1. Wari turakria Jehová waramtiksattaj?

 Watskea ame amikrum utsuma nekaam warinkisha susainme. Amikrumka ni utsumamu susamaitiat nunaka pachitsuk awas iniaisainti. Ainis turamtainkia antran susajai tu enentaimsamniaitme nekasapi. Antsu ame susamak nunaka achik ni utsumamun najaneakuinkia warasminiapitmea. Apatkar aujmattsajnia nujaisha wari nekaamniaitiaj? Jehová anenkrata asa ni uchirin Jesussan tunaanumia tura jakatniunmaya uwemtikiarturat tusa sukartusu asamtai iisha umireakrinkia ninkia warawiti (Juan 3:16 TNM; Rom. 5:​7, 8 TNM).

 2. Ju unuimiatmanumsha wari nekaattaj?

² Jehová Jesusjai turawarmiania nuka tsawan nankaamaki weakui imiancha ainis enentaimsatin juarkimniaitji. Imiancha ainis iiyakrikia kajinmatkimniaitji. Nu kajinmatkij tusar Jehová Jesusjai turawarmiania nui esetrar tuke enentaimsatniuitji. Nui esetrar enentaimsatai tusar itiurkatniuitiaj nuna ju unuimiatmanum nekaattaji. Jehová ni uchirin sukartusmiania nujaisha yamaisha urukamniaitiaj tura ukunmataisha urukattaj nusha nekaattaji. Nuyasha Jehová anenkrata asa warinkisha tura asamtai yuminsatai tusar wari turatniuitiaj nusha nekaattaji. Tura Jesús jakamu enentaimtamu nuntumsamunmasha itiurkamniaitiaj nusha nekaattaji.

 JEHOVÁ NI UCHIRI SUKARTUSMIANIA NUJAISHA YAMAISHA URUKAMNIAITIAJ?

 3. Jesús ii tumashrin akikmaku asamtai Jehová ii tunaarin itiurkamniait?

³ Jesús ii tumashrin akikmaku asamtai Jehová ii tunaarin tsankurtameaji. Ii tunaarinkia yaksha utsuamu asa tsankurtamchaitji antsu ninki wakerus nunaka turiniaiti. David Jehová namperuk junis timiayi: “Warí Uuntá Ámeka péṉkeraitme tura tsaṉkurkartiniaitme” tu timiayi (YKan. 86:5; 103:​3, 10-13).

 4. Jehovasha yana tumashrinia akikmakat tusa ni uchiri Jesusan akupkamia? (Rukas 5:32; 1 Timiutéun 1:15).

⁴ Jehová winiaka penkesha tsankurturchamniaiti tu enentaimiainiasha irunniuiti. Tumaitkiusha nekas nekamka yaksha Jehová tsankuramu achamniaiti. Apóstol Pablo junis timiayi: “Wisha Yus shuaran ti yajauch awajsa asan chíkich Yus akatrámuja̱i̱ ímianchaitjiai”. Tura junasha timiayi: “Antsu Yus ti shiir waitnentak winia enentái̱rui̱ pujurtus péṉker najataiti” tu timiayi (1 Kur. 15:​9, 10). Tunaa najanamu ene enentaimia ajasakrinkia Jehová tsankurtamniuitji. Urukamtaiya? Iin anenkrata asa tsankurtamniuitji. Winiaka Jehová penkesha tsankurturchamniaiti tu enentaimiakrikia aents tunaarintin ainian tumashrin akikmakat tusa Jehová Jesusan akupkamiania nu kajinmatkishtiniaitji (Rúkas 5:32; 1 Timiutéun 1:15 aujsata).

 5. Winiaka Jehová tuke tsankurtiniaiti urukamtai tu enentaimsashtiniaitiaj?

⁵ Nukap uwi Jehová enentaimtakrisha winiaka Jehovaka tuke tsankurtiniaiti tu enentaimsashtiniaitji. Ninkia yaunchuk warinkisha niniu najanaitiajnia nuna shiir iiniaiti (Isr. 6:10). Tumaitkiusha Jehovaka Jesusnaka penkera nu najanaitrume tusa akupturmakchamiaji. Antsu anenkratu asa nunaka turamiayi. Winiaka Jehovaka tuke tsankurtiniaiti tu enentaimiakrikia Jesuska antar jakamiayi tu tajinia ainis aminiaiti (Karaseanam 2:21 nui tana nujai apatkam iista).

 6. Pablosha Jehovan enentaimtak urukamtai kakarmia?

⁶ Jehovaka niniu warinkish najaneajnia nujai ii tunaarinkia tsankurtamprashminiaitiajnia nuna Pablo nekamiayi. Tumaitkiusha nuna nekayatcha urukamtaiya Yuusnan najanattsa ti kakarmia? Yuus waitnenkratin asamtai yuminkiak ainis turu wemiayi (Ipi. 3:7). Pablo aintsan iisha aya Jehová tsankurturat tu enentaimsar Jehová enentaimtatsji antsu ni ti yuminkiakur enentaimtaji.

 7. Jesús ii tumashrin akikmakmiania nui yamaiya juisha wari urukamniaitiaj? (Rúmanam 5:1; Sántiak 2:23).

⁷ Jesús ii tumashrin akikmatramkamiajnia nui Jehová amikri aminiaitji. a Nuik atsakamutin unuimiatramajnia aintsan akintsarik Jehová amikri ajashtainti. Tumaitkiusha Jesús ii tumashrin akikmakmiania nui Jehovajaisha shiir amajnaisar pujumniaitji tura ni amikrisha aminiaitji (Rúmanam 5:1; Sántiak 2:23 aujsata).

 8. Jehová seatiarat tusa tsankatramka asakrin urukamniaitiaj?

⁸ Jehová amikri ajasu asar nijiainkia aujmattsatin jeaji. Iikia aya iruntramunman seajnia nunak antichuiti antsu chikichkimsar iik seajnia nunasha antiniaiti. Yuus seakur ii enentain shiir enentaimsamniaitji tumaitkiusha nijiai aujmatkur ni amikri tuke atin wakerittiaji (YKan. 65:2; San. 4:8; 1 Juaṉ 5:​14, 15). Jesuska aparka anturtuktatui tu enentaimiu asa Jehovajai tuke aujmatniuyayi nuna turakka ni amikri tuke atiniuyania nunasha Jesuska nekaamiayi (Ruk. 5:16). Jesús ii tumashrin akikmaku asamtai Jehová amikri  ajasminiaitji tura aintsan nijiaisha tuke aujmattsamniaitji.

JEHOVÁ NI UCHIRIN SUKARTUSMIANIA NUJAISHA UKUNMATAISHA URUKATTAJ?

 9. Jehová Jesusan sukartusmiania nui uruma nuisha urukattaj?

⁹ Jehová Jesusan sukartusmiania nujaisha uruma nuisha urukattaj? Jehová tuke iwiaku pujustinian amastatji. Yaunchunia juarkin nukap aents tuke iwiakuka pujuschamniaitji tu enentaimniusha irunniuiti. Tumaitkiusha aentska tuke iwiaku pujuarat tusa Jehovaka najakratamiayi. Yamaiya juinkia tuke iwiaku penkesha pujushminiaitji tu enentaimminiaitji tumaitkiusha Jehová ni uchirin ii tumashrin akikmakat tusa sukartusmiania nui tuke iwiaku pujumniaitji taji (Rum. 8:32).

10. Nayaimpiniam turutskesha ju nunkanam tuke iwiaku pujuartin ainiana nusha warinia wakerusar pujuinia?

¹⁰ Yamainian tuke iwiaku pujuttajnia nui enentaimsar pujuarat tusa Jehovaka wakerawai. Nayaimpiniam weartin ainiana nuka nayaimpiniam Jesusjai metek pujusar uunt anaikiamu ajastinian wakerus pujuiniawai (Apu. 20:6). Tura ju nunkanam tuke iwiaku pujuartatna nusha nu tsawan jeat tusar wakerusmajai nakainiawai tura nuinkia waitsatniusha najaimiatniusha penke atsuttawai (Apu. 21:​3, 4). Amesha ju nunkanam tuke iwiaku pujuttsam wakeramek. Tuke iwiaku pujustinkia antrachuiti. Aentska tuke iwiaku pujuarat tusa Jehová najakratamiayi. Ju nunkanam tuke iwiaku pujakur tuke warasar pujuttaji.

11, 12. Shiiram nunkanmasha wari turunatta? (Nakumkamusha iista).

¹¹ Watskea enentaimsata shiiram nunkanmanka ti penker pujamu atatui. Nuinkia sunkursha jakatniusha atsuttawai (Isa. 25:8; 33:24 TNM). Warinkisha penkera nu ame wakeramun Jehová mash amastatui. Kampuniunam ame nekashtai warinkish irunna nu nekaattsam wakeramek? Kitiar tuntuiyatin unuimiatrattsam wakeramek? Shaukjai  warinkisha najanatin unuimiatrattsam wakeramek? Jea jeamtinian unuimiatra, arakmatniun unuimiatra, apatkun iniarkatniun unuimiatrasha nuya kukujin penker wainin nusha utsumnattawai. Nuyasha takakmatain warinkisha najanin iruntiatui tura warinmansha yaimiainiasha iruntiatui (Isa. 35:1; 65:21). Tuke iwiaku puja asar ashi warinkisha unuimiatrattaji.

¹² Jakaru nantainiakui wainkiartinkia ti penker atatui (Tur. 24:15). Jehovanu nekaki wetin tura ni warinkisha najankana nunanu nekatniuka ti penker atatui (YKan. 104:24; Isa. 11:9). Tunaartincha asar Jehová enentaimtakur ti shiir warattaji. Ukunmatai shiiram nunkanam penker pujustin atatna nuka nakitram ame wakeramu najanattameash? (Isr. 11:25). Yamaiya jui Jehová umirkatai tusar warinkisha turajnia nuka antar turatsji. Ju nunka shiiram ajastatna nu tsawanka jeattawai. Jehová iin anenkrata asa ni uchirin akupturmakmiajnia nui turunattawai.

JEHOVÁ ANENKRATA ASA WARINKISHA TURA ASAMTAI YUMINSARTAI

13. Jehová anenkrattsa asamtai yuminkiakur wari turatniuitiaj? (2 Corintios 6:1 TNM).

¹³ Jehová ii tumashrin akikmakat tusa ni uchirin akupturmakua asakrin yuminsatai tusar wari turatniuitiaj? Yuusna nu emka najanatniuitji (Mat. 6:33). Nekas nekamka “Kristu ashí shuaran jaruk nantarkimiayi. Tuma asamtai Krístunam iisha iwiaaku pujajnia ju̱i̱ iik wararmamtsuk Kristu umirkatniuitji” (2 Kur. 5:15). Jehovaka ti penker asa tsankurtampraitji. Ti anenkratin asa warinkish turayana nu yuminkia asar niniua nuna warinmansha yainkiattsar kakartatji (2 Corintios 6:1 TNM aujsata).

14. Jehová tana nuka nekas imia penkeraiti tu enentaimiakrikia itiurkatniuitiaj?

¹⁴ Jehová anenkrattsa asamtai iisha ni tana nu umirkatniuitji. Nusha itiura ainis turamniaitiaj? Timiatainia unuimiartataj tura tui takakmastataj nui enentaimiakrisha Jehová wakerana nui enentaimsatniuitji (1 Kur. 10:31; 2 Kur. 5:​6, 7). Warinkish turattsar Jehová penker iiyana nui enentaimsar najankurkia Jehová nekas yainkratniuiti tu enentaimiu asar ni ti aneastatji. Ukunmatai turunattana nusha nekas turunattawai tu enentaimsattaji (Rum. 5:​3-5; San. 2:​21, 22).

15. Jehová yuminsatai tusar Jesús jakamu enentaimtustin nuntumsamunam wari turamniaitiaj?

¹⁵ Jesús ii tumashrin akikmaku asamtai tura Jehovasha anenkratin asamtai yuminsartai tusar Jesús jakamu enentaimtustin nuntumsamunam ipiamatin atatna nui Yuusa chichame asumprusar etserkatniuitji. Nuyasha chikich aentscha Jesús jakamu enentaimtamunam pachinkiarat tusar ipiawartiniaitji (1 Ti. 2:4). Aents ipiainiakrisha nuisha wari turataj nu paant titiniaitji. Jesús urukamtai jakamia? tura Jesús jakamu enentaimtamu  nu videosha iniaktustiniaitji. Uuntri ainiana nuka Yuusna najanatniun iniaisaruana nunasha ipiawartiniaiti. Yuusnumia aran ajasaru ainiana nu ataksha Yuusai waketkiarmatainkia nayaimpiniam tura ju nunkanmasha ti waramu awiti (Ruk. 15:​4-7). Jesús jakamu enentaimtustin nu tsawantincha nui pujakrikia aya ii nekatairi ainiana nujain aujmattsuk yama tarujaisha tura Yuusna najanatniun iniaisaru ainiana nusha amikmar nijiaisha aujmattsartiniaitji. Ashi aents nu tsawantin tartatna nu amikmainiakur shiir enentaimtiksartai (Rum. 12:13).

16. Jesús jakamu enentaimtustin nuntumsamunam urukamtaiya Yuusa chichame nu nukap etserkatniuitiaj?

¹⁶ Jesús jakamu enentaimtustin nuntumsamunam Yuusa chichame nu nukap etserkamniaitji. Nu turakur Jehová Jesusjai turawarmiania nu yuminsattaji. Yuusa chichame nu nukap etserkurin Jehovasha iin yainmajnia nu paant nekaamattaji tura Jehová ti aneastatji (1 Kur. 3:9). Folleto Examinemos las Escrituras todos los días tura Unuimiattai papiiniumsha Yuusa chichame Jesús jakamun enentaimtustin nuntumsamunam aujsatin ana nusha aujsartai. Iiksha nui aarma iruneana nuka unuimiatramniaitji.

17. Jehovasha urukamtai warawit? ( Jehová anenkratin asamtai yuminkiakur ju turamniaitji tana nuisha iista).

¹⁷ Ju aujmatna nu mashi turatin jeashkumsha itiurchat enentaimsaip. Jehovaka ame najanmena nuna chikich najanainiana nujai apatak iichuiti. Ninkia aya ii enentainiak iiniaiti tuma asa Jehová Jesusjai turawarmiania nu shiir enentaimtamna nuna ninkia nekawai (1 Sa. 16:7; Mar. 12:​41-44).

18. Jehová tura Jesussha urukamtaiya ti yuminkiainiaj?

¹⁸ Jesús ii tumashrin akikmakmiania nui Jehová ii tunaarin tsankurtampramniaitji nuyasha ni amikri aminiaitji tura tuke iwiakusha pujumniaitji. Jehová anenkrata asa ainis tura asamtai tuke yuminsartai (1 Juaṉ 4:19). Nuyasha Jesús iin anenkrata asa ni iwiakmarin surumaku asamtai tuke yuminsartai (Juaṉ 15:13).