Jesús jasattuk ajas pankan vinon iniankeak winia jakamur jutiksarmek turuki wetarum timiayi. 70 Kristu aents Yuusa chichame etserkarat tusa akuprarmiania nuka nuinkia pachinkiacharu asarmatai ikiukcharmiashia turutskesha umirkatniun iniaisacharmiashia tu enentaimsashtiniaitji. Jesuska ayataik apóstoles armiania nujain pujuttsa wakerimiayi.

Jesuska 12 apóstoles armiania nu tura 70 ni nemarin armiania nusha umirin asarmatai ti shiir enentaimmiayi. Tura ni nemarniuri armiania nuna irur nunian 12 aentsun juur apóstoles anairarmiayi (Ruk. 6:​12-16). Jesús Galilea nunkanam 12 apóstoles armiania nuna ni kakarmari sura Yuus Jesusan anaikiaiti tu etserutarum nuyasha jainiasha tsuartarum tusa akuprarmiayi (Ruk. 9:​1-6). Tura aintsan Judea nunkanam 70 ni nemarniurin jimiar jimiar etserkarat tusa akupramiayi (Ruk. 9:51; 10:1). Tuma asamtai tui tuinsha etserainia irunmiayi.

Judío aents Jesusa nemarin armiania nu tuke uwitin Pascuan najanin armiayi, nuka ni shuarijiai iruntrar najanin armiashmainti (Jiin. 12:6-​11; 17-20). Tura Jesús jasattuk ajas apóstoles armiania nujai Jerusalennum wemiayi. Turasha Jesuska ni nemarniurin Judeanmania, Galileanmania tura Pereanmania armiania nuna Pascua najanmanum pachinkiarat tusa ipiacharmiayi. Nekas enentaimsamka Jesuska aya apóstoles armiania nujai Pascuan najanattsa wakerimiash tumainti. Tuma asa junis timiayi: “Wisha játsuk atumji̱a̱i̱ ju̱ Paskua najanatniun ti wakerimjiai” timiayi (Ruk. 22:15).

Jesús urukamtai aya apóstoles armiania nujai pujuttsa wakerimia? Ninkia Yuusa murikri ashi aentsu yajauchirin asakartasa jakatin asa turamiayi (Juaṉ 1:29). Yaunchuk Jerusalennum tanku maawar Yuusan aestin armiania nui Jesuska jakatniuyayi. Egiptonmaya jintsatuk ajasar tankuu maa yuamujain ewemprarmiayi antsu Jesuska ni jakamujai ashi aentsun ewemtikraiti (1 Kur. 5:​7, 8). Jesús iini jaka asamtai Kristu aents iruntainkia apóstoles armiania nujai juarnakmiayi (Ipi. 2:​20-22). Nayaimpinmania Jerusalén kaya ti uunt 12 apujkamu ainiawai, nui 12 apóstoles naari aarmash ainiawai (Apu. 21:​10-14). Apóstoles armiania nujai Yuus wakerimiania nu uminkiatniuyayi. Tuma asamtai Jesús Pascua najanuk tura pankan vinon umartasanka aya apóstoles armiania nujai irunar nankaamastasa wakerimiayi.

70 ni nemariarmiania tura chikitcha nemariarmiania nusha nuinkia pujucharmiayi. Ninkia nui pachinkiacharuitkiuisha Jesusan umirainiakka nisha nayaimpiniam Jesusjai akupin ajasarminiuyayi. Jesuska nu chichaman apóstoles armiania nujai nu kashi aujmattsamiayi (Ruk. 22:​29, 30).