Nueva Yorknum Staten Island nui ii yachi Betelnumia radio WBBR nuna uraitiai tusa chikichik uwi iniankasan chichampruiniak pujursarmiayi. Tui jeamiartiniuya nuna ipiantrar nui takakmainia kanarartinian jea uuntan jeamkarmiayi. Tura radionu warinkish irunu apujsatniuncha chikich jean jeamiarmiayi. Nuna amikiar nu radionmani iniankaktiaj tusar ii yachinkia takakmastinian juarkiarmiayi. Tumaitkiusha ainis turatin yupichuchichuyayi.

Antena apujsatin itiurchatauyayi. 91 metros timianu esarmauyayi. Jimiara pau awajamunam nui nenatin armiayi. Nu pauka 61 metros timianu esantinkia armiayi. Ii yachinkia yama nankamtaikkia nuna turatai tukamar tujinkiarmiayi. Tumaitkiusha Jehová yainmaktatji tu enentaimsar najanattsar wakeriarmiania nunaka ejetukarmiayi. Calvin Prosser nu turatniunam yaimkia asa junis timiayi: Yama nankamtaik nu pau awajarkia iik ainis turaji tusar nankaamantu enentaimmiai ajakmiaji tu timiayi. Antsu ainis turutsuk ii yachinkia Jehová yainmakuitji tusar wararmiayi. Tumaitkiusha chikich itiurchatnasha wainkiarmiayi.

Radionka yama najanawaru asarmatai nui umuchkiatin utsumnatniuyania nu wainkiatin yupichuchichuyayi. Tumaitkiusha ii yachinkia radio umuchtain arutan wainkiarmiayi. Microfonon sumatsuk telefonojai ichachkiarmiayi. Febrero nantutin ichachkiamniashitiaj tusar nekapsar iisarmiayi. Warinkish iniankaktin asar Yuusnan nampersarmiayi. Nampe pujarin Juez Rutherford b  untsurmakmiaji tusa Ernest Lowe wishiniuyayi. Ii yachi Rutherfordka Brooklynnum pujus radion ichachak antu pujumiayi.

Ikiajniaktarum, natsanmai ajarme, michik mania ainis antunawai ii yachi Rutherford ainis tu timiayi. Ii yachinkia ainis turawar nu radion ichachkiartasa ara ajasar pujuarmiayi.

24 de febrero 1924 uwitin yama ichachkiatin juarkimiajnia nui ii yachi Rutherford juka Yuusa chichame etserkatniun yainmaktatji tusa jintinkratamiayi. Ashi aents yamaiya jui wari tsawantinia pujaj nuna nekaawarat tusa ju radioka yainkratkattawai tu timiayi.

Ichachkiatin juarnakmiania nui mash chichamprukma timiatrusan turunamiayi. Radio WBBR nujai testigos de Jehová armiania nuka 33 uwi Yuusa chichamen etserkarmiayi.

Julio 1924 uwitin ii yachi ii umainkia Columbus (Ohio) nui uunt tuakman najanainiak iruntrarmiayi. Ashi nunkanmania ipiawarma tarmiayi. Nu turawar alemán, árabe, escandinavo, francés, griego, húngaro, inglés, italiano, lituano, polaco, ruso tura ucraniano chichamjai jintinkratman antukarmiayi. Nui jintinkratman radionmanisha iniankakiarmiayi. Ohio State Journal nu periódico uunt tuakmanum wari nankaamamia nuna kashi kashinin etserit tusar chichamprukarmiayi.

Jueves 24 de julio nantutin 5 mil iniankasan uunt tuakmanum tarmiania nu Yuusa chichamen etserkattsar jinkiarmiayi. 30 mil iniankasan timianu papiin sukartusarmiayi, tura Yuusa chichamencha untsuri aentsun unuiniartinian juarkiarmiayi. Ainis turar uunt tuakmanum nekaska ti penker nankaamasji The Watch Tower tu timiayi.

Viernes 25 julio nantutin ii yachi Rutherford antar religión uuntri armiania nunanun kakaram chichaman aujsamiayi. Nu papiiniumka política uuntri armiania nuna, religionka uuntri armiania nunasha tura surinia uuntri armiania nunasha aentsun Yuusnan jintintiacharu asarmatai kakaram chichaman tiarmiayi. Tura aintsan Yuus anaikiamuiti tusarum Sociedad de Naciones nusha yayarme tusa kakaram chicham aarma nu papiinium amiayi. Ii yachi ii umainkia sapijmiatsuk nu chichaman etserkatai tusar kakarartiniuyayi.

 Uunt tuakmanum iruntrarmiania nuka itiurchatan wainiainiaksha katsuntratniun enentaimsar wearmiayi The Watch Tower tu timiayi. Nu chicham aarma ii pujamunam aents susartin enentaimsar uunt tuakmanumia waketrarmaji Leo Claus tu timiayi.

Octubre nantutin ii yachi ii umainkia Eclesiásticos denunciados nu papiin sukartustinian juarkiarmiayi. Nu papiinkia uunt tuakmanum ii yachi Rutherford aujsamiayi. Irutkamu Cleveland (Oklahoma) nui ii yachi Frank Johnson nu papiin ni yachi ni umai 20 minutos nuni nankaamakiartin jeastatuk ajasai sukartus amukmiayi. Ii yachin ii umain tuinsha nakak wajashminiuyayi nu irutkamunmaya aents ni Yuusa chichamen etserea asamtai wainkiatai tusar kajekar wekayarmiayi. Tuma asamtai iglesia amunam uumkamiayi tura nuinkia yaksha atsuinia asamtai ekemtai irunmiania nui nu papiin apujar ikiukmiayi. Nuna turam nuyainia warik jinkimiayi. Tura aintsan chikich iglesia jimiar aminia nuisha aitkiasan turamiayi.

Frankka jui wainiaikiatai timia nui nakamsattsa tseke wemiayi. Aents apapearmiania nu neachma apapetkarain tusa gasolinera amunam nui uumak pujumiayi. Nu aentska carronam enkemar nankaamakiarmiayi tumaitkiusha wainkiacharmiayi. Wesarmatain Frankjai Yuusa chichamen etserkattsar jinkiarmiania nu tarmatai nujai metek wemiayi.

Nu irutkamunmania wakettsar manain iglesia amiania nuni nankaamakmiaji. Ii yachi nuna junis tawai: Chikichkimias nu iglesianam 50 aents ainis wajarmiayi tura nu papiin aujainiak pujuarmiayi. Tura chikichkia etserniun iniaktiarmiayi. Mantamatin ishichik ajasarmiayi, Jehová uwemtikrampa asakrin yuminsamiaji tu tawai.

Chikich nunkanmasha ii yachi ii umainkia Yuusa chichamen sapijmiatsuk etserkarmiayi. Francia arakani Józef Krett Polonianmania aents takakmastasar tarun Yuusa chichamen ujakmiayi. Jukerusan jakaru ainiana nu nantakiartatui nu jintinkratman jintinkratat tusar chichamprukarmiayi. Nui pachinkiarat ipiamamu papiichin susarmatai iglesia uuntri nuinkia pachinkiairap tu tiarmiayi. Ainis tiarmasha antutsuk 5000 aents pachinkiarmiayi tura sacerdotesha nui pachinkiamiayi. Ii yachi Krett sacerdoten chicharuk ame Yuusna nekamna nu titia. Tutaisha nu turatniun nakitramiayi. Ii yachinkia papiin jukitniuyania nuna mash nui sukartusmiayi. Tura nu nunkanmania aentska Yuusnan nekaattsar ti wakeruiniawai tu timiayi (Amós 8:11 TNM).

África nunkanam Claude Brown Costa de Oro (nuka yamaikia Ghana tutainti) nui Yuusa chichamen etserkattsa wemiayi. Ni jintinkratma tura papiin sukartusmiania nujai Yuusa chichame nu nunkanam warik etsernakmiayi. Farmacianam takakmastasa unuimiatu John Blankson naartin ii yachi Brown jintinkratman antuk juka nekasa nuna jintinkrateawai warik tu enentaimsamiayi. Yuusnan unuimiateamuka ti ikiakatmiayi tura unuimiatainmasha nunaka pachitsuk etser wemiajai tu tawai.

John iglesia anglicana nui we sacerdoten Yuus apa, Yuus uchi tura Yuusa kakarmari chikichik Yuus ainiawai tiniu ainia nu nekasashit ainis anintrusmiayi. Yuusa chichamenka  aininkia jintinkrateatsna nuna neka asa tu timiayi. Sacerdote ti kajek junis timiayi: Ameka Kristu aentschaitme, ameka iwianchniaitme yamaikia jinki werumta tu timiayi.

Ni jeen waketki Johnka sacerdoten apa, uchi, Yuusa kakarmari nu Yuusak ainiawai urukamtai ainis tame nu jintiata tusa papiin aatar akuptukmiayi. Atak iiksan sacerdoteka unuikiartin ainia uuntrin nui weta tu timiayi. Nui jeamtai unuikiartin armiania nuna uuntrinkia sacerdote aatramkam tu aniasmiayi.

Ee aatramjai Johnka tu timiayi.

Unuikiartinkia sacerdote papiin aatar tsakunturta titia tu timiayi. Ainis tutai John junis aarmiayi:

Winia unuitiana nu amin tsakunturta tusam papii aatram akuptukta turutui. Tuma asamtai ame jintinkrateamna nuka nekaschaiti takuminkia wi tsankurturta titiatjame ainis aarmiayi.

Unuikiartinkia Johnka ainin aartasam wakeram tu timiayi.

Ee aya nunak aarminiaitjai John tu timiayi.

Ainis aakmeka jiki akupnaktatme. Sacerdotesha urukamtaiya tush tame? Uunt naamkanu takakmamna nunia jirmakiartatui unuikiartin tu timiayi.

Tumaitkiusha uunta ame jintinkrateakmin ii nekaachar anintru wechamkaj John tu timiayi.

Ee, nekas tame unuikiartinkia tu timiayi.

Wisha aitkiasnak turamjai sacerdote Yuusnan unuiniakui anintrusmajai. Ni wi anintrusmajna nuna airkashmanumsha urukamtai winiasha tsankurturta tusam aatrata turuteam John tu timiayi.

Tuma asamtai Johnnaka jiki akupkacharmiayi tura tsankurturta tusam papii aatrata tusar utsukcharmiayi.

Nu uwitin Yuusna turamu nuna aujmatuk The Watch Tower junis timiayi: David aintsan “Maaniktinium ame kakarmaram surame” (Salmo 18:39 TNM). Ju uwintinkia ii uuntri yainmakuitji Yuusan nekas enentaimtuiniaka warasmajai etserkaruiti tu timiayi.

Uwi amuamunam ii yachinkia radionmani nu nukap etserkatai tusar chichamprukarmiayi. Chicago nuntumas nui chikich radion jeamtinian juarkiarmiayi. Inkis chichamjai WORD tu anaikiarmiayi, Yuusa chichamen tuiniak ainis tiarmiayi. Nu radiojai Canadá arakani timianaisha Yuusa chichamenka antukatniuyayi.

1925 uwitin Yuusna paant amajsatin juarnakmiayi. Ii yachi ii umainkia Apocalipsis 12 nui tana nuna penker nekaawartiniuyayi. Penker nekaawar yamaikia junisaiti taji tu etserainiakui nuna nakitiainiasha iruniarmiayi tumaitkiusha nukap aents nuna penker antuiniasha iruntiniuyayi. Nayaimpiniam wari nankaamastiniuya tura nu nankaamakui ju nunkanam Yuusan umirainia pujuiniasha urukawartiniuya nuna nekaawarminiuyayi.