Unuimiatratai tusar pujakur warinia nekaattsan wakeraj tu enentaimminiaitji. Tumaitkiusha wari unuimiatrattsar wakeraj nui enentaimiakrisha Jehová warinkisha jintintrameajnia nunanu nekaatin enentaimsatniuitji. Nusha itiura ainis turamniaitiaj?

Penker nekaatniun yainmakat tusam Jehová seata. Nekamna nujain iniaisaip (Neka. 3:​5, 6). Yamai Jehová warinia nekaat tusa wakera nuna nekaamatniun yainkiat tusam seata (San. 1:5).

Ame iwiakmarmin yapajiatniun Yuusa chichame yainmakat tusam nu enentaijiai unuimiatrata. “Yusa Chichame̱ iwiaaku chichamaiti” (Isr. 4:12). Yuusa chichame aujeakur nu nukap nekaamniaitji tura warinmansha yainmakminiaitji. Tuma asamtai Jehová warinia jintintrameaj nu nekaatai tusar unuimiatratniuitji.

Jehová ti nukap jintintramea asamtai yuminsata. Jehová ni chichamejai jintintrameajnia nuka ti nukap yurumak kunturam aintsaiti (Isa. 25:6). Tura ame tua unuimiatratin nakitiam nuna unuimiatsuk iniaisaip. Nu turakmin penker aents ajastinian Yuus yainmaktatui tura Yuusa chichame wakerusmajai unuimiatrattame.