajtamainiakrin urukamtai Jehová iisti tu enentaimsatniuitiaj?

¹² Iisha Yuus iisti tusar iniaitsatniuitji turakrikia Jesús itiurkamiania aitkiasrik turatniuitji. Yaksha itiurchat amajtamainiakrinkia nekasa nuna neka asa Jehovakeapi iwiarattawa tu enentaimsatniuitji. Aintsar enentaimkiurkia katsuntratniun yainmaktatji. Jehová iisti tusar iniaiyakrikia kajekar pujushtatji, chikich aentscha kajerchartatji. Ti kajeakrikia nankamsar warinsha najanamniaitji turutskesha warinsha timiniaitji tura warasar pujushtatji. Tura aintsan Jehovajaisha aran ajasminiaitji (YKan. 37:8).

13. Itiurchat amajtamainiakrin katsunki wetinian warimpia yainmakminiaitiaj?

¹³ Iikia Jesús itiurkamiania timiatrusrikia najanashminiaitji. Tuma asar warinsha najankur turutskesha warinsha takur urukamtain taja tu enentaimpramniaitji (San. 3:2). Itiurchat amajtamkaruitiajnia nu kajinmatkitin yupichuchichu aminiaiti. Jehová nuna nekawai, nu ainiakmincha Jehovaka nekarmawai ame itiur nankaamamna nuna. Jesussha ainis nankaamasu asa nisha enentaimturmawai (Isr. 4:​15, 16). Jesús turamiania nuna Jehová jintintramji. Nuyasha itiurchat amajtamainiakrin itiurkatniuitiaj nunasha ni chichamen jintintramji. Yamaikia Romanos papii tana nu nekaattaji.

“KAJERTAMAKUISHA ÁTUMKA YAPAJKIAIRAP”

14. “Kajertamakuisha átumka yapajkiairap” ainis Pablo timiania nu warintiua timia? (Rúmanam 12:19).

¹⁴ (Rúmanam 12:19 aujsata). “Kajertamakuisha átumka yapajkiairap” ainis Pablo timiania nu warintiua timia? Yuusa kajetairi iktustarum tusa timiayi. Tuma asamtai itiurchat amajtamainiakrinkia Jehová iisti tusar iniaisatniuitji. Ninkia nekawai urutai turatta nunaka. Ii yachi John naartin ni yachi itiurchat amajkam aitkiasan turamiayi. Ninkia junis tawai: Wi wakeraj aitkiasnak najanawaij tusan Rúmanam 12:19 tana aintsan katsuntran Jehovayapi yainkiattawa tu enentaimsatniun yainkiamiayi tawai.

15. Urukamtai Jehová iisti tusar iniaisatniuitiaj?

¹⁵ Jehová iisti tusar iniayakrikia itiurchatnasha itiurkanak iwiaraintiaj tusar nuinki enentaimia pujushtatji. Jehovaka yaintatajrume turamji, auka winia iniaitiusta, wi iwiarattajai turamjinia aintsaiti. Tuma asamtai Jehovayapi yainkiattawa tu enentaimsar Yuus iisti tusar iniaisatniuitji. Chikich parrafonam Johnna aujmattsajnia nu aitkiasan najanamiayi. Ninkia junis tawai: Wiki iwiarataj tusan enentaimiaj auncha iniankas Jehovaka penker iwiaramniaiti.

“PÉṈKER TÚRAKUM YAJAUCHIA NU NUPETKATA”

16, 17. Pablo “Péṉker túrakum yajauchia nu nupetkata” timiania nu turattsar itiurkatniuitiaj? (Rúmanam 12:21).

¹⁶ (Rúmanam 12:21 aujsata). Pablo chichak “Péṉker túrakum yajauchia nu nupetkata” timiayi. Jesús nainnium  jintinkratuk junis timiayi: Nemasrum aneetarum “tura yajauch awajtámainiana nusha Yus áujtusarta” timiayi (Mat. 5:44). Nisha imiatrusan nuna turamiayi. Romanmania suntar numiniam ajintram waitsamiayi. Nuyasha katsekrar asutiawarmiayi antar itiurchat amajkarmiania nuka penkerchauyayi.

¹⁷ Jesús itiurchat amajeamsha katsuntramiayi. Jehová waitkiarainiana nuka yapajmiatrukta tutsuk “Apawá, tsaṉkurarta. Ni áitkiainia nuna nékainiatsui tímiayi” (Ruk. 23:34). Aintsar iisha chikich aents itiurchat amajtamainiakrin Yuus seatkurkia kajeshtatji itiurchatcha nekapchattaji.

18. Alberton tura Johnkan Yuusan seawarmiania nu itiur yainkiarmia?

¹⁸ Alberto tura John Yuusan seawarmiania nu yainkiarmiayi. Albertoka junis tawai: Yatsur itiurchat amajtukarmatai Yuusan seatiarmiajai tura nuna kajinmatkittsan nukape Yuusan seamiajai tu tawai. Ataksha Alberto Jehovanka iniaitsuk Yuusna takakmaki weana nu imia penkeraiti. Antsu Johnka junis tawai: Winia yatsur itiurchat amajtuku asamtai Jehovanka tuke seat wemiajai tawai. Ainis seatu asan itiurchatka enentaimtishmajai, ninkia aniuiti tichatniun yainkiamiayi. Tura ti shiir enentaimsatniuncha yainkiamiayi tu tawai.

19. Jehová tsawantri jeamam itiurkatniuitiaj? (1 Pítiur 3:​8, 9).

¹⁹ Jehová tsawantri jeamam wari itiurchata nankaamatramsamniaitiaj nuka nekatsji. Warinsha nankaamakuisha Jehová yainkiata titinkia iniaisashtiniaitji. Jesús itiurchat amajeamsha kakarmiayi aitkiasrik iisha kakartiniaitji tura Yuusa chichamencha jintintrameajnia nusha najanki wetiniaitji. Nunis turuki weakrinkia Jehovaka yainmaktatji (1 Pítiur 3:​8, 9 aujsata).