1, 2. Wari turakur waratain?

 Iikia chikich yainkratainiakui warawitkiursha nekaska chikich yayainiakur ti warawitji, ainis Jehová najatmaitji (Tur. 20:35). Yaksha iin warinsha amakrin penker nekaptainti antsu nekaska ii warinsha chikich suakur ti waratainti.

² Jehová aini najatma asakrin ti warawitji. Chikich yayainiakrikia ti warastatji. Nekasapi timia penker najanamuitjia (Sal. 139:14 TNM).

3. Urukamtai Yuusa chichamesha Jehovaka “warau Yuusaiti” ta?

³ Yuusa chichamenka tawai ya sukartiniait nuka ti warawiti tawai tuma asamtai Jehovaka “warau Yuusaiti” (1 Tim. 1:11 TNM). Nekaska Jehovaiti iinkia sukartusuka ni sukartusuana ainis sukartusuka penkesha atsawai. Apóstol Pablo timia aintsan iisha “Yusja̱i̱ iwiaakji. Yusja̱i̱ muchitiaji. Tura Yusja̱i̱ ii kakarmari̱ takakji” (Tur. 17:28). Tura ashi penker ana nu ashi shiir ana nusha Jehovak amasuitji (San. 1:17).

4. Warastasar itiurkamniaitiaj?

⁴ Warastasar itiurkamniaitiaj? Warastaj takurkia Jehová itiurniuit aitkiasrik najankurkia ti warasminiaitiajnia nu nekaattaji (Ipi. 5:1). Tura yayainiamaitiat imian  iiyachu nekarkia itiurkatniuitiaj nusha nekaattaji. Jui unuimiatrattajnia nuka chikitcha yayainiakur ti warastinian yainmaktatji.

JEHOVÁ TSANKA ASAMTAI IISHA TSANKA ARTAI

5. Jehová warinia suramniuitiaj?

⁵ Jehová warinmansha tsankana nu nekaawartai. Nekaska utsumajnia nuna suramniuitji. Yurumkancha pushincha jeancha suramniuitji (YKan. 4:8; Mat. 6:​31-33; 1 Ti. 6:​6-8). Jehovaka yaksha utsuam suramchaitji. Nuinkia urukamtain amakratniuit?

6. Matéu 6:​25, 26 warinia jintintrameaj?

⁶ Jehovaka anenkratak ii utsumajnia nuna suramniuitji. Matéu 6:​25, 26 (aujsata) Jesús timiania nu nekaawartai. Juinkia chinkijiai apatak aujmatuk junis timiayi: “Chiṉkisha yurumkan arainiatsui, juuksha ikiuiniatsui”. Nuyasha timiayi: “Atumí Aparí̱ nayaimpiniam pujana nú Yusak ayurenatsuk”. Tura anintrakka timiayi: “Atumsha chiṉkiji̱a̱i̱ naṉkaamaschakaitrum” timiayi. Nuna warinia jintintrameaj? Aentska yajasmach ainiana aujaisha nankaamas ti penker ainiawai tusa ainis jintiamiayi. Jehovaka yajasmach ainiana auncha penker wainchakait, aentstin imiankaska penker waitmaktatajnia nu nekaji. Jehovaka anenkratin asa ii apari asa ii utsumajnia nuna neka asa suramsattaji (YKan. 145:16; Mat. 6:​31, 32).

7. Iisha Jehová tsankana aitkiattsar itiurniuitiaj? (Nakumkamusha iista).

⁷ Jehová anenkratniuana aintsarik anenkratin asar chikitcha warinsha utsumamu suwitji. Yaksha yatsum umaimiksha yurumkan pushin utsumainian nekatsmeash. Jehovaka utsumainiana nuna yainkiat tusa amin utsukmakminiaiti. Jehová enentaimtintinkia itiurchat akuinkia warichik yaimin ainiawai turamainiaji. Sunkur COVID-19 amania nui ii yachi ii umai utsumainian yurumkancha pushincha tura warijiainsha yainkiarmayi. Tura nuyasha ashi nunkanam ii yachin ii umain yainkiarat tusa kuitniasha obra mundial tana nui enkeawarmai. Israernum 13:16 tawai:  “Péṉker túrakrum takakrum nu ajamnaisatin kajinmátnaikiirap. Nusha ti shiir Yus sútainti”. Nuna ii yachi ii umai najanawarmai.

8. Jehová kakarmarin suramkurin warinma yainmakminiaitiaj? (Jiripiusnum 2:​12, 13).

⁸ Jehová kakarman suramniuitji. Ni kakarmarinkia amushtaiti tuma asa ni kakarmarinkia nin umirin ainiana nuna suwiti (Jiripiusnum 2:​12, 13 aujsata). Yajauchiniam iniaraij, itiurchatnash katsuntrataj, takakmaknasha penker takakmasmij tusam Yuusa kakarmari seachuashitiam? Jehová tu seam kakarmari suramsamtai Pablo timiania aintsamek enentaimchashitiam? Junis timiayi: “Yuus ni kakarmarin surakui ashi turamniaitjai” timiayi (Filip. 4:13 TNM).

9. Jehová ni kakarmarijiai itiurniuit aitkiasar iisha itiurkamniaitiaj? (Nakumkamusha iista).

⁹ Aentstikia Jehová kakarman sukartana ainis sukartuschamniaitji tumaitkiush aents utsumaka yainminiaitji. Junisar turamniaitji, ii yachi uuntmantu turutskesha ii yachi jaa pujaksha warinsha sumaktinian utsumakui tura jeen warinsha najanatin akuisha yainkiarminiaitji. Ankan pujakrikia iruntai jeanam japinkiattsar turutskesha iwiarkatniunam yainkiattsar weminiaitji. Aitkiar ii yachi yainkiarminiaitji.

10. Chikich ikiakarartasar itiurkatniuitiaj?

¹⁰ Ii chichamujai aents ikiakarminiaitiajnia nu kajinmatkishtiniaitji. Yaksha kuntuts puja tura majat enentaimiuksha nekatsmeash? Nunis puja nekakmeka mensajekesh akuptukminiaitme turutskesha tarjeta najanamkesh susamniaitme nuyash untsutash untsukminiaitme. Nu turattsamka tsakeka aaram warinsha anunuju amasashtiniaitme. Antsu ame nekas enentaimjiai aatramniaitme turutskesha najanamniaitme. Nunisam turattsamka sutamchik antuujat Yuussha umirki wemin ikiakarmin timiniaitme (Neka. 12:25; Ipi. 4:29).

11. Jehová ni nekatairijaisha itiurniuit?

¹¹ Jehová nekatain sukartiniaiti. Jesusa nemarin Santiago junis timiayi: “Átum náṉkamsarmek nekaatin tujintiakrumka Yusa nekatairi̱ seatá” timiayi. Tura junash timiayi: “Yuska kajetsuk tura ementutsuk antsu patatas suawai” timiayi (San. 1:5). Juinkia Jehovaka ni nekatairin chikichniash suwiti tusa jintintramji.  Nekatairin sukartaksha kajettsuk nuna susamjai tutsuk, kuntuts enentaimtikiartutsuk sukartiniaiti. Nekaska ni nekatairin seatiarat tusa wakeriniaiti (Neka. 2:​1-6).

12. Ii nekajnia nujaisha itiurtain?

¹² Iisha Jehová aikniuana aitkiasrik ii nekamu chikitcha jintiamniakaitiaj? (YKan. 32:8). Ee, nuka nukap aintsar turamniaitji. Nekaska yama imianiaru ainiana nu itiurkara etserkartiniait nu jintinniuitji. Tura uuntri anairamuka yaimin anairamu ainiana nuna tura chikich ii yachi ainiana nunasha jintintin ainiawai. Ii yachi ii umai jea jeamtinian iwiarkatniun nekainia chikitcha itiurkara jeancha jeamiartiniait iwiarkartiniait nuna jintintin ainiawai.

13. Itiurkaria Jehová jintinkratniuana aitkiasrik chikitcha jintiawarminiaitiaj?

¹³ Chikich jintiakur Jehová jintinkratniuana aitkiasrik jintiawartiniaitji. Unuimiatrajnia nui nekaaji Jehovaka wakerusmajai sukartiniaiti tu nekaaji. Tuma asamtai iisha ii nekajnia nu chikitcha jintiawartiniaitji. Jintiakrisha sapijmiashim enentaimsar wi takakmajna nunaka atantruktiatui tu enentaimsar jintiawarchatniuitji. Nuyasha antsu winiasha ya jintintruama, ninki nekaashtinkiai tu enentaimsashtiniaitji. Ainis enentaimmiaka penkerchaiti. Aya ii nekajnia nuke jintinchaitji antsu penker nekaat tusar itiurkatniuit nu jintinniuitji (1 Tis. 2:8). Aitkiasar jintiakrikia chikichniasha jintiniak timiatruskeapi jintiawartatua tu enentaimsattaji (2 Ti. 2:​1, 2). Ii nekajnia nu chikitcha jintintiainiakrikia iisha ti unuimiatrattaji tura ti warastatji.

TURA YUMINSAJME TURAMANIASHKURINCHA ITIURKATNIUKITIAJ

14. Ii yachi ii umai warinkish suam yayam warintin ainia?

¹⁴ Ii yachi ii umainkia warinsha suam yayam yuminsajme tiniu ainiawai. Papiichin aarkesh turutskesh yuminsajme tuiniak warinkisha najanin ainiawai (Kurs. 3:15). Ainis aitkiarmainiakrin ti waratainti.

15. Yuminsajme tukakratainiachkuisha warintia enentaimsatniuitiaj?

¹⁵ Ju nekaatniuitji ii warinsha suam yayam mashikia yuminsajme turamchartatji. Nekaska tsawan sumamsar, ii kakarmarijiai, kuitkesh apujsar suamaitiat yayamaitiat yuminsajme turamcharminiaitji. Ainis aitkiarmainiakrincha warimpia kuntuts enentaimsashtinian tura warastinniasha yainmakminiaitiaj? Túramuri̱ 20:35 tana nui enentaimsatniuitji. Juinkia junis tawai iikia warinsha suakrikia aya yuminsajme turutiarat tusarkia suchatainti antsu yuminsajme tukakratainiachkuisha suajnia nujai warastiniaitji tu tawai. Nusha itiurkaria warasminiaitiaj nu nekaawartai.

16. Warintia enentaimsatniuitiaj?

¹⁶ Nekaska Jehová sukartiniana aitkiasnapi najanaja tu enentaimsatniuitji. Ninkia penker iiniakuisha tura penker iiniachkuisha pachitsuk sukartiniaiti (Mat. 5:​43-48). Jehovaka junis turamji, “awaṉturkimnium tútsuk ikiastiniaitrume. Túrakrumni̱ṉkia Uunt Yus péṉker akirmáktatrume” tawai (Ruk.6:35). Tuma asamtai yuminsajme turamainiachkuisha kuntuts enentaimprashtiniaitme. Ju nekatniuitji chikich  warinsha warasmajai sukartakrin Jehovaka suajnia auncha nankaamas suramsattajnia nu kajinmatkishtiniaitji (2 Kur. 9:7; Neka. 19:17).

17. Warintia enentaimsaria susartiniaitiaj? (Rúkas 14:​12-14).

¹⁷ Jehová itiurniuana aitkiasrik najanattsarkia Rúkas 14:​12-14 (aujsata) tana nu umiktiniaitji. Turasha mai sunai ajatniuka yajauchichuiti. Suiniakur surusarainti tusar suajnia nu nekaamarkia wari itiurkatniuitiaj? Iisha Jesús timiania aintsar takakainiatsna nu ipiawarminiaitji. Jehová itiurniuit aitkiasrik najanu asar warastatji. Yuminsajme turamainiashkurincha suinia asar warastatji.

18. Yaksha yajauch enentaimtusaij tusar itiur enentaimsatniuitiaj?

¹⁸ Chikich yajauch enentaimtuschartiniaitji (1 Kur. 13:7). Yaksha yainkiam warinsha turamchakrin tukeash yuminsajme tichait turutskesha kajinmatkiyash tu enentaimsamniaitji. Nuyasha warinsha najanatin enentaimiu asa kajinmatkichiash turutskesha yuminsajme titinian wakeraksha tujinkiachiash? Tura yaunchuk warinsha sukartin asa yamaikia ni yayam natsamatsuash? Nunisar enentaimsamniaitji. Nekas ii yachi ii umai anenakrikia yajauch enentaimtuschartiniaitji antsu warasmajai yaintin iniaisashtiniaitji (Ipi. 4:2).

19, 20. Urukamtai yuminsajme turutiarat tusar wakerishtiniaitiaj? (Nakumkamusha iista).

¹⁹ Yuminsajme turutiarat tusam wakerip. Uunt akupin Salomón tsanka atinian aujmatuk junis timiayi: “Pankrum entsa ajapata tura nukape tsawan nankamasmatai wainkiattame” (Ecl. 11:1 TNM). Nuna takunka chikichkia tsawan nankaamasmatai yuminsajme tiniush irunin ainiawai tusa jintiak timiayi. Yamaikia ainis nankaamasmiania nu nekaawartai.

²⁰ Wekas iikratniu nuwe ni kain yama  imianiun Yuus umirki weta tusa papiichin aatramiayi. Tura ocho uwi nankaamasu ai ii umai yama imianmiania nu ni kain wekas iikratniu nuarin junis aatramiayi: Ameka nukape uwi yainkiaitmena nuka nekatsme tu aatramiayi. Junash aatramiayi: Nekaska anenkratmajai aaru asakmin tura Yuusa chichamesha enentairui ejejet aatruru asakmin nunaka kajinmatkichuitjiai tu aatramiayi. a Ti itiurchatri nankaamasmarincha aatar amik junasha timiayi: Yuusnasha tura warinsha najanmansha iniaisatuk aja wemiajai. Tumaitkiusha ame Yuusa chichame aatrurmiamna nuinki enentaimiu asan ocho uwi emki wetinian yainkiaiti tu aatramiayi. Tura wekas iikratniu nuari papii aarma wainiak waras juakchamiashia. Iincha aitkiasan yaksha yainma nukape tsawan nankaamasu ai yuminsamajme turamarminiaitji.

21. Jehová tsankana ainis atasam urukamtai amesha kakartiniaitiam?

²¹ Jui unuimiatrajnia aintsan achiakur warajnia auncha nankaamas suakur waratainti. Chikich yayakur penker nekaptainti tura yuminsajme turamainiakrincha ti penker nekaptainti. Ainis turamainiachkurincha penkera nu najana asar warawitji. 2 Crónicas 25:9 TNM tawai: “Jehovaka nu nukap iniankas amasminiaitji”. Nui enentaimsata. Yaksha Jehová sukartana aitkiasan sukartustinkia atsawai. Ainis turakui warawitji. Ainis asamtai iisha Jehová tsankana ainis atasar kakarartiniaitji.