1. Jesús yainkratkattsasha itiurkait?

 Jesús yainkratkana aniuka aentska atsawai. Jesús ju nunkanam pujumiania nuinkia aents najanachminian najanmiayi aentsun yainkiartasa (Ruk. 9:​12-17). Ninkia ni iwiakmarin iini sukartusmiayi (Juaṉ 15:13). Tura jaka nantaksha yaintatajrume timiania nutiksan yainkratki weawai. Nuyasha jintinkratasa tura ikiakakrakattsa Jehová kakarmaram susarta tu seatramniuitji (Juan 14:​16, 17 TNM, nota; 16:13 TNM). Ashi aentsun jintintiawarat tusa iruntramunmasha jintintramji (Mat. 28:​18-20).

2. Jesús sukartusua nusha ya ainia? (Ipisiunam 4:​7, 8).

² Jesús warinia chikichniasha suramsaitiaj nu nekaawartai. Apóstol Pablo timiayi Jesús nayaimpiniam waka aishmankan sukartusuiti timiayi (Ipisiunam 4:​7, 8 aujsata). Nu aishmannaka iruntramunam yaimkiarat tusa sukartusuiti (Ipi. 1:​22, 23; 4:​11-13). Yamaiya juinkia ju ainiawai: uuntri anaikiamu, uuntrin yaincha tura wekas iikratin. a Kame nu aishmanka maakchartin asar unuu ainiawai (San. 3:2). Tumaitkiusha nu aishmannaka Jesús sukartusuiti yainkratkarat tusa.

3. Jesús aishmankan sukartusuana nu itiurkaria yainkiarminiaitiaj nu apatkam aujmattsata.

³ Kristu aentsun ikiakarartasa Jesús nu aentsun sukartusuiti (Ipi. 4:12). Tuma asamtai takatrin umikiarat tusar yainkiartiniaitji. Watskea, iruntai jean jeamainiak pujuinia nui enentaimsartai. Takatnum yaimiainiasha yurumkan  suiniasha carrojai yaimiainiash tura chikich warinkish najanainiash irunminiaiti. Aintsankete uuntri ainiana nusha yaintrisha tura wekas iikratniusha ni takatri najanatniun takakainiawai, tuma asamtai iisha yainkiarminiaitji. Nu aishman takatan najanainiana nu iincha warinma yainmakminiaitiaj nu nekaawartai. Tura nu aishmankan Jesús sukartusu asamtai iisha yuminkiakur wari itiurkatniuitiaj nusha nekaattaji.

YAIMIN ANAIRAMUKA IRUNTRAMUNAM YAIMNIUITI

4. Yaunchuk Kristu aents yaimin anairamu armiania nu warinma yaimin armia?

⁴ Yaunchuk Kristu aentska iruntramunam yaimniun anain armiayi (1 Ti. 3:8). 1 Kurintiunam 12:28 nui Pablo yaimin ainian timiania nunaka aishman anairamu armiania nuna timiayash tumainti. Uuntri ainia ni yachin ni umain jintintiawar ikiakararat tusar yaimin ainiaka warinmansha yaimin armiayi. Yuusa chichame awainki awainki aartinian turutskesha warinia utsumiartiniuya nuna sumaktinian yaimin armiayash tumainti.

5. Yamaiya juisha yaimin anairamusha warinma yaimin ainia?

⁵ Yamaiya juisha yaimin anairamusha warinma yaimin ainia? (1 Pit. 4:10). Kuitia iin, tura tuimpia etserkatniuit nunasha iin, papii Yuusnan seami sukartin, tuntuisamun tura video apujsatniun iin, ekemsatniun iin, nuyasha iruntai jea penkerashit tusar iistinniumsha yaimin ainiawai tura nuyasha iruntramunam penker ati tusa nui mash yaimin ainiawai (1 Cor. 14:40 TNM). Yaimin anairamuka Jesús Najanmiania Aitkiasrik Najanawartai tana nui jintinkratin ainiawai tura Yuusa chichamencha jintinkratin ainiawai. Nuyasha uuntri ainiana nu Yuusa chichame etserkatin emtikiatin yaimkiata tutai yaimin ainiawai. Yaimin ainiaka uuntri ainiana nu nemartusta tutai nemarin ainiawai.

6. Yaimin anairamu ainiana nu warinia turin asarmatainia shiir enentaimtiniaitiaj?

⁶ Yaimin ainiana nu iruntramunam yaimiainiakui ti shiir enentaimtutainti. Ii umai Bolivianmaya Beberly b naartin junis tawai: Ainis yaimiainiakui nampesminiaitjiai, ewejrun takuincha aujmattsamniaitjiai, Yuusa chichame jintiniakuisha penker antukminiaitjiai, videonsha tura nakumkamun apujainiakuisha iisminiaitjiai. Nuyasha iruntramunam ni yachi ni umain penkerash pujuiniak tusar iin ainiawai. Tura jeanian Zoomnumani iruntramun antukarat tusar yain ainiawai. Tura nuyasha iruntramu amukamtai japimkiatniunam, kuit iistinnium, tura Yuusna papii sukartustinnium yaimin ainiawai. Tuma asamtai yaimin ainiana nuna ti yuminkiainiajai ainis tawai. Leslie uuntri nuarinti ninkia Colombianam pujawai tura junis tawai: Yaimin ainiana nuka winia aishrun ti yayau ainiawai. Winia aishruka ni yaimiainiakui ni takatrincha penker najaneawai. Ainis yaimiainiakui yuminkiainiajai tu tawai. Iisha aintsan yuminkiainiaji (1 Ti. 3:13).

7. Yaimin ainiana nu yuminkiakur wari najanamniaitiaj? (Nakumkamusha iista).

⁷ Yaimin ainiana nu ayataik yuminsajme chichartiniaitji, antsu Yuusa chichame tana aintsan yuminkiakur warinsha najanamniaitji (Kurs. 3:15). Uuntri anaikiamu Daavid naartin Finlandianmaya junis tawai: Takatnash penker najanainiak winiasha ikiakatin asarmatai mensajenam turutskesha tarjetanmankesh Yuusa  chichamen aatran akuptin ainiajai. Pascal tura Jael naartin Nueva Caledonia nunkanam pujuinia junis tuiniawai: Yuus seakur Jehová yuminkiajme yaimin ainiana nu sukartusu asakmin nisha yainkiarta tu seawitji tuiniawai. Nu turakrinkia Jehovaka yaimin ainiajai yainmaktatji (2 Kur. 1:​10, 11).

UUNTRI ANAIKIAMUKA IRUNTRAMUNAM TI TAKAKMAU AINIAWAI

8. Pablo yaunchunia Kristu aents uuntri armiania nuna urukamtai ti takakmainiawai timia? (1 Tisarúnikianam 5:​12, 13).

⁸ Yaunchunia Kristu aents uuntri anairamu armiania nu iruntramunam ti takakma armiayi (1 Tisarúnikianam 5:​12, 13 aujsata; 1 Tim. 5:17). Ninkia Yuus enentaimtustinian emtuki ju wearmiayi, tura warinia najanawartata nuna iruntu wearmiayi. Nuyasha iruntramunam warinsha itiurchat ain tusar ni yachi ni umain anenkratmajai chicharin armiayi, tura Yuusan iniaisaij tusar kakaram aja wearmiayi (1 Tis. 2:​11, 12; 2 Tim. 4:2). Tura aintsan ni shuarincha penker wainin armiayi (1 Ti. 3:​2, 4; Tit. 1:​6-9).

9. Uuntri anairamu ainiana nusha yamaiya juisha wari takatna najanin ainia?

⁹ Yamaiya juisha uuntri anairamuka ti takakmainiawai. Yuusa chichamencha etserin ainiawai (2 Ti. 4:5). Etserainiaksha taamtsuk etserin ainiawai. Tuimpia etserkatniuit nuna mash iwiarar taku ainiawai, tura itiurkaria etserkatniuit nuya aents unuiniakrisha itiurkaria jintiawartiniait nunash jintinkratin ainiawai. Iruntramunmanka metekrak iikratin ainiawai, waitnenkratmajai chichamnash iwiarin ainiawai. Yaksha ti tunaamkamtainkia ataksha Jehovai waketki tusar yain ainiawai. Tura yajauch najanma ain tusar penker iin ainiawai (1 Kur. 5:​12, 13; Kar. 6:1). Nekaska uuntri ainiaka murikiun wainin ainiana ainis ainiawai (1 Pit. 5:​1-3). Tura Yuusa chichame jintinkratainiaksha penker iwiarnarar jintinkratin ainiawai. Ni yachincha tura ni umaincha penker nekattsar wakeruinia asar jeen weriar aujsar Yuusa chichamejai ikiakarar ikiu ainiawai. Tura chikichkia iruntai jea jeamtinian turutskesha iwiarkatniunam yaimin ainiawai. Nuyasha uunt tuakman najanattsar iwiarin ainiawai. Hospitalnum takakmainiajai chichasarat tusar anairamusha iruneawai, tura hospitalnum jaak pujuiniana nuna chichamprukarat tusar anairamusha iruneawai. Tura chikich takatnasha najanin ainiawai. Ninkia ti yainmainiaji.

10. Urukamtai uuntri ainiana nu ti shiir enentaimtusartiniaitiaj?

¹⁰ Jehová timiayi: Winia murikruka uuntri anairamu penker wainmia asar penkesha sapijmiakchartatui timiayi (Jrm. 23:4). Ii umai Johanna Finlandianmaya ni nukuri ti jaakui itiur nankaamasmia nuna aujmatuk junis tawai: Wi itiur nekapeaj nuna etserkatniun tujinniuitjiai. Tumaitiatnak uunt anaikiamun nisha yainkiamniashit tu enentaimiaiyatnak ujakmiajai, turam anturtuk Yuus seatai turutmiayi tura Jehovaka anenmawai tu turutmiayi. Tura ni turutmiania nunaka kajinmatkiniaitjiai antsu itiur nekapramiaj nunaka kajinmatkichuitjiai.Jehovaka wi utsumajna nunaka neka asa yainkiamiayi tu tawai. Amincha uuntri anairamusha warinma yainmakaruit?

11. Uuntri anairamu ti penker enentaimtuinia asar wari najanamniaitiaj? (Nakumkamusha iista).

¹¹ Uuntri anairamuka ti takakmainia asarmatai Jehovaka ti penker enentaimtusarat tusa wakerawai (1 Tis. 5:​12, 13). Henrietta Finlandia nunkanam puja junis  tawai: Uuntri anairamuka kakaram ainiawai, itiurchatnash waincha ainiatsuash, turutskesha ankantan takakainiatsuash tu enentaimtuschartiniaitji. Urutainsha uuntri anaikiamun weantukan ameka penker takakmawitme tiniuitjiai tawai. Antsu ii umai Turquianmania Sera naartin junis tawai: Uuntri anairamuka kakartinian utsumin ainiawai tuma asamtai tarjeta najatan su ainiajai tura yurumatniuncha ipiau ainiajai, etserkatniunmasha nijiai jinin ainiajai tawai. Ame iruntramurmin uunt anaikiamu aitkiasmek turata (1 Kur. 16:18).

WEKAS IIKRATIN AINIANA NUKA IRUNTRAMUN IKIAKAIN AINIAWAI

12. Yaunchuk Jesús ikiakarartasa yana anairamia? (1 Tisarúnikianam 2:​7, 8).

¹² Jesús warinia chikichnasha suramsaitiaj? Jerusalennumia uuntri Kristu aents armiania nu wekas iikrattsa tusa Pablon, Bernaben tura chikichniasha wekas iikratin arat tusar anaikiar akuprarmiayi (Tur. 11:22). Nush urukamtai turawarmia? Uuntri tura yaimin ainia ni yachin ni umain ikiakain ainiana aitkiasan ikiakararat tusar anaik akupkarmiayi (Tur. 15:​40, 41). Wekas iikratin ni yachin ni umain jintiawar ikiakarartasar ti waitsarmiayi. Penke jatancha janintsarmiayi (1 Tisarúnikianam 2:​7, 8 aujsata).

13. Wekas iikratniusha wari takatna najanin ainia?

¹³ Wekas iikratniuka tuke yaja wekas iikratin ainiawai. Tuke atsakamutin nukap jintinkratin ainiawai. Ni jeencha weriar ni yachin ni umain ikiakain ainiawai, tura precursor ainiajaish, uunt anairamujaish irunin ainiawai, nuyasha etserkattsa jinkittsar irunin ainiawai. Nuya uunt tuakmanum jintinkratatniuncha iwiarnau  ainiawai. Tura uunt tuakman najanatniun chichamprin ainiawai. Escuela de precursores tura reunión especial con los precursores de circuito najanawartasa chichamprin ainiawai. Tura Betelnumia warinkish najanatin akuinkia nunash warik iin ainiawai.

14. Urukamtai wekas iikratin ainiana nu shiir enentaimtusartiniaitiaj?

¹⁴ Wekas iikratin itiurkara yainkratin ainia? Ii yachi Turquianmaya junis tawai: Wekas iikratin tamatainkia winia yatsur tura umar ainiajai iruntran nankaamastasan tura yainkratkattsan wakeriniaitjiai. Nukape wekas iikratin ainia nuna nekawaruitjai, ankan pujuiniachu tura wijiansha aujmattsattsa wakerachu aini iischaruitjiai tu tawai. Párrafo 10 nui Johannanu aujmattsajnia nu Yuusa chichame etserkattsan junisan nankaamasmajai tusa aujmateawai. Wekas iikratniujai Yuusa chichame etserkattsan jinkin jeanka yaksha pujuiniaka awaintrashmaji. Tura wikia ti kuntuts nekapmiajai jimiar winia kaer yaja wearu asarmatai tura wekas iikratin chichartak yamaikia ii shuarjai iruntrar matsatsuji, ukunmatainkia shiiram nunka atatna nui mash iruntrar matsamtiatji tu ikiakatramiania nuna kajinmatchaitjiai tawai. Ainis aitkia asarmatai wekas iikratniunka ii yachi ii umaisha ti shiir enentaimtin ainiawai (Tur. 20:37–21:1).

15. a) 3 Juaṉ 5-8 tana aintsan wekas iikratin ti penker enentaimtuinia asar wari itiurkamniaitiaj? (Nakumkamusha iista). b) Anairamu ainiana nuna nuwesha urukamtai kajinmatkichartiniaitiaj? Wari turamniaitiaj? ( Anairamu ainiana nuna nuarisha kajinmatkichartai tana nui iista).

¹⁵ Apóstol Juan Gayo naartinian chicharuk iruntramun iistasar jeainiakuinkia “atsumainiana nu susam shiir akupkarta. Péṉker wáinkiumka Yus shiir enentáimtikrattame” timiayi (3 Juaṉ 5-8 aujsata).  Yamaisha wekas iikratainiakui ayurattsar ipiawarminiaitji tura etserkatniunmasha nu atsakamutinkia tuke jinminiaitji. Leslieniu párrafo 6 nui aujmattsajnia nu wekas iikratniun yuminkiak itiurkamia nu nekaawartai. Ni utsumainiana nu Jehová susarta tu seainiajai. Nuyasha winia aishrujai yuminkiajrume iincha ikiakakratka asakrumin tu aatrar akuptiniaitji tawai. Wekas iikratin ainiana nusha sunkurmau ainiawai, warinmansha ti enentaimin ainiawai tura majatcha nekapin ainiawai. Wekas iikratniun ikiakarat tusa turutskesha warinkisha susat tusa Yuus utsukmaktin jeawai (Neka. 12:25).

AISHMAN ANAIRAMU UTSUMNAWAI

16. Ii yachisha warinma enentaimsarminiait? (Nekatai̱n Jintinkiartin 3:27).

¹⁶ Ashi nunkanam aishman anairamu iruntramunam utsumnawai. Yatsuru imiainiutkiumka amesha anaikiamu ajasminkaitiam? (Nekatai̱n Jintinkiartin 3:27 aujsata). Uuntri yain atasam kakamek? Uuntri yain ajasuitkiumka uuntri anaikiamu ajastasam kakamek? c Escuela para Evangelizadores del Reino wetasam winia iwiakmarui warinsha najanatin akuisha iniaisatjai tu enentaimsakaitiam? Nui unuimiatrakmin Jesús warinsha najanatniun amasminiaiti. Nu aitkiatin tujintiakmeka Jehová seatniuitme, warinsha najanatniun amainiakui timiatrusnak penker umikmij tusam Yuusa kakarmari seamniaitme (Luc. 11:13 TNM; Tur. 20:28).

17. Ii yachi uunt anairamu ti takakmainia asarmatai warimpia paant nekaamniaitiaj?

¹⁷ Jesús aishman anairamu suramsaitiajnia nu ti takakmainia asarmatai yamai amukatin tsawannum pujajnia jui Jesús jintintrameajnia nu paant nekaamniaitji (Mat. 28:20). Ii uuntri Jesuska ti anenmaji, ninkia ti tsankaiti, ii utsumajnia nunasha nekawai tuma asa ii yachin yainkratkarat tusa sukartawai. Iisha ni yuminkiainiakur warinsha najanamniaitji. Tuma asamtai Jehová yuminsajme titin iniaisashtiniaitji. Ninkia “Ashí péṉker ana nu, ashí shiir ana nusha” amasuitji (San. 1:17).