1, 2. a) Judea nunkanam Pablo Hebreos papiin armiania nui wari itiurchatan nankaamarmia? b) Urukamtai Pablo papii aar akuptukarmia?

 Jesús jakamtai hebreo aents Kristu aents armiania nuka ti itiurchatan wainkiarmiayi. Jerusalennum yama congregación najannamtai apapetan nankaamawarmiayi (Tur. 8:1). Tura 20 uwi nankaamasmatai Kristu aents kuitchajai pujuarmiayi tuma asamtai tsuka achamiashia (Tur. 11:​27-30). Antsu 61 uwitinkia apapeshtai penker matsamiarmiayi. Nu uwitin Pablo arum itiurchatan wainiainiak kakararat tusa papiin aar akuptukarmiayi.

² Nu papii aarmanka itiurchatka jeatsain nekasain utsumiarmiania nuna Pabloka akuptukarmiayi. Nuinkia ti itiurchat wainiainiak itiurkara katsuntrartiniait nuna aar Pablo akupkarmiayi. Jesús judío aents nankaamasartinian timiania nu ishichik ajasuyayi (Ruk. 21:20). Tura Pablosha Judeanmaya Kristu aents armiania nusha urutainia nu nankaamastiniuya nunaka nekacharmiayi. Ainis nankaamastin nekainia asar katsuntratniun penker iwiarnarar nakamsartiniuyayi (Isr. 10:25; 12:1; 12:2 TNM).

3. Urukamtai yamai tsawantaisha Hebreos papii aarmasha unuimiatratniuitiaj?

³ Yaunchu Kristu aents hebreo aents armiania nu ti  itiurchatan nankaamasarmiania auncha nankaamas nankaamastatji (Mat. 24:21; Apu. 16:14; 16:16 TNM). Yaunchuk Jehová Kristu aentsun jintiamiania nu yamaisha iincha yainmakminiaitiajnia nu iistatji.

YUUSNUM KATSUAKI WEARTAI

4. Judío aents Kristu aents ajasarmiania nu wari itiurchatna wainkiarmia? (Nakumkamusha iista).

⁴ Judío aents armiania nu Kristu aents ajasar yaunchuk turiarmiania nu iniaisatniun itiurchatan wainiarmiayi. Judío aentska Jehová irutkamuri armiayi. Nukape tsawan Jerusalenka ti penker iismauyayi. Nuinkia Jehová anaikiamu puju wearmiayi tura Yuusa jeesha aa wemiayi. Ashi judío aents armiania nu Moisés akatramu chichamnasha umirin armiayi. Tura Yuusna umikiaru armiania nu jintiarmiania nunasha umirin armiayi. Nuyasha chicham najankamu irunmiayi, yurumkanusha, tsupirnaktinniasha tura chikich nunkanmania shiir amajsartincha irunmiayi. Antsu Jesús jakamiania nui tankun maawar aesainiakui Jehovaka penker iichmiayi. Kristu aentska Moisés akatramu chichaman umirin asar nu iniaisatin yupichuchichuyayi (Isr. 10:​1, 4, 10). Kristu aents Yuusnum katsuarusha yupichuch iischarmiayi nu umiktinian. Apóstol Pedrosha aintsan iimiayi (Tur. 10:​9-14; Kar. 2:​11-14). Jehovan umirainiakui Yuusna unuimiakaru armiania nuka Kristu aentsun apapetan juarkiarmiayi.

5. Kristu aents Judeanmaya wari itiurchatna inkiunkarmia?

⁵ Yuusna unuimiatraru apóstata tutai armiania nu, tura Kristu aents apapekma aij tusar Moisés akatramu chicham umiktiniaitji tu wearmiania nusha Kristu aentsun apapetan juarkiarmiayi (Kar. 6:12). Ainis nankaamainiak nekas Kristu aents armiania nu Jehovan umirkatniuncha warimpia yainkiarminiuya?

6. Pablo hebreo aentsun ikiakarartasa warinmia? (Israernum 5:​14–6:1).

 ⁶ Pablo hebreo aentsun ikiakartasa papiin aak Yuusa chichame amamkesrum unuimiatrarum nui enentaimsatarum tu aarmiayi (Israernum 5:14–6:1 aujsata). Pabloka hebreo chichamjai Yuusa chichame aarmajai paant nekamtikiawartasa atumka itiur Jehová enentaimtustiniaitrum aintsarum enentaimtarme judío aentska ainis enentaimtuiniatsui timiayi. a Kristu aentsun ikiakak armiania nunaka Yuusa chichamen penker unuimiatrar nekaawar wait chichaman jintinkratainiakui nuka nekaschaiti tu enentaimsarat tusa aarmiayi.

7. Yamaisha nukap aents waritramainiaj?

⁷ Yamaiya juisha wait chichaman Yuusa chichamenianchun etserainiawai nuya iincha kajertamainiaji. Yuus papiinium tsanirmashtinian tana nu umia asakrin aentska imian iirmainiatsji. Yamaiya juinkia nukape aents Jehová enentaimiana aintsanka enentaimiainiatsui tura ni wakeramun najanainiawai (Neka. 17:15). Aents enentaimiainiana aintsar enentaimsaij tusar iik ni tuinia nu nekasashit tusar penker nekaatniuitji. Nu turakrikia Yuusnumiash aran ajaschattaji (Isr. 13:9).

8. Yuusnum katsuaki wetasar wari turatniuitiaj?

⁸ Pablo Kristu aentsun Yuusnum katsuaki wetarum timiayi. Iisha aintsarik wari itiurkatniuitiaj? Yuusa chichame ti nukap unuimiatratniuitji tura Jehová enentaimna aintsar enentaimsattsar kakartiniaitji. Testigos de Jehová ajasrisha nuka turukir wetiniaitji. Yama imianniuitkiursha Yuusa chichamenka tuke unuimiatkir wetiniaitji (YKan 1:2). Yuusa chichame tuke unuimiatkurkia Yuus chichakma nekas uminkiattawai nuya Yuus yainmaktatji tu enentaimsattaji (Isr. 11:​1, 6).

“YUS NEKAS ENENTÁIMTUSAR UWEMPRAITJI”

9. Kristu aents warinia turawartiniuya?

⁹ Kristu aentska Judea nunkanam nankaamastiniuya nui ewemprataj tuiniakka Yuusan umirkartiniuyayi (Isr. 10:​37-39). Jerusalenkan suntar tentawarmatainkia nainnium tsekentiarum Jesús timiayi. Jerusalennum pujuiniasha tura aran pujuiniasha nu chichamnaka umikiartiniuyayi (Ruk. 21:​20-24). Yaunchukka suntar tentamka nuin apemar puju armiayi, tumaitkiusha Jesús nainniumani pisartarum timiania nuna umikiartiniuyayi.

10. Pablo ni yachin tura umain wari turatarum timia? (Israernum 13:17).

¹⁰ Kristu aentska uuntri anairamun umirkartiniuyayi. Urutai tura itiur jintrartiniuya nunaka uuntri anairamuka ujakcharmiashia (Israernum 13:17 aujsata). Pablo ni Yuusnumia yachin tura umain chicharainiak uuntri anairamu umirkatarum timiayi. Nuna takunka uuntri asarmatai umirkatai tu enentaimtsuk uuntri anairamu tuiniakui nekasaiti tu enentaimsatarum tusa timiayi. Ti itiurchat jeatsain Kristu aentska uuntri  anairamu ainia nuka nekas tuiniawai tu enentaimsartiniuyayi. Nuna turuiniakka ti itiurchat jeamtaimsha umikiarminiuyayi.

11. Urukamtai yamaisha Kristu aentstisha nekas turunattawai tu enentaimsatniuitiaj?

¹¹ Yaunchuk Kristu aents umikiarmia aintsarik iisha umiktiniaitji. Yamaiya juinkia ju nunkanam yajauch irunna nu amukatin ishichik ajasainia nuna nekascha ainis enentaimtuiniawai, antsu iikia nekas turunattawai tu enentaimiakrin wishikratainiash iruneawai (2 Pit. 3:​3, 4). Nuyasha ti itiurchat atatna nuna Yuusa chichamen jintintrameaji tumaitkiusha mashikia nekatsji. Ju nunkanam yajauch irunna nu amukatniunka Jehová tsawantan antua achiakeana nu nakaji tura nu tsawan jeamtainkia penker waitmaktatji tu enentaimsatniuitji (Awa. 2:3).

12. Ti itiurchat atatna nui ewemprataj takurkia wari turatniuitiaj?

¹² Yamai Testigos de Jehová takatrin chichamprin ainiana nuka Jehová jintinkratawarat tusa apujsamuiti tu enentaimsatniuitji (Mat. 24:45 TNM). Yaunchuksha Kristu aentsun ewemprarat tusa Yuusna uuntri anaikiamu armiania nu jintiawarmiayi. Yamaisha aintsan ti itiurchat atatna nui itiur ewemprataj nuna uunt anairamu jintintramawartatji. Jehová iruntramurin emtuki juinia nekas tuiniawai tu enentaimsatniuitji. Yamaiya jui umirainiashkurkia ti itiurchat atatna nuinkia umiktin tujintiatji.

13. Urukamtai Israernum 13:5 tana nu najanatin imia penkerauya?

¹³ Kristu aentska pisartin tsawan jeamam warinsha ikiaunkattsa enentaimsachartiniuyayi, turutskesha aya kuitniunman enentaimsachartiniuyayi (Israernum 13:5 aujsata). Chikichkia tsukai waittsaruyayi, nuya kuitchajaish nankaamasaruyayi (Isr. 10:​32-34). Itiurchatan nupetkaruitkiusha tsawan nankaamaki weakui aya kuitian nukap waitmaktasa wakerutan juarkiarmiayi. Jerusalén emesnakuinkia kuitcha ewemtikracharminiuyayi (San. 5:3). Tura kuitian ti wakerinkia takakmarin tura jeencha ikiuktinian tujinkiamniuyayi.

14. Yamaiya jui mash irunainiana nuka amukatin asamtai warinma ti enentaimsashtiniaitiaj?

¹⁴ Yamaiya jui nukap irunainia nuka amukatin asamtai nukap warinsha takurmastaj tu enentaimsashtiniaitji. Tura ti waittsatin atatna nuinkia kuitkia utsumchattaji. Yuusa chichamenka tawai Jehová tsawantrinkia kuririsha kuitrisha uwemtikiachartatui tawai (Ezeq. 7:19 TNM). Kuitniasha ti nukap achirmaktaj tu enentaimtsuk takakmajain pujustin enentaimsatniuitji. Tura kuitcha tumashmakchatniuitji, nukap takarma nu iiyakur tsawan iniankarchatniuitji. Tura nuke pujurij tusar anearartiniaitji (Mat. 6:​19, 24). Jehová tsawantri nuntumki weana jui ya nukap takurmastasa wakera turutskesha Jehová yainkiattawapi tu enentaimiana nu paant nekanattawai.

ATUMKA KATSUNTIN ATINIAITRUME

15. Urukamtai Kristu aents katsuntratin armia?

¹⁵ Judea nunkanam ti itiurchat ajaki weakuisha Kristu aentska katsuntratin armiayi (Isr. 10:36). Kristu aents apapeam katsuntrarush tura apapeamu amukamtai Kristu aents ajasarush irunmiayi. Ainis asamtai Pabloka ataksha  ti apapekratma atatui jaamam Kristu itiurkamiania aitkiasrumek katsuntratniuitrume timiayi (Isr. 12:4). Chikichkia Kristu aents ajainiakui judío aents armiania nu ti kajearmiayi. Tura Pablo Jerusalennum Yuusa chichame etserkui 40 judío aents ti kajearmiania nu chichaman jurusarmiayi. Nui junis tiarmiayi: “‘Papru máchkurkia yurumtsuk tura peṉké úmutsuk matsamsattaji. Máachrikia yajauchiniam yumiṉkramu atai’ tiármiayi” (Tur. 22:22; 23:​12-14). Kristu aentska judío aents kajerainiamsha Yuusnaka iniaitsuk irunkir, etserkir weartin armiayi.

16. Warinia Kristu aentscha nekaawarat tusa Pablosha wakerimia? (Israernum 12:7).

¹⁶ Kristu aents armiania nu apapeamsha katsuntratniuncha warimpia yainkiarminiuya? Pabloka katsunteakur wari urukamniaitiaj nuna Kristu aents nekaawarat tusa wakerimiayi. Tuma asamtai ainis timiania nunaka Yuuska itiurchat nankaamakrincha katsuntrarat tusa iniaiyana nuna nekaawarat tusa jintiamiayi (Israernum 12:7 aujsata). Itiurchatan nankaamainiak katsuntratniun unuimiatratin armiayi. Jehovayapi katsuntratniun jintintrawa tu enentaimsartiniuyayi. Ainis enentaimiainiakka arum itiurchat nankaamainiaksha yupichuch katsuntrarmin armiayi (Isr. 12:11).

17. Urukamtai Pablo Kristu aentsun katsuntratniuitrume timia?

¹⁷ Pabloka Kristu aentsun Yuus iniaisairap katsuntratarum tu ikiakararmiayi. Ninkia Kristu aentsun yaunchu apapemia nui wari nankaama wemia nunaka neka asa ainis timiayi anearar pujusarat tusa. Tura yama Kristu aents ajasmiania nui nukape apapekarmiayi tumaitkiusha katsuntramiayi (2 Kur. 11:​23-25). Tura aintsan katsuntrattsar itiurkartin armia  nunaka Pabloka paant nekamiayi. Nuyasha Jehovayapi yainkratkattawa tu enentaimsarat tusa Pablo junis timiayi: “Winia yainnia nuka Úunt Yusaiti. Nu asamtai shuar túrutamnia nuna ashamkashtatjai” timiayi (Isr. 13:6).

18. a) Warimpia paant nekaatniuitiaj? b) Yamai tsawantaisha warintia enentaimsatniuitiaj?

¹⁸ Yamaiya juisha ii yachin ii umain apapenawai. Tuma asamtai Yuus seatiartiniaitji, tura warijiainsha yainkiartiniaitji anena asar (Heb. 10:33 TNM). Yuusa Chichamenka nakak tawai: “Yuusan umirainia nuka tura Jesús turamiania aintsan najanainiaka waitkiasma artatui” tawai (2 Tim. 3:12 TNM). Nu chichamka ashi Kristu aentstikia ti itiurchat jeatsain iwiarnarar pujustinian tawai. Ti itiurchat nankaamakrinsha Jehovayapi yainkratkattawa katsuntratniun tu enentaimsatniuitji. Jehovaka nin umirin ainianka penker enentaimtikrartatui (2 Tis. 1:​7, 8).

19. Ti waitsatin atatna nu jeatsain iwiarnarar pujustasar warimpia najanatniuitiaj? (Nakumkamusha iista)

¹⁹ Pablo hebreo aentsun papii aatar akupturkarmiania nuka ti itiurchatan nankaamasartatna nui iwiarnarar pujusartinian yainkiarminiuyayi. Pabloka timiayi Yuusa chichame amamkesrum unuimiatrarum nekaatarum timiayi. Nunisar turuiniakka nekaschan jintinkratainian nekaawar nakitrarminiuyayi. Junash timiayi nekas turunattawai tu enentaimsarum nakitsuk Jesús jintiamiania tura uuntri emtuki juiniana nu tuiniamu umirkatniuitrume timiayi. Ti itiurchatan wainiainiak penker Kristu aents ajaki wearat tusapi Jehovaka iniaitiameajia tu enentaimsarat tusa timiayi. Iisha Pablo timiania nu umiakrikia tsawan jeamam katsuntrattaji (Isr. 3:14).