1. Jukerusan Jesús warinia turatta?

 Jukerusan Jesús ju nunkanam pujuiniana nuna ni turamurin iirsartatui. Nu tsawan jeatin ishichik ajasusha itiur nekaj? Jesús ni nayaimpiniam pujutniuyania nuna tura amuukatin jeakuish itiur nekawartiniuya nuna ni unuiniamurin ujakmiayi (Mat. 24:3). Matéu akankamu 24 tura 25 nuya Márkus akankamu 13 nuyasha Rúkas akankamu 21 nui Jesús timiania nu aujsamniaitme.

2. a) Ju unuimiatmanumsha wari nekaattaj? b) Nusha urukamtai nekaattaj?

² Jesuska anearar pujuarat tusa metektakun apatak aujmattsamiayi. Ovejan nuya cabran akantratniun, tura 10 nuwa natsanun aujmattsamiayi, nuya kuit susarman nunasha aujmattsamiayi. Nu unuimiatkur Jesús aentsun waririnia iirsatta nuna nekaattaji. Ju unuimiatmanum nuna wari nekaamniaitiaj nusha nekaattaji. Emkaka ovejan nuya cabran akantratniun Jesús aujmattsamiania nu nekaattaji.

OVEJAN TURA CABRAN AUJMATTSAMU

3. Jesussha urutain aentsu turamurin iirsat?

³ Jesuska aentsu turamurin iirsattana nuinkia Yuusa chichame etserman antukuashit tura nayaimpiniam weartin ainiana nuna yainkiaruashit tusa chikichkimias iirsattawai (Mat. 25:​31-46). Yait oveja turutskesha yait cabra nunasha Jesussha urutain titiata? Armagedón juarnaktin ishichik ajasmanum nuya ti waitsatin tsawan amusatuk ajasmanum nui ainis turattawai (Mat. 24:21). Ovejan cabranmaya akaneana aintsan Jesús turattawai. Nayaimpiniam weartin ainiana nuna yayainianka yayainiatsna nuyainian Jesús akankartatui.

4. Isayas 11:​3, 4 tana aintsan Jesuska aentsun penker sumamtikiattawai urukamtai ainis taji? (nakumkamusha iista).

 ⁴ Aentsu turamurin iirsat tusa Jehová Jesusan anaikiaiti, tura Jesuska nekasa nujai metek aentsun sumamtikiattawai Yuusa chichame tu tawai (Isayas 11:​3, 4 aujsata). Ninkia aents warinia enentaimiainia tura warinia chichainia nuyasha warinia turuinia nuna iirniuiti, nayaimpiniam weartin ainiancha itiur amajin ainia nunasha iirniuiti (Mat. 12:​36, 37; 25:40). Nayaimpiniam weartin ainian ya yainkiaruit nuna nekattawai. a Nayaimpiniam weartin ainiana nu yaintai takurkia nekaska Yuusa chichame etserkatniuitji. Nayaimpiniam weartin ainiana nuna yayainiaka penkeraitrume timia artatui, tura tuke iwiaku pujustinian tsankatkamu artatui (Mat. 25:46 TNM; Apoc. 7:​16, 17 TNM). Nuka ti penkeraiti. Ti waitsatin tsawan atatna nui tura nu nankaamasu aisha Yuusan tuke umirainiaka tuke iwiaku pujustin papiinium ni naari anujkamu artatui (Apu. 20:15).

5. a) Oveja tura cabran akantrarman aujmattsamusha wari itiurkatniuna jintintrameaj? b) Yaki nunasha umikiartiniait?

⁵ Yuus tuke umirin ata. Oveja tura cabran aujmattsamuka ju nunkanam tuke iwiaku pujuartin ainiana nunanun aujmatuk Jesús ainis timiayi. Nayaimpiniam weartin ainiana nuna Yuusa chichame etserkatniun yayainia asarmatai, nuyasha testigos de Jehová takatrin irunturar chichampruiniana nunasha yayainia asarmatai Yuusjai iismaka penker iisma ainiawai (Mat. 24:45 TNM). Oveja tura cabranu aujmattsamunka nayaimpiniam weartin ainiana nusha nui enentaimsartiniaiti. Urukamtaiya? Ni enentaimiainiana tura tuiniana nuna nuya najanainiana nunasha Jesuska iiyawai. Nisha Yuusan tuke umirkartiniaiti. Tuma asamtai Matéu akankamu 25 nui aujmatna nusha nekaattaji. Nui aujmatna nuka nayaimpiniam weartin ainiana nu warinia itiurkartiniait nuna nui paant tawai. Yamaikia 10 nuwa natsanu aujmattsamu nuna nekaattaji.

10 NUWA NATSANUN AUJMATTSAMU

6. Cinco nuwa natsa ti enentaimin armiania nusha itiurkarmia? (Matéu 25:​6-10).

⁶ 10 nuwa natsanun Jesús aujmattsamiania nuinkia nu nuwa armiania nuka nuatkatniun inkiuntasar wearmiania nuna aujmattsamiayi (Mat. 25:​1-4). Nu nuwa armiania nuka nuatnaikiatin nampernum nuatkatniujai waniattsar wakeriarmiayi. “Seṉku nuwa̱ ímian enentáimcha armai. Tura chíkich seṉku nuwa̱ ti enentáimin armai” Jesús tu timiayi. Ti enentaimin armiania nu nuwaka iwiarnarar anermak pujuarmiayi. Nu nuwaka nuatkatin warik taachkuisha kashi sukukir wetai tusar akaamuncha jukiarmiayi. Nuyasha akaamu kajinkiain tusar aceiten nukap jukiarmiayi (Matéu 25:​6-10 aujsata). Nuatkatin tamatai nuatnaikiatin nampernum nijiai metek waniawarmai. Nuatkatin tajinia nuka Jesusaiti, nayaimpiniam weartin Yuusan umirkaru Jesús taamam anermak pujuiniana nuka nayaimpiniam Jesusjai metek uunt anaikiamu ajasartatui (Apu. 7:​1-3). b Cinco nuwa natsa imian enentaimcha armiania nusha wari urukawarmia?

7. Cinco nuwa imian enentaimcha armiania nu urukawarmia tura urukamtaiya?

 ⁷ Cinco nuwa natsa imian enentaimcha armiania nuka iwiarnarar pujucharmiayi. Yuus papiinium tana aintsan nuatkatin tatin ishichik ajasman nekaamawarmiania nui akaamurinkia amuukatin ishichik ajasuncha nekaamawarmiayi. Akaamunam yaratniun aceiten itiacharu asar nu kajinkiain tusar aceiten sumaktasar wearmiayi. Nu nuwa waketki tainiachmanum nuatkatinkia tamiayi. “Túramtai enentáimin nuwa̱ arma nuka nuatnaikiatin nampernum nuatkatniuja̱i̱ waya̱warmai” (Mat. 25:10). Arum nuwa imian enentaimcha armiania nu taar enkemattsar wakeriarmiayi tumaitkiusha nuatkatinkia junis timiayi: “Cha, ¿yátsukaitrum? Peṉké nékatsjarme” tu timiayi (Mat. 25:​11, 12). Nuatkatin warik taachkuisha nakaa pujuttsar iwiarnarcharuyayi. Nayaimpiniam weartin ainiana nusha nujaisha warinia unuimiatrarminiait?

8, 9. 10 nuwa natsanu aujmattsamujai nayaimpiniam weartin ainiasha warinia nekaawarminiait? (Nakumkamusha iista).

⁸ Iwiarnaram tura anermak pujusta. Nayaimpiniam weartin amuukatin nuntumsamunam anearar pujuiniasha tura anearar pujuiniachusha iruntiatui Jesús tu jintinkratachmiayi. Antsu yajauchia nu amumam katsuntratai tusarum iwiarnarum pujachkurmeka wijiai nayaimpiniam uunt anaikiamu ajaschattarme tusa ainis jintinkratamiayi (Juaṉ 14:​3, 4). Nuka nekas aintsaiti. Ju nunkanam tuke iwiaku pujuartatna nu tura nayaimpiniam pujuartatna nusha 10 nuwanu aujmattsamun nekaawartiniaiti. Mashiniuti anermak pujustiniaitji tura yajauchia nu amumam katsuntratai tusar iwiarnarar pujutniuitji (Mat. 24:13).

⁹ 10 nuwa natsanu Jesús aujmattsamiania nu unuimiatkur iwiarnarar tura anermak pujustiniaitiajnia nu nekaaji. Jesús 10 nuwa natsanu aujmattsamiania nuna amik  kuitian susarman aujmattsamuncha jintinkratamiayi. Nujai Jehovanu asumprusar takakmastiniaitji tusa ainis jintinkratamiayi.

KUITIAN SUSARMAN AUJMATTSAMU

10. Jimiar takarniurisha umin asa itiurkaruya? (Matéu 25:​19-23).

¹⁰ Jimiar aents takata nerenniurin umirkarmiania nuna tura chikichik umirkachmiania nunasha Jesús aujmattsamiayi (Mat. 25:​14-18). Aents aran weak ni takarniuri armiania nuna nukap kuitian waitruktarum tusa ikiukiarmiayi. Jimiara takarniurinkia kuitian nukap irurartasa ti takakmasarmiayi. Kuitia nerenniuri susarmiania nuna ikiaunkaruyayi. Tuma asarmatai kuitian susamiania nu chikichkimias junis timiayi: “Winí̱ waya̱m wiji̱a̱i̱ ti shiir warasta” timiayi (Matéu 25:​19-23 aujsata). Antsu chikichik takarniuri itiurkauya?

11. Chikichik takarniuri nakiyania nusha urukamia tura urukamtaiya?

¹¹ Kuitian nerenniurinkia mashiniun ikiaunkarat tusa kuitian susarmiayi. Tumaitkiusha takarin nakiyania nuka nunka taur kuitian uukmiayi. Kuitia nerenniuri waketkimtai nu takarniuka kuitian awantukmiayi. Kuitian ikiaunkachu asa tsankurturta tutsuk ameka ti kajen asakmin kuitian ikiaunkachjai antar tu timiayi. Ainis takui kuitian nerenniurinkia chicharak kuitian atanki ni jeenian jiki akupkamiayi (Mat. 25:​24, 26-30).

12. Penker takarniu jimiaran Jesús aujmattsamiania nusha yana aujmatuk timia?

¹² Penker takarniun jimiaran Jesús anaikiamia nuka nayaimpiniam weartatna nuna aujmatuk timiayi. Antsu kuitia nerenniuriya aintsaiti Jesuska. Kuitia nerenniuri timiania aintsan Jesuska nayaimpiniam weartin ainian winirum wijiai ti shiir warastarum chikichkimias tu tawai. Nu aentska emka nantaktin ainiawai tura nayaimpiniam nantakiar ainis tumainiawai (Mat. 25:​21, 23; Apu. 20:​4, 5). Nayaimpiniam weartin ainiaka takarniu nakiyaunia ainis aij tusar anearartiniaiti. Yamaikia nunanu unuimiatrartai.

13, 14. Nayaimpiniam weartin ainiana nu kuitian susarman aujmatna nujaisha warinia unuimiatrarminiait? (Nakumkamusha iista).

 ¹³ Asumprusam takakmau ata. Kuitian susarman Jesús aujmattsamiania nuka nayaimpiniam weartin ainiaka naki ajasartatui tusanka ainis tichamiayi. Antsu 10 nuwa natsanun nuna aujmatuk timiania aintsan ni warinma anearartiniuya nuna jintinkratattsa tu timiayi. Asumprusar Yuusna najanainiachkuinkia Yuus untsukaruana nuna emenkakar nayaimpiniam uunt anaikiamu achartatui Jesús nuna jintinkratattsa ainis timiayi (2 Pit. 1:10).

¹⁴ 10 nuwa natsanun aujmattsamiania nujai tura kuitian susarman aujmattsamiania nujaisha nayaimpiniam weartin ainiana nuka mashiniu iwiarnarar anearar pujuartiniaiti tusa Jesús tu timiayi. Nuyasha asumprusar takakmau artiniaiti tusa ainis timiayi. Tumaitkiusha aya nunakka Jesús tichamiayi. Antsu Matéu 24:​40, 41 timiania nusha iistai.

YAKI JUNAKIT

15, 16. Matéu 24:​40, 41 nui tana aintsan nayaimpiniam weartin ainia nusha uruamtaiya anearar pujuartiniait?

¹⁵ Metektaku chichaman manaintiun aujmattsuk emka Jesús jimiara aishman kampuniunam takakmainian aujmattsamiayi tura jimiara nuwa shana nekenancha aujmattsamiayi. Nu aents mashiniu metekrak najanainia aintsauyayi tumaitkiusha Jesuska junis timiayi: “Chikichik junaktiatui tura chíkichkia ikiunkittiawai” tu timiayi (Matéu 24:​40, 41 aujsata). Urum ni unuiniamuri armiania nuna Jesús junis timiayi: “Nu asamtai atumsha iwiarnarum pujustarum. Nekaachminiaiti uruk áintsuk taritjiarum” tu timiayi (Mat. 24:42). 10 nuwa natsanun aujmatas amik Jesús aintiaku timiayi (Mat. 25:13). Ya nayaimpiniam nekassha jukimiu artata nu paant nekanattana nuna Jesús jintinkratamiayi. Tuma asamtai junis timiniaitji: Nayaimpiniam weartin Yuusan umirkaruana nuke jukimiu artatui, uunt anaikiamu arat tusa Jesús nayaimpiniam awaniawartatui (Juaṉ 14:3).

¹⁶ Anearam pujusta. Nayaimpiniam wetin jukmaitiat Yuusnum anear pujatsna nuka chikich aents nayaimpiniam pujuartatna nujai iruntrashtatui (Mat. 24:31 TNM). Ju nunkanam tuke iwiaku pujuartatna nusha Jesús timiania nui enentaimsar anearar pujuiniak Yuusan tuke umirkartiniaiti.

17. Jehová yamai tsawantincha nayaimpiniam wearat tusa chikichnasha anaiyakuisha nui enentaimsar urukamtai itiurchat enentaimtsuj?

¹⁷ Iikia Jehová penker neka asar ni najanna nuka penkeraiti tu enentaimniuitji tuma asamtai yamai tsawantin Jehová nayaimpiniam wearat tusa chikichnasha anaiyakuisha iikia nui enentaimsar itiurchat enentaimiu pujatsji. c Takata nerenniuri takatan amustatuk amajsayat chikichnasha untsuk itiamiayi tusa Jesús aujmattsamiania nui enentaimniuitji (Mat. 20:​1-16). Kashik takakmastinian juarkiarusha kiarai taarujaish metek akinkiarmiayi. Aintsan yaunchuk nayaimpiniam wearat tusa anairamu ainiasha tura yamai anairamu ainiasha metekrak nayaimpiniam tuke iwiaku pujustinian susamu artatui.

JESÚS JINTINKRATAMIANIA NUI ENENTAIMSARTAI

18, 19. Ju unuimiateamunam wariniua unuimiatraj?

¹⁸ Oveja tura Cabra akantrarman Jesús timiania nuna unuimiatkur ju nunkanam  tuke iwiaku pujustasar wakeruiniaka yamaisha tura ti waitsatin tsawan atatna nuisha Yuusnaka tuke umirin artiniana nu nekaaji. Ti waitsatin tsawan jeamtainkia ya tuke umin ainia nuna Jesús iistatui tura nu aentska tuke iwiaku pujustin tsankatkamu artatui (Mat. 25:46 TNM).

¹⁹ Nuyasha Jesús nayaimpiniam weartinian jintintiattsa jimiaran aujmattsamiania nusha nekaaji. 10 nuwa natsanun aujmattsamiania nuinkia 5 nuwaka iwiarnarar anermak pujuarmiayi. Nu nuwaka nuatkatin warik taachkuisha nakastai tusar iwiarnarar pujuarmiayi. Tura 5 nuwa imian enentaimcha armiania nuka iwiarnatsuk pujuarmiayi tuma asamtai anajmaruka ni nuatnaiyamu nampernum awaniacharmiayi. Wari nekaamniaitiaj? Jesús yajauchia nuna amuktatna nu tsawan jeamam nakakur iwiarnarar pujutniuitji. Tura aintsan kuitian susarman Jesús aujmattsamiania nuinkia jimiar takarin armiania nuka ti takakmau armiayi. Umin asar kuitian ikiaunkatai tusar takakmasaru asarmatai kuitia nerenniurinkia penkeraitrume timiayi. Antsu chikich takarin nakiyania nunaka jiki akupkarmiayi. Wari nekaaj? Yajauchia nu amuukatin jeamam Yuusna nuka tuke turu pujutniuitji. Nuyasha nayaimpiniam weartin ainiana nu nayaimpiniam jukimiu atai tusarka anearar pujuartiniana nuna Jesús timiania nusha nekaaji. Nayaimpiniam weartin ainiana nuka nayaimpiniam Jesusjai inkiunaiktinian wakerusar pujuiniawai. Armagedón nankaamasmatai Jesusa anajmarmari ainis artatui, nijiai nuatnaiyainiana ainis artatui (2 Tis. 2:1; Apu. 19:9).

20. Metektaku chichamjai Jehová jintintramaitiajnia nu umiakrinkia Jehovasha itiurtamkattaj?

²⁰ Jesús aentsu turamurin iirsattana nu tsawan jeatin ishichik ajasai tumaitkiusha ashamkashtiniaitji. Uminiaitkiurninkia ii apari Jehová ni kakarmarijiai yainmakrin aents ajasu tutai iimmianum penker atatji (2 Kur. 4:7; Ruk. 21:36). Tuma asamtai nayaimpiniam turutskesha ju nunkanam tuke iwiaku pujutniuitkiursha Jesús metektaku chichamjai apatak aujmattsamiania nui enentaimsartai. Nu turakrinkia ii apari Jehová penkeraitrume turamtiatji tura ni penker asa ii naari chikichkimias iwiaku atinia nu papiinium aarma atatui (Tan. 12:1; Apu. 3:5).