AKANKAMU 43
NAMPET 90 Iruntrar mai ikiakanai ajaartai
Warinmansha enentaimsam majat enentaimiakmeka itiurkamniaitiam
“Ashí etserkamu ana nu nekasashit tusarum nekaatarum” (1 TIS. 5:21).
JU UNUIMIATRATTAJI
Yuusna takakmajna nu penkerashit tu enentaimkiur itiurkamniaitiaj.
1, 2. a) Warintia enentaimminiaitiaj? b) Ju unuimiateamunmasha wari nekaattaj?
Ashi aentsti warinmansha nekasashit tu enentaimniuitji. Watskea natsamaru Jehová nekasash winisha enentaimia tu enentaimiu asa imiantinniaka enentaimtsui. Tura chikich ii yachisha natsauyania nuyainian kuitian ikiaunkatniun enentaimtsuk Jehovanun ti nukap najanamiayi. Tumaitkiusha yamaikia uchirtin ajasu asa tura kuitniasha ikiaunkachu asa winia iwiakmaruin penker enentaimsan nekasash najanaitiaj tu enentaimminiaiti. Tura aintsan ii umai uuntmantu yaunchuk uchi asa Yuusnan nukap najanniuyania nuna yamaikia najanachmin asa kuntuts enentaimminiaiti. Jehová winisha enentaimiawash? Niniun warinmansha yaimkiaitiajna nu nekasash penkerait? Wi jeamun najanmancha Jehová penkerash iiya? Amesha tu enentaimtsumeash?
2 Tu enentaimiakrikia majat enentaimsatin jeaji tura Jehová enentaimtamusha iniaisatin jeaji. Ju unuimiateamunam Jehovaka wininkia enentaimiatsui tura yaunchuk Yuusnan najanaitiajna nuna nekasash penker najanaitiaj turutskesha yamaikia Jehovanun nukap najanachminiaitjai tu enentaimkiurkia itiurkamniaitiaj nu yamai nekaattaji.
WARINMANSHA ENENTAIMKIUR WARI ITIURKAMNIAITIAJ
3. Ii enentaimiajnia nusha tui penker nekaamniaitiaj?
3 Nuik tajinia ainis enentaimiakrikia Yuusa chichame nunaka penker nekatniun yainmakminiaitji. Yuusa chichame penker nekarkia Jehová nekas winia amikruiti tu enentaimsattaji. Nuyasha Yuusnum tariarar pujuttaji (1 Kur. 16:13).
4. 1 Tisarúnikianam 5:21 nui tana aintsan warinmansha nekasashit tu enentaimiakrikia itiurkatniuitiaj?
4 (1 Tisarúnikianam 5:21 aujsata). “Ashí etserkamu ana nu nekasashit tusarum nekaatarum” Yuusa chichame ainis turameaji. Nusha itiura ainis turamniaitiaj? Ii enentaimiajnia nu Yuusa chichamejai apatkar enentaimiakur nu turattaji. Watskea natsamaru Jehová nekasash winisha enentaimiawash tu enentaimminiaiti. Tu enentaimiak warinia itiurkatniuit? Jehovasha itiurak enentaimia nuna nekaattsa Yuusa chichame tana nuna unuimiatratniuiti.
5. Warinmansha nekasashit tu enentaimiakrikia Jehová warintiua nu nekaattsar wari itiurkatniuitiaj?
5 Yuusa chichame aujeakrikia Jehová iin aujtameajnia aintsaiti. Tumaitkiusha warinmansha nekasashit tu enentaimiakrikia Jehová warintiua nu nekaattsar Yuusa chichame aya aujsashtiniaitji antsu warinma enentaimiaj nuna Yuusa chichame aujmatu eakar tura papii Yuusna aujmatainiana nujaisha unuimiatratniuitji (Neka. 2:3-6). Nuyasha unuimiatrattajnia nuna Jehová penker nekatniun yainkratkat tusar seatniuitji. Yuusa chichame jintinkrateana nu nekaar tura wari itiurkamniaitiaj nunanu aujmatusha eaktiniaitji. Nuyasha yaunchunia aents iiya aintiakun enentaimiarmiania nuna Yuusa chichame aujmateana nusha unuimiatramniaitji.
6. Iruntramunam weakrisha wari nekaamniaitiaj?
6 Iruntramunam weakrisha Jehová antureajnia aintsaiti. Nui taamtsuk weakrikia nekasen jintinkratmanum turutskesh chikich aujmatainiakui ii nekattsar wakeramu nekaamniaitji (Neka. 27:17). Yamaikia ii nekaattsar wakeramu itiur nekaamniaitiaj nu nekaattaji.
JEHOVÁ WINIASHA ENENTAIMTUREAWASH
7. Warintia enentaimsamniaitiaj?
7 Jehovasha winiasha enentaimtureawash ainis enentaimsachuashitiam. Nekas imiancha enentaimtuma asan Jehová amikri ajastinniaka jeatsjai tu enentaimsamniaitme. Uunt akupin Davidcha ainis enentaimchamashia tuma asa aentstikia imiancha arinin Jehovaka iincha enentaimturmajnia nuna nekaa junis timiayi: “Jiuwáa ¿aentsti Ame imiá enentáimtutai̱ átincha warimpiaitiaji? ¿Aentsush warí uruku asamtai timiasha aneam?” (YKan. 144:3). Urukamtai ainis timia nu nekaawartai.
8. 1 Samuir 16:6, 7, 10-12 tana aintsan Jehovasha aentsnasha waririnia iirniuit?
8 Nekas imianchaitjiai tu enentaimia nunaka Yuus papiikia Jehovaka enentaimtuiniawai tawai. Jehovaka Samuelan Jesé jeen weme akupin atatna nu aceite ukatrata tusa akupkamiayi. Jeseka siete uchiri armia nuna Samuel wajamunam naka awajtusarmiayi. Tumaitkiusha Davidniaka a nui itiarchamiayi. Turasha Jehovaka Davidtian anaikiuyayi (1 Samuir 16:6, 7, 10-12 aujsata). Nush urukamtai turamia? Jehovaka Davidtia enentain nekaru asa nin aneemia nuna nekarmiayi.
9. Jehovaka nekas enentaimtureawai urukamtai tu enentaimsatniuitiam? (Nakumkamusha iista).
9 Jehová amin enentaimturmak warinsha najanana nui enentaimsata. Nekasen ame utsumamna nuna jintintramniuiti (YKan. 32:8).Nekarma asa jintintramniuiti (YKan. 139:1). Jehová tana nu umiakum ni yainma wainiakmeka Jehovaka winiasha enentaimturui tu enentaimsattame (1 Crón. 28:9 TNM; Tur. 17:26, 27). Ninkia mash najaneam nuna wainniuiti tura ame urukuitiam nuna iiniaiti (Jrm. 17:10). Tuma asa ame amikrum ati tusa wakeriniaiti (1 Juaṉ 4:19).
“Eamka waitkiat tusa iniaitiamsattawai” (1 Crón. 28:9 TNM). (Párrafo 9 nui iista). b
YAUNCHUK NAJANAMIAJ NUNA PENKERASH NAJANAITIAJ?
10. Yaunchuk najanaitiajnia nui enentaimkiur warintia enentaimsamniaitiaj?
10 Yaksha yaunchuk najantairun iniaisaitiajna nuna penkerash turaitiaj tu enentaimsamniaiti. Takatrinsha tura suruk takakmastasa wakeraksha Jehovanu takakmastasa wakera asa iniaisa aminiaiti. Tura nekatairinkia ti nukap takakmasaru asar penker pujuinia iimniaiti. Jehovanu najanattsan warinsha najantairun iniaisaitiajna nuna penkerash turaitiaj turutskesha chikich warinkisha najanaitkiunka penkerash pujuaj tu enentaimsamniaiti.
11. Salmo 73 aaru urukamtai kuntutscha pujumia?
11 Ainis enentaimkiumka Salmo 73 aarmiania nui enentaimsamniaitme. Ninkia junis timiayi: Yuusan umircha ainiaka penker pujuiniawai, kuitniash takakainiawai tu timiayi (YKan. 73:3-5, 12). Penker pujuinia iiya asa antran Jehovanu takakmasuitjiai tu enentaimsamiayi. Nuinki enentaimkiun tuke tsawan kuntuts pujumiajai tawai (YKan. 73:13, 14). Ainis enentaimmiancha warimpia yainmia?
12. Yus Kanta 73:16-18 juna aarusha penker enentaimsatniuncha wari yainmia?
12 (Yus Kanta 73:16-18 aujsata). Salmo 73 papii aaruka Yuus enentaimtutai jeanam wemiayi. Nui pujuska penker enentaimsamiayi. Ainis penker pujuiniaksha chikichkia aruma nuinkia penker pujuchartiniuya nuna nekaamamiayi. Jehovanu takarsatin imia penkera nuna nekaa shiir enentaimsamiayi, tura Jehovanu ti nukap takarki wetinian yainmiayi (YKan. 73:23-28).
13. Warinma enentaimkiumea shiir enentaimsamniaitiam? (Nakumkamusha iista).
13 Salmo 73 papii aaru shiir enentaimsamiania aintsamek amesha shiir enentaimsamniaitme. Nush itiur aintsan enentaimsamniaitiam? Ame penker pujamna nui enentaimsam tura Jehovasha shiir enentaimturmana nui enentaimsata. Tura Yuusa enentaimtichuka Jehová yayashma asar penkercha pujuiniana nui enentaimsata. Ninkia ukunmatai penker pujustin enentaimiainiaksha penkerka pujuschartatui. Antsu ameka Jehová enentaimtin asam ukunmatainkia penker pujuttame (Sal. 145:16 TNM). Chikich warinsha iik wakerusar najanaitkiurkia yamaisha itiur pujuaj nu nekaachaji. Ju nekatniuitji nekaska Jehová tura aentscha anea asar niniu najankurkia ti penker warasar pujuttaji.
Jehová uruma nui najanattana nu enentaimsar pujutniuitji. (Párrafo 13 nui iista). c
JEHOVÁ WI JEAMUNAK NAJANAJ NUNA PENKERASH IIYA?
14. Yuusna takarin ainia nusha wari itiurchatna wainin ainia tura warintia enentaimin ainia?
14 Yuusnan takarin ainia nuka ti nukap najanatniuncha wakeruiniayatsha uuntmantu asar sunkurmakkesh pujuiniak turutskesha tunamaru asamsha jeacharminiaiti. Ainis nankaamainiak Jehová wi jeamunak najanaj nuna penkerash iiya tu enentaimsarminiaiti.
15. Salmo 71 aarmiania nusha nekassha warintia enentaimsamia?
15 Salmo 71 aarusha aintiaku tawai: “Kakarmachu nekapeakuisha ajapa ikiurkip” tawai (YKan. 71:9, 18). Nuna timia nuka Yuusna asumprusan iniaitsuk takakmakuinkia yainkiattawai tura itiurkatniuitiaj nunasha jintintruattawai tu enentaimiuk timiayi. Jehovaka ii jeamujai najankurin warana nuna nekamiayi (YKan. 37:23-25).
16. Uuntmantu ainiana nuna urukamtai Jehová shiir enentaimtiniait? (Yus Kanta 92:12-15).
16 Weamsaitkiumka Jehová shiir enentaimturmana nui enentaimsata. Jehovanu nukap najanatin jeashkumsha ame jeamuk najanatniun yainmaktatui (Yus Kanta 92:12-15 aujsata). Jeatsmena nui enentaimiu pujutsuk ame jeamuk najanmena nui enentaimsata. Ame penker najanmajai chikitcha nuna iisar kakararminiaiti tura yainkiarminiaitme. Jehová itiur yainmakuit tura ni chichakmarin uminkiat tusam nakamna nu chikitcha ujakarminiaitme. Nuyasha Jehová chikichniash yainkiarat tusa seatiarminiaitme (1 Pit. 3:10-12). Mashiniuti Jehovanu nukap najanamniaitji tura chikitcha yainkiarminiaitji.
17. Chikich najanainiana aitkiasnak najanamniaitjiai urukamtai tu enentaimsashtiniaitiam?
17 Yaunchuk najanniuyajna aintsanak najanachminiaitjiai tu enentaimkiumka Jehovaka ame jeamna nuna shiir iiyana nui enentaimsatniuitme. Chikich najanainiana aitkiasnak wisha najanamniaitjiai tu enentaimsashtiniaitme. Urukamtaiya aintsar enentaimsashtiniaitiaj? Jehovaka yajainsha apatak iirmachuitji (Kar. 6:4). María Jesusan kunkuin ti kuitian nawenam ukatramiayi (Juaṉ 12:3-5). Antsu wajeka Yuusa jeen kuit enketainiam penke ishichichik kuitian enkeamiayi (Ruk. 21:1-4). Nuna Jesuska Yuusan nekas enentaimtuiniak aitkiawaruiti tu enentaimsamiayi. Aintsan Jehovasha ni aneakum ame jeamuk najanmena nuna ti shiir iirmawiti.
18. Nekasashit ame tu enentaimiam penker nekatniun wari yainmakminiait? ( Warinsha nekattsam wakerakmeka Yuus papiinium nekaamniaitme tana nuisha iista).
18 Mashiniuti nu nekasashit tu enentaimniuitji. Tumaitkiusha Yuus papiikia nu nekatniun yainmakminiaitji. Nu nekattsam wakerakmeka wainkiam shiir enentaimsattame. Ame turamna nuna Jehovaka iirmawai tura ti shiir enentaimturmawai. Aruma nuinkia suramsattajnia nuna amastatji, niniu ainia nunaka anea asa penker waitmawitiajnia nu kajinmatkishtiniaitme.
NAMPET 111 Jehovanu nekakur wara warat nekapeaji
a Yuusa chichamenka David urutma uwi takumia nunaka tatsui, Jehová akupin anaikiamia nuinkia natsamaruash tumaiyayi (La Atalaya del 1 de septiembre 2011 uwitiniu, página 29, párrafo 2 nui iista).
