Ii yachi wekas iikratin Hans naartin Bolivianmaya junis tawai: Nukap aishman nuwanka imiancha ainis enentaimtin ainiamunam tsakararuiti tuma asar aishman nuwanka imiancha ainis enentaimtin ainiawai tu tawai. Ii yachi Shengxian naartin uuntri anaikiamuiti. Ninkia Taiwannumiainti. Ni junis tawai: Wi pujajna nuinkia nuwaka aishman aujmatmanum nisha pachin ajashtiniaiti tu enentaimin ainiawai tura nuwa timian aishman takuinkia nu aishmannaka imiancha ainis iin ainiawai tu tawai. Tura aintsan aishman nuwan imiancha ainis enentaimtuinia asar nuwanun aujmattsar wishin ainiawai.

Yaksha nuwan ainis enentaimtin ainiamunam akiniaitkiuisha tu enentaimmianka yapajiamniaiti (Ipi. 4:​22-24). Tu enentaimmian yapajiattsa itiurkamniait? Jehová nuwan itiur enentaimtiniait aitkiasan enentaimtusminiaiti. Juinkia Jehová nuwa ainiana nuna itiur enentaimtiniait aitkiasan turatai tusar ii yachi ainiana nu itiurkarminiait nunanu nekattaji. Nuyasha uuntri anaikiamu ainiana nu nisha aitkiasan itiura turawarminiait nuna nekattaji.

JEHOVÁ NUWA AINIANA NUNA ITIUR ENENTAIMTINIAIT?

Jehovaka nuwa ainiana nunaka ti shiir enentaimtiniaiti. Ninkia nin umirainiana nunaka mashiniun shiir enentaimtiniaiti (Juaṉ 3:16). Tuma asa nuwanka ti anenaiti.  Jehová nuwanka shiir enentaimtiniana nuna nekaawartai.

Nuwancha ti shiir enentaimtiniaiti. Jehovaka aishmannasha tura nuwancha niya aniunak najanamiayi (Naṉ. 1:27). Jehovaka aishmannaka nuwajaisha iniankas ti enentaimin najanachmiayi. Aishman nuwasha Yuusa chichamenka metekrak nekaawarat tusa najanaiti. Nuwasha aishmanjai metek Jehová urukuit aintsan arminiaiti, Jehová ainis najanaiti (2 Crón. 19:7 TNM). Jehovaka aishmansha nuwasha enentaimtursarat tusa wakerawai. Tura nayaimpinmankesh turutskesh ju nunkanmansha tuke iwiaku pujuarminiaiti. Ainis asamtai Jehovaka nuwa ainiana nunaka imiancha ainis iichuiti taji.

Nuwancha anturniuiti. Jehovaka nuwa itiurchat nankaamainiakuisha, kuntuts pujuiniakuisha kajinmatchaiti. Yaunchuk Raquel tura Ana itiurchat nankaamarmia nui Jehová anturkarmiayi (Naṉ. 30:22; 1 Sa. 1:​10, 11, 19, 20). Nuyasha Yuusa chichamen yaunchuk aishman nuwan anturkarmiania nuna aujmatui. Abrahán ni nuarin Saran anturkamiayi (Naṉ. 21:​12-14). David Abigailan anturkamiayi. Jehová amijiai aujmatit tusa akuptukai timiayi (1 Sa. 25:​32-35). Jesussha tunaartinchaitiat ni nukurin anturkamiayi (Juaṉ 2:​3-10). Jehovaka nuwa ainiana nuna nekas anturniuiti.

Nukap yaimkiarminiaiti Jehová tu enentaimniuiti. Jehovaka Evan ju nunkancha penker wainkiat tusa tsankatkamiayi (Naṉ. 1:28). Adankan yainkiat tusa Jehovaka Evan najanamiayi. Débora nuya Huldá ninkia chikich aentsun chicharkarat tusa Jehová takatan susarmiayi (Suma. 4:​4-9; 2 Ak. 22:​14-20). Yamaisha aintsan Jehová nuwa ainiana nuna takatan suwiti. Kame ninkia ni pujuiniana nui Yuusa chichamen etserin ainiawai, turutskesha precursora nuya misionera ajasaru ainiawai. Tura aintsan Betelnash tura ii iruntai jean jeamkatniun yaimiainiash irunainiawai. Tura nu jeamkamun mamurain tusar wainkiatniun yaimiainiash irunainiawai. Nuya chikichkia Betelnum takakmau ainiawai, turutskesha chikich chichamjai Yuusna papii najantainiam nui takakmau ainiawai. Ii umai Jehová wakeramu uminkiat tusar yaimiainiaka ti nukap ainiawai (YKan. 68:11). Nuwaka ti penker yaimin ainiawai Jehová tu enentaimniuiti.

JEHOVÁ NUWA AINIANA NUNA ITIUR ENENTAIMTINIAIT AITKIASAN II YACHISHA ITIURKARTINIAIT?

Yatsurua nuwa ainiana nuna shiir enentaimtiniashitiaj tusarum enentaimsatarum. Nuwa ainiana nu itiur enentaimtiniaitrum tura arantiniashitrum nuisha enentaimsatarum. Kame sunkurmakar ii enentain yajauch warinsha atai tusar radiografiajai iimiatainti, aintsan iisha nuwa ainiana nuna nekasash shiir enentaimtiniaitiaj tusar ii amikri aniasminiaitji, turutskesha Yuus papiijiai nekaamamniaitji. Yamaikia itiurkatniuitiaj nu nekaatai.

Ii amikri aniasminiaitji (Prov. 18:17 TNM). Ii amikri nakak turuttia tusar aniasminiaitji. Ii umai ainiana nuna shiir amajniukaitiaj, arantinkiaitiaj, warinma yapajiamniaitiaj tu aniasminiaitji. Warinkisha turamkurin kajetsuk wari turata turameaj nu turatai.

Yuusa chichame unuimiatrartai. Ii umai shiir enentaimtiniashitiaj tusar Yuusa chichame tana nujai apatkar animiasminiaitji (Isr. 4:12). Yuusa chichame unuimiatkur yaunchunia aents nuwan shiir enentaimtin armiania nuna turutskesha shiir enentaimtichu armiania nunasha paant nekaattaji. Yaya aniuitiaj tusar animiasminiaitji. Yuusa chichame aujkur nui tana nuka nuwaka imiancha ainiawai tusa tawai tu enentaimsashtiniaitji, antsu Jehová nuwan shiir enentaimtana nu paant nekaatniuitji. 1 Pítiur 3:7 nui nuwan junis tawai: Nuwaka “áishmaṉja̱i̱ métek katsuntrachminiaiti”. b Nuna takunka nuwaka  imianchaiti tusa tatsui. Tura aintsan Karaseanam 3:​26-29 tana nuisha enentaimsartai, nuinkia aishmannasha nuwancha nayaimpiniam uunt anaikiamu ajasarat tusa Jehová iruruiti tawai. Yuusa chichame unuimiakrikia tura ii umai arantiniashitiaj tusar nekaamattsar ii amikri aniakrikia ii umai ainiana nu arantukartatji.

UUNTRI ANAIKIAMU AINIANA NUSHA II UMAI AINIANA NUNA ARANTUINIA ASAR WARINIA TURIN AINIA?

Uuntri anaikiamu ainiana nu ii umain arantuinia wainiainiakka ii yachi ainiana nusha nisha aitkiasan turawartatui. Ii umain arantuinia asar warinia turuinia nu nekaawartai.

Penker najanme tiniu ainiawai. Pablo Romanam Kristu aents matsamiarmia nuna papii aatuk nuwancha penker turarme timiania aitkiasan uuntri anairamu ainiasha turawarminiaiti (Rum. 16:12). Pablo papiin aar akupkamun aujainiakui ni umainkia ti warasarmiayi. Aitkiasan uuntri anaikiamu ainiana nusha ni umain Yuusnan penker najanainia asarmatai penker najanme tiniu ainiawai. Ti shiir amajainiamu asar tura arantuiniamu asar ii umainkia Jehovan tuke umirainiawai (Neka. 15:23).

Uuntri anaikiamu ainiana nuka ii umain penker najanme tuiniakka warinia penker najanea nuna nekas enentaijiai tiartiniaiti. Ii umai junis tawai: Uuntri ainiana nu penker najanme turutainiaksha warinia penkeran najaneaj nuna turutiarat tusan wakeriniaitjiai. Nekaska ame uchirmeka penker jintinma asar iruntainmasha penker iniakmamainiawai turutskesha ame unuiniamuram iruntainiam tati tusam iiyuwamna nu ti penkeraiti ainis turutainiakuinkia shiir nekapniuitjiai tu tawai. Warinma penker najanea nuna uuntri  ainiana nu ii umain nakak tuiniakuinkia ii umaisha wi najaneajna nunaka antran turatsjai tu enentaimin ainiawai.

Anturin ainiawai. Uuntri ainiana nu mash neka nuke enentaimcha asar urutainsha warinkisha nekaattsar wakeruiniak ii umainkesha aniasarminiaiti. Ainis turamka ii umaisha shiir enentaimin ainiawai. Uuntri ainiana nu ii umain ainis turuiniakka nisha itiur enentaimin ainia? Ii yachi Gerardo naartin Betelnum pujawai, ni junis tawai: Umar warinkisha turutainiana nujai winia takatrun penker najanniuitjiai. Wari ii umainkia nukape uwi wi najaneajna nunaka najanainia asar penker nekainiawai. Ii umai precursor ainiasha nukap iruneawai. Tuma asar Yuusa chichame tui etserkatniuitiaj nuna nukap nekainiawai. Uuntri anaikiamu Bryan naartin chichaak ii umainkia Yuusnan ti nukap najanawarminiaiti. Ni najanainiana aitkiasan iisha najanatin unuimiatrartai tu tawai.

Uuntri ainiana nuka ii umaincha warinkisha anintrin ainiawai. Urukamtai ainis turawartiniait? Uuntri anaikiamu Edward naartin chichaak: Ii umainkia warinkisha penker nekainia asarmatai anintrakrikia ni tuiniana nu warinkish penker enentaimsar najanatniun yainmaktatji tu tawai (Neka. 1:5). Ni tuiniamu imiatrusrik turashtiniaitkiursha ni enentaimian takuinkia yuminsatniuitji.

Unuiniau ainiawai. Uuntri ainiana nuka ii umain shiir enentaimtuinia asar warinkisha unuimiatrat tusar unuiniau ainiawai. Yuusa chichame etserkatai tusar irunmanum aishman testigo de Jehová atsakuinkia ni emtukiarat tusar jintintiawarminiaiti. Yuus enentaimtutai jea najanmanum turutskesha Yuus enentaimtutai jean jeamkamun nui warinkisha iwiarainiak itiur takakmasartiniait tura warinkisha itiur umuchkiartiniait nunasha jintintin ainiawai. Betelnumka uuntri anaikiamu ainiana nuka warinkish iwiaratniunam yaimkiarat tusar turutskesha sumaktinian nuya kuit umuchkiatniun nuya computadoranam warinkisha umuchkiatniuncha ii umain unuiniau ainiawai. Uuntri ainiana nuka ii umainkia penker takakmasarmin asarmatai ainis unuiniau ainiawai.

Ii umai ainiana nuka uuntri anaikiamu warinkisha unuiniarma asar chikich aentsnasha yain ainiawai. Yuus enentaimtutai jea najanmanum warinkisha unuimiatraru asar tuinsha itiurchat nankaamasmatai ii yachi ii umainiu jeamkatin akui nui yaimin ainiawai. Tura chikichkia aents yujainiamunam Yuusa chichamen wajas etserkarat tusar unuiniarma asar chikichnasha aitkiasan unuiniau ainiawai. Ii umai ainis uuntri unuiniarma asar warintiainia? Ii umai Jennifer junis tawai: Yuus enentaimtutai jea najanmanum takakmasmiajna nui uuntri anaikiamu juni turata tusa jintintru wemiayi tura warinkish najankuisha penker najaname turutkui shiir nekapmiajai tu tawai.

II SHUARA AINIS SHIIR AMAJEAMU PENKERAITI

Jehová aintsan ii umai ainiana nuka ti shiir enentaimtuiniaji. Nekas ii shuara ainis shiir amajainiaji (1 Ti. 5:​1, 2). Ii umai ainiana nujai Yuusna iruntrar takakmastinkia ti penkeraiti. Ii umai Vanessa junis tawai: Umar shiir ajau irunmanum Jehovan enentaimta asan ti warakun Jehovan yuminsajme tajai tu tawai. Ii umai Taiwannumiasha junis tawai: Jehová tura ii umaisha shiir enentaimturmainia asakrin ti warajai. Nui mash enentaimkiun Jehová iruntramurin pachitkia asan shiir enentaimiajai tu tawai.

Aishman ainiana nu nuwan ti shiir enentaimtuinian iiyak Jehová ti warawai (Neka. 27:11). Ii yachi Escocianmaya Benjamin naartin chichaak aentska nuwanka imiancha ainis enentaimtin ainiawai tumaitkiusha nuwa ii iruntairin jeainiaka iikia nuwa ainiana nu shiir enentaimtiniaitiajnia nuna paant nekaawartiniaiti tawai. Jehová aintsan iisha ii umai ti shiir enentaimtustai tusar tura arantukartai tusar kakarartai (Rum. 12:10).