1. Jehová Abrahankan kajeashmajai warinia timia?

 Jehová Abrahankan chicharuk Sodoman tura Gomorran amuktatjai timiayi. Abrahanka Jehovaka ti penkeraiti tu enentaimniuyayi. Nunis enentaimniuitiat Jehová nunisan turattajai takui Abrahán junis timiayi: “¿Yajauchin túrichusha yajauch shuarja̱i̱ métekek amuktatam?” tu aniasmiayi, tura junash timiayi: “Ashí nuṉkanmaya̱ aents Sumamtikin asam ¿péṉkera nu túrashtatmek?” timiayi. Kajekchamujai Jehovaka chichaak aents penker ainiana aunka amukcharmin ainiajai timiayi. Ainis timiania nu iisha nekaar shiir enentaimiaji (Náṉ. 18:​23-33).

2. Aents yajauchin najanamtaisha Jehovaka penkeran najanin asa waitnenkratniuiti urukamtai tu timiniaitiaj?

² Aents yajauchin najanamtaisha Jehovaka penkera nuna najanin asa waitnenkratniuiti urukamtai tu timiniaitiaj? Ninkia ashi aentsu enentain neka asamtai tu timiniaitji (1 Sa. 16:7). Jehovaka ashi aentsu enentain chikichkimias nekaarniuiti (1 Ak. 8:39; 1 Crón. 28:9 TNM). Nu nekaatniuka ti penkeraiti. Jehová nekatairinkia amushtaiti tuma asamtai aents yajauch najanamtaisha Jehová itiurniuit nuka iikia nekaachminiaitji. Pablosha junis timiayi: “Ni túramu peṉké nekaachminiaitji” timiayi (Rum. 11:33).

3, 4. a) Iisha wari timinkiaitiaj? b) Ju unuimiatmanumsha wari nekaattaj? (Juan 5:​28, 29 TNM).

³ Iisha Abrahán timiania aintsar timiniaitji. Sodomanam tura Gomorranam tura chikich aentscha Jehová amukarmiania nusha nantararminiashit tu timiniaitji (Tur. 24:15).

 ⁴ Yamaikia jakaru nantakiartatna nunanu aujmattsattaji. Tuke iwiaku pujuarat tusa iniankimiu artatna tura nekapsamu artatna nunanusha yamaipiat penker jintiamu nekaamji (Juan 5:​28, 29 TNM aujsata). a Nunanu yamaram jintinkratma ju unuimiatmanum tura chikich unuimiatmanumsha nekaattaji. Emkaka Jehová iikia nekachtain aentsun itiurniuit nu nekaattaji tura Jehová aentsu itiurniuit nu nekajnia nunanu nekaattaji

WARIMPIA NEKATSUJ

5. Yaunchuk papii Yuusna najankamunmasha Sodomanam tura Gomorranam aents jakarmiania nunanusha waritniuyaj?

⁵ Jehová Sodomanam tura Gomorranam aentsun amukarmiania tura chikichniash amukarmiania nunasha itiurkatin? Yaunchuka nu aentska nantakchartatui tu tiniuyaji. Tumaitkiusha testigos de Jehová takatrin chichamprin ainiana nu Yuusan ti seawar papiincha tishipsar unuimiatrar nuka nunis aminiaiti chichamniaitji tiaruiti. Urukamtai ainis tiaruit nu nekaatai.

6. a) Jehovasha ya aentsna amukarmia? b) Yuus papiiniumsha warimpia aarchamusha atsa?

⁶ Yuus papiinium aents yajauch asarmatai Jehová amukarmiania nuna aujmateawai. Noé tsawantin entsa nunka aimnakmatai ashi aents jakarmiayi tawai, ayatek Noé ni shuarijiai uwemprarmiayi tawai. Tura Jehová Israel aentsun chicharainiak nunka sunastatrumna nuya aents matsatainiana nuka mash amuktarum timiayi. Nuyasha chikichik Yuusa suntari 185.000 suntar Asirianmaya nu kashi amukmiayi (Náṉ. 7:23; Muis. 7:​1-3; Is. 37:​36, 37 TNM). Nu aentsun amukarmiania nunaka tuke amukma artatui nantakchartatui Yuus papiinium tu aarmaka atsawai. Nunanu amamkesar unuimiatrartai.

7. Nunka entsa aimnakmatai jakarmiania tura Canaannumsha amukma armiania nunanusha warimpia nekatsuj? (nakumkamu iista).

⁷ Jehová aentsu amukarmiania nuna mashiniun nuchamtaik amukarmiayi tumaitkiusha nu aentsun chikichkimias itiur iimia nuka nekatsji. Tura Jehovanu nekaawar ene enentaimia ajasminiash armia nusha nekatsji. Nunka entsaka aimnatsain Noeka Yuusa chichame etserniuyayi tawai (2 Pit. 2:5). Tumaitkiusha uunt arcan najanuk pujus chikichkimias aentsun Yuusa chichamen ujakarmiayi tatsui. Nuyasha Canaán nunkanam yajauch aents matsamiarmiania nu Jehovanu chikichkimias nekaawar yapajniawarminiuyania nuka nekatsji.

8. Sodomanmaya tura Gomorranmaya aentscha urukua armia?

⁸ Sodomanmaya tura Gomorranmaya aentscha urukua armia? Sodomanmanka Yuusan umirin Lot naartin pujumiayi tura nui ashi aentsun Yuusa chichamen ujakarmiashia nuka nekatsji. Nui aents matsamiarmiania nuka penke yajauch armiayi. Turasha yajauchiana penkerana nunasha nekachu armiayash tumainti. Lot ni jeen aentsun ikiantrattsa jukiarmiania nuna Sodomanmaya aents nijiai tepestasar wakeriarmiayi tura nuinkia uchisha pachitra ajarmiayi, ninkia yajauch najanman nekachu armiayash tumainti (Náṉ. 19:4; 2 Pit. 2:7). Jehová ti waitnenkratniuitiat nu aentsun  aruma nui iniankichartatui tu timinkiaitiaj? Jehová Abrahankan timiayi Sodomanmanka diezkesh penkerka atsawai timiayi (Náṉ. 18:32). Yajauchin najanin asarmatai Jehovaka nu aentsun amukarmiayi, nunaka antar turashmiayi. Tura aintsan chikichkiksha yajauch aents jakarmiania nu nantakchartatui tu timiniashitiaj? Atsaa tuka chichamniaitji.

9. Jehová Salomonnasha itiurkatin?

⁹ Yuus papiiniumka Salomón tura chikich Yuusan umirin ainiayat umirkatniun iniaisarmiania nuna aujmateawai. Salomonka itiurkaria Jehová enentaimtustiniait nuna nekaamiayi tura Jehová warinsha nukap susamiayi. Tumaitkiusha chikich yuusan enentaimtutan juarkimiayi. Nunis aitkiamtai Jehovaka ti kajerkamiayi. Salomón umikchamujai nukape tsawan Israel aentska ti waitsarmiayi. Nuya Salomón jakamtai ni apari iwiarsarmiania tura ni shuari iwiarsamu armiania nui iwiarnasmiayi (1 Ak. 11:​5-9, 43; 2 Rey. 23:13 TNM). Nui iwiarsamu asamtai nantaktiatui timinkiaitiaj? Yuus papiikia nunaka tatsui. Romanos 6:7​nam TNM tawai: “Aents jakanka ni tunaari tsankuramu juawai” tu tawai. Tuma asamtai nuna iisar chikichkia Salomonka nantakminiaiti tu enentaimniush irunminiaiti. Tumaitkiusha Yuus papiiniam tana nuka ashi aents jakaruka nantakiartatui tusanka tatsui. Aents jakaruka tunaarinkia asakarma asarmatai nantakiartatui tusanka tatsui. Jehová anenkratin asa umirtak tuke iwiaku pujusainti tusa nu aentsnaka iniankittiawai (Job 14:​13, 14 TNM; Juaṉ 6:44). Salomonnasha iniankitpiash? Iikia nekatsji, aya Jehovak nekawai iniankitpiash. Antsu Jehovaka tuke penker najanniuana nuke nekaji.

WARIMPIA NEKAJ

10. Jehová yaksha yajauch najanin jakamtai itiur nekapniuit? (Isekiár 18:23; nakumkamusha iista).

¹⁰ (Isekiár 18:23 aujsata). Jehovaka yaksha yajauchin najanin jakamtainkia warachuiti tawai. Apóstol Pedro Ezequiel aarmiania aintiaku aarmiayi. Pedro junis timiayi: “Shuar chikichkisha meṉkaka̱i̱ṉ tusa nakitiawai. Antsu ashí shuar enentái̱n yapaji̱áwarat tusa wakerawai” timiayi (2 Pit. 3:9). Nu chicham penker enentaimtikrameaji. Jehovaka yaksha penke yajauchitkiui aya nuin amuwiti. Jehovaka ti waitnenkratniuiti tuma asa yanaksha waitnentramnia ainian waitnenniuiti.

11. a) Ya nantakchartin ainia? b) Nusha urukamtai aintsash taji?

¹¹ Ya aentsua nantakchartata? Yuusa chichamenka ya nantakchartata nuna warumchiniak anaiyawai. b Nekaska Judas Iscarioteka nantakchattawai timiayi Jesús (Mar. 14:21; Juaṉ 17:12 nusha aujsata tura nota de estudiosha iista). Judas Iscariote ninkia yajauchin najanmiania nuna neka nekayat Jehovan tura Jesusnasha umirkacharmiayi (Marcos 3:29 TNM tura nota de estudio irunainiana nusha iista). Jesús timiayi Yuusna unuimiatraru kajertiarmiania nuka nantakchartin ainiawai timiayi (Mat. 23:33 TNM; Juaṉ 19:11 nusha aujsata tura amuana nui nota de estudio tana nusha iista). Tura aintsan Yuusan tuke iniaisar yajauch ajasaru ainiana nusha nantakchartatui Pablo timiayi (Isr. 6:​4-8; 10:29).

12. Jehová waitnenkratin asa itiurniuit? Yaunchuk aentsun nankaamattsamiania nuna aujmattsata.

 ¹² Jehovaka ti waitnenkratniuiti tura “shuar chikichkisha meṉkaka̱i̱ṉ tusa nakitiawai” nu nekaji. Jehová aents ti yajauchin najanawarun waitnentainiak itiurkamia? Davidkia tsanirmarmiayi tura aentsnash maamiayi tuma ti tunaamkamiayi. Tumaitkiusha ene enentaimia ajasmatai Jehová waitnentar tsankuramiayi (2 Sa. 12:​1-13). Manasessha iwiaku pujumia nui ti yajauchin najanamiayi. Ti yajauchin najanamtaisha ene enentaimia ajasmatai Jehovaka waitnentar tsankuramiayi (2 Crón. 33:​9-16 TNM). Nu asamtai Jehovaka ya ene enentaimia ajasa nunaka waitnenkratin asa tuke tsankurniuiti tu timiniaitji. Jehovaka Manasesan tura Davidtian ene enentaimia ajasaru asarmatai iniankiartatui.

13. a) Urukamtai Jehovasha Ninivenmania aentsun waitnentramia? b) Tura Jesús Ninivenmania aentsun aujmatuk urukawartin ainiawai timia?

¹³ Tura Ninivenmania aents armiania nuna Jehová waitnenkratin asa tsankuramiayi. Yuus Jonasan junis timiayi: “Warí, ju̱ péprunam yajauchin ti túruinia nuna nekaajai” timiayi. Nu aents ene enentaimia ajasarmatai Jehovaka tsankurarmiayi. Ninivenmania aentsun Jonasjai nankaamas Jehovaka ti waitnentrarmiayi. Jonás kajeakui Jehovaka chicharuk ninkia penkerana nuna tura yajauchiana nunaka nekainiatsui tuma asamtai waitnentrarjai timiayi (Jns. 1:​1, 2; 3:10; 4:​9-11). Jesuska Jehovaka penkerana nunak najanniuiti, waitnenkratniuiti tusa Ninivenmania aentsun tsankuramiania nuna aujmatas jintiamiayi. Ninivenmania aentska nekapsatin tsawan jeattana nui nantakiartatui Jesús tu timiayi (Mat. 12:41).

14. Nekapsamu arat tusa iniankimiu artatna nui Ninivenmania aentscha urukawartin?

¹⁴ Urukamtai Yuus papiinium nekapsatin tsawan jeattana nui Ninivenmania aents nantakiartatui ta? Jesús timiayi yajauchin turiarmiania nuka nekapsamu artasa nantakiartatui timiayi (Juan 5:29 TNM). Jesús nuna takunka mil uwi uunt anaikiamu ekemkiatna nui aents penker ainiana nutiksan yajauch  aentscha nantakiartatna nuna timiayi (Tur. 24:15). Yajauch turiarmiania nu nantakiarmatainkia Jehová tura Jesusjai uminiawash tura unuimiarmarin najanainiawash tusar iirsartatui. Tura Ninivenmania aents jaka iniankimiuitiat antsu penke umiashkunka tuke jakattawai (Is. 65:20 TNM). Tura umiakka tuke iwiaku pujuttawai (Dan. 12:2 TNM).

15. a) Urukamtai Sodomanmania tura Gomorranmania aentska nantakchartatui tu chichatniuitiaj? b) Judas 7 TNM tana nui wariniuna aujmatea? ( Judassha warinia tajai tusa timia? tana nui iista).

¹⁵ Sodoma tura Gomorra nunkaka winia nakitruiniana auncha nankaamas nekapsatin tsawantan katsuntrattawai Jesús tu timiayi (Mat. 10:​14, 15; 11:​23, 24 TNM; Ruk. 10:12). Jesús warinia tajai tusa ainis timia? Ninivenmania aentsu aujmatuk timiania aintsan nekas turunatniun timiayi. c Sodomanam, Gomorranam nuya Ninivenam nankaamasmiania nuna aujmatuk nekapsamu tsawan jeattana nunasha aujmattsamiayi. Ninivenmania aents tura Sodomanmania tura Gomorranmania aentscha ti yajauchin najaniarmiayi. Antsu Ninivenmania aentsun ene enentaimia ajasarat tusa Jehová tsawantan antuamiayi. Aents yajauchin turiarmia nuka nekapsamu arat tusa iniankimiu artatui timiayi Jesús (Juan 5:29 TNM). Tuma asamtai Sodomanmania tura Gomorranmania aents iniankimiu artatuashtumainti. Nunia neachma yaksha nantakuinkia Jehovanu tura Jesusna nekaatin yainkiartatjiash ajaji.

16. Jehová aentsun warinia iiras iniankittia? (Jirimías 17:10).

¹⁶ (Jirimías 17:10 aujsata). Juinkia nekajnia nunanu aujmateawai: Jehovaka ii enentai urukuit nuna tuke amamkes iiniaiti, nuyasha ii enentaimmiarincha nekartamniuitji. Tuma asa aentsun chikichkimias warinia najanait nuna iiras iniankittiawai. Jehovaka yana waitnentramniait nuna waitnentrattawai. Ainis asamtai Yuusa chichamen nu aentska nantakchartatui tu aarmaitkiui antsu  nuinkia nu aentska penkesha nantakchartatui tu timiniaitji.

JEHOVAKA AYA PENKERA NUNAK TUKE TURATTAWAI

17. Aents jakarusha urukawartin?

¹⁷ Yuus papiiniumka tawai jatainkia ii nemasriya aniuiti tawai. Adán Evajai Yuus umirkashmajai nukape aents jakaruiti (1 Kur. 15:26). Nu aents jakarusha urukawartin? 144.000 Kristu aents nayaimpiniam nantakiartatui tura penke jacha artatui (Apu. 14:1). Tura aintsan nukap aents Yuusan umirkarmia nu nantakiartatui tura Jesús mil uwi uunt anaikiamu pujuttana nu aminkiamtai nuya iwianch aentsun tunaanum utsuktatna nu nankaamastai Yuusan umirkaruka tuke iwiaku pujuartatui (Tan. 12:13; Isr. 12:1). Nuyasha Jehovanun nekaacharmia nu tura yajauchin turiarmia nusha Jehovanu nekaawar penkera nu turawarat tusa iniankimiu artatui (Luc. 23:​42, 43 TNM). Antsu aents penke yajauchin Jehovan umirkattsar nakitiarmiania nu aentska nantakchartatui tawai Jehová (Luc. 12:​4, 5 TNM).

18, 19. a) Aents jakaruana nuna turutairin iirsar Jehová penkerana nunak najanattawai urukamtai tu timiniaitiaj? (Isayas 55:​8, 9). b) Chikich unuimiatmanumsha wari nekaattaj?

¹⁸ Urukamtai Jehová penkerana nunak tuke najanniuiti timiniaitiaj? Abrahán Jehová nekaamiania aintsan iisha Jehová urukuit nu nekaji. Ashi najantairinkia penkerak ainiawai tura ti waitnenkratniuiti ti nekaiti. Jehová aentsun turutairin iirsat tusa Jesusan anaikiaiti tura nuna itiura turatniuit nunasha jintintiaiti (Juaṉ 5:22). Jehová Jesusjai aentsu enentain nekarin ainiawai (Mat. 9:4). Tuma asar tuke aya penkerana nunak najaniartatui.

¹⁹ Jehová najanna nuka penkerkete tu enentaimsartai. Iikia aentsu turutairinkia iistinkia jeatsji. Aya Jehovakete nuna turamniaka (Isayas 55:​8, 9 aujsata). Tuma asamtai Jehovaka Jesusjai aentsu turutairin iirsar tuke penkerana nunak najanawartatui tu timiniaitji. Jehovaka penkerana nunak najanniuiti tura waitnenkratniuiti, Jesussha aniuiti (Isa. 11:​3, 4). Chikich unuimiatmanumka Jehová Jesusjaisha ti waitsatin tsawan jeamtai aentsu turutairin iirsar itiurkartata tura itiurkachartata nu nekaattaji.