1. Pablo Kristu aents Filiposnumian papii aatuk waritmia?

 Yaimin ainiaka iruntramunam ti takakmau ainiawai. Pablo Kristu aentsun Filiposnumian papii aar akuptak uuntri anairamusha tura yaimin ainiasha amikmatruatarum timiayi (Jir. 1:1).

2. Ii yachi Luis iruntramunam yaimin asa warintia?

² Ii yachi natsamaruksha turutskesh uuntmantuksha iruntramunam yaimin anaikiamu asar warasar takakmainiawai. Ii yachi Devan naartinian 18 uwi takumiania nui uuntri yain anaikiarmiayi. Luisnasha 50 uwi iniankas takumiania nui uuntri yain anaikiarmiayi. Ii yachi Luis junis tawai: Iruntramunam yaimin anaikiamu asan warajai tura winia yatsur winia umar ti shiir enentaimturainia asarmatai shiir enentaimiajai tu tawai.

3. Ju unuimiateamunmasha wari nekaattaj?

³ Imianniuitkiumka yaimin anaikiamu ajastasam enentaimsakaitiam? Tura urukamtai yaimkiatin enentaimsatniuitiaj? Nuyasha yaimin anaitiukarat tusam wari itiurkatniuitiam? Ju unuimiateamunam nunanu nekaattaji. Emkaka iruntramunam yaimin anaikiamusha warinia najanin ainia nu nekaatai.

IRUNTRAMUNAM YAIMIN ANAIKIAMUSHA WARINIA NAJANIN AINIA?

4. Iruntramunam yaimin anaikiamusha warinia najanin ainia? (Nakumkamusha iista).

⁴ Uuntri anaikiamu iruntramunam yaimin ati tusar ii yachin imianniarun Yuusa kakarmarijiai anain  ainiawai. Yaimin ainiaka tuimpia etserkartiniait tura Yuusa chichame etsermanumsha Yuusna papii najanamu takuarat tusar yaimin ainiawai. Nuya Yuusa enentaimtutai jea japimkiatniun tura iwiarkatniun yaimiush iruneawai. Nuyasha iruntramunam ekemsatniun iin, tuntuisamun tura video apujsatniun yaimin ainiawai. Warinmansha yaimin ainiaksha Yuusna nuna emka najanin ainiawai. Jehovan anea asar ni tana nuna umirainiawai. Tura aintsan ni yachin ni umain ti anen ainiawai (Mat. 22:​37-39). Ii yachi imianniaru ainiana nu iruntramunam yaimin ajastasar warinia itiurkartiniait?

5. Iruntramunam yaimin anaikiamu ajastasar wakeruiniana nu warinia itiurkartiniait?

⁵ Iruntramunam yaimin anaikiamu ajastasar wakeruiniana nu warinia itiurkartiniait nuka Yuus papiinium aarma awai (1 Ti. 3:​8-10, 12, 13). Yaimin anaikiamu ajastasam wakerakmeka itiurkamniaitiam? Yuus papiinium aarma ana nu unuimiatram umikta. Emkaka wari enentaijiai yaimin anaikiamu ajastasam wakeram nui enentaimsata.

AMESHA URUKAMTAI IRUNTRAMUNAM YAIMIN ANAIKIAMU AJASTASAM ENENTAIMIAM?

6. Iruntramunam ame yatsum umaimsha urukamtai yaintin wakeruktiniaitiam? (Matéu 20:28; nakumkamusha iista).

⁶ Jesús urukuya nui enentaimsartai. Ninkia warinsha turaksha ni aparin tura chikich aentsun anea asa turiniuyayi. Jesuska anenkratin asa nankaamantu enentaimtumatsuk aentsun yaintasa ti kakainiuyayi (Matéu 20:28 aujsata; Juaṉ 13:​5, 14, 15). Anenkratin asam warinmansha yaimiakminkia Jehová iruntramunam yaimin anaikiamu ajastinian yainmaktatui (1 Kur. 16:14; 1 Pit. 5:5).

7. Iruntramunam yaimin ajastinian wakeruinia nu urukamtai nankaamantu enentaimtumaschartiniait?

⁷ Ju nunkanmaya aentska paant ajastinian wakerin ainiawai. Tumaitkiusha Jehová iruntramurinkia aintsanchuiti. Jesús anenkratniuya aintsan ii yachisha anenkratin asar paant ajastinian  wakerukchartiniaiti tura wiyaitjiai anaikiamuka tu enentaimsarchartiniaiti. Yaksha paant ajastasa enentaimin yaimin anaikiamka warinmansha yaimkiattsa wakerukchattawai, wikia anaikiamu asan najanachminiaitjiai chikich najanawarti tu enentaimminiaiti (Juaṉ 10:12). Jehovaka nankaamantu enentaimin ainiana nuna tura aya paant ajastinian wakeruiniana nunaka iruntramunam yaimin ajasarat tusa penke yainchattawai (1 Kur. 10:​24, 33; 13:​4, 5).

8. Jesús ni unuiniamurin warintiarmia?

⁸ Jesús amikrisha nankaamantu ajastinian enentaimsarmiayi. Santiago Juanjai aini enentaimmiarmiayi. Jesusan uunt akupin ajastatmena nui wi ame untsurumini, yatsurka menanmani amijiai pujustasar wakeraji tsankatrukta tu tiarmiayi. Jesuska searmena nu penkeraiti tutsuk junis timiayi: “Átumka, wi unuiniamutiram, uunt ajastaj tusarum wakerakrumka ashí yáimin ajastiniaitrume. Shuar atumí peṉkeri̱ ajastajtsa wakerakka takarniua nuke ajas umirtamkati” tu timiayi (Mar. 10:​35-37, 43, 44). Nekas enentaijiai ni yachin ni umain yaintinian wakeruiniaka iruntramunam nukap yaimkiartatui (1 Tis. 2:8).

IRUNTRAMUNAM YAIMIN AJASTIN WAKERACHKUMKA WARINMA ENENTAIMSATNIUITIAM?

9. Iruntramunam yaimin ajastin wakerachkumka warinma enentaimsatniuitiam?

⁹ Jehová aneakum ame yatsum umaimsha yaintasam wakerayatam iruntramunam yaimin ajastaj tu enentaimchakmeka itiurkamniaitiam? Yatsum umaim yayainia asam ti warastatmena nui enentaimsata. Jesús junis timiayi: “Achíana núja̱i̱ṉkia naṉkaamas, súana nuka shiir waraawai” (Tur. 20:35). Jesussha ainis turiniuyayi. Ninkia chikichan yaya asa ti warauyayi, amesha ainis turamniaitme.

10. Jesús aentsun anea asa warinia turiniuya? (Márkus 6:​31-34).

¹⁰ Jesús chikichan yayak warauyania nu nekaatai (Márkus 6:​31-34 aujsata). Jesús ni unuiniamurin ayamprartai tusa aran wearmiayi. Tumaitkiusha nukap aents Jesús anturkatai tusar nui pujuinian jeariarmiayi. Jesús ni unuiniamurijiai yurumacharuitkiusha nu aentsun yainkiarmiayi. Nuyasha warikmas jintiachmiayi antsu ti nukap jintintiawarmiayi. Nu aentsun jintia jintiakua kirir amajsamiayi (Mar. 6:35). Yaksha utsuam turachmiayi antsu waitnenta asa ainis turamiayi. Jesuska aentsun ti anea asa jintintiattsa wakeriniuyayi. Jesuska chikichan warinmansha yayak ti warauyayi.

11. Jesús warinia turakua aentsun yainkiarmia? (Nakumkamusha iista).

¹¹ Jesuska aentsun aya jintinchauyayi antsu ti yainniuyayi. Jesuska yurumkan nukap awajas ni unuiniamurin aents sukartustarum tusa akupkarmiayi (Mar. 6:41). Nujai Jesuska ni unuiniamurin chikichan yainkiartiniuyania nuna jintintiawarmiayi. Yamaisha aintsan ii yachi yaimin anairamu ti yainkratin ainiawai. Jesús aentsun ayurkarmiania nui ni unuiniamurisha yaimkiaru asar ti warasarmiayi (Mar. 6:42). Ju nunkanam pujumiania nui Jesuska niniunak enentaimtsuk chikich aentsun yaya wemiayi (Mat. 4:23; 8:16). Jesuska chikich aentsun Yuusna nuna jintinniuyayi  tura yainniuyayi nuna turak ti warauyayi. Amesha iruntramunam yaimin anaikiamu ajasmeka warinmansha yaimiu asam ti warastatme.

12. Chikichan yaintinian jeatsjai urukamtai ainis enentaimsashtiniaitiam?

¹² Wikia warinsha najanatniun nekatsjai tu enentaimtsuk antsu warinmansha yaimkiamniaitmena nui enentaimsata. Emkaka Yuus seamniaitme tura 1 Kurintiunam 12:​12-30 nui aarma ana nu yainmakminiaiti. Yuusan umirian Jehovaka ti shiir enentaimtinia nuna Pablo aujmattsamiayi. Ame najaneamna nunasha Jehová ti shiir enentaimturmawai. Nui enentaimsam yaimin anaikiamu ajastasam kakarta. Jehovanu najaneakum chikich yainminiaitmena nui enentaimsata. Uuntri anairamuka ame jeamunak takatnasha amasartatui (Rum. 12:​4-8).

13. Jehová enentaimtatikia wari najanniuitiaj?

¹³ Nuyasha juisha enentaimsata Jehová enentaimtatikia mashiniuti Yuus papii tana nu umiktiniaitji. Jehovanu nukap nekatniuitji nuyasha warasmajai chikich aents yaintiniaitji tura penker iniakmamsartiniaitji. Tumaitkiusha yaksha yaimin anaikiamu ajastasa wakerakka nuniasha wari itiurkatniuit?

IRUNTRAMUNAM YAIMIN ANAIKIAMU URUKU ATINIAIT?

14. Yaimin anairamu uruku asarmatai chikitcha shiir enentaimtin ainia? (1 Timiutéun 3:​8-10, 12).

¹⁴ Yaimin anairamu uruku artiniait nu 1 Timiutéun 3:​8-10, 12 (aujsata) nui nekaatai. Yaimin anairamuka chikitcha shiir enentaimtusma atiniaiti. Penker iniakmamkuinkia chikich aentscha arantukartatui. Yaimin ajasnaka yajainsha nakuruschamniaitjiai tu enentaimsashtiniaiti (Ecl. 3:​1, 4 TNM). Ni takatrin asumprusar najanin asamtai chikitcha shiir enentaimtiartatui.

15. a) Ni tana nuna timiatrusan umin artiniaiti tana nusha warintiua ta? b) Aya kuitniak ikiaunkatniun enentaimtichu artiniaiti nusha warintiua ta?

¹⁵ Ni tana nuna timiatrusan umin artiniaiti. Yaimin anairamuka nekas enentaijiai chichau, anankartichu ni tamarin tuke umin artiniaiti (Neka. 3:32). “Aya kuítniak ikiauṉkatniun enentáimtichu ártiniaiti”. Iruntramunam kuit iistinian anaikiamuitkiunka nuyasha  takatnumsha anankartichu artiniaiti. Warinsha suraksha ni yachin ni umain sumartukarat tusa utsukchartiniaiti.

16. a) Nampechu artiniaiti tana nuna warintiua ta? b) Yaksha esetas enentaimin atasa uruku atiniait?

¹⁶ Nampechu artiniaiti. Awartiun umaksha ti nukap umarchatniuiti. Tura aintsan ninki esetar enentaimin asa penkera nuna najanin atiniaiti. Ainis najanin asar Yuus papii tana nuna imiatrusan umin ainiawai. Tunaarintin ainiayat Yuusa amikri asar ti shiir enentaimin ainiawai.

17. Yanaksha yaimin anaitsuk uuntri anairamusha warinia turawartiniait? (1 Timiutéun 3:10; nakumkamu iista).

¹⁷ Yanaksha iruntramunam yaimin anaitsuk uuntri anairamuka emka penker iisartiniaiti. Takat susamun penker najanattsa kakawash tusar uuntri anairamuka nui enentaimsartiniaiti. Uuntri anairamu takatan susamka Jehová iruntramuri jutikiatniuitrume tana nuna umikiartiniaiti. Ni takatrin itiura tura urutai najanatniuit nuna neka artiniaiti. Yuusna nuna penker najanattsar kakainiana nuna chikitcha penker enentaimtusartatui. Uuntri anaikiamuitkiumka ame yatsum imianniaru Jehovanu nu nukap najanat tusam jintintiata (1 Timiutéun 3:10 aujsata). Ame iruntramurmin natsach yama imianniaru iruneawak. Akuinkia nisha Yuusa chichamen esetar unuimiatniukait. Tura iruntramunmasha ewejen takuir pachinniukait. Nuyasha Yuusa chichamen taamtsuk etserniukait. Ainis iniakmamainiakuinkia ni jeamuk takatsha susarta. Nu turakmeka ukunam yaimin anaikiamu ajasminiashit tusam nekaattame tura yaintatme.

18. Yaimin uruku atiniait?

¹⁸ Yaimin anaikiamuka penker iisma atiniaiti. Turutskesha yajauchin najancha atiniaiti. Tumaitkiusha Kristu aentstinkia antar yaksha makurmararminiaitji. Jesusnasha antar tsanumprarmiayi tura aintsan Jesús ni unuiniamurincha atumsha antrarum tsanumpramu atatrume timiayi (Juaṉ 15:20). Jesús iniakmamsamia aintsan yaimin penker iniakmamkuinkia Yuusnumia yachisha  umaisha penker enentaimtusartatui (Mat. 11:19).

19. Aishman nuatka Yuus timia nuna umiktasa warinia turatniuit?

¹⁹ Iruntramunam yaimin ataj takunka penker nuatka tura apatkachu atiniaiti. Yaunchuk Yuus aishmanka chikichkiniak nuatkatniuiti timia nuna umiktiniaiti (Mat. 19:​3-9). Tuma asamtai aishmanka tsanirmashtiniaiti (Isr. 13:4). Junasha kajinmatkichartiniaiti aya ni nuariniak aneastiniaiti tura chikich nuwan wakerukchatniuiti (Job 31:1 TNM).

20. Aishman nuatka ni nuarin ni uchirin penker iistasa warinia turatniuit?

²⁰ Iruntramun yaimniuka ni shuarin tura uchirincha penker jintintiatniuiti. Ni nuarincha ni uchirincha penker iistasa kakartiniaiti. Yuusa chichamencha tuke atsakamutin unuimiatrartiniaiti. Ni nuarijiai ni uchirijiai Yuusa chichamen tuke etserkartiniaiti. Tura ni uchirincha Yuusa amikri ajasarat tusa jintintiatniuiti (Ipi. 6:4). Aishman ainis turakka iruntramunmash penker yaimkiattawai (1 Timiutéun 3:5 nui tana nujai apatkam iista).

21. Iruntramunam yaimin ataj takumka wari turatniuitiam?

²¹ Amesha iruntramunam yaimin ataj takumka Yuus seata tura ju papiisha nukap unuimiatrata. Yaimin atasa wari turatniuit nu unuimiatram umiktasam kakarta. Jehová anea asam tura yatsumsha umaimsha anea asam yaimin atasam kakarta (1 Pit. 4:​8, 10). Nu turakmeka iruntramunmasha wara warat yaimkiattame. Yaimin atasam kakakminkia Jehová yainmaktatui (Jir. 2:​12, 13).