1, 2. Jesusa nemarniuri jimiar armiania nu Emausnum jeatai tusar wenamunam wari nankaamasmia?

 33 uwitin 16 de nisán nu tsawantin Jesusa unuiniamurinkia ti kuntuts tura sapijmia pujuarmiayi. Jesusan nemarniuri jimiar armiania nu Jerusalennumia jinkiar Emausnum jeatai tusar wearmiayi. Nui jeatniuka arantauyayi. Jesusan maawaru asarmatai majat enentaimsar wearmiayi. Jesús jakasha itiuran uwemtikramprattaj tu enentaimiarmiayi. Ainis enentaimki wenai aya neachma Jesús watinkiamiayi.

² Aents nekashtai Jesusa unuiniamurin nemarkiar wemiayi. Jesusa nemarniuri jimiar armiania nuka Jesusan maawaru asarmatai ti kuntuts tura majat enentaimsar pujaji tusar ujakarmiayi. Nu aentska Yuusa chichamen aarma amiania nuna aujmattsatniun juarkimiayi. Tura Jesús urukamtaiya waitias jakatniuya nuna paant timiayi. Jesusa nemarniuri armiania nuka Emausnum jeawar yajai aujmattsarmia nuna paant nekaawarmiayi. Jesús nantakniun wainkiaruyayi. Jesús nantakniun nekaawar ti warascharmiashia (Ruk. 24:​13-35).

3, 4. a) Jesusa nemarniurisha urukawarmia? (Túramuri 1:3). b) Ju unuimiateamunmasha wari nekaattaj?

³ Jesús nantaki 40 tsawan ju nunkanam pujumiania nui ni nemarniuri armiania nuna nukape wantintiukmiayi (Túramuri  1:3 aujsata). Ni nemarniuri armiania nuna ikiakararmiayi. Ainis ikiakaram ni nemarniurisha kuntuts tura sapijmia pujuiniayat ti warasarmiayi, tura kakaram ajasar Yuusa chichamen sapijmiatsuk etseriarmiayi. a

⁴ Jesús nantaki pujumiania nui turamiania nuna nukap nekaamniaitji. Jesús ni nemarniurin ikiakararmiania nuna tura Yuusa chichamen penker nekaawarat tusa nuyasha Yuusna nu nukap najanawarat tusa yainkiarmiania nunasha nekaawartatji. Nu chikichkimsar unuimiatkur iisha Jesús turamiania aitkiasrik itiura najanamniaitiaj nuna nekaawartatji.

II YACHI II UMAI IKIAKARTAI TUSAR ITIURKAMNIAITIAJ

5. Jesusa nemarniurincha urukamtai ikiakarartin armia?

⁵ Jesusan nemarkarmiania nuka Jesusan nemariartaj tusar ni shuarin, ni jeencha tura surutairincha ikiukiaruyayi. Ainis turawaru asarmatai ikiakarartin armiayi (Mat. 19:27). Tura chikichkia Jesusan nemarin ajasu asamtai imiancha iismash armiayi (Juaṉ 9:22). Jesuska Yuus akupkamuiti tu enentaimiainia asar ainis turawarmiayi (Mat. 16:16). Tumaitkiusha Jesusan maawarmatai ii enentaimiajnia nuka turunashtatuapi tu enentaimsar ti kuntuts enentaimiarmiayi.

6. Jesús nantakmiania nui warinia turamia?

⁶ Nin nemarin armiania nuka ni jaka asamtai kuntuts pujuarmiania nuna Jesuska paant nekamiayi. Yuusnum majat pujuinia asar ainis nekapainiawai Jesuska tu enentaimsachmiayi. Tuma asa nantakmiania nu tsawantinin ni amikri ainianka ikiakartinian juarkimiayi. Ni iwiarsamunam pujus uutu pujan Jesús María Magdalenan wantintiukmiayi (Juaṉ 20:​11, 16). Yama juarkur Jesusa nemarniuriniu jimiarna aujmattsajnia nuna nuya Pedroncha wantintiukmiayi  (Ruk. 24:34). Jesús turamiania nuna wari nekaamniaitiaj? Yamaikia Jesús María Magdalenan wantintiukmiania nui wari nankaamasmia nuna nekaatai.

7. a) María urukuk pujana Jesús iismia? b) Jesussha yaintaj tusa itiurkamia? (Juaṉ 20:​11-16; Nakumkamusha iista).

⁷ (Juaṉ 20:​11-16 aujsata). 16 de nisán tsawarmatai nuwa kashik nantakiar Jesús iwiarsamunam wearmiayi (Ruk. 24:​1, 10). María Magdalenasha nui wemiayi. Jesús iwiarsamunam jea Jesusa ayashi atsan wainiak Pedron tura Juannasha ujaktaj tusa tseke ajasmiayi. Pedro Juanjainkia Jesús iwiarsamunam jeattsar tseke wearmiayi tura nisha ukunman ajasmiayi. Pedro Juanjainkia Jesús iwiarsamunam jeawar Jesuska atsan iisar waketkiarmiayi. Tumaitkiusha María Magdalenaka nui juak uutu pujumiayi. Ninkia wainchakuisha Jesuska ii wajatmiayi. Tura uuteakui Jesús waitnentar wantintiuk ikiakarmiayi. Nuyasha nijiai aujmattsamiayi tura yatsur ujainiakum Jesuska nantaki tu tiarta tusa akupkamiayi (Juaṉ 20:​17, 18).

8. Jesusa aintsan najanatai tusar itiurkamniaitiaj?

⁸ Jesusa aintsan najanatai tusar itiurkamniaitiaj? Ii yachi ii umaisha Jehovan tuke enentaimtuki wearat tusar ikiakartiniaitji. Warinkisha itiurchat nankaamainiatai tusar anintrusrik ajatniuitji tura waitnentrartiniaitji nuyasha aneasmajai nijiai aujmattsartiniaitji. Ii umai Jocelyn naartin ni kai jakamtai itiurchat nankaamasmiania nuna junis tawai: Nukape nantu ti kuntuts enentaimsan pujumiajai tu tawai. Ii yachi ni nuarijiai ni jeen ipiawar ii umai itiur nekapmia nuna aujmatkui amamkesar anturkar Jehová ti anenmawai tu tiarmiayi. Ii umai junasha tawai: Entsa chichimi amunam jakeki wea nuke nekapmiajai. Jakekin weai Jehová umarun ni nuarijiai akupturak uwemtikrurua ainis nekapramiajai. Jehová enentaimtuki wetinian yainkiarmiayi tu tawai. Chikich aents yaintai takurkia itiur nekapainia nuna ujatmainiakrin amamkesar anturkatai. Nu turakrikia Jehovan tuke enentaimtusarat tusar ikiakarartatji (Rum. 12:15).

II YACHI II UMAI YUUSA CHICHAMEN PENKER NEKAATNIUN YAINTAI TUSAR WARI ITIURKAMNIAITIAJ

9. a) Jesusan nemarniuri armiania nusha warinia penker nekaatniun utsumiarmia? b) Jesussha itiura yainkiarmia?

⁹ Jesusan nemarin armiania nuka Yuusa chichamen nekasaiti tuinia asar nui aarman umiktai tusar kaka wearmiayi (Juaṉ 17:6). Tumaitkiusha Jesusnaka kasa ainis maawaru asarmatai majat enentaimsar pujuarmiayi. Ni nemarniuri armiania nuka penker enentain takaku ainiayat Yuusa chichame penker nekaatniun utsumiarmiania nuna Jesuska nekamiayi (Ruk. 9:​44, 45; Juaṉ 20:9). Tuma asa Yuusa chichamen aujearmiania nuna penker nekaawarat tusa yainkiarmiayi. Ni unuiniamuri jimiar Emausnum wenamunam Jesús waritmia nuna nekaatai.

10. Ninkia Yuus akupkamuyania nuna ni unuiniamuri paant nekaawarat tusa Jesussha itiurkamia? (Rúkas 24:​18-27).

¹⁰ (Rúkas 24:​18-27 aujsata). Jesuska ni nemarniurin jimiaran wantintiukmiania nuna ni yauya nunaka tichamiayi antsu aya anintrusmiayi. Urukamtai? Ni enentaimmian tura itiur nekapiarmia nuna tiarat tusa ainis turamiayash tumainti. Tuma asar Jesuska Romanmania aentsnumia ankan awajkartusat tusar wakerimji tiarmiayi. Ni enentaimmian tuiniakui Yuusa chichamejai yaunchuk aarma itiur uminkiamia nuna paant nekamtikiawarmiayi. b Nu tsawantinin Jesús chikich nemarniurincha wantintiukarmiayi tura yaunchuk Yuusa chichamen aarma itiur uminkiamia nuna paant  jintintiawarmiayi (Ruk. 24:​33-48). Nujaisha iisha wari nekaamniaitiaj?

11, 12. a) Jesús Yuusa chichamejai unuikiarturmiania nuna wari nekaamniaitiaj? (Nakumkamusha iista). b) Nortey naartinian Yuusa chichame unuiniamiania nusha itiur yainmia?

¹¹ Jesusa aintsan najanatai tusar itiurkamniaitiaj? Yaksha Yuusa chichame unuiniakur ni enentaimmian titi tusar penker enentaimsar anintrusartai (Neka. 20:5). Ni enentaimmia nekaar Yuusa chichamesha wari ta nuna penker nekaat tusar yainminiaitji. Junis turatniuitme tutsuk Yuusa chichame aujtusar nuniajai anintrusartai. Ni iwiakmarin warinia turatniuit nuna nekaat tusar ainis turatniuitji. Yamaikia ii yachi Nortey naartin nankaamasmiania nuna nekaatai.

¹² Nortey 16 uwi takumiania nui Yuusa chichamen unuimiatratniun juarkimiayi. Ni shuari nin kajeramsha Yuusa chichamen unuimiatki wetinian wari yainmia? Nin unuiniamiania nu Matéu akankamu 10 nuyan aujtus nekas Kristu aents ainiaka kajerkamu artiniaiti tu timiayi. Nortey junis tawai: Wi shuar kajertuktinian nankaamawarmiania nui Yuusa chichamen paant jintian nekaamiajai tu tawai. Nuyasha ni unuiniamurinkia Matéu 10:16 nui aneartiniaitrume tana nuna iniaktusmiayi tura Yuusa chichamenia wari nekaitiam nuna amee shuarmijiai aujmattsattamna nui ainis turata tusa jintiamiayi. Tura imianmiania nui precursor ajastinian wakerimiayi tumaitkiusha aparinkia uunt unuimiatainiam unuimiut tusa wakerimiayi. Nin unuiniamiania nuka ju turatniuitme tutsuk ninki enentaimias ni iwiakmari warinia turatniuit nuna nekaat tusa Yuusa chichame aujtusman nuniajai anintrusmiayi. Ainis turan urukamia? Nortey naartinkia precursor regular ajasmiayi tura aparinkia jiki akupkamiayi. Ni junis tawai: Penkera nuna najanaitjiai tu enentaimiajai tu tawai. Yuusa chichamen penker nekaat tusar yaksha yayakrikia Yuusnum katsuarat tusar yaintin jeaji (Efes. 3:​16-19 TNM).

II YACHI YUUSNUM KATSUARU AJASARAT TUSAR ITIURKAMNIAITIAJ

13. Yuusa chichamenka tuke etsernaki weti tusa Jesussha warinia turamia? (Ipisiunam 4:8).

¹³ Jesús ju nunkanam pujumiania nuinkia Yuusa chichamen etserkatniun nuna pujursamiayi (Juaṉ 17:4). Penker etsernakat takunka wiki nunaka turatniuitjiai aininkia  penkesha enentaimsachmiayi. Menaintiu uwi iniankasan Yuusa chichamen etserkamiania nuinkia nin nemarin armiania nuna penker jintiawarmiayi. Jesuska nin nemarin armiania nuna Yuusa chichamen etserkatniun tura ni yachi ni umaincha penker wainkiarat tusa nu takatan susarmiayi. Nin nemarin armiania nuka 30 uwi takakchasha armiayi (Ipisiunam 4:8 aujsata). Nu aishmanka Jesusjai metek takakmasaruyayi. Tuma asamtaisha Jesuska nayaimpiniam wetsuk nin penker jintintiawarmiayi. Nunasha itiura turamia nu nekaatai.

14. Jesús nantaki ju nunkanam 40 tsawan pujumiania nui nin nemarin armiania nusha Yuusnum katsuararat tusa itiurkamia? (Nakumkamusha iista).

¹⁴ Jesuska nin nemarin armiania nuna nakak tinia jintiaksha aneasmajai tu wemiayi. Nin nemarin armiania nu Jesús nekasash nantakniuit tu enentaimiainiasha irunmiayi. Tuma asarmatai aini enentaimsairap tu timiayi (Ruk. 24:​25-27; Juaṉ 20:27). Kuitrintin ajastin enentaimtsuk Yuusan enentaimtuiniana nu yaintin enentaimsatarum Jesús tu timiayi (Juaṉ 21:15). Yuusnan nukap yaimkiat tusar chikichan anaiyainiakui suir enentaimsairap tu timiayi (Juaṉ 21:​20-22). Yuusa anaikiamuriniun mash nekaatin enentaimtsuk Yuusa chichame etserkatin nekaska nu najanatarum tu timiayi (Tur. 1:​6-8). Uuntri anaikiamu ainiana nusha Jesusnan warinia nekaawarminiait?

15, 16. a) Uuntri ainiana nusha Jesús turamiania aitkiasan turawartasa warinia najanawarminiait? b) Patrick uuntri anaikiamu chicharkam urukamia?

¹⁵ Uuntri ainiana nusha Jesús turamiania aitkiasan warinia najanawarminiait? Ni yachin tura natsamaru ainiana nunasha warinkish turatniun unuiniararminiaiti. c Uuntri anaikiamu ainiana nuka ni yachinkia penkesha awajichu arat tusar wakeruiniatsui. Antsu natsamaru ainiana nuna nankaamantu enentaimcha penker umin chikichnasha yaintinian wakerin arat tura warinkisha turatniun unuimiatrarat tusar aneasmajai jintintin ainiawai (1 Ti. 3:1; 2 Ti. 2:2; 1 Pit. 5:5).

¹⁶ Patrick naartin natsamaruyania nuinkia shiir ajachuyayi tura Yuusnumia umaincha kajekmajai tiniuyayi. Ainis iniakmamean uuntri anaikiamu nekaa aneasmajai chicharkamiayi. Patrick junis tawai: Ainis  chichartukmiania nuna yuminkiajai wari wikia Yuusnan najanatniun wi wakeramun chikich Yuusnumia yatsurun suiniakui itiurchat enentaimmiajai. Uuntri anaikiamu turutmiania nuka nankaamantu enentaimtsuk yatsurun tura umarun yaintinian yainkiamiayi. Tura warinmansha yaimkiat tusa warinkish surusarat tusan aya nuin enentaimia pujushtinniasha yainkiamiayi tu tawai. Ni enentaimmian yapajia asamtai Patrickniaka 23 uwi takumiania nui uuntri ati tusar anaikiarmiayi (Neka. 27:9).

17. Nin nemarin armiania nuna nekas umikiartatui tu enentaimiu asa Jesús waritmia?

¹⁷ Jesuska aya Yuusa chichame etserkatniunak takatan sukartuschamiayi antsu unuikiarturtinniasha takatan sukartusmiayi (Matéu 28:20). Ni nemarniuri armiania nuka nu takatnaka tujinkiarmin aini enentaimsacharmiashia. Tumaitkiusha Jesuska nu takatnaka penker umikiartatui tu enentaimiu asa junis timiayi: “‘Winia Apar akatar akuptúkma núnisnak Wisha akatran akupeajrume’ tímiayi” (Juaṉ 20:21).

18. Uuntri ainiana nusha Jesús turamiania aitkiasan warinia najanawarminiait?

¹⁸ Uuntri ainiana nusha Jesús turamiania aitkiasan warinia najanawarminiait? Uuntri ainiana nuka ni yachin Yuusnan najanawarat tusar unuiniarartiniaiti tura Yuusnan najanatniun takatan susartiniaiti (Jir. 2:​19-22). Natsamaru ainianka iruntramu jea japimkiatniun tura nui warinkisha iwiaratniun yaimkiat tusar ipiawarminiaiti. Yuusnan warinmansha yaimkiat tusar unuiyainiak nekas penker umiktatui tu enentaimin ainiawai. Matthew naartin yamaipiat uuntri anaikiamuiti. Yuusnan penker umikattawai tusar yaunchuk uuntri anairamu ainia nin jintintin ainiawai. Matthew ainis yayamu asa uuntri anaikiamu ainian shiir enentaimtiniaiti. Matthewka junis tawai: Wi awajiamun nekaamatniun yaintiainiawai tura atakka au penker najanatniuncha yaintiainiawai tu tawai. d

19. Warimpia tuke turatin iniaisashtiniaitiaj?

¹⁹ Jesuska nantaki 40 tsawan ju nunkanam pujumiania nui nin nemarin armiania nuna jintintiawarmiayi tura ikiakararmiayi nuyasha unuiniararmiayi. Iisha Jesús turamiania aitkiasrik tuke turatin iniaisachartai (1 Pit. 2:21). Ninkia tuke yainmaktatji, tuma asa junis timiayi: “ ‘Tuke tsawantai̱ ikiutsuk atumji̱a̱i̱ pujuttajai’ tímiayi” (Mat. 28:20).