AKANKAMU 3
NAMPET 124 Pénkera nu tuke ikiuchu artai
Ti itiurchat nankaamakmin Jehová yainmaktatui
“Niṉkia winia ejamtairuiti nuya̱ṉka ti núkap umuchnakchattajai” (YKAN. 62:2).
JU UNUIMIATRATTAJI
Itiurchat pujakur Jehová yainkiat tusar wari itiurkatniuitiaj.
1, 2. Testigos de Jehovatisha wari itiurchata wainkiamniaitiaj?
Urutainsha aya neachma itiurchat nankaamasminiaitji. Ii yachi ii umaisha warinia nankaamasaruit nuna yamai aujmatsattaji. Ii yachin Luis a naartinian doctor chicharuk cáncer achiakeame jakatin ishichik ajasume ainis timiayi. Ii umai Monika naartinia aishrinkia uuntri anaikiamuyayi tura maimtaik Jehovanun wara warat takariarmiayi. Tumaitkiusha aya neachma ii umainkia ni aishri chikich nuwajai ananku pujan nuna nekaamiayi. Ii umai natsa Olivia naartin nase ti kakaram winiawai taman antuk aran wemiayi. Tura urum ni jeen waketeaj tukama mash saanakniun wainkiamiayi. Ii yachi ii umaisha nankaamasaruana aintsamek amesha nankaamaschashitiam?
2 Jehová umirutisha itiurchat wainniuitji tura sunkurmatsha sunkurmaitji. Aintsan chikich aentscha iin kajertamainiakrin nusha katsuntratniuitji. Jehovaka itiurchat nankaamaschattarme tichaiti tumaitkiusha itiurchat pujakrumin wi yaintatajrume tiniuiti (Isa. 41:10). Turasha Jehová yainmakrin warasar pujumniaitji nuyasha penkera nu turakur Yuus umirki weminiaitji. Ju akankamunmanka itiurchat pujakur Jehová itiur yainmaj nuna nekaattaji. Tura aintsan iisha wari itiurkatniuitiaj nusha nekaattaji.
JEHOVÁ SHIIR ENENTAIMSATNIUN YAINMAKTATJI
3. Itiurchat nankaamakur urukamniaitiaj?
3 Itiurchat nankaamakur jakamnia nekapu asar warinkish najanataj takursha penker enentaimchatainti. Párrafo uno nui ii umai itiurchat nankaamasaru aujmattsarmiania nu ainis nekapiarmiayi. Olivia chichaak ti nasenkamtai jear saanakmiatai ti kuntuts nekapramiajai tawai. Tura Monikasha chichaak aishur chikich nuwajai tsanirmamtai nekaska ti waitsamiajai. Tuinsha weaknasha jearui pujaknasha warinkish najanachminian nekapmiajai. Ainis nankaamastinniaka penke enentaimchauyajai. Ti itiurchat nankaamakrin Jehovasha itiur yainmaktataj?
4. Jiripiusnum 4:6, 7 nuisha Jehová wari turameaj?
4 Jehová itiur yainkratniuit. Ninkia shiir enentaimsatniun yaintatajrume turamji (Jiripiusnum 4:6, 7 aujsata). Jehová amikri asar ainis enentaimniuitji. Kame chikich aentska Jehová ainis enentaimsatniun yainmakminiaitiajnia nuna nekainiatsui. Itiurchat enentaimiakum Yuus seam shiir enentaimsakaitiam? Kame Yuuska ainis enentaimsatniun yainmakuiti.
5. Itiurchat enentaimiakrin Jehovasha itiur yainkratniuit?
5 Jiripiusnum 4:7 nui Yuuska atumi enentain, atumi enentaimsamurincha yajauch wayawain tusa shiir waitmaktatrume tu tawai. Yuus papiinium shiir waitmaktin tana nuka yaunchunia suntar uunt matsakamunam ni nemasri wayawarain tusar wainin armia nuna tiarmiayi. Kame nu suntar ainis wainiainia asarmatai aentska kanararminiuyayi. Iincha aitkiasan Jehovaka shiir enentaimsatniun yainkratniuiti (YKan. 4:8). Aintsan ii itiurchatri amunachkuisha iikia shiir enentaimsatin jeaji, Ana aintsan nankaamasmiayi (1 Sa. 1:16-18). Tura ti penker shiir enentaimiu asar warinkish najankur penker enentaimsar najanattaji.
Itiurchat enentaimiakum Yuus seakminkia ninkia shiir enentaimsatniun yainmaktatui. (Párrafo 4-6 nui iista).
6. Wari najankuria shiir enentaimsattaj? (Nakumkamusha iista).
6 Iisha wari itiurkatniuitiaj. Yaunchukka winia waitkiata tusar suntaran aujsarminiuyayi, iisha aintsan Yuus yainkiata tusar seamniaitji. Itiurchat enentaimkiur Yuus seakrikia ti shiir enentaimsattaji (Ruk. 11:9; 1 Tis. 5:17). Ii yachi Luis naartinian jakatin ishichik ajasume tiarmiania nui ninkia ni nuarijiai warinkisha turatniun takuarmiayi. Tumaitkiusha Yuusan ti seawarmiayi. Ainis turawarmatai Jehovaka shiir enentaimsatniun yainkiarmiayi tura aintsan warinkisha penker najanatniun yainkiarmiayi. Amesha itiurchat nankaamakmeka Yuus tuke seata turakum shiir enentaimsattame (Rum. 12:12).
JEHOVAKA MAJAT ENENTAIMTSUK PUJUARAT TUSA YAINMAKTATJI
7. Itiurchat nankaamakur itiura enentaimminiaitiaj?
7 Itiurchat nankaamakur penker enentaimsataj takursha tujintainti. Watskea uunt kanu chichimi ajakui mai ayanta mai ayanta ajamniaiti iincha aintsan ii itiurchatrisha mai ayanta mai ayanta amajtameajnia aitkiarmamniaitji. Ii umai ni aishri Luis jakamiania nui ainis enentaimmiayi. Ni junis chichaak aishur jaka asamtai ti kuntuts nuya majat enentaim wemiajai tura kajetnash kaje wemiajai. Nuyasha winia aishur yaunchuk najan wemiania nuna najankun wichik pujajna nuke enentaim wemiajai tura najanatniun tujintiakun itiurchat enentaim wemiajai. Nayants tampa tampa ajamunam puja aintsan enentaim wemiajai. Ti itiurchat majat enentaimiakrin Jehovasha itiur yainmaktataj?
8. Yus Kanta 62:2 nuisha Jehová wari turameaj?
8 Jehová itiur yainkratniuit. Jehovaka itiurchat pujakrumin penker enentaimsatniun wi yaintatajrume turamji (Yus Kanta 62:2 aujsata). Uunt kanuka nayants tampa tampa ajakui ayanta ayanta ajamniaiti. Tura ayanta ayanta ajasain tusa juini tura awinisha numi aniun takakui, nujainkia uunt kanuka muchitchaiti. Tura nui enketainiasha shiir enentaimsarminiaiti. Uunt kanu ayanta ayanta ajain tusa numi aniun achiaku asa shirir weakuinkia ti penker ayanta ayanta ajatsuk weawai. Iisha aitkiasrik Jehová iin yainkratkat tusar wakerakrikia niniu najanatin iniaisashtiniaitji.
Yuusna papii irunna nu unuimiakmeka itiurchat nankaamakmesha penker enentaimsattame. (Párrafo 8 tura 9 nui iista).
9. Yuusa chichame unuimiatrattsar najanamu achiakeajnia nusha itiur yainmaj? (Nakumkamusha iista).
9 Iisha wari itiurkatniuitiaj. Itiurchat nankaamakrisha Yuusna nu najanatniuka iniaisashtiniaitji. Yaunchuk najan wemiajnia aintsan najanatin jeachkurnincha Jehovaka ii najaneajnia nujainkia ti warawiti (Rúkas 21:1-4 nui tana nujai apatkam iista). Yuusa chichame unuimiatratai tusar tura unuimiajnia nuisha enentaimsatai tusar ankan sumamsatniuitji. Majat enentaimiu pujuij tusar itiurkatniuitiaj nuna papii nuya video najanamu irunui, Jehovaka nujai yainmaji. Nuna aujmatu JW Library® nui, Índice de las publicaciones Watch Tower tana nuisha turutskesha Testigos de Jehová unuimiatai papii tana nuisha wainkiattame. Ii umai Monika chichaak itiurchat jakamnia enentaim wemiajna nuinkia nuna unuimiat wemiajai. Kame kajektin tura anankeamu nuya penke ikiuchu atin tu aaran eakan unuimiat wemiajai, nuna turakun ti shiir enentaim wemiajai. Tura nekaska Jehová yaintiawai tu enentaim wemiajai tu tawai. Itiurchat nankaamakrincha Jehovaka itiurchat enentaimtsuk pujuarat tusa yainmakminiaitji (YKan. 119:143, 144).
JEHOVÁ YAINMAKTATJI
10. Ti itiurchat nankaamakur itiur nekaptain?
10 Ti itiurchat nankaamakur kakarmachu nuya ti kuntuts nekapminiaitji. Watskea enentaimsatai aents tsekentinian neka aya neachma tukumak kupiniakka yaunchuya ainis tsekentinian jeachminiaiti. Iisha aitkiasrik ti itiurchat nankaamakur kakarmachu nekapminiaitji nuya yaunchuk najan wemiajnia nusha najanatin wakerichminiaitji. Elías aintsan iisha majat enentaimiakur aya kanartiniak wakerimniaitji (1 Ak. 19:5-7). Jehovasha itiura yainmaktataj?
11. Jehová itiur yainmaj? (Yus Kanta 94:18).
11 Jehová itiur yainkratniuit. Jehovaka wi yaintatajrume turameaji (Yus Kanta 94:18 aujsata). Tsekentinian unuimiatra tseke wesa inian ajintra asamtai wekasat tusar yainkiartiniaiti, iisha aintsan yainmainiakrin Jehovanu najanki weminiaitji. Jehová junis turamji: “Warí, Wíkitjiai Jiuwanka ame Yúsrumetjana nuka. Ame untsuurmin emeta achirmakna nu chichartamuk ‘Sapijmiakaip, warí wi yaya̱jme’ túramui” tu tawai (Isa. 41:13). David ti itiurchat nankaamasmiania nui nuya ni nemasrisha kajeriarmiania nuisha Jehová yaintiawai tu enentaimiu asa junis chichaak: “Untsuur uwejmiji̱a̱i̱ emetruame” timiayi (YKan. 18:35). Jehovasha itiura ikiakatmaj?
Amee shuar, ame amikrumsha nuya uuntri ainiasha amin yainmaktasar wakeruiniawai. (Párrafo 11-13 nui iista).
12. Ti itiurchat nankaamakrin iin yainkratkarat tusa Jehovasha yana utsukarminiait?
12 Iin yainkratkat tusa Jehovaka yanaksha utsukminiaiti. David ti itiurchat nankaamamiania nui Jonatán ikiakartasa werimiayi (1 Sa. 23:14-18). Nuyasha Eliasan yainkiat tusa Jehová Eliseon anaikiamiayi (1 Ak. 19:16, 21; 2 Ak. 2:2). Yamaisha aintsan Jehovaka iin yainkratkarat tusa ii shuaran ii amikrin turutskesha uuntri ainiana nuna utsukarminiaiti. Ti itiurchat nankaamakur chikich aentsjai aujmattsatin nakitminiaitji. Tumaitkiusha Jehová yainkiat takurkia wari itiurkatniuitiaj?
13. Jehová yainkratkat takurkia wari itiurkashtiniaitiaj? (Nakumkamusha iista).
13 Iisha wari itiurkatniuitiaj. Chikich aentsjai chichastin nakitiakrisha kakartiniaitji. Chikich aentsjai aujmattsatin nakitiakrikia aya ii itiurchatrinin enentaimiu pujuttaji. Ainis tumakrikia nankamsar warinkish turatin jeaji (Prov. 18:1 TNM). Ti itiurchat nankaamakur iik pujusar iniampratin wakerutainti. Tumaitkiusha nukape tsawan iik pujustasar wakerakrinkia ii shuar ii amikri nuya uuntri ainiasha yainmakchartatji. Jehová iin yainkratkattsa wakerana nu nakitrattaji (Neka. 17:17; Is. 32:1, 2 TNM).
JEHOVÁ IKIAKATMARTATJI
14. Wari urukamtai sapijmiamniaitiaj?
14 Itiurchat nankaamakur ti sapijmiakminiaitji. Itiurchatan wainkiar turutskesha ni nemasri kajerainiam Yuusan umirniusha waitsarmiania nuna Yuus papiinium aujmatui (YKan. 18:4; 55:1, 5). Ii ai unuimiatainmania tura takatnumiansha tura uunt naamkaruksha kajertamiarminiaitji. Turutskesha tsuamashtai sunkurjai jakatin ishichik ajasar pujajik? Ainis ti itiurchat nankaamakur uchia aintsar ti sapijmiamniaitji.
15. Yus Kanta 94:19 tana aintsan Jehová itiurkattajrume turameaj?
15 Jehová itiur yainkratniuit. Ti itiurchat enentaimiakrin Jehová ikiakatmawitji (Yus Kanta 94:19 aujsata). Watskea kashi yumi ti yutak charpisha ajakui nuwach ti sapijmiakui sapijmiakain tusa ni apari miniakkamniaiti. Ni apari ainis turam nuwachikia yumi yutakuisha shiir enentaimiawai nuya sapijmiatsuk pakeka kanawai. Jehovasha aintsan ii apari asa ti sapijmiakrin ikiakatmartatji. Jehová ikiakakratkat takurkia wari itiurkatniuitiaj?
Yuusa chichame aujeakminkia Jehová ikiakatmartatui. (Párrafo 15 tura 16 nui iista).
16. Jehová shiir enentaimsatniun yainkratkat takurkia wari itiurkatniuitiaj? (Nakumkamusha iista).
16 Iisha wari itiurkatniuitiaj. Jehovajai tuke aujmattsatniuitji nuyasha Yuusa chichame tuke aujsatniuitji (YKan. 77:1, 12-14). Nu turakrikia itiurchat nankaamattajnia nuisha Jehovai warik weamkattaji. Jehovajai aujmatkur warinma enentaimiaj, wari sapijmiamtikrameaj nu mash ujaktiniaitji. Jehovaka shiir enentaimsar pujustinian ni chichamejai yainmaktatji (YKan. 119:28). Yuus papii aujeakur ti shiir enentaimsattaji. Job, Salmos, Proverbios papii nuya Mateo akankamu 6 nui Jesús timiania nu aujeakur ti shiir enentaimsattaji. Jehovaka ni seakrin tura ni chichamesha aujeakrin shiir enentaimsatniun yainmaktatji.
17. Warimpia penkesha kajinmatkishtiniaitiaj?
17 Ti itiurchat nankaamakrin Jehová yainmaktatji nu penke kajinmatkishtiniaitji (YKan. 23:4; 94:14). Jehovaka itiurchat nankaamakrumin shiir enentaimsamniuram tusan wi yaintatajrume turamji. Isaías Jehovan junis timiayi: “Aya aminiak enentaimturmasar Yuus yainkiattawai tiniu ainiana nu ayamprukaram tuke shiir enentaimtikiartatme” timiayi (Is. 26:3 TNM). Jehová amin yainmaktasa wakerawai tuma asamtai ni yainkiattawai tu enentaimsata. Jehová yainmakui ti itiurchat nankaamakmesha katsuntrattame.
WARI NEKAAM?
-
Wari itiurchat wainiakur Jehová yainkiata timiniaitiaj?
-
Ti itiurchat nankaamakrin Jehová itiur yainkratniuit?
-
Jehová yainkratkat takurkia iisha wari itiurkatniuitiaj?
NAMPET 12 Yuus Jehová, ashi nankaamakuitme
a Nekas naarinchu ainiawai.