1. Amijiaisha Jehová urukukit?

 Amijiaisha Jehovasha urukukit? Amesha Jehová seakum itiur enentaimsaitiam? Yuuska etsa aintsaiti tura tantara aintsaiti nuyasha uunt ji aintsaiti tawai Yuusa chichame (YKan. 84:11; Isr. 12:29). Tura Ezequielsha Jehovaka winchar ajamiayi tura tuntiak waja jiitsumir ajana ainis wainkiamjai tu timiayi (Isk. 1:​26-28). Jehová aniuiti tu enentaimkiur ashamaiya ainis enentaimminiaitji.

2. Urukamtai Yuuska anentatsui tu enentaimminiaitiaj?

² Jehová nakak waincha asar nuyasha ti itiurchat nankaamasu asar ninkia anentatsui tu enentaimminiaitji. Turasha Jehovaka ii urukuitiaj nuna nekartameaji tura yaunchuksha wari itiurchata wainkiaitiaj nunasha nekawai. Yuusa chichame unuimiatkur Yuus urukuit nu nekaar ninkia nekas anenmaji tu enentaimsattaji.

3. Jehová anenkratniuana nuna urukamtai juisha nekaattaj?

³ Yuuska ti anenkratniuiti (1 Juaṉ 4:8). Jehovaka warinkish najankuisha anenkrata asa turiniaiti. Nin anenatsna nunasha anenaiti (Mat. 5:​44, 45). Juinkia Jehová anenkratniuana nuna nekaattaji. Jehová paant nekaam amesha ti aneastatme.

JEHOVAKA TI ANENMAJI

4. Jehová anenkratin asamtai itiur enentaimiam? (Nakumkamusha iista).

⁴ Yuus papiikia Jehovan junis tawai: “Ii Uuntri̱ Yus  ti waitneṉkratchakait” (San. 5:11). Yuus papiikia Jehovan nuwa ni uchirin ti aneana aintsaiti tawai (Isa. 66:​12, 13). Nuwa ni uchirin ti anea asa miniakak aneasmajai chichareawai. Uuteakuisha turutskesha najaimiakuisha miniakak atsanniuiti. Aintsan kuntuts pujakrincha Jehová iniaitiamsashtatji. Tuma asamtai Yuusa chichame Jehovan junis tawai: “Nuyá̱ ti enentáimsan pujakuisha Ame atsaṉtakum shiir enentáimtikrusam waramtikrimiame” (YKan. 94:19).

5. Jehová ikiukratchaiti urukamtai ainis tame?

⁵ Jehovaka penke ikiukratchaiti (YKan. 103:8). Awajiakrincha Jehovaka tuke anenmawitji. Yaunchuk Israel aentscha warinkisha unuukarmataisha Jehovaka ajapa iniai wecharmiayi. Ninkia Israel aentsun junis timiayi: “Warí Wi iismasha ti shiir enentáimtusar naat awajmáinme. Tuma asakmin aneajme” timiayi (Isa. 43:​4, 5). Jehovaka iincha aintsan ti anenmaji. Ti tunaamkakrincha Jehovaka iniaitiamsashtatji. Ene enentaimia ajasar yapajniakrinkia Jehovaka tuke anenmastatji. Ti tunaamkakrincha Yuuska tsankukratniuiti (Isa. 55:7). Yuus tsankurtameakrin ninkia shiir enentaimtikrameaji ainis Yuus papii tawai (Tur. 3:​19, 20).

6. Sakarías 2:8 nui tana nujaisha Jehovanu wari nekaamniaitiaj?

⁶ (Sakarías 2:8 aujsata). Jehovaka anenmaji tuma asa waitiakrin najaimiawiti nuya penker waitmaji. Nu neka asar Jehová junis timiniaitji: “Ame ji̱mi wáinmena ímiatrusam wáitkiata” (YKan. 17:8). Ii jiijiai paant iimtainti tura nui warinkish enkemturmakrinkia warik najaimiatainti. Jehovaka winia jiirua aintsaitrume turameaji. Tuma asamtai yaksha itiurchat amajtameakka winia itiurchat amajtawai Jehová ainis tawai.

7. Jehová nekas anentawai urukamtai tu enentaimsatniuitiaj?

⁷ Jehová aminkia nekas anentawai tu enentaimsat tusa wakerawai. Itiurchat nankaamakur Jehová nekasash winiasha anenta tu enentaimsamniaitiajnia nuna ninkia nekawai. Nu neka asar ninkia  nekas anentawai tu enentaimsatniuitji. Tuma asamtai Jehová Jesusan nuya nayaimpiniam weartin ainiana nunasha tura iincha itiur anenmaj nuna nekaattaji.

JEHOVAKA ANENMAJNIA NUNA UJATMAJI

8. Jesussha Jehová anemiania nuna urukamtai paant nekaamia?

⁸ Jehová Jesusjainkia nukape uwi tsaninkiar nankaamasaruiti. Tuma asar mai anenai ajau ainiawai. Matéu 17:5 nui Jehová Jesusan anemiania nuna timiayi tumaitkiusha ayataik “Nin ti shiir enentáimtajai” tu tichamiayi antsu Jesusan ti anemiania nuna nekaawarat tusa “Ju̱ka winia aneamu Uchiruiti” ainis timiayi (Ipi. 1:7). Jesuska Jehová nin anemiania nuna paant nekaamiayi tuma asa aparka anentawai tu wemiayi (Juaṉ 3:35; 10:17; 17:24).

9. Nayaimpiniam weartin ainiana nuna Jehová ti anenaiti tusa Yuus papiisha wari ta? (Romanos 5:5 TNM).

⁹ Nayaimpiniam weartin ainiana nunasha Jehovaka aneajrume tiniuiti (Romanos 5:5 TNM aujsata). Yuus papiinium ukatkatniun aujmatna nuka entsan ukatramainiajnia aintsaiti tusa tawai. Nuka nayaimpiniam weartin ainiana nuna taku ainis tawai. Tuma asamtai nayaimpiniam weartin ainiana nunaka Jehová ti anenaiti taji (Jut. 1). Juan junis timiayi: “Yus Apa ti anenma asa ‘winia uchir’ tu anaitiamkaitji”. Nayaimpiniam weartin ainiana nusha Juan timiania aintsan enentaimiainiawai (1 Juaṉ 3:1). Nayaimpiniam weartin ainiana aya nunakeash Jehová anena? Atsa, mash nin umirainiana nuna anenaiti.

10. Jehová nekas anenmaji urukamtai ainis taji?

¹⁰ Jehová nekas anenmaji urukamtai ainis taji? Ii tumashrin akikmakat tusa Jehová Jesusan akupkamiayi (Juaṉ 3:16; Rum. 5:8). Nu turamujai iisha Jehová amikri ajasminiaitji (1 Juaṉ 4:10). Jehová nuya Jesús najanawarmiania nui enentaimkiur ninkia nekas anenmainiaji titiatji (Kar. 2:20). Jehovaka nekas iin anenkrata asa ii tumashrin akikmakat tusa ni uchirin akupturmakmiaji.

11. Jirimías 31:3 nuisha wari nekaamniaitiaj?

¹¹ Jehovaka aneajrume turamniuitji (Jirimías 31:3 aujsata). Jehová anenma asakrin wini weamkarat tusa yainmakuitji (Muisais Ujakma 7:​7, 8 nui tana nujai apatkam iista). Yuusa anenkratairiya akantamkimniaka penke atsawai (Rum. 8:​38, 39). Nu nekakum itiura enentaimiam? Yus Kanta akankamu 23 nui tana nu aujsattaji. Nu akankamunam David waritmia nu unuimiatkur iisha wari nekaamniaitiaj nuna nekaattaji.

JEHOVÁ TI ANENMANA NU NEKA ASAM ITIUR ENENTAIMIAM?

12. Yus Kanta 23 nui David timiania nuna wari nekaamniaitiaj?

¹² (Yus Kanta 23:​1-6 aujsata). Yus Kanta 23 nuinkia Jehová nin anemiania tura penker wainmiania nuna David timiayi. Tura nuinkia winia waitniuka Jehovayaiti David tu timiayi. Tura aintsan Jehovajai shiir amajnaimiania nunasha timiayi. Davidkia Jehová penker wainma asa shiir enentaimniuyayi. Tura Jehová yainkiat tusa tuke sea wemiayi. Jehovaka anenta asa penkesha iniaitiuschattawai David tu enentaimmiayi. Jehová nekas yainkiattawai Davidcha urukamtai ainis enentaimniuya nu nekaatai.

13. Jehovaka penker waitiawai David urukamtai tu enentaimniuya?

 ¹³ Davidkia warinkisha tatruschattawai tu timiayi. Ni utsummiania nuna mash suamu asa Davidkia Jehová penker waitniuiti tu enentaimniuyayi. Davidkia Jehovajai shiir amajnaiya asa shiir enentaimniuyayi. Warinkish nankaamakuisha Jehovaka wi utsumajna nuna tuke surustatui tu enentaimniuyayi. Warinkisha nankaamakuisha Jehovaka anenta asa iniaitiuschattawai David tu enentaimias shiir enentaimmiayi (YKan. 16:11).

14. Jehovasha anenkratin asa itiurtamniuitiaj?

¹⁴ Ti itiurchat nankaamakrincha Jehovaka ajapa iniaitiamsashtatji. Ii umai Claire a naartin nankaamasmiania nuna nekaawartai. Ninkia 20 uwi Betelnum takakmak pujawai. Ninkia aujmatuk junis tawai: Winia aparun muuknum derrame susamiania nui, nuya winia kaersha testigo de Jehová ajasman iniaisamtai, tura winia apar kuitchajai juakarmatai jeancha atankiarmiania nuisha ti waitsamiajai ainis tawai. Jehovasha wari itiurkamia? Claire junis tawai: Wi shuar warinkish utsumamun takuarat tusa Jehová yainkiamiayi. Tuke ti nukap ama wemiaji. Jehová anentu asa itiura yainkiamia nuna kajinmatchaitjiai. Itiurchat wainkiun Jehová yaunchuk itiura yain wemia nui enentaimkiun kakaajai.

15. Davidcha warinia turakua kakaram nekapramia? (Nakumkamusha iista).

¹⁵ Davidkia Jehová ikiakateawai tu timiayi. David ti itiurchat nankaamak ti  kuntuts nekapmiayi (YKan. 18:​4-6). Jehová yayam kakaram enentaimpramiayi. Jehová penker wainma asa Davidkia shiir enentaimias kakaram nekapramiayi, ainis najana wara warat Jehovan enentaimtuki wemiayi (YKan. 18:​28-32).

16. Amincha Jehová itiura ikiakatmaruit?

¹⁶ Itiurchat wainiakrisha Jehová anenkratin asa ni yainmakrin katsuntraitji (Lam. 3:22 TNM; Kurs. 1:11). Rachel nankaamasmiania nu iistai. Coronavirus amania nui ii umain ni aishrinkia ajapa ikiukmiayi tura Jehovan enentaimtamuncha iniaisamiayi. Jehovasha itiura yainmia? Ni junis tawai: Jehová nukap amikrun surusmiayi. Tuma asamtai nijiai iruntran nankaama wemiajai. Ninkia apatkunsha iniarkar itiartu wearmiayi nuyasha mensaje akupturainiak Yuusa chichamen aarman akuptur wearmiayi. Wijiai aujmatainiak wara warat aja wearmiayi nuya Jehová penker waitmawai turut wearmiayi. Jehová ainis yainkiamai. Amikrusha anentainia asar ti yainkiaru asarmatai Jehovan ti yuminkiajai tu tawai.

17. Ame tuke pujurta asakmin ashamkashtatjai Davidcha urukamtai Jehovan ainis timia?

¹⁷ Ame tuke pujurta asakmin penkesha ashamkashtatjai David Jehovan tu timiayi. Davidniaka nin kajeriarmiania nu maatin ishichik ajasarmiayi. Tumaitkiusha Jehová anentawai tu enentaimia asa sapijmiatsuk pujumiayi. Jehovan nijiai pujana ainis enentaimniuyayi. “Tura ashí sapijrui̱ya̱ aṉkant awajtúsmai” David Jehovan namperuk tu timiayi (YKan. 34:4). Aents mantuataj tuiniana nujaisha nankaamas Jehovaka kakarmaiti David tu enentaimmiayi.

18. Ti itiurchat nankaamakur wari neka asar kakarminiaitiaj?

¹⁸ Ti itiurchat nankaamakur Jehová anenmajnia nu neka asar kakaji. Ii umai Susi ni aishrijiai ni uchiri maamamtai itiur enentaimsarmia nuna aujmatuk junis tawai: Ii uchiri maamamtai ti waitsamji kakarmachu nekapramji tumaitkiusha Jehová anenkratin asa yainma asakrin shiir enentaimsamji ainis tawai. Rachel aya neachma kuntuts enentaimsan uuteakun sukanat sukanat ajamiajai tumakun Jehovan seamiajai. Jehová sean shiir nekapramiajai. Uchi  uuteakui ni nukuri miniakkam shiir enentaimniuana aintsanak wisha enentaimsamjai. Ainis nekapran pakeka kanarmajai. Jehová yainkiamiania nuna penke kajinmatchaitjiai tu tawai. Ii yachi Tasos naartin uuntri anaikiamu suntarnum wetinian nakitiakui aintiuk uwi sepunam enkeawarmiayi. Ninkia chichaak Jehová ti penker waitkia asamtai nekas ninkia anenkratniuiti tu enentaimsamjai. Sepunam pujakuisha ni kakarmarijiai yaintiakui kuntuts enentaimchamjai. Ni yainkiattawai tu enentaimiu asamtai Jehovaka tuke yain wemiayi. Tuma asan sepunam pujaknasha precursor regular ajasmiajai tu tawai.

YUUS ANENKRATIN ASAMTAI NINI WEAMKARTAI

19. a) Yuus seakur itiur timiniaitiaj? b)  Jehovaka anenkratniuiti tusa Yuus papiinium aarma tana nui iisam amesha tua ti penker iiyam?

¹⁹ Yamai nekaajnia nujai Yuuska nekas anenkratniuiti tu timiniaitji (2 Kur. 13:11). Ninkia iini chikichkimias enentaimiawai. Tura aintsan ninkia tuke anenkratniuiti (YKan. 32:10). Itiura anenmaj nui enentaimiakiur nijiai shiir amajnaisar pujustin ti wakerittiaji. Yuus seakur waitneasam anenta asam penkesha ikiurkip tu timiniaitji. Ii warinma ti enentaimiaj nu mash ujaktiniaitji tura ii itiurchat nankaamajnia nunasha ninkia neka asa yainmaktatji tu enentaimsatniuitji (YKan. 145:​18, 19).

20. Wari urukamtai Jehovai weamkattsar wakeraj?

²⁰ Ji keak tsuet tsuet ajakui shiir nekaptainti, Jehová anenkrattairisha aintsaiti. Tuma asamtai tuke nijiai shiir amajnaisar pujustin wakeraji. Jehovaka nekas ti anenkratniuiti. Jehová ainis ti anenma asakrin ti waraji. Mash chikichkimsar “Jiuwan aneajai” tu tiartai (YKan. 116:1).