AKANKAMU 21
NAMPET 107 Jehová anenkratniua aintsarik anenkratin artai
Nuatnaikiattsa wakera wari itiurkatniuit?
“Tí peṉker nuwa̱ wainkia nuka kaya shíirmachi kuítri̱ji̱a̱i̱ naṉkaamas péṉkeran wáinkiaiti” (NEKA. 31:10).
JU UNUIMIATRATTAJI
Nuatnaikiattsa wakeraka wari itiurkatniuit nunanu Yuus papiijiai unuimiatrattaji. Tura aintsan nuatnaikiattsar wakeruinia yainkiartasar wari itiurkatniuitiaj nusha unuimiatrattaji.
1, 2. a) Nuatnaikiattsa wakera emka wari itiurkatniuit? b) Anajmainayamusha warimpiait? (Paant nekaatin tana nui iista).
Nuatnaikiattsam wakeramek? Aya nuatnaikiarik warasminiaitji tu enentaimsashtiniaitji. Ii yachisha ii umaisha nuatnaikiattsar wakerin ainiawai. Nuatnaikiattsanka emka Jehovan enentaimtin atiniaiti kuitniash takutniuiti, tura penker enentaimin atiniaiti (1 Kur. 7:36). a Nuna turakka nuatkash nuatnaikiash penker pujuttawai.
2 Yupichuchichuiti aents penker wainkiatniuka (Neka. 31:10). Ame wakeramu nuatkattsam wainkiam itiurkamniakitiaj tu enentaimsamniaitme. b Juinkia nuatnaikiattsa wakeruinia itiurkartiniait nu nekaattaji. Tura nuatnaikiattsar wakeruiniakuinkia ii yachisha ii umaisha itiur yainkiarminiait nusha nekattaji.
AENTS PENKER WAINKIATTSA ITIURKAMNIAIT
3. Kristu aents anajmanaiyatsuk warinma enentaimsatniuit?
3 Anajmanaiyatsuk nuatnaikiattana nujaisha uruku ati tusan wakeraj tu enentaimsatniuiti. Ainis enentaimtsuk warik anajmanairka yajainsha warichik nuatnaikiarminiaiti. Nuatnainiainiaksha Kristu aentsjai nuatnaikiartiniaiti (1 Kur. 7:39). Testigo de Jehová asamtai nuatnaikiarkia penker pujusminiaitji tu enentaimsashtiniaiti. Junisam enentaimsamniaitme: Wisha iwiakeajna juisha warinia najanattsan wakeraj? Nuatkattsan eajna nusha uruku ati tusan wakeraj? Aintsan enentaimiajna nu penkerashit?
4. Nuatnaikiattsar wakeruinia warinia Yuusnasha seawaruit?
4 Nuatkattsam nuatnaikiattsam wakerakmeka Jehová seachuashitiam (Jir. 4:6). Kame Jehovaka nuatnaikiatin waitkiattajrume chichaiti. Ninkia ame enentaimmena, ame utsumamna nunash nekarma asa yainmaktatui. Tuma asamtai ame wari titiasam wakeram itiur nekapeam nu Jehová aujsatniuitme (YKan. 62:8). Tura katsuntrattsam enentaimsam penker najanattsam nekatairi seatniuitme (San. 1:5). Ii yachi Estados Unidosnumia John c naartin Yuusan seakun junis tiniuitjiai tawai: Tura aintsan nuwancha penker waitmaktaj nush tuin wainkiaintiaj nuyasha nuatkan penker iniakmamin ataj tu seawitjiai tawai. Tura ii umai Sri Lankanmaya Tanya naartin junis tawai: Jehová tuke amin umirin ataj tuke asumprusan warasmajai aminiun takakmaki wetaj winia aishru atinian wainmam tu seawitjiai tawai. Nuatnaikiattsa wakeramu wainchakmincha Jehovaka aintsam enentaimmena nunaka yaintatajme tura warinkisha amastatjai turamui (YKan. 55:22).
5. Warinia najanainiakua nuatnaikiatniurin wainkiarmin ainia? (1 Kurintiunam 15:58; Nakumkamusha iista).
5 Yuusa chichamenka tawai “yawe̱tsuk nú nukap Yusa takatri̱ takastarum” tu tawai (1 Kurintiunam 15:58 aujsata). Nu umiakmeka Yuusnumia yatsumjiai Yuusnumia kaimjiai nankaama asam natsa Yuusna takakmainiasha nekaawartatme. Tura Yuus wakeramu najanu asam warattame.
Jehovanu takakma pujakum chikich yachisha umaisha waintrattame tura nuatnaikiattsa wakeruiniash waintrattame. (Párrafo 5 nui iista).
6. Nuatnaikiattsar wakeruinia warinma ti enentaimsachartiniait?
6 Nuatnaikiatniuk nuke enentaimtu wekaishtiniaitji (Filip. 1:10 TNM). Aya natsa asarik turutskesha nuatnaikiarik warasar pujusminiaitji tu enentaimprashtiniaitji (Mat. 5:3 TNM). Antsu Jehová amikri ajastin nu imia penkeraiti (1 Kur. 7:32, 33). Nuatnaitsuk puja asam Jehovanu nukap takakmasminiaitme. Tuma asamtai Yuusna takakmaki weta. Jessica Estados Unidosnumia 40 uwin takakun nuatnaikiamiajai tawai. Ninkia junis tawai: Nuatnaikiatniun wakeraknasha etserkun warasan pujumiajai tawai.
URUKUKIT TUSAM NEKAATTSAM NUKAPE TSAWAN IISTINIAITME
7. Nuatkaintiajtai tu enentaimtamna nu urukamtai amamkesam iistiniaitiam? (Nekatai̱n Jintinkiartin 13:16).
7 Tura yaksha ame aishrum ajastin turutskesha ame nuwem ajastin wainkiamsha itiurkamniakitiam? Warichik werim amijiai nuatnaikiattsan wakerajai tu titiniashitiam? Yuusa chichamenka tawai aents penker enentaimniuka Yuusa chichamesha warintiawak tusa penker unuimiatar najanniuiti tawai (Nekatai̱n Jintinkiartin 13:16 aujsata). Wakerajme tutsuk emkaka amamkesam urukuit nu iirsatniuitme. Ii yachi Países Bajosmania Albert naartin tawai: Ii itiur nekapeaj nu warik timiniaitji tuma asamtai nisha urukukit tusar iistiniaitji tawai. Nunisan aitkiakmeka amijiainkia penker pujushminiana nu nekaattame.
8. Nekaamatsain itiurkamea iistiniaitiam? (Nakumkamusha iista)
8 Junismesh enentaimminiaitme: Nekaamatsain itiurkanak amamkesan iisminiaitiaj? Iruntramunam, nampermamunmankesh urukuit, warinia najanea, Jehovancha nekas enentaimtiniashit, yaki ainia amikrisha, wariniunak aujmatniuit nu nekaramniaitme (Ruk. 6:45). Tura wi enentaimiajna aintsash nish enentaimia? tu enentaimminiaitme. Uuntri anairamu ainiana nu turutskesha chikich nekainiana nu aniasminiaitme (Neka. 20:18). Penker iniakmamniukait, urukniuit tu aniasarminiaitme (Rut 2:11). Amamkesam urukuit nu iiyakmeka nekaamawain tusam aneartiniaitme. Ni enentaimtairisha, najantairisha arantuktiniaiti. Tura apapekni wekaishtiniaiti.
Anajmanaiyatsuk urukukit tusa nekaamatsain nukape tsawan iistiniaiti. (Párrafos 7 tura 8 nui iista).
9. Wakerajme tutsuk wari enentaimsatniuitiam?
9 Wakerajme titiasam urutma tsawantak iistiniaitiam? Warichik wikia wakerajme tu takuminkia penker enentaimtsuk turuteawai turamminiaiti (Neka. 29:20). Tura warik wakerajme tu tachakminkia penker esetas enentaimchaiti tu enentaimturmastatui (Ecl. 11:4 TNM). Ju nekaatniuitme: Wakerajme titiatmena nujai nuatnaikiattajai tu enentaimsashtiniaitme. Tumaitkiusha nuatnaikiattsan iwiarnaruitjiai tu enentaimsatniuitme. Maa, nekas nijiainkia penker pujumniaitjiai tu enentaimsatniuitme.
10. Ameka wakerachmin ni wakerutma nekaamsha itiurkamniaitiam?
10 Wakerutma nekaamsha itiurkamniaitiam? Wakerachman nekaamat tusam paant iniakmamsatniuitme. Wakerachiatam wakera nuke ajakmeka nuka penkercha aminiaiti (1 Kur. 10:24; Ipi. 4:25).
11. Yaja nunkanam natsa nuatkat turutskesh nuatnaikiat tusar eatin ainiana nu wariniak kajinmatkichartiniait?
11 Yaja nunkanam aparinsha turutskesha ni shuarkesh natsa nuatnaikiarat tusar eatin ainiawai. Tura amikrisha nuatnaikiatniurin natsa aishmannasha nuwanuncha eatin ainiawai. Penker wainniaikiar nekanaiyawarat tusar warinkisha najanin ainiawai. Nuatkattsan wakerajai eaktin yainkiata yaksha turamkuinkia warinia wakeriniait warinia utsumniuit nu iirsatniuitji. Ii shuarnaksha turutskesha ii amikriniuksha nuatkatin wainkiarkia nisha urukuit penkerash iniakmamniuit nekas Jehovancha enentaimtiniashit nu iirsatniuitji. Kuitjiaish uunt unuimiatcha tura warinsha takakmasha nankaamas Jehová amikri ajamuka imia penkeraiti. Tura aya natsak nuatkattajai nuatkashtatjai turutskesha iniurtuktatjai iniurtukchattajai nunaka ninki tiartiniaiti (Kar. 6:5).
YAMA ANAJMANAIYAKSHA URUKIN AINIA
12. Anajmartasam wakerakum waritminiaitiam?
12 Anajmartasam wakerakmeka jutikiamniaitme d. Nijiai aujmattsattsamka telefononmaninsha turutskesha nukap aents yujainiamunmansha nuyasha videollamada najanamkesha aujmattsamniaitme. Nakachik amin aneajme penker nekanaittsar wakerajai tu titiniaitme (1 Kur. 14:9). Cha, yamaikia tichamniaitiajme turamkuinkia nakastiniaitme (Neka. 15:28). Tura aminkia wakeratsujme turamkuinkia arantuktiniaitme.
13. Amin wakerajme turamkuisha itiurkamniaitiam? (Kurusenam 4:6).
13 Amin wakerajme turamkuisha itiurkamniaitiam? Nuna yaksha ainis turamchamniaiti ninkia natsantinkia iniais turamu asamtai arantuktiniaitme (Kurusenam 4:6 aujsata). Nakarsata tu tiniuitkiumsha tsawanka ti iniankatsuk warik aujsatniuitme (Neka. 13:12). Arantamujai nakak aminkia wakeratsjame tu titia. Ii yachi Austria nunkanmaya Hans naartin ii umai amin nekaattsan wakerajme tutai itiurkamia nuna aujmateawai: Nunis turutkui wikia arantamujai wakeratsjame timiajai tawai. Antar enentaimturu pujurtin tusan nu chichamtaik timiajai tawai. Turutmiania nuyanka ninkia arantamujai ii wemiajai tawai. Ame wakeramna nu aujsattsam wakerakmeka nish itiur enentaimtam anajmarmeka uruksa atata nu aujsatniuitme. Nuyanchu asar najantairinkia chikich arminiaiti.
NATSA NUATKATTSAR WAKERUINIANA NU ITIUR YAINKIARMINIAITIAJ
14. Natsa yainkiartasar itiurkartiniaitiaj?
14 Natsa nuatnaikiattsar wakeruiniana nu, yainkiartai tusar itiurkatniuitiaj? Tura nankamsar tij tusar aneartiniaitji (Ipi. 4:29). Mai natsa chichaa wajainiakui wishikniuashitiaj auka wakerunainiawai tu tiniuashitiaj? Nunisan tiniuitiajtai tu enentaimsatniuitji (1 Ti. 5:13). Nuyasha nuatkachu asa tawai tu tiri kuntuts enentaimtikrashtiniaiti. Ii yachi Hans chichaak chikichkia urukamtai natsasha pujam? Ai ainkiua weamprattame tiniu ainiawai tawai. Junash timiayi: Natsaka kuntuts enentaimiar urukamtai nuatsuj urukamtai nuatnaiyatsuj tu enentaimsarminiaiti tawai. Iikia natsa ikiakarartin enentai takutniuitji (1 Tis. 5:11).
15. a) Rúmanam 15:2num tana aintsan nuatnaikiattsa wakeruinia yaintasar warinma enentaimsatniuitiaj? (Nakumkamusha iista). b) Video iisam wari nekaamam? (Nota tana nusha iista).
15 Ii yachi ii umainsha nuatnaikiamnia anin iiyakrikia Yuusa chichame tana aintsan ni enentaimmiarinkia arantukartiniaitji (Rúmanam 15:2 aujsata). Natsa ainia auka ju nuatkata turutiarain tusa nakitin ainiawai, tuma asamtai ninki nuatkatniurinkia wainkiarat tusar iniaitsatniuitji (2 Tis. 3:11). Antsu yainkiatarum tuiniakuin yainkiartiniaitji (Neka. 3:27). e Ii umai Lydia naartin Alemanianmaya junis tawai warinmansha pachinkiarat tusarum mai ipiamniaitrume nunisar aitkiar ni iisarat tusar iniaisartiniaitji tu tawai. Chikichkia ainis yaimkiarat tusar wakerin ainiawai.
Natsa nuatnaikiattsar wakeruiniaka nampernumkesh aujnaisarminiaiti. (Párrafo 15 nui iista).
16. Natsa ainiana nu warinma enentaimsartiniait?
16 Natsaitkiusha nuatnaikiaitkiusha warasar pujumniaitji (YKan. 128:1). Tuma asamtai nuatnaikiatin wainchakmesha nekaska Jehovanu takakmakim emtukim weta. Ii umai Macaonmaya Sin Yi naartin tawai: Nukape tsawan natsaka nuatnaitsuk pujuchuiti antsu nuatkaruka nukape tsawan tsaninkiar shiiram nunkanam pujuartatui. Nunis asamtai natsaitmena jui warasam tura wari najanatin akuisha najanata tu tawai. Tura nuatnaikiatin wainkiam nijiai jiniakmeka anajmanairma penker arutit tusam itiurkamniakitiam? Nu nekaattaji chikich unuimiatnum.
NAMPET 137 Nuwa Jehovan umirainiana nu penker enentaimtiniaitji
a Internetnum JW.ORG Ser novios. Parte 1: ¿Estoy listo para salir con alguien? tana nui aujsam nekaata.
b PAANT NEKAATIN: Ju akankamunmasha tura chikich akankamunmasha anajmanaiyamu tamaka aishman nuwajai nuatnaikiattsar nekanainiana nuna tawai. Aishman nuwasha mai anenaiyak nunia anajmarmarinkia juarin ainiawai. Nuatnaikiatai turutskesha nuatnaikiashtai tunainiana nui anajmarmarinkia amunainiaiti. Chikich nunkanmanka anajmanairarunka estar conociéndose, ponerse de novios, salir con alguien, ennoviarse, empezar una relación, hacerse novios tiniu ainiawai.
c Nekas naarinchu ainiawai.
d Chikich nunkanmanka anajmartasar aishmankesh nuwaksha wakerajme tiniu ainiawai (Rut 3:1-13). ¡Despertad! 22 de octubre 2004 nui Los jóvenes preguntan. ¿Cómo le digo lo que siento por él? tana nui aujsam nukap nekaamniaitme.
e Internetnum JW.ORG Luchan con éxito por la fe. Los solteros tana nu iista.
