1. Yamaiya jui aents warintia enentaimtumainia?

 Yamaiya juinkia aentska aya niniunak enentaimtumainiawai. Tuma asar ni najanainiamun chikich iisarat tu enentaimiainiak internetnum apujainiawai. Antsu ishichik aents Jehovan paant awajainiawai. Jehová paant awajsatin tana nusha wari turatniuna ta tura urukamtaiya ainis turatniuitiaj nuka jui nekaattaji. Tura jusha nekaattaji: Itiurkaria Jehová naari paant amajsatniuitiaj nuya jukerusan Jehová ni naarin paant ujukattsa itiurkatin nu nekaattaji.

JEHOVÁ PAANT AWAJSATIN TANA NUSHA WARI TURATNIUNA TA?

 2. Sinaí nainnium Jehová ni kakarmarin paant nekamtikiattsa warinia turamia? (nakumkamusha iista).

² Yuusa chichamenka Jehovaka nankaamakuiti, ti kakarmaiti tu tawai. Israel aents ainian Egiptonmaya jiirarmiania nui arusan Jehová ti kakarmana nuna paant nekamtikiamiayi. Warimpia nankaamasmia nu aujmattsatai. Yuus titiniuyania nuna antuktai tusar untsuri Israel aents Sinaí nainnium nuntumas iruntrar pujuarmiayi. Nu nainnium yurankim tee ajas utsanamiayi. Ti ureakui nain mukuin ajatniun juarkimiayi, ipiamtasha newar newar charpisha mai pata ajarmiayi tura kachu umpuinia ainis ti kakaram antunamiayi (Jiin. 19:​16-18; 24:17; YKan. 68:8). Israel aentska ainis Jehová ni paantniurin nekamtikiakui awakmamak ii ajacharmiashia.

 3. Jehová naari paant awajsatai tusar itiurkatniuitiaj?

³ Aentstisha Jehovaka paant awajsamniaitji. Ninkia ti kakarmana tura ni urukuit nunanush chikich aents ujainiakur Jehová paant awajsattaji. Warinkisha ni kakarmarijiai najanu  asar Jehová naari paant ujukatniuitji (Is. 26:12 TNM). David ainis turamiayi. Israel aents antuiniamunam David junis timiayi: Ameka ti kakarmaitme, ti penkeraitme. Amek ti nankaamakuitme. Ashi nayaimpiniam tura ju nunkanam irunna nusha aya aminiuk ainiawai tu timiayi. Ainis taku ashi nui pujuarmiania nuka Jehovan paant awajsarmiayi (1 Crón. 29:​11, 20 TNM).

 4. Jesussha Jehová naarin paant ujukattsa itiurkamia?

⁴ Jesús ju nunkanam pujumiania nui ni aparin paant ujukattsa warinkisha turamiayi. Aentstikia najanachminian najankusha Jehová kakarmarijiai turajai Jesuska ainis tu wemiayi (Mar. 5:​18-20). Nuyasha Jesussha ni chichamujai tura chikich aentsnasha shiir awajeak ni aparin paant uju wemiayi. Yuusa chichame antuktai tusar irun wearmiania nui Jesús pujai iruntrar pujuarmiania nuyainia chikichik nuwa 18 uwi iwianchi suntari enkemtuamu asa waitiu pujumiayi, tura punur pujumiayi. Nu nuwa waitian Jesús nekaa waitnentar junis timiayi: “‘Nawantru, ame jáamurmiya̱ aṉkant ajasume’ tímiayi. Nuna tinia ni uwejé̱ja̱i̱ antiṉmiayi. Tura nú chichamaik nuwa̱sha paṉkái̱ nakuenkamiayi. Tura Yusa náari̱n uunt awajsámiayi” (Ruk. 13:​10-13). Nu nuwaka jaa pujamun tsuamaru asa Jehová naarin paant awajsamiayi. Iisha aitkiasrik Jehová naari paant awajsamniaitji.

URUKAMTAI JEHOVASHA PAANT AWAJSATNIUITIAJ?

 5. Jehovasha urukamtaiya arantuktiniaitiaj?

⁵ Jehová ti aranta asar ni paant ujuwaji. Jehovaka ti kakaram asa penkesha pimpichuiti (YKan. 96:​4-7). Ashi ni najankana nujai ni ti enentaimniuana nuka paant nekaamniaitji. Ni ii iwiakmarin sukartusu asa iwiaku pujuttsar utsumajnia nunasha amakratniuiti (Apu. 4:11). Ninkia penkesha ikiukratchaiti (Apoc. 15:4 TNM). Ashi warinkisha najankusha timiatrusan najanniuiti tura ni tana nunasha tuke uminiaiti (Jus. 23:14). Yuusna etserin Jeremías junis timiayi: “Warí, ashí nuṉkanam neka irunainia nuja̱i̱ apatka iismasha tura ashí ni akupénamunmasha Ámiji̱a̱i̱ métekka chikichkisha peṉké atsawai” (Jrm. 10:​6, 7). Ii apari Jehová urukamtaiya arantuktiniaitiaj nuka paant nekaaji. Tumaitkiusha aya arantukchatniuitji antsu aneastiniaitji.

 6. Iisha Jehovasha urukamtai aneaj?

⁶ Jehová ashi ii enentaijiai anea asar paant awajeaji. Jehovaka ti penker asamtai anenaitji. Ninkia ti waitnenkartiniaiti (YKan. 103:13; Isa. 49:15). Waitiakrinkia waitiajnia nuna iiyak ni enentain najaimiawiti (Sak. 2:8). Tura wini weamkarat nuya amikiur arat tusasha yainkratniuiti (YKan. 25:14; Tur. 17:27). Tura aintsan Jehovaka nankaamantu enentaimcha asa nayaimpincha tura nunkancha tsuntsuma iis nankaamantu enentaimcha ainiana nuna yainiaiti (YKan. 113:​6, 7). Jehovaka ashi ti penker asamtai paant awajsattsar wakeriniaitji (YKan. 86:12).

 7. Iisha Jehová naari itiurkamniaitiaj?

⁷ Aents nekaawarat tusar Jehová naarinkia paant awajeaji. Nukap aentska Yuuska ti penkerana nuna nekainiatsui. Urukamtaiya? Iwianch Jehovanun nankamas waitruaiti nuyasha aentsun mutsuken ukusturaruiti (2 Kur. 4:4). Tura yapajmiaktinian wakeriniaiti, waitiakrincha pachikratchaiti tura ju nunkanam warinkish irunna nunaka ni aikiakratniuiti iwianch Jehová tsanumeak tu tiniuiti. Iikia Yuus penkerana nu neka asar chikich aents ujakarminiaitji. Nu turakur ni paant amajsattaji (Is. 43:10 TNM). Yus Kanta 96 nui Jehová naari paant ujukatniuitji tana nuna nekaattaji. Nu nekaar Jehová  naari paant nekamtikiattsar itiurkatniuitiaj nu mash nekaattaji.

JEHOVÁ NAARI PAANT AMAJSATTSAR ITIURKATNIUITIAJ?

 8. Wari turakria Jehová naari paant ujukamniaitiaj? (Yus Kanta 96:​1-3).

⁸ (Yus Kanta 96:​1-3 aujsata). Jehovanu aujmatkur ni paant awajsamniaitji. Yuusa chichame aujsajnia nuinkia Jehová nampersatniuitiajnia nuna aujmatui tura ni naari shiir awajeakur ni chichame chikich aents ujakartiniaitiajnia nunasha aujmatui nuyasha ni paantniurisha chikich aents ujakartiniaitiajnia nunasha aujmateawai. Ainis turakur Jehová naari paant awajeaji. Judío aents Jehová umiriarmiania nu tura yaunchunia Kristu aents armiania nusha Jehová naarin penker ujukataj tusar warinkisha turawarmiayi nuyasha nin itiura yainkiarmia nunasha aujmattsarmiayi (Tan. 3:​16-18; Tur. 4:29). Iisha ni turawarmiania aitkiasrik turatai tusar wari itiurkamniaitiaj?

9, 10. Angelina nankaamasmiania nuna wari nekaamniaitiaj? (Nakumkamusha iista).

⁹ Ii umai Angelina a Estados Unidosnumia ni nankaamasmiania nuna nekaatai. Ninkia takatnum pujus sapijmiatsuk Jehová naarin ayamprukmiayi. Yama takakmainia nekaawarat tusar mashiniun irurar chichainiak chikichkimsarum atumnia warinkisha titiarum turamiarmiaji. Testigo de Jehovayaitkiurkia penker nankaamataiyana nuna titiasa foton iniakmastasa videon aintiaku najanamiayi. Tumaitkiusha ni ai emka aujmattsamiania nu wikia uchiyajna nuinkia testigo de Jehová aa wemiajai nuna tinia nuyanka ii najanniuitiajnia nuna pachis wishikiartimiayi tu timiayi. Ii umai Angelina ni junis tawai: Aini tinia wishikkiartakui enentairka tek tek ajatrimayi. Tumaknasha nu aents Jehovanun waitruat tusan iniaisattajak tu enentaimsamiajai.

¹⁰ Ni ai chichak amukmatai Angelinaka Yuusan warikchik sea junis timiayi: Wisha amijiai metek uchiyajna nuyainian testigo de Jehovayaitjiai tu timiayi. Angelinaka kajernaikiaij tusa katsuntramiayi. Emkaka uunt tuakmanum foto jusamun iniakmasmiayi tura urukamtai warinkisha turiniaitiaj nuna jintiamiayi (1 Pit. 3:15). Chichak amukminia nuinkia ni ainkia nankamas warinkisha tuurkut ajamunka iniaisauyayi tuma asa wisha ame ainis  testigos de Jehová warinkish najanainiamunam penker nankaamasmiajai tu timiayi. Jehová naarinkia ayampruktiniaitji. Ni naari ayampruktinkia ti penkeraiti Angelina tu tawai. Chikich aentska Jehová naarin yajauch aujmatainiakuisha iijiainkia ni naari paant awajtustinkia ti penkeraiti.

11. Salmo 96:8 TNM nui tana nuna uminiak Kristu aentscha yaunchunia juarki itiurkaruit?

¹¹ (Salmo 96:8 TNM aujsata). Ii takakeajnia nujai Jehovaka paant awajsamniaitji. Ainis turuiniak nin enentaimtuinia nuka Jehová naarin paant amajin ainiawai (Neka. 3:9). Israel aentska Yuus enentaimtutai jean najanawarat tusar tura nui warinkisha iwiaratin akuinkia iwiararat tusar ni takakman warinkisha sukartusarmiayi (2 Ak. 12:​4, 5; 1 Crón. 29:​3-9 TNM). Kristu aents armiania nuka Jesusan tura Jesusa unuiniamuri armiania nuna yaintai tusar ni takakmarin sukartin armiayi (Ruk. 8:​1-3). Tura aintsan yaunchunia Kristu aents armiania nusha ni yachi ni umai utsumiarmiania nuna yaintai tusar warinkisha susarmiayi (Tur. 11:​27-29). Iisha yamaiya jui warinkish ii takakeajnia nu Jehová suakur ni naari paant awajtusminiaitji.

12. Ii takakeajnia nujaisha Jehová naari itiura paant awajsamniaitiaj? (Nakumkamusha iista).

¹² Ii takakeajnia nujai Jehová itiura paant amajsamniaitiaj nuna nekaatai. 2020 uwitin Zimbabue nunkanam esat aa asamtai nukap aents tsukai jakarminiuyayi. Nu nunkanam ii umai Priscila naartin pujumiayi. Esat tepeamtaisha ii umainkia Yuusa chichamen tuke atsakamutin miércoles tura viernes etserkattsa jiin wemiayi. Tura ni nunken arakmatasa pukuitniuitkiusha nunaka iniaisan Yuusa chichamen etserniuyayi. Ainis turakui chikich aents ayam pujuarmiania nu nunkemin takakma pujutsuk nu wekatame. Ame ainiu pujusam tsukai jakattame tusar wishik wearmiayi. Ainis tutaisha ninkia junis tu wemiayi: Jehovaka nin enentaimtuiniana nunaka penkesha ajapa iniaichaiti ainis tu wemiayi. Arusan ii yachi ii umai warinkisha sukartusaru asarmatai yurumkan ejetiarmiayi. Ainis turawarmatai chikich aents ayam pujuarmiania nuka junis tiarmiayi: Yuus aminkia penkesha iniaitiamsachuiti. Iisha nu Yuus penker nekaattsar wakeraji tu tiarmiayi. Tuma asar 7 aents nui ayam pujuarmiania nu iruntainiam wetinian nankamawarmiayi.

13. Yus Kanta 96:9 nui tana aintsan urukamtaiya penker iniakmamsatniuitiaj?

 ¹³ (Yus Kanta 96:9 aujsata). Penker iniakmamkur Jehová paant ujukamniaitji. Sacerdote armiania nuka Jehová enentaimtutai jeanam tura Yuus enentaimtutai jea akmakmanumsha Jehovan enentaimtuiniakka emkaka nijiamarartiniuyayi (Jiin. 40:​30-32). Iisha wapik aij tusar warinkish turiniaitji tura nekaska Jehovajai iisam wapik aij tusar ni tuke umirniuitji (YKan. 24:​3, 4; 1 Pit. 1:​15, 16). Nuyasha yaunchuk najantainkia iniaisar Yuus wakerana nu tuke najanatai tusar kakartiniaitji. Penker iniakmamchatai tura yajauchia nu najantaisha iniaiyakrikia Jehová aintsan enentaimsatin juartainti (Kurs. 3:​9, 10). Aents ti yajauchin najanniusha tura warik kajen ainiasha Jehová yayam yapajniawarminiaiti.

14. Juan turamia nuna wari nekaamniaitiaj? (Nakumkamusha iista).

¹⁴ Juan turamiania nuna aujmattsatai. Ninkia ti kajen itiurchat amajkartiniuyayi tuma asamtai iwianch tu wearmiayi. Mankartin asamtai chichaman iwiarin ainiana nu ninkia mantamnati tiaruyayi. Mantamnatin tsawan jeamam testigo de Jehová sepunam Yuusa chichamen etserkattsa tau ujakam nisha Yuusnan unuimiatratniun juarkimiayi. Mankartin akusha Juanka ni iwiakmarin yapajnia testigo de Jehová ajak imianmiayi. Nekas yapajnia asamtai sepunam wajas iin armiania nusha maattsar juiniakui neajkin papar ajarmiayi. Suntar nui takakma junis timiayi: Yaunchukka Juanka penke yajauchiyayi. Tumaitkiusha yamaikia Juan urukuit ainis ti penkerka chikichkiksha penke atsawai tu timiayi. Juan chikichik atsakamu maamu ai ii yachi armiania nuka sepunam iruntramu najanatai tusar wearmiayi tura nui chikichik aents sepunmaya yaunchukka iruntainmanka penke tacha ta eketun wainkiarmiayi. Urukamtaiya iruntramunmansha nui enkema pujumia? Juan yapajnia wainkia asa nisha Jehovan enentaimtustaj takunka warinia turatniuya nuna nekaataj tusa nui tauyayi. Ii penker iniakmamkur Jehová naari paant ujukamniaitji (1 Pit. 2:12).

JUKERUSAN JEHOVÁ NI NAARIN PAANT UJUKATTSA ITIURKATIN?

15. Jukerusan Jehová ni naarin paant ujukattsa itiurkatin? (Yus Kanta 96:​10-13).

¹⁵ (Yus Kanta 96:​10-13 aujsata). Yus Kanta 96 nuinkia Jehová warinkisha najanuk chichamnasha penker iwiarniuana nuna  aujmatui. Jukerusan Jehová ni naarin paant ujukattsa itiurkatin? Sumamtikiattana nujai ni naarin paant awajsattawai. Ni naarin natsan awajsa asamtai Jehová Uunt Babilonian jukerusan amuktatui (Apu. 17:​5, 16; 19:​1, 2). Jehová Uunt Babilonian amuakui nukap aents iijiai metek Jehovan enentaimtustinian juarainiasha iruniartatuash tumainti. Tura Jehová arusan Uunt Babilonian yayainiana nunaka mash Armagedonnum amu amu amajsattawai. Nuyasha Jehovaka nin kajerainiana nuna tura ni naarin natsan amajainiana nunasha amuktatui. Tumaitkiusha nin anenana nunaka tura umirainiana nunasha nin paant awajainia asarmatai uwemtikrartatui (Mar. 8:38; 2 Tes. 1:​6-10 TNM). Jesús mil uwi uunt anaikiamu ajas pujuttana nu amukamtai tura nekapsamu tsawan atatna nusha amukamtai Jehovaka ni naarin ashi penker awajsattawai (Apu. 20:​7-10). Nu tsawantinkia “Uunt Yusa winchari̱ṉkia entsa nayantsanam pímiana núnis ashí nuṉkanam nekanattawai” (Awa. 2:14).

16. Amesha wari tuke turatin enentaimiam? (Nakumkamusha iista).

¹⁶ Jukerusan ashi aents Jehová naarin paant ujukartatna nuinkia ti penker atatui. Nu tsawan jeamam Jehová naari paant awajsatai tusar warinkisha turatniuitji. Tuma asamtai Jehová naari paant nekamtikiattsa Testigos de Jehová takatrin irunturar chichamprin ainiana nuka 2025 uwitinkia Salmo 96:8 TNM nui tana nuna Yuusa chichame ju uwitiniuka ju ati tiaruiti: “Ni naari ti arantukma asamtai Jehová paant awajsatarum”.