1-2. Uuntri anaikiamush warinia turin ainia?

 Iruntramunam yaimin yaunchuk anaikiamuitkiumka uuntri anaikiamu ataj tusam kakaki weatsmeash? Uuntri anaikiamu ajasam yatsum tura umaim yainkiartatmena nuka ti penkeraiti (1 Ti. 3:1).

² Uuntri anaikiamush warinia turiniait? Yuusa chichame etserkatniun emtiniaiti. Yuusnumia yachin umaincha jintintiawartasa tura ikiakarartasa ti takakmawiti. Ni penker iniakmameakui chikitcha kakainiawai. Tuma asamtai Yuusa chichamen uuntri anaikiamu ainianka ti takakmau Yuus amasma tawai (Ipi. 4:8).

3. Aishman uuntri anaikiamu atasa uruku atiniait? (1 Timiutéun 3:​1-7; Titiun 1:​5-9).

³ Uuntri atasa uruku atiniait? Warinmansha takakmakrikia wari najanatniuitiaj nuke najantainti. Antsu uuntri anaikiamu ajastasrikia Yuusa chichamen 1 Timiutéun 3:​1-7 nuya Titiun 1:​5-9 (aujsata) tana nusha umikir wetiniait. Ayataik etserkar nuya jintintiar nui iniaisashtiniaiti. Ju unuimiateamunmanka uuntri anaikiamu atasa uruku atiniait nu nekaattaji. Uuntri anaikiamu atasanka chikichjiaisha tura ni yachi ni umaijiaisha penker iniakmamin atiniaiti. Ni uchirincha nuarincha penker jintin atiniaiti. Nuyasha iruntramunmasha penker yaimin atiniaiti.

PENKER INIAKMAMIN ATINIAITI

4. Aishman uuntri anaikiamu atasa itiur iisma atiniait?

⁴ Uuntri anaikiamunka warinmansha makuchmin atiniaiti. Iruntramunmasha yajauch iirsarain tusa penker  iniakmamsatniuiti. Tura Kristu aentschasha shiir enentaimtusma atiniaiti. Yuusan enentaimtakui kajeramsha penker iniakmamin tura anankartichu atiniaiti (Tan. 6:​4, 5). Chikich aentscha tura iruntramunmasha penkerash iniakmamaj tu enentaimsata.

5. Uuntri anairamuka penkeran turin ainiawai urukamtai taji?

⁵ Uuntri anaikiamu atasanka penkera nuna turattsa wakerin atiniaiti. Chikich penker najanmari iiras wararsatniuiti. Ju najanata tachamaitiat wara warat shiir enentaimias yaimin atiniaiti (1 Tis. 2:8). Urukamtai uuntrinkia nuna turawartiniait? Ni yachin ni umain ikiakartin asa nuya chikich takatnash najanatin asa ainis turatniuiti (1 Pit. 5:​1-3). Ainis turakka shiir enentaimsattawai (Tur. 20:35).

6. Aents tsanka nuka warinia turiniait? (Israernum 13:​2, 16; nakumkamusha iista).

⁶ Aents tsankana nuka aya ni amikrijiai tsanka achaiti antsu ashi aentsjai tsanka awiti (1 Pit. 4:9). Papii Yuusa chichamenu aujmatu junis tawai: Aents tsanka nuka aents nekashtaincha shiir enentaimtus jearui winitia tiniuiti. Chikich aents ninkia tsankaiti tu enentaimturainiawash tu enentaimsata (Israernum 13:​2, 16 aujsata). Aents tsanka nuka kuitrinchancha tura wekas iikratin tamataisha nuyanchuka jintinkratattsa arantia tamataisha warinsha suwiti (Náṉ. 18:​2-8; Neka. 3:27; Ruk. 14:​13, 14; Tur. 16:15; Rum. 12:13).

7. Uuntri anaikiamu aya kuitniak enentaimtachuka warinia turiniait?

⁷ Aya kuitniak enentaimtuschatniuiti. Kuitrinniusha tura kuitrinchaitkiusha emka Yuusna nuna najanatniuiti (Mat. 6:33). Tsawanta anka Yuusan enentaimtustiniaiti, ni shuarin penker wainkiatniuiti, Yuusnumia umaincha nuya yachincha yaintiniaiti nuyasha ni takakmajai yaimkiattsa kakartiniaiti (Mat. 6:24; 1 Juaṉ 2:​15-17). Takakeajna nujain pujustaj tu enentaimiajak. Nuyanchuka warinsha nukap takustaj tu enentaimiajash. Turutskesha aya kuitniak enentaimtajtai tu enentaimsata (1 Ti. 6:​6, 17-19).

8. Esetar enentaimniuitkiunka tura katsunniuitkiunka uruku atiniait?

 ⁸ Penker esetar enentaimiar naka wekainiaitkiunka tura katsunniuitkiunka penkera nuna turiniaiti. Aya yurumatniunak turutskesha umartiniak enentaimsashtiniaiti. Iwiarmamkusha penker iwiarmampratniuiti, intiashincha penker tsupimiartiniaiti, waras nankaamastasa warinkish najankusha penkera nuna turatniuiti. Yuusa enentaimtichu ainia turuiniana nunisan turashtiniaiti (Ruk. 21:​34, 35; San. 4:4). Kajeramsha katsuntratniuiti. Nampen achatniuiti. Esetran enentaimniuashitiaj turutskesh katsunniuashitiaj tu enentaimsata.

9. Amamkes enentaimin tura timiatrusan umin warinia turiniait?

⁹ Uuntri anaikiamuka warinsha najantsuk Yuus papii warintiawa nui amamkes enentaimsatniuiti. Itiurchat wainkiasha Yuusa chichame jintinkratna nui enentaimias chichamnasha penker iwiaratniuiti. Aintsapitia tu enentaimtsuk emka aintsashit tusa penker nekaatniuiti (Neka. 18:13). Nuna turakka Jehová enentaimna aintsan enentaimiawai. Warinia turatniuit nunaka timiatrusan umin atiniaiti. Yuusa chichame tana nui enentaimias Yuusa iruntramuri tuiniakuish timiatrusan umin atiniaiti. Tuma asamtai penker najanniuiti tiartatui. Uuntri anaikiamuka ni nuarin ni uchirin itiur penker jintiatniuit nu nekaawartai.

NUARIN TURA UCHIRIN PENKER JINTIN ATINIAITI

10. Aishman nuarin tura uchirin penker jintiattsa warinia turatniuit?

¹⁰ Aishman nuatkaitkiunka uuntri anaikiamu ataj takunka ni nuarisha tura uchirisha penker iniakmamin artiniaiti. Tuma asa nuarincha tura uchirincha penker jintiatniuiti. Tura aintsan shiir enentaimtus aneamujai nuwen tura uchirin penker wainin atiniaiti. Yuusa chichame unuimiatratniun, etserkatniun nuya iruntramunam wetinniasha emtuktiniaiti. Urukamtai ainis turatniuit? Apóstol Pablo chichak “Kame ni shuari̱n akupkachminiaitkiuṉka ¿itiurak Yus shuaran wainkiat?” tu timiayi (1 Ti. 3:5).

11, 12. Uuntri anaikiamu atasanka uchirisha itiur iniakmamsartiniait? (Nakumkamu iista).

¹¹ Uchi 18 uwi takakchakka apari umirin artiniaiti. Uchirtinkia ni uchirin aneamujai jintiatniuiti. Uchikia nakurustinian ti wakerin ainiawai tumaitkiusha ni apari penker jintintiamka arankartin tura umin artatui nuyasha penker iniakmamsartatui. Uchirtinkia ni uchirin Yuusa amikri ajasarat tusa yainkiartiniaiti. Nuyasha Yuusa chichamen jintinkratman umikiarat tusa ikiakarartiniaiti. Tura aintsan imianniarat tusa ikiakarartiniaiti.

¹² “Núnisaṉ uchirí̱sha ní wakeramunak túrichu tura aya níniunak enentáimtichu antsu Yusan enentáimtin ártiniaiti”. Uchi Yuusan enentaimtayat yajauchin najanamtainkia chikich uuntri anairamu ainia aparin jintiachma asa ainkiati tusar penker nekawartiniaiti. Uchi apari jintiachma asa turunaitkiuinkia aparinkia uuntri anaikiamu ajasman iniaisamniaiti (La Atalaya 15 de octubre 1996, página 21, párrafos 6-7 tana nui iista).

 IRUNTRAMUNMASHA PENKER YAIMIN ATINIAITI

13. Ni wakeramu najanchak urukuit?

¹³ Aishman penker iniakmamkunka iruntramunmash penker yaimin ainiawai. Shiir ajawitkiuinkia ni umaincha ni yachincha shiir enentaimtittiawai. Chikich chichainiakui anturak urukamtain aini enentaimiak tusa esetar enentaimtiniaiti. Chikich uuntri anaikiamu ame enentaimiamna ainis enentaimiainiashkuisha Yuusa chichame tana ainis timiatrusan najanainiakuinkia amesha atum tarumna ainis ati tu enentaimsatameash? Uuntri anaikiamuka ni wakeramuriniak turichu atiniaiti. Chikich chichareamsha antin atiniaiti (Náṉ. 13:​8, 9; Neka. 15:22). Warik kajechu atiniaiti. Chikichniash kajertsuk shiir chichamtin tura shiir ajau atiniaiti. Itiurchat akuisha chikichjiai kajernaikiaij tusa kakain atiniaiti (San. 3:​17, 18). Chikich kajeramsha shiir chichamtin atiniaiti (Suma. 8:​1-3; Neka. 20:3; 25:15; Mat. 5:​23, 24).

14. a) Urukamtai yama imianin uuntri anaikiamu achamniait? b) Uuntri anaikiamu yana umirkatniun iniaisashtiniait?

¹⁴ Yamaipiat imianniuka uuntri anaikiamu ajaschamniaiti. Imianniamu nukap uwi achiakchaksha penker iniakmamkunka tura Yuus papiinium jintinkratna nuna mashiniu umiakka uuntri anaikiamu aminiaiti. Uuntri anaikiamu ajastaj takunka nankaamantu enentaimtumaschatniuiti, Jesús urukuya nunisan atiniaiti. Jehová wakera aintsan turatniuiti (Mat. 20:23; Filip. 2:​5-8 TNM). Yuus umirkatniun penkesha iniaisashtiniaiti nuyasha Yuusa iruntramurin jintinkratainiakui umin atiniaiti (1 Ti. 4:15).

15. Uuntri anaikiamu metekrakeash jintinkratin ainia?

¹⁵ Yuusa chichamen tawai uuntri anaikiamuka “Péṉker jintinkratin  átiniaiti”. Uuntri anairamuka chikichkia iruntramunam jintinkratuk ti penker jintinkratniusha tura chikichkia Yuusa chichame penker etserniusha iruneawai tura ni yachi ni umain ikiakainiak penker najanniusha iruneawai (1 Kurintiunam 12:​28, 29 tura Ipisiunam 4:11 nui tana nujai apatkam iista). Uuntri anaikiamu ajastasa wakerakka penker jintinkiartin atasa kakaki wetiniaiti. Itiurka nunasha turatniuit?

16. Aishman penker jintinkratin atasa warinia turatniuit? (Nakumkamusha iista).

¹⁶ Jintinkratuk Yuusa chichame tana timiatrusan jintiatniuiti. Iruntramunam jintinkratkusha turutskesha ni yachi ni umain chichareaksha Yuusa chichamejai jintiatniuiti. Yuusa chichame tura papii Yuusna najankamu irunna nunasha ti unuimiatin atiniaiti (Neka. 15:28; 16:23).Yuusa chichame unuimiatkunka warinma yainkiamniait tusa esetar enentaimsatniuiti. Yanaksha jintiakka ni enentain ejejet jintiattsa kakartiniaiti. Ti penker jintinkratin atasanka chikich uuntrin penker neka ainian yainkiata timiniaiti (1 Ti. 5:17). Uuntri anaikiamu ainiasha ni yachin ni umainkisha ikiakararminiaiti turutskesha chicharkatin akuinkia chicharkarminiaiti. Nuna turaksha waitnentamujai turatniuiti. Shiir ajau atiniaiti nuya Jesús jintinkratmia nunisan Yuusa chichamejai jintinkratkunka ti penker jintinkratattawai (Mat. 11:​28-30; 2 Ti. 2:24).

KAKAKI WETA

17. a) Iruntramunam yaimin anaikiamu uuntri ajastasa warinia turatniuit? b) Uuntri ainiana nu yanaksha anaikiamniashitiaj tusar iiniak warinma enentaimsartiniait? ( Uuntri ainiana nu yanaksha anaikiamniashitiaj tusar aujmatainiak warinma enentaimsartiniait tana nu iista).

¹⁷ Iruntramunam yaimin anaikiamuka uuntri anaikiamu atasa warinia turawartiniait nuna nekaa wikia nuna timiatrusan  turachminiaitjiai tu enentaimniush iruneawai. Jehovaka atum jeamuk najankurmin shiir enentaimturmarme (1 Pit. 2:21). Uuntri anaikiamu ajastinniaka Jehová ni kakarmarijiai yainmaktatrume (Jir. 2:​12, 13). Uuntri ajastin wari tatrama nu nekamamka kakaki wetasam Yuus seata, wari tatrama nu ti unuimiatrata. Nuya uuntri anaikiamu warinma kakaki weminiaitiaj tu titia.

18. Iruntramunam yaimin ainia uuntri anaikiamu atasa warinia turawartiniait?

¹⁸ Jui tana nunaka mash aishman Kristu aents ainiana nu umikiartiniaiti nuyasha uuntri anaikiamush umikiartiniaiti (Jir. 3:16). Iruntramunam yaimin anaikiamuitkiumka uuntri anaikiamu ajasmij tusam kakaki weta. Jehová ame jintintruata iruntramurmin penker yaimkiataj tu seata (Is. 64:8 TNM). Uuntri anaikiamu ataj tusam kakakminkia Jehová yainmaktatui.