Paul: Ti waramiaji. Noviembre 1985 uwitin nuarjai misionero anaitiukar Liberianam akuptamkarmiaji. Avionjai wesar emkaka Senegalnum jeamiaji. Nuar chichartak chikichik hora ajasai Liberianam jeatniuka, nuna turutin ai aya neachma nui avionnum aents chichak Liberianam weatirmeka akaratarum timiayi, Liberianmanka aents wajarar charatum ajainia asarmatai iikia nuinkia wechattaji tu timiayi. Senegalnum misionero pujuiniamunam nui 10 tsawan juakmiaji. Liberianam chichaman etserainiak jakaru ainian camión yarumainiawai tu tiarmiayi. Tura toque de queda aa asamtai yujainianka tukuiniawai tu tiarmiayi.

Anne: Tuinkish wetinkia wakerichuitji. Uchichinmanian warinsha ashamniuyajai tuma asamtai ashamin nua turutin armiayi. Awini nankaamaktiasnasha kurainiaitjiai. Tumaitkiusha winia aishrujai Liberianam akupkamu asar nui jeattsar wakerimiaji.

Paul: Anne Inglaterra akiniaiti, wisha nuin akiniaitjiai. Nuar tsakarmia nuka aranchauyayi wi pujamunmanianka 8 kilómetros timianai pujumiayi. Unuimiamu amukar precursor ajasmiaji. Yuusna ti takakmastasar wakerimiaji. Winia aparjai tura nukurka precursor ati tusa ikiakatniuyayi. Tura Anniencha aintsan nukuri precursora ati tusa ikiakainiuyayi. 19 uwi takumiajna nui Betelnum ipiatawarmiayi. Tura 1982 uwitin nuatkan nuarjai Betelnum maimtaik takakmastin juarkimiaji.

Anne: Betelnum takakmastasar wakeriniuyaji tumaitkiusha Yuusa chichame etserkatin tui utsumna nui yaimkiattsar wakeriniuyaji. Tura aintsan Betelnum takakmakur yaunchunian misionero armia nujai takakmasmiaji. Aran weri etserkattsar wakera asar nunanu kashi Yuus tuke sea wemiaji. Nu tura turakuar manaintiu uwi pujursamiaji. Tura 1985 uwitin clase 79 Galaadnum unuimiararat tusar ipiatmawakrin ti warasmiaji. Nunia Liberianam akuptamkarmiaji.

Paul: Timiatmam avionjai Liberianam jeamiaji. Nui jeamka ti itiurchat amiayi tura toque de queda amiayi. Aents sapijmiainia asar carro neachma shirir ajakuinkia mercadonam pujuiniaka tsekenak charaatum ajarmiayi. Shiir enentaimpramij tusar  Salmos papii kashi tuke aujniuyaji. Itiurchat amanum pujakrisha Jehovanu takakmakur warauyaji. Winia nuarka misionerayayi wikia Betelnum takakmauyajai, yatsur John Charuk anaartinjiai takakmauyajai. Ninkia ti katsuaru tura ti neka asa winiasha ti nukap yainkiamiayi.

Anne: Liberianam pujustasar wakerimiaji. Nuinkia umach tura kaichisha shiir ajarmiayi tura Yuusnan penker takakmarmiayi. Nuchamtaik yajau amajnaicharmiaji. Ii shuarana ainis enentaimtiarmiaji. Yuusnum kakakir wetinian ikiakatmararmiaji, nui etserkatniuka ti penkerauyi. Aents antuujat nekapainia asar warik wearain tusa nakit wearmiayi. Tui tuinsha aentska iruntrar Yuusnan aujmatu wajainia nukap iruniarmiayi. Irunar pujuiniamunam werir iisha etserniuyaji. Yuusa chichame unuimiania nukap armiayi tuma asamtai mashiniu unuiniartin yupichuchichuyayi. Aintsaitkiuisha aishrujai nu turakur shiir enentaimmiaji.

Paul: Aintiuk uwi itiurchatka atsamunam pujumiaji. Tumaitkiusha 1989 nu uwitin aents wajarar nuamtak maniktinian juarkiarmiayi. 2 de julio 1990 uwitin Betel aminia nui nuntumas suntara anin chikichjiai maniktai tusar iruntraru nui matsamawarmiayi. Manaintiu nantu ii shuarjai, central mundialnum nui takakmainiajaisha aujmattsatin tujinkiar pujumiaji. Suntara anin iruntraru armiania nuka ni nui akintruk pujuinia asarmatai yurumkasha atsumiayi tura nuwancha waitkiasar turu wearmiayi. Nu itiurchatka 14 uwi ainis nankaamasmiayi tuma asamtai ti itiurchat amiayi.

Anne: Nu nunkanmanka nuyainia aents mai maani ajarmiayi. Mankartin armiania nuka ipiattain takakainia nishatkan entsarar paasanmani wekasar warinkish nui irununka kasamkini yujarmiayi. Mankartin armiania nu shiamnasha itiurkara maa wearmia nuna aujmat wearmiayi. Betel nuntumas aents maamuka tepetpet ajarmiayi. Testigos de Jehovancha maawarmiayi nui jimiara misioneron maawarmiayi.

Testigos de Jehová armiania nuka mantamnamniaitiat ni yachi ni umain chikich irutkamunmanian armiania nuna uukarmiayi. Ii yachi ii umai Betelnumia tura misionero armiania nusha nisha aintsan mantamnamnia ainiayat ni yachin ni umain uukarmiayi. Ii yachi ii umai pisarar kaunkarmiania nuka nunka kanuiniasha armiayi tura yaki iijiai kanuiniasha iruniarmiayi. Ii kanutairinkia iijiai metek siete aents kaniarmiayi.

 Paul: Yanaksha uuk takakainiatai tusar suntara ainis iruntrarmiania nuka enkemataj tusar tuke tsawan ta wearmiayi. Wajasar iin arat tusar aintiuk ii yachi apujsarmiaji. Jimiar ii yachinkia ventananmani iimia waja wearmiayi tura chikich jimiarka waiti waniamunam aminia nui iimia waja wearmiayi. Itiurchat atsakuinkia ewejen eem achis waja wearmiayi . Suntara anin armiania nu kajenakuinkia ewejen ukunmani achis waja wearmiayi. Ainis tumainiakuinkia ventananmani iimia pujuiniaka ii yachin ii umain warik uu wearmiayi.

Anne: Tsawan nankaamaki weakui suntara ainis iruntraru armiania nu Betelnum enkemawarmiayi. Kaerjai bañonam apemamiaji tura nuinkia uumkatin najanamu uchich warikkia wainkiachmin amiayi. Winia kaerka nui uumak tee ajas juakmiayi. Suntara ainin armiania nuka yaki wakai ametralladora takaku yaki wakarmiayi. Ti kajekar waitin tak tak amajiarmiayi. Ainis turuiniakui aishur junis timiayi: Ishichik nakamsatarum nuar bañonam enketeawai tu timiayi. Uumtai amiania nuna urakun tatarat amajkamiajai tura ataksha imiatrusnak najanan ikiuktiasan arurmiajai. Tura kurakrak ajamiajai. Kurakrak ajayatnak waitin uraimtainkia nekaamawarminiuyayi. Tuma asamtai kurakrak ajaij tusan Jehovan seamiajai. Yuusa sean amikian waitin urain kurashim ajatsuk amikmawarmiajai. Chikichik karut shitiata enkema armarionam we nui irununka kutsar iniaisamiayi. Nuinkia warinkish wainkiach chikich kanutainmasha warinkish atai tusar tura yaki kanutai amiania timianaisha wakarmiayi. Ainis turuiniaksha warinkish penkesha wainkiacharmiayi.

Paul: Nukap nantu yurumkachujai pujumiaji. Tumaitkiusha Yuusa chichame unuimiatkur kakaimiaji. Yaunchukka Betelnum kashik Yuusa chichame unuimiataiyana aya nuke takuyaji tura Jehová yainmakrin shiir enentaimniuyaji.

Yurumatin tura entsa atsa asamtai Betel ajapa ikiukir weakrinkia ii yachi ii umai uukar takumiajnia nuna maawarmai ajakarmiayi. Yurumatniuncha aya neachma Jehová itiartam wemiaji. Utsumamunmasha yainmakmiaji tura ti sapijmiakarain tusasha yainma wemiaji.

Yuusa chichamen nekatniuka penkesha iniaisachmaji. Ii yachi ii umainkia mantuawarain tusar pisarmiayi tumainiaksha Jehovainianka penkesha kanakcharmiayi. Ju mesetka ti waitsatin tsawan atatna nui iwiarnarar pujutniun yainmaktatji tu tuiniash iruniarmiayi. Ii yachi uuntri anaikiamu armiania nu tura uchi natsamarusha ii yachin ii umain sapijmiatsuk yainkiarmiayi. Ii yachi ii umai pisarar taaruyania nuka iruntrar pujuarmiayi tura Yuusa chichamencha etser wearmiayi tura kampuniunmasha iruntrar Yuusa chichamen unuimiat wearmiayi. Iruntrar Yuusa chichamen unuimiainiak shiir nekap wearmiayi. Yuusa chichamen etserainiak ii yachi ii umainkia nu itiurchatan katsuntiarmiayi. Warinkisha suiniam ii yachi ii  umainkia pushinkia seamtsuk Yuusa chichame etserkatai tusar papii enkear jukitniun nuna nekaska seam wearmiayi. Aentska meset aa asamtai ti kuntuts pujuinia asar Yuusa chichamenka ti penker antiarmiaji. Testigos de Jehovatikia wara warat ajakrin iijiai aujmattsatniun wakeriarmiayi. Testigos de Jehovatikia ainis itiurchat akuisha Yuusna nu najanatniuka penke iniaichmiaji (Mat. 5:​14-16). Testigos de Jehová ainis Yuusa chichamen etserainiakui suntara aintiaku iruntraru armiania nusha ni wakeruiniaka testigo de Jehová ajasarmiayi.

Paul: Liberianmaya nukape wemiaji, warichik manaintiu wemiaji tura jimiara chikichki uwi weri tamiaji. Ii itiur nekapmiaj nuna nekasen chikich misionera junis timiayi: Galaadnum unuimiartasar wemajnia nuinkia tui akuptamearum nui pujusrum yaimkiatarum turammiaji tu timiayi. Nu neka asar iisha ii yachi ii umai itiurchat nankaamainia ikiua asar ti kuntuts nekapmiaji. Liberianmaya tikia arantcha pujusar ii yachi ii umai Liberianmaya ainia yainmiaji.

Anne: Mayo 1996 uwitin aintiuk Betelnumia jinkimiaji tura papii aarman carro juajai enkemprar jinkimiaji. 16 kilómetros timianu aran nu papii jukir wetiniuyaji. Nui wearin suntara anin iruntraru armiania nu ipiattinian juarkiarmiayi. Turawar carro ii enkemprar weamunka awajsarmiayi tura manaintiunka akaiki ujutamkarmiaji antsu Paulnaka enketranak jukiarmiayi. Tura aya neachma Paul winia wainkiamiaji tura nijiainium numpan puamiayi. Ipiatainiak taker amajainia asarmatai tukuchariash tu enentaimpramiaji tumaitkiusha tukumka wekamainchu ajawai tu enentaimpramiaji. Nekas nekamka ayataik carronam enketran shitia ajua ikiukiaruyayi tuma asa ayataik tsupimiakuyayi.

Tumamunam ii wajamiajnia nui ayamach camión suntarna wainkiamiaji. Wainkiarik tseke wakamiaji. Aentska sapijmiainia asar charatum ajarmiayi. Tumamunam camionkan ewekameaka warik nunianka jiinkimiayi. Wajasta tamasha antutsuk teterkasa juramkimiaji. Jeanka kurakrak ajaki jeamiaji.

Paul: Aya entsarmajain, pushi jaanaru tura wapik nujain juakmiaji. Mantamachu asakrin awakmamkar mai iiniai ajamiaji. Helicóptero tukurma tepamunam ayam kanarmiaji. Kashi tsawarar nu helicopterojai Sierra Leona timianai juramkiarmiaji. Mantamacharu asakrin waramiaji tumaitkiusha ii yachi ii umai juakarmiania nui enentaimmiaji.

Anne: Sierra Leona nui Betelnum jeamiaji nuinkia warinkish nankamachu asamtai penker waitmarmiaji. Tumaitkiusha ti itiurchat nankamasuyajnia nui enentaimsatniun juarkimiajai. Tsawaikia sapijmiakun anermak ajamiajai. Tura warinkish wainiaknasha nekascha ainis iimiajai. Kashikia itiurchat nankaamasmin ainis nekapkun kurak kurak ajakin see seema ajasan shintia wemiajai. Mayatkachmin ajakui aishruka miniakruk Yuusan sea wemiayi. Nuyasha Jehovanun nampet nampe wemiaji. Tumakin tumakin kuramuka menkatur wemiayi. Waurka ajastinian juarjash tumainti tura yamaikia misionera ajaschattajai tu enentaimmiajai.

Arum turunamiania nuna penke kajinmatchuitjiai. Nu atsakamutinin revista ¡Despertad! 8 de junio 1996 uwitiniu Qué hacer ante los ataques de pánico tu aarma jinkimiayi. Nuna aujsan wi itiur nankamamiaj nuna nekaamamiajai tura La Atalaya 15 de mayo 1996 uwitiniu ¿De dónde proviene su fuerza? tu aarmasha jinkimiayi. Nu papiinium wampishuk nanapen kupikiun nakumkamu amiayi. Tura nui wampishuk nanapen kupikiuitkiuisha nanaktinniaka iniaichaiti tura yurumatniuncha iniaichaiti. Iisha wampishuk aintsan itiurchat wainiakrisha Jehová yainmakrin itiurchat nankaamasuitkiursha chikich aents yaintin iniaisachminiaitji tu aarma jinkimiayi. Ainis jintinkratmaka nekasen wi utsumamunam jinkimiayi (Mat. 24:45). Nunanun unuimiatran tura chikichcha aintiaku aujmatainian iruran ikiusmajai, nuna turan kakarmiajai. Tsawan nankaamaki weakui penker nekapratniun juarkimiajai.

Paul: Liberianam weakrikia ii jeen jea nuke nekap wemiaji. 2004 uwi amusatuk ajasmanum nui 20 uwi pujumiaji. Meset amukamtai Betel ataksha iwiaratniun chichampruktinian juarkiarmiayi.  Tumaitkiusha aya neachma chikichnium yaimiutarum turamiarmiaji.

Ii yachi ii umai nuyainia ikiukir wetin yupichuchichuyayi. Tuma asamtai ti kuntuts nekapmiaji. Galaadnum weakur ii shuar ikiukniuyaji tura Jehovaka niniu takaru asakrin itiur yainmamiaj nusha paant nekamamiaji. Nui enentaimsar Ghana nunkanam wemiaji.

Anne: Liberianmaya wemiajnia nuinkia ti uutmiaji. Ii yachi Frank naartin uuntmantu junis turammiaji: Iinkia kajinmatkitniuitrume. Tura junasha turammiaji Iini enentaimsarum pujuttarmena nuka iikia nekaji. Tui yaimkiattsa wearum nui yaimkiatin enentaimsatniuitrume, Jehová akuptamiarme tuma asamtai tui wearum nui ii yachi ii umai matsatainiana nu yaintin enentaimsatarum tu turammiaji. Ainis turameakrin nekachtainiam weakur kakarmiaji.

Paul: Ghana nunkanam jear nui ii yachi ii umai matsatainia nijiaisha warik shiir amajnaisartin juarkimji. Nu nunkanmanka untsuri testigo de Jehová iruniarmiayi. Tura itiurchat wainiainiaksha Yuusnaka penker enentaimtuinia iiyakur iisha kakarmiaji. 13 uwi nui pujarin yamaikia Kenia nunkanam África orientalnum sucursal ana nui wetarum turamiarmiaji. Yaunchuk pujumiajnia nuyainia ii yachi ii umai aneakrisha Kenia nunkanam jear nui ii yachi ii umai matsatainia nijiaisha warik shiir amajnaisartin juarkimji. Yamaisha nuin yaimkiur pujaji juinkia Yuusa chichame tuinsha etserkatin ti utsumnawai.

Anne: Nukap itiurchatan wainkiaitjai tura sapijmiaknasha waitsaitjiai. Ti itiurchat nankaamakur sapijmiashim ajakur sunkurmakminiaitji. Jehovaka itiurchatnaka waintsuk matsamsarat tusa warinkisha turashtatui. Ipiatman antakun turutskesha ipiatainiak taker taker amajainian antaknaka mayatkashmin ajawitjiai tura uwejrusha tampema ainiawai. Tumaitkiusha Jehová iin ikiakakratkattsa ii yachi ii umain utsuiniana nuna neka asan kakajai. Jehovanu nu najanatin iniaiyachkurninkia tui yaimiakur pujaj nui yaimkiatin iniaisashtinian Jehová yainkratniuiti.

Paul: Urutainsha junis aninma ainiaji pujarmena nuisha pujustin unuimiatkarmek turam wearmaji. Tura tuinsha nui pujustinkia ti penkeraitiat aya neachma itiurchat nankamnamniaiti. Tuinsha wari urukamtaiya unuimiatniuitiaj. Ii yachi ii umai anena asar unuimiatniuitji. Metek nu nunkanam akiniachuitkiursha mashiniu nu enentaik takakji. Ii yachi ii umai yaintai tusar wemaji tumaitkiusha nii nekaska iin yainmakarmaji.

Tuinsha akuptamainiakrincha ii yachi ii umaijiai nekanaiyar shiir amajnai wemaji. Jehová tuke enentaimtakrikia ii yachi ii umai tui tuinsha takuttaji. Niiniu najankurninkia Jehová katsuntrarat tusa tuke yainmaktatji (Filip. 4:13 TNM).