1, 2. Jehová umirutisha urukamtai warasar pujuwitiaj? (Sántiak 1:​22-25).

 Jehová Jesusjainkia aentska waras pujuarat tusar wakeruiniawai. Yus Kanta 119:2 nuna aaru junis timiayi: “Ni jintíamun umirna nuka tura tuke enentái̱ji̱a̱i̱ e̱a̱na nusha warasminiaiti” tu timiayi. Jesussha junis timiayi: “Yuusa chichamen antukar, uminiana nu warau ainiawai” tu timiayi (Luc. 11:28 TNM).

² Jehová enentaimtatikia warasar pujuwitji. Urukamtaiya? Yuusa chichame tuke aujea asar tura nui tana nu umia asar warasar pujuwitji (Sántiak 1:​22-25 aujsata).

3. Yuusa chichame tana nu umia asar itiur pujuwitiaj?

³ Yuusa chichame tana nu umia asar itiur pujuwitiaj? Jehová umiru asar waraji (Ecl. 12:13 TNM). Nuyasha ii shuarjai, ii Yuusnumia yachi, ii Yuusnumia umaijiaisha ti shiir amajnainiaitji. Amesha ainis nankaama paant nekaamachuashitiam? Tura aintsan Yuus tana nuna uminiachu asar waitiainiana ainis iikia nankaamatsji. Jehová akupkamu chichaman nuna aujmatas nampereak Davidkia amin umirtameana nuka ti penker pujuttawai timiayi (YKan. 19:​7-11).

4. Yuusa chichame tana nu umiktin urukamtai yupichuchichu aminiait?

⁴ Tumaitkiuisha Yuusa chichame tana nu umiktin tukeka yupichuchichuiti. Ankancha pujakrisha Yuusa  chichame aujsar tura unuimiatratai tusar tsawan ankatniuitji, nu turakur Jehová warinia turawarat wakera nu paant nekaamattaji. Tuma asamtai Yuusa chichame tuke aujsatai tusar itiurkatniuitiaj nuna yamai nekaattaji. Nuyasha aujeajnia nui enentaimsatin tura itiura umikminiaitiaj nuisha enentaimsatai tusar itiurkamniaitiaj nusha nekaattaji.

YUUSA CHICHAME AUJSATTSAM TSAWAN ANKATA

5. Wari najankuria ankancha pujuwitiaj?

⁵ Jehová enentaimtatisha warinkisha nukap najanatin takakji. Yuusnanu najanatniuitiajnia nusha nukap iruneawai. Ii utsumamu tura ii jeen pujuiniana nuna utsumainiamurisha susartai tusar takakmastiniaitji (1 Ti. 5:8). Ni shuar jaa pujakui turutskesha weamsa asamtai wainiainiasha iruneawai tura iisha penker iimiastai tusar tsawan ankatniuitji. Nuyasha Yuusa chichamesha tuke etserkatniuitji. Nukap warinkish najanatin takaku asar junis enentaimminiaitji: Yuusa chichamen aujsattsan, nui enentaimsattsan nuyasha umiktasnasha wari itiurkamniaitiaj?

6. Yuusa chichame tuke aujsataj tusam wari itiurkatniuitiam? (Nakumkamusha iista).

⁶ Kristu aentstikia Yuusa chichamenka tuke aujsatniuitji, tuma asamtai ainis turatai tusar kakartiniaitji (Filip. 1:10 TNM). Yus Kanta papiinium juarmanum aents waras pujaka warinia turiniait nuna aujmatuk tawai: “Antsu Uunt Yus akupkámu chicham umiktinian tí enentáimtak^u waraawai. Túmak tsawai̱sha tura káshisha ti enentáimtawai” (YKan. 1:​1, 2). Yuusa chichame aujsatai tusar tsawan ankatniuitji. Urutma ekemsamunma Yuusa chichame aujsamniaitiaj nuka iik enentaimsatniuitji. Ii yachi Víctor junis tawai: Kashik nantaktinniaka  asumprichuitjiai, tumaitkiusha Yuusa chichamen kashik nantakin aujsatniun wakeriniaitjiai, penker nekapea asan tura nunak najanu asan aujuujat nekap wemajai tu tawai. Amesha ii yachi Víctor tana ainis enentaimiamek? Urutma ekemsamunma wisha aujsamniaitiaj tu animiasta.

AUJEAMNA NUI ENENTAIMSATA

7, 8. Yuusa chichame aujeakur wari itiurkashtiniaitiaj nuna apatkam aujmattsata.

⁷ Urutma ekemsamunam aujsataj nui enentaimsar nuniasha ayataik aujsaij tusar aneartiniaitji. Tuke tsawan warinkisha aujniuitji tura aujsayatar aujsamu kajinmatainti. Yuusa chichame ainis aujsatniuka penkerchaiti. Urutma akankamu aujsattaj nui enentaimiamuka penkeraiti (1 Kur. 9:26). Tumaitkiusha Yuusa chichame aujniuitkiursha Yuusa chichame nu nukap unuimiatratai tusar chikitcha wari najanatniuitiaj?

⁸ Watskea apatkar aujmattsatai. Yumi yutak nupan tsapamtikniuiti. Tumaitkiusha yumi ti yutakuinkia entsa nunka warik aimnakminiaiti. Ainis yutakui entsaka init waniaichuiti. Tuma asamtai nupasha tsapachu ainiawai, antsu sarar ajakuinkia yumi nunka init wania nupan tsapamtikniuiti. Aintsan Yuusa chichame waurtusar aujsashtiniaitji, warik aujeakrikia aujeamu penke nekaashtatji nuyasha kajinmatkir umikchattaji (San. 1:​23, 24).

9. Yuusa chichame aujeakur warikmasar aujniuitkiurkia wari itiurkatniuitiaj?

⁹ Yuusa chichame warikmasam aujeamu nekaamamniaitme. Ainis nekaamam wari itiurkamniaitiam? Yuus papii aujki weakum warikmasam aujtsuk aujsamna nui esetram enentaimsata. Aujeakur esetrar enentaimsatniuka itiurchataiti tu enentaimsaip. Ju turamniaitme: Yuusa chichame unuimiatkumsha warik unuimiatram amukaip  antsu unuimiatram amukam esetram enentaimsata turutskesha Yuusa chichame ishichik aujeakmeka aujeamna nui enentaimsatin tsawan takuttame. Párrafo 6 nui ii yachi Victorna aujmatuitji, ni junis tawai: Yuus papiinium akantramu irunna nuna ti nukap aujchaitjiai, chikichik akankamunkesh aujniuitjiai. Kashik aujea asan aujsaitiajna nui enentaimsan weka wemajai tu tawai. Ishichik aujeakmesha esetram enentaimsam unuimiakmeka penker nekaattame (YKan. 119:97;  Yuusa chichame aujeamna nui enentaimsattsam juni animiasta tana nui iista).

10. Yuus papiinium unuimiajnia nusha umiktai tusar itiurkatniuitiaj nu aujmattsata (1 Tisarúnikianam 5:​17, 18).

¹⁰ Yuusa chichame aujsattsam tsawan sumameakmesha unuimiamna nusha umiktiniaitme. Yuusa chichame aujeakum juni enentaimsata: Unuimiarajna nunasha yamai tura ukunmataisha itiurkana umikminiaitiaj tu enentaimsata. Watskea 1 Tisarúnikianam 5:​17, 18 (aujsata) aujsam Jehovan itiur seawitiam nui enentaimsata. Jehovan nukape seajak, nekas enentaijiaisha ashi winia enentaimmiarun ujaukaitiaj tu enentaimsata. Tura aintsan warinma Jehová juna yuminkiajme timiniaitiam nuisha enentaimsamniaitme. Jehová seakum Jehová juna yuminkiajme tusam menain anaikiamniaitme. Yuusa chichame aujsam unuimiarumna nui enentaimsata, nu turakmeka Jehová tuke umirkim wetatme. Tura aintsan tuke tsawan ainis turakmeka nu penker ajastatme. Yamaikia ame iwiakmarmin nukap yapajniatin nekaamamka wari itiurkatniuitiam nu nekaatai.

AME JEAMUK NAJANATA

11. Warinma enentaimsam majat nekapminiaitiam? Watskea aujmattsata.

¹¹ Yuusa chichame aujki weakum ame iwiakmarmin yapajniatin nekaamam majatcha enentaimpramniaitme. Watskea enentaimsata Yuusa chichame auju pujusam aents metekrak enentaimtustiniaiti tama aujsainme (San. 2:​1-8). Ameka tu enentaimcha asam yamaikia yapajniatjai tu tinme. Nu turatniuka ti penkeraiti. Tura kashincha Yuusa chichame auju pujusam yajauch aujmatsashtiniaitji tama aujsainme (San. 3:​1-12). Ame timi yaksha kuntuts  enentaimtikraitkiumka tuka chichatjai, yamaikia aents shiir enentaimsamnian chichaktajai tu enentaimsattame. Tura kashinia nuisha Yuusa chichame auju pujusam Yuusan enentaimtuiniachu amikri ajaschatniuitme tama aujsainmetai, nu aujsam yamaikia nampesma antaknasha película iiyaknasha tua penkerait nuna amamkesan iistajai tu enentaimsattame (San. 4:​4-12). Nuya nu kashinia nuisha nukapeapi yapajniatniuitjia tu enentaimsam majat enentaimpramniaitme.

12. Yuus papii aujeakum yapajniatniuitmena nu nekaamka urukamtai majat enentaimprashtiniaitiam? (Nota tana nusha iista).

¹² Nukap yapajniatniuitkiumka majat enentaimsaip. Nankaamantu enentaimcha asam tura nekas yapajniattsam wakerakum Yuus papii aini aujme. a Yapajniatai tusar tuke kakaki wetainti, nu kajinmatkip (Col. 3:10 TNM). Yuus papii tana nu umiktinian wari yainmakminiait?

13. Yapajniattsam wari najanatniuitiam? (Nakumkamusha iista).

¹³ Yuus papiinium tana nu unuimiatram nuuchamtaik mash najanatniuitjai tu enentaimsaip (Neka. 11:2). Antsu ju najanamniaitme: warinma yapajniatniuitiam nui enentaimsam papiinium aaram emka juna yapajnian arum chikichnaka yapajniatjai tuksha enentaimsamniaitme. Nusha itiura najanamniaitiam?

14. Emkaka warinma enentaimsamniaitiam?

 ¹⁴ Emkaka warinma yupichuch yapajniamniaitiam turutskesh warinma warik yapajniatniuitiam nui enentaimsata. Juna yapajniatjai takumka Índice de las publicaciones Watch Tower turutskesha Testigos de Jehová unuimiatai papii ana nujai unuimiatramniaitme. Jehová wakeruktinniasha tura umiktinniasha yainkiata tu seata (Jir. 2:​12, 13). Nu turam unuimiarumna nu umikta. Yapajniaki weakum chikitcha najanattsam wakerittiame nuya yupichuch yapajniaki wetatme.

YUUSA CHICHAME UMIKTASAM WARI ITIURKATNIUITIAM?

15. Chikich aentscha Yuus papiincha itiurin ainia tura iisha itiurniuitiaj? (1 Tisarúnikianam 2:13).

¹⁵ Nukap aents Yuus papiinkia nukap aujsaitjiai ainis tiniu ainiawai. Tumaitkiusha nekas nekamka nui tana nuna nekasaiti tusar uminiawash? Atsaa, mashikia uminiatsui. Antsu yaunchuya Kristu aents aintsan testigos de Jehovatikia Yuus papiinium aarma ana nuka nekas Yuusa chichamente taji. Tuma asamtai Yuus papii tana nu umiktasar tuke kakainiaitji (1 Tisarúnikianam 2:13 aujsata).

16. Yuusa chichame kajinmattsuk umiktinniasha ya yainmakminiait?

¹⁶ Yuusa chichame aujsar umiktinkia yupichuchichuiti. Yuus chichame aujsattsar tsawan antuatniuka itiurchat aminiaiti. Turutskesha warikmasar aujea asar unuimiarma kajinmatkimniaitji. Tura aintsan ii iwiakmarin nukap yapajniatin nekaamar majat enentaimminiaitji. Warinmansha enentaimiu asam Yuus papii aujsatin amijiainkia itiurchataitkiuinkia Jehová yainmakminiaiti. Jehová yainmakui Yuusa chichame tana nuka kajinmattsuk mash umiktatme. Yuusa chichame tuke aujsata. Nui tana nu umiakmeka ti warastatme (San. 1:25).