1. Uuntmantu ainiana nusha urukamtaiya ti jintintramawarminiaitiaj?

 Ii iwiakmarin warinkish turatniuitiajnia nu penker enentaimsar turattsar warinsha turutskesha yaksha yainkratkat tusar wakerutainti. Uuntri ainiana nu tura yaksha Yuusnum ­katsuaru ainiana nu ainis turatniun yainmakarminiaitji. Uuntmantu ainiana nu chichartamkurin auka yaunchuk ainis turin armiayi tu enentaimsar ni turameajnia nu anturtsuk iniaisashtiniaitji. Jehovaka uuntmantu ainian nu tuiniana nuna unuimiatrarat tusa wakerawai. Ninkia yaunchuk akinia asar ti enentaimin, ti neka ainiawai ( Job 12:12 TNM).

2. Yamaisha wari nekaataj?

² Yaunchukka Israel aents armiania nuna emtikiawarat tura ikiakararat tusa uuntmantu armiania nuna Jehová anairamiayi. Moisesna tura Davidnia nuyasha Juannasha nekaatai. Nu tsawannuman pujucharmiayi tura metekrak warinkisha turacharmiayi. Penke weamsa armiania nu Yuus umirkatin urukamtai penkerait nuna uchipiat armiania nuna jintintiawarmiayi. Ni tiarmiania nuna Jehovaka ni chichamen aamtikramiayi. Uuntaitkiursha turutskesha uchitkiursha ni tiarmiania nuna nekaar iisha aitkiasrik turamniaitji (Rum. 15:4; 2 Ti. 3:​16, 17). Ju unuimiateamunmanka manaintiu uuntmantunu penke weamas pujuarmiania nui tiarmiania nuna nekaattaji tura ni tiarmiania nuna wari unuimiatramniaitiaj nusha nekaattaji.

“NÚKAP UWÍ PUJUSTATRUME”

3. Jehová Moisesan warinia turat tusa anaikiamia?

³ Moiseska Yuusan tuke umirkamiayi. Ninkia Yuusna etserniuyayi tura chichaman iwiarniuyayi, yaunchuk nankaamasun nekauyayi nuyasha Israel aentsun emtik juyayi. Ninkia tuma asa warinkisha ti nekauyayi. Israel aents Egiptonmaya jiintrarmiania nui Moisés emtikia jukiarmiayi. Jehová aentstikia najanachminian turamiania nuna ti nukap wainkiamiayi.  5 papii Yuus papiiniam emka aarma ainiana nuna aarat tusa Jehová utsukmiayi nuyasha Yus Kanta 90 nunasha aarmiayi tura Yus Kanta 91 nunash aarmiayash tumainti. Nuyasha Juup papiincha aarmiayash ajakmiayi.

4. Moisés Israel aentsun urukamtai ikiakararmia?

⁴ Moisés jakatin ishichik ajas 120 uwi takumiania nui Israel aents wainkiaruyania nuna kajinmatkiarain tusa irurarmiayi. Nui pujuarmiania nuka uchi armiania nui Jehová aentstikia najanachminian najanamiania nuna wainkiarush irunmiayi tura Egiptonmaya aentsnasha Jehová itiurkamia nunasha wainkiarush pujuarmiayi ( Jiin. 7:​4). Israel aentska untsurnumani nunisan menamanisha penkramua nutikiamunmani nayantsanam katinkiarmiayi nuyasha faraonka suntarin nupetnakmiania nunasha wainkiaruyayi ( Jiin. 14:​29-31). Numi atsuu nunkanmasha Jehová Israel aentsun penker wainkiaruyayi (Muis. 8:​3, 4). Canaán nunkanam jeatin ishichik ajasarmiania nuisha Moiseska Israel aentsun ikiakarartaj tusa irurarmiayi. a

5. Moisessha Israel aents armiania nuna itiur pujuttarme timia? (Muisais Ujakma 30:​19, 20).

⁵ Moisessha israel aentsun wari tiarmia? (Muisais Ujakma 30:​19, 20 aujsata). Israel aentska penker matsamsartiniuyayi. Israel aentska Canaán nunkanam nukape uwi pujuarminiuyayi. Nu nunkasha urukuya? Ti penkerauyayi tura arak aramusha ti penker neren armiayi. Israel aents armiania nuna junis timiayi: “Nú nuṉkanam uunt pepru ti shiir ainia nu atumsha takakmaschiatrum nérentin ajastatrume. Tura nu je̱a̱nmasha warinkish átum ikiuschamu irunainia nusha átum táurchamu yumirmat irunainiasha tura átum takakmaschamu uwa aja nuyá̱ asuiti jutai̱ árak arakmamu irunainia nu ashí nérentin ajasrum” pujuttarme tu timiayi (Muis. 6:​10, 11).

6. Chikich nunkanmaya aents Israel aents armiania nuna nupetkarat tusa Jehovasha urukamtai tsankatkamia?

⁶ Tumaitkiusha Israel aents warinma aneartin armia nunasha Moisés timiayi. Canaán nunkanam nui tuke pujuartaj tuiniakka Yuus timiania nuna umikiartiniuyayi. Tuke iwiaku pujustin wakeruktarum tura Jehová umirkarum nininia kanakirap Moisés Israel aentsun tu tiarmiayi. Tumaitkiusha Israel aentska Jehovan umirkacharmiayi. Tuma asamtai Asirianmaya aents nuya Babilonianmaya aents Israelan nupetkar ni nunken jukiarat tusa Jehová tsankatkarmiayi (2 Ak. 17:​6-8, 13, 14; 2 Crón. 36:​15-17, 20 TNM).

7. Moisés timiania nuna wari nekaamniaitiaj? (Nakumkamusha iista).

⁷ Nujaisha iisha wari nekaamniaitiaj? Umiakrikia iwiaku pujumniaitji. Israel aents Canaán nunkanam nuntumsar pujuarmiania aintsan iisha shiiram nunka atatna nu ishichik ajasmanum pujaji (Isa. 35:1; Luc. 23:43 TNM). Iwianch ni suntarijiainkia nuinkia pujuchartatui (Apu. 20:​2, 3). Antar religionka atsa asamtai aentska Jehovainia penke kanakchartatui (Apu. 17:16). Aents anaikiamu atsuinia asarmatai aentska waitsuk matsamsartatui (Apu. 19:​19, 20). Shiiram nunkanmanka Jehová umirchaka atsuttawai (YKan. 37:​10, 11). Ashi aents Jehovan umirainia asar iruntrar ti penker matsamsartatui. Ainis asamtai anenkratin asar ti penker pujuartatui (Isa. 11:​9). Ukunmatainkia ti penker pujuttaji. Jehová umireakrikia shiiram nunkanam aya  nukape uwi pujushtatji antsu nui tuke iwiaku pujuttaji (YKan. 37:29; Juan 3:16 TNM).

8. Ii yachi misionero anaikiamuyania nusha tuke iwiaku pujustinian wakera asa itiurkamia? ( Jútas 20, 21).

⁸ Tuke iwiaku pujustasar wakerakrikia warinkish itiurchat wainiakrisha Jehovainianka penkesha kanakchattaji ( Jútas 20, 21 aujsata). Uruma nui penker pujuttajnia nuka yamai tura chikichkimsar warinmansha tunaanum iniaraij tusar kakaki wetinian utsutmaji. Ii yachi África nunkanam misionero nukape uwi pujumiayi, ninkia tunaa najanawaij tusa ti kakarmiayi. Yuusan umireashkunka tuke iwiaku pujushminiapitjia tu enentaimsan Jehová yainkiat tusan ti seamiajai tura tunaa najanamnia nekapmiajna nuna najanawaij tusan ti kakarmiajai. Ni yaintiu asamtai tuke umirkaitjiai tu tawai.

“PÉṈKER ARUTRÁMTIATUI”

9. Davidcha wari itiurchatna wainkiamia?

⁹ Davidkia uunt anaikiamuitkiusha penkerauyayi tura enentaimias ti penkeran tiniuyayi. Nuyasha tuntuiyatniun unuimiatra, maaniktinniasha unuimiatrauyayi tura Yuusnancha etserniuyayi. Saúl maataj tutai pisar wekaimiayi. David uunt anaikiamu ajas pujumiania nui Absalón ni uunt anaikiamu ajastaj tusa maattsa wakeram pisar aran wemiayi. Davidkia ti itiurchat nankaamaksha tura ti awajiruitkiusha Jehovanka tuke umirkamiayi. Winiaka waramtikrawai Jehová Davidtian tu timiayi. Tuma asamtai David timiania nuka antuktiniaitji (Tur. 13:22; 1 Ak. 15:​5).

10. Davidcha urukamtai Salomonkan jintintiamia?

¹⁰ David ni uchiri Salomonkan timiania nuna nekaatai. Winia enentaimtursarat tusa chichamprukat tusa Jehová Salomonkan anaikiamiayi nuyasha ni enentaimtutai jean jeamit tusasha anaikiamiayi (1 Crón. 22:5 TNM). Salomonka nukap itiurchatan wainkiatniuyayi. David jintintiuk timiania nuna nekaatai.

11. a) Davidcha ni uchirin waritmia? b) Salomón umikchamiania nui urukamia? (1 Akupin 2:​2, 3). (Nakumkamusha iista).

¹¹ Davidcha ni uchirin waritmia? (1 Akupin 2:​2, 3 aujsata). Yuus umirkumka penker pujuttame David Salomonkan tu timiayi. Salomonka Yuusan umirmiania nuinkia penker pujumiayi (1 Crón. 29:​23-25 TNM). Salomón Yuus enentaimtutai jean ti penkera najanamiayi. Salomón papiin aarmiania nuka Yuus papiinium aarma iruneawai tura Salomón timiania nusha Yuus papiinium tuinsha aarma irunui. Ti enentaimin ti kuitrintin asa tui tuinsha nekaamuyayi (1 Ak. 4:34). David timiania aintsan Salomonka aya Jehovan umireakka tuke penker pujutniuyayi. Tumaitkiusha uuntmantu ajasmiania nui antar yuusan enentaimtustinian juarkimiayi. Ainis turakui Salomón ti enentaimin ati tusa Jehová yaya wemiania nuna yaintinian iniaisamiayi. Tuma asamtai Salomonka penker enentaimias aentsun penker wainkiatniun tujinmiayi (1 Ak. 11:​9, 10; 12:​4).

12. David Salomonkan timiania nuna wari nekaamniaitiaj?

 ¹² Nujaisha iisha wari nekaamniaitiaj? Umiakrikia penker pujuttaji (YKan. 1:​1-3). Salomón kuitrintin tura paantin aa wemiania ainis atumsha atatrume Jehovaka turamtsuji. Tumaitkiusha umireamka penker enentaimsar turatniun yainmaktatji (Neka. 2:​6, 7; San. 1:​5). Takatnum, unuimiatainiam, kuitnium tura warastai tusar najanmanum nuisha Jehová tana nuka yainmakminiaitji. Jehová tana nu umiakrikia itiurchat amajmamsar waitiu pujushtatji (Neka. 2:​10, 11). Nuyasha penker aentsjai nawamnaiya asar tura ii jeen pujuiniajaisha shiir amajnaisar puja asar warasar pujuttaji.

13. Carmen naartincha warinia turakua ni iwiakmarincha penker nankaama?

¹³ Carmen naartin ninkia Mozambiquenam pujawai ni chichaak wikia unuimiaru akurkia nekas penker pujumniaitji tu enentaimniuyajai tawai. Ninkia tu enentaimia asa arquitecta ajastasa uunt unuimiatainiam wemiayi. Unuimiajat nekapmiajai. 7 ekemsamunam juarkin kiarai 6 ekemsamunam iniai wemiajai. Tumakun tsawantan taku wechamiajai tura ti pimpi wemiajai. Iruntramunmasha wetinian jea wechamiajai tumakun Yuusnumsha majat ajasmiajai. Jehovan enentaimtustinian wakerayatnak unuimiartinniasha wakerimiajna nuna nekaamamiajai tu tawai (Mat. 6:24). Ninkia ainis nankaama asa Yuusan sea nuya nunanun Yuus papiinium aujmatun unuimiatramiayi. Ainis tura urukamia? Umar, kaer Yuusnum katsuaru armiania nu jintintruawarmatai tura nukursha jintintruamtai unuimiamunka iniaisan Jehovanun nu nukap najanatniun juarkimiajai. Nuna tura asan winia iwiakmaruin penker nankaamasuitjai. Unuimianum iniaisamiajna nuna urukamtain iniaisamaj tu enentaimchaitjiai tu tawai.

14. Moisés Davidjaisha nekaska warinia tiarmia?

¹⁴ Moisés Davidjainkia Jehovan anen armiayi tura nin umirkartiniuyania nunasha nekarmiayi. Jasattuk ajasar chikich antuiniamunam wi turaitjiana aitkiasrumek turatarum tura Yuus tuke umirkatarum tu tiarmiayi. Nuyasha Yuus umireashkurmeka Yuus nakitrampra asakrumin penker nankaamaschattarme tu tiarmiayi. Ni tiarmiania nui iisha enentaimsatniuitji. Arum chikitcha Jehovan enentaimtin Yuus umirkatin urukamtai penkerait nuna timiayi.

 “TI SHIIR ENENTAIMIAJAI”

15. Apóstol Juan nankaamasmiania nuna aujmattsata.

¹⁵ Jesuska ni unuiniamuri asamtai Juannaka ti anemiayi (Mat. 10:2; Juaṉ 19:26). Juanka Jesús Yuusa chichamen etseruk wekaimiania nui nisha nemarsamiayi, Jesús aentstikia najanachminian najanamiania nunasha Juan wainkiamiayi, ti itiurchat nankaamasmiania nuisha ajapa ikiukchamiayi. Jesusan maawarmiania nuisha ninkia ikiukchamiayi tura urum nantakmiataisha wainkiamiayi. Nuyasha Kristu aents pampaki wemiania nu tsawantincha pujumiayi, Kristu aents warumchik armiania nuya juarkin ashi nunkanam Yuusa chichame etsernakmiania nuisha pujumiayi (Kurs. 1:23).

16. Papiin Juan aarmiania nusha yana ikiakararuit?

¹⁶ Juan jasattuk ajassha Apukarípsis papiin aarmiayi (Apu. 1:​1). Nuyasha Juan papiincha tura chikich papiin manaintiuncha aarmiayi. Juan papiin aar manaintiu akupkamiania nuinkia Gayon pachis aarmiayi. Gayo naartiniaka ni uchiriya ainis enentaimtiniuyayi (3 Juaṉ 1). Nu papiin aarmiania nuinkia Juanka nukap aentsun Yuusnan nekatniun yainkiuyash tumainiuyayi. Juan aarmiania nuka Kristu aents armiania nuna ikiakararmiayi tura iincha ikiakatmaji.

17. 3 Juan 4 nui tana aintsan wari turakria warasminiaitiaj?

¹⁷ Juansha warinia aarmia? (3 Juan 4 TNM aujsata). Juanka Yuus umireakur warasar pujuwitiajnia nuna aujmattsamiayi. Manaintiu aar papiin akupkamiania nuinkia waitruawar jintikratainiasha iruniarmiayi. Ainis nankaama asamtai nakanairar pujuarmiayi. Tumaitkiusha Yuusan nekas umirainiasha irunmiayi. Tuma asar ni timiania nuna timiatrusan uminiasha iruniarmiayi (2 Juaṉ 4, 6). Nu Kristu aentska aya Juannak waramtikcharmiayi antsu Jehovancha waramtikiarmiayi (Neka. 27:11).

18. Juan timiania nuna wari nekaamniaitiaj?

¹⁸ Nujaisha iisha wari nekaamniaitiaj? Yuus umireakrikia warasar pujuttaji (1 Juaṉ 5:​3, 4). Jehová waramtikiakur iisha warawitji. Ninkia ju nunkanam warinkish turamnia irunna nu nakitrar ni wakeramu najankurninkia warawiti (Neka. 23:15). Nuyasha Yuusa suntarisha warau ainiawai (Ruk. 15:10). Iisha Kristu aents ainiana nu itiurchat nankaamainiaksha Jehovanka tuke  umirainiakui warawitji (2 Tis. 1:​4). Ju nunkanam yajauch irunna nu amukamtai iikia Jehová umirka asar shiir enentaimtiatji.

19. Chikich aents unuiniartiniaitiajnia nunanun ii umai wari ta? (Nakumkamusha iista).

¹⁹ Chikich aents Yuusna unuiniakur warawitji. Rachel naartin República Dominicananmania ni junis tawai: Chikich aents Yuusna ujaktinkia ti penkeraiti tu tawai. Nukap aentsun Yuusna nekatniun yainmiania nui enentaimias ii umainkia junis tawai: Wi unuiniamu Jehovan enentaimtustinian juarkiarmatai tura Yuus nekas yainkiattawai tu enentaimiainiakui nuyasha ni iwiakmarin yapajniainiakui ti warawitjiai tu tawai.

MOISÉS, DAVID TURA JUAN JASATTUK AJASAR TIARMIANIA NUNA WARI NEKAAMNIAITIAJ?

20. Moisés, David tura Juan aintsan iisha wari najaneaj?

²⁰ Moisés, David tura Juanka yamaiya jui uruksait ainis achamunam ninkia pujuarmiayi. Tumaitkiusha ninkia iiya aintsan ­nekas Yuusan enentaimtiarmiayi. Niya ­aintsan iisha Jehová seaji, ni yainmaktatji tu enentaimiaji nuya penkera nu turattsar Jehová ni tana nu uminiaitji. Nuyasha Moisés, David tura Juan aintsan nin umirainiana nunaka Jehová warinkisha penkera nuna suwiti tu enentaimiaji.

21. Moisés, David tura Juan tiarmiania nuna uminianka Yuus warinia susartata?

²¹ Moisés, David tura Juan tiarmiania nu anturkartai tura Jehová tana umirkartai. Nu turakur ashi warinkisha turittiajnia nui penker arutramtiatji. Nekas tuke iwiaku pujuttaji (Muis. 30:20). Nuyasha Jehovaka ni chichakuana nuna timiatrusan umin asamtai ni tana nu warasmajai tuke najanu pujuttaji. Ninkia warinkisha ashi ti penkeran amastatji (Ipi. 3:20).