1. 2023 uwitin uunt iruntramu amania nuisha wari nekaamaj?

 2023 uwitin uunt iruntramu amania nui ii jintinkrateajnia nuna yamaikia juni nekaaji tusar etserkarmayi. a Tura aintsan Yuusa chichame etsermanush chicham etsernakmai. Uruma nui antar religionkan amuukartatna nui chikich aentscha Jehovan enentaimtin ajasartasar wakeriarminiaiti tusar etserkarmayi. Nuyasha noviembre 2023 uwitinia juarkir ii itiura etserkaitiaj nu mash tichattaji tu etserkarmai. Yamaikia asumprusar etserkashtatji tusaran ainis tiarma? Atsaa.

2. Urukamtai Yuusa chichame asumprusar etserkatniuitiaj? (Márkus 13:10).

² Yajauchia nu amuukatin penke ishichik ajasu asamtai Yuusa chichame asumprusar etserkatniuitji. Márkus 13:10 (aujsata) nui yajauchia nu amuukatin nuntumsamtai wari etsernaktata nuna Jesús timiayi. Jesús timiania aintsan Mateo papiiniumsha tawai. Nui Jesuska ashi nunkanam Yuusa chichame etsernakmatai amuukatin jeattawai timiayi (Mat. 24:14). Iwianch ju nunkanam ni aentsrin irur achiakeana nu amuukartinian timiayi. Nu turunatniusha urutai atata nunaka Jehová nekawai (Mat. 24:36;  25:13; Tur. 1:7). Tsawan nankaamaki weakui nu tsawan jeatniuka penke ishichik ajaki weawai (Rum. 13:11). Nu tsawan jeamam Yuusa chichame etsermaka iniaisashtiniaitji.

3. Urukamtai etsereaj?

³ Urukamtai Yuusa chichamesha etsereaj nui chikichkimsar enentaimsatniuitji. Urukamtai etsereaj? Yuusa chichame etsereajnia nu shiir enentaimtiniaitji, aentscha anenaitji, Jehová anenaitji tura ni naarisha shiir enentaimtiniaitji. Nuna chikichkimsar paant nekaawartai.

YUUSA CHICHAME TANA NU SHIIR ENENTAIMTA ASAR ETSEREAJI

4. Penker chichaman ujatmakakrin urukniuitiaj?

⁴ Urutainsha yaksha ti penker chichaman ujatmakuana nui enentaimia ajakia. Amee shuar uchin takusai turutskesha takat eakum wekamin ju takat awai tusa aya neachma ujatmakcharmashi. Ainis ujatmakarmatai itiur enentaimsamam? Warakum chikich aentscha ujakartin wakerishmashim. Yuusa chichame antukmiamna nuisha ainis enentaimsachmiashiam?

5. Yuusa chichame yama unuimiartin juarkimiamna nuisha itiur enentaimmiam? (Nakumkamusha iista).

⁵ Yama Yuusa chichame unuimiartin juarkimiamna nuisha itiur enentaimmiam nui enentaimsata. Jehová anenma asa ni iruntramurincha pachitkia ai tusa wakerimiania nu nekaamiame. Nuyasha najaimiamu tura waitiamuncha Yuus amuktatna nusha nekaamiame. Tura shiiram nunkanam amee shuar nantakiartatna nusha nekaamiame (Mar. 10:​29, 30; Juan 5:​28, 29 TNM; Rum. 8:​38, 39; Apu. 21:​3, 4). Nu mash nekaam enentaimin waraschamiashiam (Ruk. 24:32). Yuusa chichame nekaamiamna nu shiir enentaimta asam chikich aentscha ujakartin wakerichmiashiam (Jirimías 20:9 nui tana nujai apatkam iista).

6. Ernest ni nuarijiai nankaamasarmiania nuna wari nekaamniaitiam?

 ⁶ Ii yachi Ernestna aujmattsatai. b 10 uwi takumiania nui aparinkia jakamiayi. Ni junis tawai: Aparka nayaimpiniam wuwashit turutskesha tukeash menkakait tu enentaimniuyajai. Tura chikich uchi aparin takakainian iiyakun wisha takakeaknaka penkerapi aintia tu enentaimniuyajai tu tawai. Ni apari iwiarsamunam we tikishmar Yuusan seak Yuusa winia aparsha tuin puja nuna nekaattsan wakerajai tiniuyayi. 27 uwi takumiania nui Yuusa chichame unuimiarta tiarmiayi tura Yuusa chichamen unuimiartasa juarkimiania nui jakaru ainiana nuka penke enentaimcha ainiana nuna nekaa nuya uruma nuisha jakaru nantakiartatna nunasha nekaa ti warasmiayi (Ecl. 9:​5, 10 TNM; Tur. 24:15). Yaunchuk ni nekaattsa wakerimiania nuna nekaamiayi. Yuusa chichamen paant nekaaki weak ti waramiayi. Ni nuari Rosesha nijiai metek Yuusa chichamen unuimiartinian juarkimiayi. Tura unuimiak nekaaki wemiania nuna nekaa ti warasmiayi. 1978 uwitin maimtek imianiarmiayi. Warasmajai ni shuarin, ni amikrin tura chikich aents Yuusna nekaattsa wakeriarmiania nuna ujakarmiayi. Ernest ni nuari Rosejainkia 70 aents iniankasan testigos de Jehová ajasarat tusar yainkiaruiti.

7. Yuusa chichame tana nu ti shiir enentaimtakrikia wari turatin wakerittiaj? (Rúkas 6:45).

⁷ Yuusa chichame shiir enentaimtakrikia nuna chikich aents ujaktasar wakerittiaji (Rúkas 6:45 aujsata). Yaunchunia Kristu aents junis tiarmiayi: “Iisha íisjinia nu tura antukjinia nusha ii etsertsuk pujustin tujintiaji” (Tur. 4:20). Iisha aintsan enentaimiaji. Yuusa chichame tana nu shiir enentaimta asar ashi aents ujaktasar wakeraji.

AENTS ANENA ASAR ETSEREAJI

8. Urukamtai chikich aentscha yaintasar wakeraj? ( Aents unuiniartasam anenkratin ata tana nui iista; nakumkamusha iista).

⁸ Jehová Jesusjainkia aentsun anenana aintsan iisha chikich aents anenaji (Neka. 8:31; Juan 3:16 TNM). Yuusan nekainiatsna nu waitnentainiaji (Ipi. 2:12). Aentska nukap itiurchatan achiakainia asar waanawar init enketainiana ainis ainiawai. Iikia chapik takakeajnia aintsaitji tuma asar nu aents nuyainia jinkiarat tusar yainkiarminiaitji. Uwemprarat tusar Yuusa chichamejai yaintin jeaji. Aents anena asar Yuusna nekaawarat tusar tuinsha  wekakrisha etserniuitji. Yuusa chichame tana nuna nekaawar warasarminiaiti yamaisha penker pujuarminiaiti tura shiiram nunkanmasha tuke iwiaku pujuarminiaiti (1 Ti. 6:19).

9. a) Aentscha wari ujakartiniaitiaj? b) Nusha urukamtai ujakartiniaitiaj? (Ezequiel 33:​7, 8 TNM).

⁹ Aents anena asar yajauch irunna nu amuukatin ishichik ajasai tusar aents ujakartasar wakeraji (Ezequiel 33:​7, 8 TNM aujsata). Ii shuar tura iijiai irutrainiana nuka nu turunattana nunaka turunashtinia ainis enentaimiainia asarmatai kuntuts nekapeaji. Matéu 24:21 tawai: “Maa, nu tsawantai̱ tí waitsatin átatui. Tí yaunchusha núnisaṉ wáitsatin atsuyayi. Ukunmasha atsuttawai”. Nu turunakui wari nankaamastata nuna chikich aentscha nekaawarat tusar wakeraji. Emka antar religión irunna nu mash amuukartatui tura arum ashi iwianchna ainiana nuka mash amukattawai (Apu. 16:​14, 16; 17:​16, 17; 19:​11, 19, 20). Yamainian untsuri aents iijiai metek Jehovan enentaimtusarat tusar Jehová seaji. Tumaitkiusha ii shuar tura chikich aentscha yamaikikia Yuusa chichamen antuktinian nakitiainiana nusha urukawartin?

10. Ukunmatai turunattana nuna chikich aents ujaktai tusar urukamtai asumprusar etserkatniuitiaj?

¹⁰ Antar religión ainiana nuna amuiniakui Jehovan enentaimtustinian wakeruiniasha iruntiattuash tumainti, nuna nuik atsakamutin nekaamji. Nu neka asar ukunam turunattana nuna asumprusar etserkatniuitji. Urukamtai ainisha taji? Jui enentaimsartai: Yamai Yuusa chichame ujakur tajinia nuna ukunmatai aents nui enentaimsarminiaiti (Ezequiel 33:33 TNM nui tana nujai apatkam iista). Ukunam turunattana nuna yaunchuk antukarmiania nui enentaimsar Jehovai weamkattsar wakeriarminiaiti. Filiponmaya aents sepu wainin ti uurkamtai Kristu aents ajasmiania aintsan antar religionkan amuiniakui aentska Jehovai weamkatniun wakeriarminiaiti (Tur. 16:​25-34).

JEHOVÁ ANEAKUR NI NAARI SHIIR ENENTAIMTA ASAR ETSEREAJI

11. Jehová shiir awajeakur tura ii kakarmarijiai yaimiakur wari najaneaj? (Apukarípsis 4:​11, nakumkamusha iista).

¹¹ Jehová anea asar ni naarisha shiir enentaimtaji tuma asar Yuusa chichame etserji. Yuus anea asar ni chichame etserkur ni paant amajeaji. Yuus papii tana  aintsan “Uuntá, ii Yúsri̱nme. Tuke shiir awajmáinme. Ashí naṉkaamas kakarmaitme” tu taji (Apukarípsis 4:11 aujsata). Wari turakria Yuus shiir awajniuitiaj? Yuuska ashi irunna nuna najankaiti tura ni ii iwiakmarin amasuitji tusar aents jintintiakur ni paant awajeaji. Ii kakarmarijiaisha Jehovanu wari turamniaitiaj? Ii tsawantrijiai, ii kuitrijiai, ii kakarmarijiai Yuusa chichame etsermanum ii jeamuk yaimkiamniaitji (Mat. 6:33; Ruk. 13:24; Kurs. 3:23). Yuus anea asar iikia Yuusna aujmattsatin wakeriniaitji. Tura ni naariniu nuya nisha urukamtai aini namkait nuna aujmattsatin wakeriniaitji. Urukamtai ainisha turiniaitiaj?

12. Yuusa chichame etsereakur Yuusa naari penker ujukattsar wari turiniaitiaj?

¹² Jehová anea asar ni naari penker ujukattsar wakeraji (Mat. 6:9). Iwianch Jehovan tsanumpra asamtai iikia Jehová naari penker ujukattsar wakeraji (Náṉ. 3:​1-5; Job 2:4 TNM; Juaṉ 8:44). Yuusa chichame etsereakur Jehovanu nekasana nu etsereaji. Jehová ti anenkratniuana nuna ashi aents nekaawarat tusar wakeraji. Ninkia penkera nuna najanin asa shiir amajnaisar pujuarat tusa ju nunkan iwiarattana nunasha nekaawarat tusar wakeraji (YKan. 37:​10, 11, 29; 1 Juaṉ 4:8). Nu turakur Jehová naari penker ujuwaji. Nuyasha Jehovanu etserin asar ii takatri umiakur ti waraji. Nusha urukamtai ainis taji?

13. Testigo de Jehová atinkia ti penkeraiti urukamtai nusha taji? (Isaías 43:​10-12 TNM).

¹³ Niniu etserin arat tusa Jehová anaitiamkaitji (Isaías 43:​10-12 TNM aujsata). Testigos de Jehová takatrin irunturar chichamprin ainiana nu junis tiarmiayi: Testigo de Jehová atinkia ti penkeraiti, chikich takat aintiaku  ti penkerka atsawai tu tiarmiayi. c Apatkar aujmattsatai. Yaksha tsanumprutmawakrin chichaman iwiarin ainiana nui iiniun penker aujmattsat tusar yaksha ame ayamprutkata timiniaitji. Ii penker nekajnia nu penker aents asamtai ame ayamprutkata timiniaitji. Penker aents asamtai ni titiatna nuna nekas tawai chikitcha tu tiartatui. Aintsan Jehovasha ii urukuitiaj nuna penker neka asa ninkia nekas Yuusaiti tusar etserkarat tu enentaimias iin anaitiamkaitji. Jehovanu etserin atinkia ti penkeraiti tuma asamtai ni naari nekamtikiatin tura penker ujutuktinkia iijiainkia ti shiiraiti. Nu turakur ii takatri umiaji (YKan. 83:18; Rom. 10:​13-15 TNM).

YAJAUCH IRUNNA NU AMUUKATIN JEAMAM ETSERKI WETATJI

14. Urukamtai ti waraj?

¹⁴ Uruma nui turunattana nui enentaimsar ti waraji. Ti waitsatin tsawan jeatsain Jehová yainmakrin untsuri aents Jehovan enentaimtin ajasarat tusar wakeraji. Nuyasha ti waitsatin tsawan atatna nuisha nukap aents yajauch turamunka iniaisar iijiai metek Jehovan enentaimtusartatuash tumainiana nui enentaimsar ti waraji (Tur. 13:48).

15, 16. a) Wari wari turatin iniaisashtataj? b) Nu takat najanmasha urutai iniaisattaj?

¹⁵ Nu tsawan jeamam shiir chicham Yuus ju nunkanam itiurkatta nu chicham etserkatin takat achiakeaji. Nuyasha yajauchia nu amuukatin penke ishichik ajaki weawai tusar chikich aents ujakartiniaitji. Nu tsawan jeakui aentska ii etsereajnia nuna nekas Yuusa chichamen etseriarmajanta tu tiartatui (Isk. 38:23).

¹⁶ Yuusa chichame tana nu shiir enentaimtaji, aents anenaji, Jehová anea asar ni naarisha shiir enentaimtaji. Tuma asar wari turatin iniaisashtataj? Jehová makete titiatna nu tsawan jeamam iikia asumprusar Yuusa chichame etserkatin iniaisashtatji.