1. Yamaiya juisha wari nankaama wainiaj?

 Yamai tsawantin wari turunatniuya nuna Yuus papiinium yaunchuk aarmauyayi. Yaunchuk aarmauya nuka kashi kashinin timiatrusan nankaama wainji. Watskea yamaiya jui ashi nunkanmaya uunt naatka ataj tusar arakia uunt naamka, nunkania uunt naamkajai kajernainiawai (Tan. 11:40). Nuyasha testigos de Jehovatikia ashi nunkanam Yuusa chichame tui tuinsha etsereaji tura aintsan untsuri aents Jehovan enentaimtin ajainiawai (Is. 60:22 TNM; Mat. 24:14). Nuyasha Yuusna nekaatniusha ti nukap najanamu achiakeaji tura nekasen yainmainiaji (Mat. 24:​45-47).

2. a) Wariniua paant nekaattaj? b) Wari paant nekatsuj?

² Jukerusan warinkisha turunattana nuna nekaatniun Jehová yainmaji (Neka. 4:18; Tan. 2:28). Ti waitsatin tsawan jeattana nui Jehovainia kanatsuk antsu iruntrar pujustasar wari turatniuitiaj nu nekaattaji. Tumaitkiusha ukunmatai turunattana nuka mashikia nekatsji. Ukunmatai wari turunatta nuna yaunchuk tu wemiajnia nuka urukamtai yamaikia yapajiaj nuna jui aujmattsattaji. Nuyasha ukunmatai turunattana nuna wari paant nekaj tura Jehovasha warinia turatta nusha nekaattaji.

 NEKATSJINIA NU

3. a) Ti waitsatin tsawan jeamtainkia aents warinia turataj tukama tujinkiartatui tu wemiaj? b) Urukamtai ainis tu wemiaj?

³ Ti waitsatin tsawan jeamtainkia aents Jehovan enentaimtuiniatsna nuka uwemprataj tuiniaksha tujinkiartatui yaunchuka ainis tu wemiaji. Noé tsawantin turunamiania aintsan ukunmataisha turunattawai tusar yaunchukka tu jintinkrat wemiaji. Noé tsawantin entsa yutuk ashi nunkanam aimnatsain Noé uunt kanunam enkemamtai Jehová waitin apenmiania aintsan ukunmataisha ti waitsatin tsawan jeakuinkia yaksha ewemprataj takusha tujinkiattawai ainis tu wemiaji (Mat. 24:​37-39).

4. Noé tsawantin turunamiania nu yamaisha ainis turunattawai urukamtai yamaikia tu tatsuj?

⁴ Noé tsawantin turunamiania aitkiasan yamai tsawantincha turunattawai ainis enentaimsatniuashitiaj? a Atsaa, Yuus papiikia ainis tatsui. Noé tsawantin urukuya aintsan atak wi pujuttajna nuisha ainis atatui Jesús tu timiayi, tumaitkiusha Noé arcanam enkemamtai Jehová waitin apenmiania nuna tura nu tsawantin warinsha nankaamasmiania nunasha ukunmataisha aintiaku turunattawai tusa tichamiayi. Imiatrusan turunattawai tusa tu tichaitkiuisha  Noé tsawantin nankaamasmiania nuna nukap nekaamniaitji.

5. a) Ashi nunkanam entsa aimnatsain Noesha warinia turamia? (Israernum 11:7; 1 Pítiur 3:20). b) Noé etserkamiania nusha yamai ii etsereajnia nujaisha urukamtai metektakuit?

⁵ Jehová yumin yutumtikian ashi nunkanam entsan aimkiattajai tu takui Noé nekas turunattawai tusa arcan najanamiayi (Israernum 11:7; 1 Pítiur 3:20 aujsata). Aintsan aentscha uruma nui turunattana nuka nekas turunattawai tu enentaimiainia asar yapajniawartiniaiti (Tur. 3:​17-20). Yuus itiurkatniuya nuna Noé etserniuyayi Pedro tu timiayi (2 Pit. 2:5). Tumaitkiusha aents nui matsamiarmiania nuna chikichkimias Yuus turatniuyania nuna ujakmiashia? Nuka nekatsji. Yamaiya juisha ashi nunkanam Yuusa chichame asumprusar etsereaji. Asumprusar etsereakrisha ashi aents Yuusa chichame ujakchattaji. Urukamtai ainis taji?

6, 7. Yajauchia nu amuukatin tsawan jeatsain urukamtai ashi aents Yuusa chichame ujakchartataj?

⁶ “Ashí aents nekaawarat tusa Yus Chicham ashí nuṉkanam etsernaktatui” Jesús tu timiayi (Mat. 24:14). Nu chicham yamaiya jui uminniawai. Yuusa chichamenka mil chichamjai iniankasar etsereaji. Internetnumsha jw.org nui enkemawar nukap aents Yuusnan nekaawarminiaiti.

⁷ “Tuma asan nekasan tájarme, átum Israer shuar mashⁱ ujatsrumni̱ṉ wantinkiattajai” Jesús ni unuiniamurin tu timiayi. Ainis timiania nuka wi taatsain ashi aents Yuusna ujakchattarme tusa timiayi (Mat. 10:23; 25:​31-33). Yamaiya jui chikichkia Yuusa chichamen yaksha etserkarain tusar nakitiainiamunam pujuiniasha iruneawai. Nuyasha uchisha tuke tsawan aru arumen akiniainiawai. Asumprusar Yuusa chichame etsereakrisha yajauchia nu amuukatin jeatsain ashi aents Yuusa chichame ujakchartatji (Apu. 14:6).

8. Warintia enentaimminiaitiaj? (Nakumkamusha iista).

⁸ Juni enentaimminiaitji: Ti waitsatin tsawan jeatsain Yuusa chichamen antuktinian jeachartatna nusha urukawartin? Jehová Jesusjaisha nu aentsun itiurkartin? (Juaṉ 5:​19, 22, 27; Tur. 17:31). Ju unuimiateamunam yama juarmanum Yuusa chichame aarma tana aintsan Jehovaka yaksha chikichkiksha menkakain antsu ashi aents ene enentaimia ajasarat tusa wakerawai (2 Pit. 3:9; 1 Ti. 2:4). Tumaitkiusha Jehová nu aents ainiancha warinia turatta nunaka ujatmakchaitji.

9. Jehová warinia ujatmakuitiaj?

⁹ Jehová warinia turatta nunaka ni chichamen ujatmakuitji. Yuusnan nekainiachu asar yajauchin turawaruana nuna Jehová iniankiartatjai turamji (Tur. 24:15; Luc. 23:​42, 43 TNM). Nu nekaar warintia chikitcha enentaimminiaitiaj?

10. Chikitcha warintia enentaimminiaitiaj?

¹⁰ Ti waitsatin tsawan atatna nui aents jakartatna nusha urukawartin? Mashiash tuke jakarat? Jehovan kajerainiana nu aentsnaka Armagedón tsawantin Jehová ni suntarijiai amukartatui tura nu aentska tuke jakartatui  Yuus papii ainis tawai (2 Tes. 1:​6-10 TNM). Antsu ti waitsatin tsawan atatna nui aantran jakartatna nusha tura warinkish nankaamakui jakartatna nusha tura maamu artatna nusha urukawartin? (Ecl. 9:11 TNM; Sak. 14:13). Shiiram nunkanam yajauchin turawaru nantakiartatui Yuusa chichame tana nui nisha nantakiartimpiash? Cha, nekatsji.

WARI NEKAJ

11. Yuus aentsnasha warinia najanamurinia iirsartata?

¹¹ Uruma nui turunattana nuna nukap nekaji. Nayaimpiniam weartin ainiana nuna shiir awajsaruashit tusa Yuus chikichkimsar itiurkaitiaj nuna iistatui (Mat. 25:40). Nayaimpiniam weartin ainiana nuna tura Jesusnasha yainkiaruana nuka murikiua ainis iisma artatui. Nuyasha nayaimpiniam weartin ju nunkanam pujuiniaka Armagedón jeatin ishichik ajasmanum nayaimpiniam jukimiu artatui. Nu turunatsain aents penker enentain achiakainiaka ni turuiniamun yainkiartin jeainiawai (Mat. 25:​31, 32; Apu. 12:17). Nusha urukamtai penker nekaatniuitiaj?

12, 13. Antar religión ainiana nuna amuki wenakui aentscha urukawarminiait? (Nakumkamusha iista).

¹² Ti waitsatin tsawan atatna nui antar religionkan jatektinian juarainiakui nukap aents ainis turunatniunka yaunchuk testigos de Jehová etser wearmiayi ainis tiarminiaiti. Nu nankaamakui yaksha Jehovan enentaimtustinian juarkimniashit? (Apu. 17:5; Ezeq. 33:33 TNM).

¹³ Moisés pujumiania nu tsawantin nankaamasmiania nui enentaimsartai. Israel aents Egiptonmania jiinkiarmiania nui chikich aentscha untsuri nemakarmiayi (Jiin. 12:38). Nu aentska Moisés timiania nu uminkiamtai Jehová nekas Yuusaiti tu  enentaimsacharmiashia. Antar religión irunna nuna amuki wenakui nuna iisar aents iini pachitkia atasar wakeruiniasha iruniarminiaiti. Ainis tumainiakui kajektajiash? Atsa kajekchattaji. Ii apari Jehová “yáiṉkratniuiti, wari kajechuiti, ti waitnenkartiniaiti tura nekasa núiti”. Iikia niya anin atasar wakeraji (Jiin. 34:6). b

14, 15. Jehovaka urutainia jakait tura tui pujuwit nuna iiras ewemtikchaiti urukamtai timiniaitiaj? (Yus Kanta 33:​4, 5).

¹⁴ Wii shuar testigo de Jehovachu ti waitsatin tsawan jeatsain jakanka ukunmatai nantakminiaiti ainis tuiniamu antukchashitiam. Nekas enentaijiai ainis enentaimiarminiaiti. Tumaitkiusha Jehovaka aents urutainia jakait nui enentaimias iniankichartatui. Jehová najantairinkia tuke penkerak ainiawai (Yus Kanta 33:​4, 5 aujsata). Jehová aentsu turutairin iiyaksha tuke penkera nunak turattawai (Náṉ. 18:25).

¹⁵ Aents tui pujuwit nunasha iiras Jehovaka ewemtikchaiti. Yuusa chichame etserkashmanum pujuiniana nu aentska tuke iwiaku pujuchartatui Jehová ainis tichattawai (Mat. 25:46 TNM). Iikia nu aentscha ewemprarat tusar wakeraji. Jehovasha iijiai iniankas nu aentscha ewemprarat tusa wakerawai.  Ti waitsatin tsawan jeattana nui Jehová warinia itiurkatta nuka nekatsji. Jehová ni naarin paant awajsattsa mash turattana nuna iisar aentska Jehová enentaimtustinian juarkiarminiaiti (Ezeq. 38:16 TNM).

16. Jehovanusha wari nekaj? (Nakumkamusha iista).

¹⁶ Jehová aentstin shiir enentaimturmajnia nu Yuus papiinium nekaaitji. Aents tuke iwiaku pujuarat tusa ni uchirin akupturmakmiaji (Juan 3:16 TNM). Jehová waitnenkratin asa yainmakuitiajnia nu urutainsha paant nekaamaitji (Isa. 49:15). Jehovaka chikichkimias ii naarin nekawai. Jakakrincha ii urukuitiaj aintsan ii wari enentaimiaj aitkiasan iniantamkittiaji (Mat. 10:​29-31). Jehová mash neka asa tuke penkera nunak najanin asa nuyasha ti waitnenkartin asa aentsu turutairin iiras penkera nunak turattawai taji (Sant. 2:13 TNM).

17. Chikich atsakamutincha wari unuimiatrattaj?

¹⁷ Yamai unuimiarajnia nui enentaimsar Yuusa chichame etserkatniuka iniaisashtiniaitji taji. Urukamtai ainis taji? Yuusa chichame yawetsuk etserkatniuncha wari yainmakminiaitiaj? Nu anintramunka chikich atsakamutin nekaattaji.