1, 2. Anajmanairar itiur nankaamatain nuna warintia aujmatainia?

 Anajmanairar pujamuka ti penker aminiaiti. Anajmanairam pujakmeka penker nankaamastasam wakerimniaitme. Nukap ainis nankaamasaruiti. Ii umai Etiopianmaya Tiina a naartin aishrujai anajmanairan pujumiajna nui ti penker nankaamasmiaji. Wariniuksha aujmateakrikia nakak aujmat wemiaji. Nuyasha warinkish najankur ti penker nankaama wemiaji. Mai anenai ajakur ti penker nankaama wemiaji tu tawai.

² Ii yachi Países Bajos nunkanmania Alessio naartin junis tawai: Nuarjai anajmanairan pujumiajna nui ti penker nankaamasmiajai. Tumaitkiusha itiurchatcha wainkiamiaji tu tawai. Ju unuimiateamunmanka anajmanairar pujakur wari itiurchata wainkiamniaitiaj nu nuyasha anajmanairar pujakrisha wari turakria penkera nu turamniaitiaj nuna nekaattaji. Ii yachi ii umaisha anajmanairar pujuiniana nuna yaintasar warinia turawarminiait nusha nekaattaji.

ANAJMANAINIANA NUSHA WARINTIA ENENTAIMSARA ANAJMANAIN AINIA

3. Anajmanainiana nusha warintia enentaimsara anajmanain ainia? (Nekatai̱n Jintinkiartin 20:25).

³ Anajmanairtinkia ti shiiraiti tumaitkiusha nakuuchuiti. Anajmanainiaka nuatnaikiatai tu enentaimsar anajmanainiawai. Nuatnaikiatin tsawan jeamtai anajmanairaru ainiana nuka tuke anenaistatji tura tuke arantunaikiartatji tu tiniu ainiawai (Nekatai̱n Jintinkiartin 20:25 aujsata).  Ainis turattaji tutsuk iinkia amamkesar enentaimsartiniaiti. Anajmanairar pujusar penker nekanaiyawar nuatnaikiarminiaiti turutskesha nuatnaitsuk tsurinkiarminiaiti. Tsurin iniaiyainiaksha nuka yajauchichuiti antsu anajmanairar tsurin iniaiyainiaksha penker enentaimsar najanin ainiawai.

4. Urukamtai anajmatain nusha urukamtaiya penker nekaatniuitiaj?

⁴ Urukamtai anajmatain nusha urukamtaiya penker nekaatniuitiaj? Natsa ainiana nu nuna paant nekainiaka nuatnaikiatniun wakerachiat anajmanaiyachartatui. Urukamtai anajmanairtin mashiniu nekaatniuitiaj? Chikichkia junis enentaimin ainiawai: Anajmanairaru ainiana nuka tamtsuk nuatnaikiatin ainiawai. Tumaitkiusha nu enentaikia natsa ainiana nuna majat enentaimtikrarminiaiti. Ii umai Melissa naartin Estados Unidosnumia junis tawai: Ii yachi ii umainsha anajmaru ainiana nunaka nuatnaikiatniuitrume tusar utsuiniak anajmanairu ainiaka nukap itiurchatan wainiainiaksha anajmanairar puju ainiawai. Chikichkia nuna nakitiainiak anajmanaiyartinniaka nakitin ainiawai tu tawai.

PENKER NEKANAITIARUM

5, 6. Anajmanairar pujuiniana nusha warinia penker nekanayawartiniait? (1 Pedro 3:4 TNM).

⁵ Anajmanairam pujakmeka nijiai nuatnaikiattameash nusha itiura nekaamniaitiam? Ni urukuit nu ti penker nekaata. Nijiai anajmanaiyatsuk ni urukuya nu neka asam anajmanaiyame. Tumaitkiusha nijiai anajmanaiyakum ni nekassha urukuit nu, nu nukap nekaata (1 Pedro 3:4 TNM aujsata). Jehovan itiur enentaimtiniait nuna, warinia wakeriniait tura warintia enentaimniuit nusha penker nekaratniuitme. Tsawan nankaamaki weakui nuatnaikiarsha penker pujutjiash? tu enentaimsam amek nekaamattame (Neka. 31:​26, 27, 30; Ipi. 5:33; 1 Ti. 5:8). Mai anenai ajatjiash? Ni awajeamurin iiyaknasha katsuntramniashitiaj? ainis enentaimiakum amek nekaamatniuitme (Rum. 3:23). b Anajmanairaruka warinkisha metek nunak wakerichu ainiaksha nuatnaikiarsha penker pujusarminiaitkiumka nuatnaikiarminiaiti.

 ⁶ Anajmanairam pujusam warimpia chikitcha nekaaratniuitiam? Anajmanairam nu nukap anetsuk emkaka chikichkimsarum wari imiankaska wakeriniaitrum nuna aujmattsatarum. Amesha wari turatin enentaimsaitiam tu tirum aujmattsatarum, wari sunkura achiakearum nuna tura kuitcha itiur umuchniuitrum nuyasha wari itiurchat nankaamasaitrum nusha aujmattsatniuitrume. Nunanu warik aujmattsuk nakastin wakerakrumka nakasminiaitrume (Juaṉ 16:12 nui tana nujai apatkam iista). Yama anajmanaiyakrum nunanu aujmattsatniuka amijiainkia itiurchataitkiuinka nakak titia. Tura ju kajinmatkip: Amijiai anajmanair pujana nusha amijiai nuatnaitsuk iinkia nuna nekaatniuiti.

7. Anajmanairaru ainiana nu penker nekanaitiasar warinia turawarminiait? ( Aran pujajai anajmanaiyakum itiurkatniuitiam tana nui tura nakumkamusha iista).

⁷ Ame anajmaruitmena nu penker nekaattsam itiurkatniuitiam? Aujmateakrum mai anintrunai ajatniuitrume nuyasha mai anturnai ajatniuitrume tura waritia enentaimiarum nu natsamtsuk titiniaitrume (Neka. 20:5; San. 1:19). Yurumkuram aujmattsamniaitrume, nukap aents yujainiamunam nuni iimsattsarum weminiaitrume turutskesha maimtek Yuusa chichame etserkamniaitrume. Nuyasha atum shuarjai nuya atumi amikrijiai warinkish najaneakrum penker nekanaimniaitrume. Chikich aentsjaisha tuinsha pujarmena nui ame anajmaruitmena nu itiur iniakmamniuit nu amamkesam iista. Ii yachi Países Bajos nunkanmania Albert naartin nisha aintsan najanamiayi. Ninkia junis tawai: Aliciajainkia apatkun maimtek iniar wemiaji. Tura chikich takat jea najanatin amiania nusha maimtek najan wemiaji. Nu takat najankur tura chikitcha aintsan warinkish yupichuch takat najankur maimtek penker nekanaimiaji. Nuyasha penker najanniuitiajnia nuna tura aintsan warinma awajiniaitiaj nusha paant nekanaimiaji.

8. Anajmanairu ainiana nu Yuusa chichamen urukamtai maimtaik unuimiatrartiniait?

⁸ Penker nekanaitiai tusarum Yuusa chichamesha unuimiatratniuitrume. Nuatnaikiarmeka  Yuusa chichamesha unuimiatratniuitrume. Nu turakrumka Yuus tuke enentaimtittiarme (Ecl. 4:12 TNM). Tuma asamtai yamainian Yuusa chichame unuimiatratniun juarkimniaitrume. Nuatnaikiacharu ainiayatcha ainis Yuusa chichamen unuimiainiaka Yuusnasha itiur enentaimtiniait nuna paant nekanaiyawartatui. Max Laysajainkia Estados Unidosnumia ainiawai. Ni junis tuiniawai: Anajmanairmiajnia nuyainian anajmanaiyamunu nuatnaiyamunusha nuna unuimiarmiaji, nu turachuitkiurkia nuna ti penker aujmattsachaji tu tuiniawai.

WARINIA CHIKICHNIASH NEKAAWARTINIAIT?

9. Anajmanaiyar pujuinia yanaksha ujatsuk warinia enentaimsartiniait?

⁹ Ya ujakminiaitrum? Nuka atumek timiniaitrume. Yama anajmanaiya asarum atum ujaktasrum wakerarmena nuke ujakminiaitrume (Neka. 17:27). Ainis aitkiakruminkia chikichkia anintru wekaichartatui tura nuatnaikiakua tukinish wekaichartatui. Yaksha nekaawarain tusarum etserchakrumka aran ajasminiaitrume. Ainis aitkiamuka nuka penkercha aminiaiti. Antsu ya yainmakminiaitrum nuke ujakartiniaitrume. Amee shuarkesh, amikrum Yuusnum katsuarukesh turutskesha uuntri anaikiamu ainia auksha ujakarminiaitrume (Neka. 15:22).

10. Anajmanairar pujuinia yajauchiniam iniaraij tusar warinia itiurkartiniait? (Nekatai̱n Jintinkiartin 22:3)

¹⁰ Anajmanairarum pujarmena nu tunaanum iniaraij tusarum itiurkamniaitrum? Nekanaiki wenak ti anenain ainiawai. Tuma asamtai Jehová wakerachma najanawaij tusar nakitin ainiawai (1 Kur. 6:18). Nunis asamtai tsanirmamu chichamka aujmattsashtiniaitrume, atumkeka pujuschatniuitrume tura ti nukap awartiusha umarchatniuitrume (Ipi. 5:3). Nunisam chichakmeka tura najankumka nijiai tsaninkia tepestaj tu enentaimtiatme. Nunis enentaimiu asam katsuntrachmin ajattame. Anajmanairum pujuttarmena nui wari itiurkattaj Jehová umirkattsaria tusarum aujmattsaniuitrume (Nekatai̱n Jintinkiartin 22:3 aujsata). Dawit tura Almaz Etiopianmaya wari itiurkarmia nu nekaattaji. Ni aujmatainiawai: Iikia yajauchiniam iniaraij tusar ii amikri matsatainiamunam puju wemiaji tura aents nukap wekainiamunmash weka wemiaji nuyasha carronmansha jeasha iikkia puju wechamiaji tu tuiniawai.

11. Anajmanairar pujuinia wakeramun iniakmamainiak warinma enentaimsartiniait?

¹¹ Anajmanairum pujusrum wakerunaiyaji tusarum iniakmamrumna nuka arantamujai turatniuitrume. (Anen. 1:2; 2:6). Ti wakerunaiyakrum urukuitrum nuka iirnaitsuk tsaninkiar tepestaj tu enentaimpramniaitrume turarum katsuntrataj tukama tujintia asarum tunaanum iniarminiaitrume (Neka. 6:27). Tuma asamtai emka yama anajmanaiyakrum Yuusa chichame umirkattsar itiurkattaj tu aujmattsatniuitrume (1 Tis. 4:​3-7). c Pujajnia jui wakerunainiamu iniakmamkurin aentscha itiurak iirmainiaj tu enentaimsatniuitrume. Aintsar najankur mai tepestasar wakerajiash tusha enentaimsatniuitrume.

12. Itiurchatan wainkiar penker chichaman iwiarachmin jeainiachkusha itiurkarminiait?

 ¹² Itiurchatan wainkiar penker chichaman iwiarachmin jeainiachkusha itiurkarminiait? Neachma metek enentaimiainiachu asar anajmanair pujamurin iniaisarminiak ainia? Nuatnaikiaruka maimtaik itiurchatnasha iwiarin ainiawai. Anajmanairar pujusar chichaman iwiarainiakka aintsan nuatnaikiarsha iwiarartatui. Junisar enentaimsartiniaiti: Arantamujai chichamnasha iwiarniukaitiaj? Warichik tsankurturta unuukajai tiniukaitiaj? (Ipi. 4:​31, 32). Ayu ayu nu atii tiri tsankurturta tu tiniuashitiaj tu enentaimsartiniaiti. Penker anturnaishkurmeka tura charaa charaa amajnaiyakrumka nuatnaikiarmesha aintsarmek turittiarme. Penker pujuschamia anin nekaamarmeka anajmanaiyarum pujarmena nuka iniaisatniuitrume. d

13. Anajmanairar urutma tsawantak pujustataj tusar warinma enentaimsartiniait?

¹³ Urutma tsawanta anajmanairarsha pujusarminiait? Waurtus najanainiakka penkerka najancha ainiawai (Neka. 21:5). Tuma asamtai chikitcha urukukit tusam penker nekaattsam nukape tsawan iistiniaitme. Tura antar nukape tsawan ii pujushtiniaiti. Yuus papii tawai “shuar nákana nuna wárik wáinchaka kúntuts nekapeawai” tu tawai (Neka. 13:12). Tura nukape tsawan anajmanairum pujakrumka tunaanum iniarminiaitrume (1 Kur. 7:9). Urutma tsawantak nijiaisha jiniaj tu enentaimia pujutsuk chikichniash wariniak nekarawaintiaj tu enentaimsartiniaiti.

ANAJMANAIRARU AINIANA NUNA CHIKITCHA ITIUR YAINKIARMINIAIT?

14. Anajmanairaru yainkiartasa itiurkatniuitiaj? (Nakumkamusha iista)

¹⁴ Tura anajmanairar pujuinia nekakrikia itiurkartiniaitiaj? Jinkir irauwartai tura yurumuwartai nuyasha Yuusa chichame unuimiatmanumsha ipiawarminiaitji (Rum. 12:13). Ainis aitkiakrinkia penker nekanaiyawartatui nermatustarum tuiniakuinkia nemarsartiniaitji tura ninki wekasarain tusar tuinsha ipiawarminiaitji turutskesha jearui winitiarum nui chichasmintrum timiniaitji (Kar. 6:10). Alicia tawai: Ii umai ii kai atumek pujusrum aujmatu pujuirum ii jeen winirum aujmataitiarum turam wearmiaji, ainis  tuiniakui Albertjai wara wemiaji tawai. Nemartursarat tusar wakeruiniakuinkia nemarsartiniaitji. Antsu chichastasar wakeruinia nekaarkia ninki pujusar chichasarat tusar iniaisartiniaitji turasha penke ninki ikiukchartiniaitji (Jir. 2:4).

15. Nuyasha anajmanairar pujuiniana nunasha warimpia chichatniuitiaj? (Nekatai̱n Jintinkiartin 12:18).

¹⁵ Anajmanairar pujuinia nuna nankamsar aujmattsashtiniaitji. Warinsha titiaj takursha takamattsatniuitji (Nekatai̱n Jintinkiartin 12:18 aujsata). Anajmanairar pujuiniawai tusar etserkini wekaishtiniaitji ayataik ninki tiarat tusar iniaisartiniaitji (Neka. 20:19; Rom. 14:10 TNM; 1 Tis. 4:11). Nuatnaikiartatna nuka atumka nekatsrumek tu chichatniuitji. Ii umai Elise tura ni aishrijiai junis tuiniawai: Iikia nu tsawantai nuatnaikiatai tachamunman aya neachma urutaimpia nuatnaikiattarum turamiarmiaji ainis turamainiakrin yajauch nekapramiaji tu tuiniawai.

16. Anajmanairar pujuinia iniaisarmataisha iish itiurkatniukitiaj?

¹⁶ Anajmanairar pujuiniamurin iniaisarmatainkia urukamtain iniaisaruit tusar nekaattsar wakerukchatniuitji (1 Pit. 4:15). Ii umai Lea naartin anajmanairar pujumiaj nuna urukamtain iniaisama tu aujmatruiniakui yajauch nekapramiajai tu tawai. Nuik nekaajnia aintsan anajmanairar pujuiniayat iniaisarmataisha yajauchichuiti. Anajmanairar pujusar nuatnaikiatniun nuatnaikiashminiana nuna nekau ainiawai. Anajmanairar pujuiniayat iniaisarka kuntuts nekapin ainiawai. Tuma asamtai yaintin enentai takutniuitji (Neka. 17:17).

17. Anajmanairaru ainia nu warinia najanki weartiniait?

¹⁷ Nekaajnia aintsan anajmanairar pujuiniaka itiurchatnash wainkiarminiaiti turutskesha warasar nankaamasarminiaiti. Ii umai Jessica tawai: Anajmanairar pujumiaj nuinkia ankantan sumam wemiajai tura nuna turattsan kaka wemiajai nunaka antranka turachmiajai tawai. Anajmanairum pujakrumka penker nekanaittsarum kakartiniaitrume. Ainis aitkiakrumka penker enentaimsarum tua penker arutramminiaitrum nu najanamniaitrume.