1. Jesús jakamia nu urukamtai enentaimtustiniaitiaj?

 Jehová ni uchirin akupturmakmiajnia nui ti yuminkiaji (2 Kur. 9:15). Jesús ni iniashin iini surumakmia nui Jehová amikri ajasminiaitji tura tuke iwiaku pujuttaji. Jehová anenkrata asa ni uchiri akupturmaku asakrin ti yuminsatniuitji (Rom. 5:8 TNM). Jesuska ni aparijiai turamiania nuna kajinmatkiarain tusa winia jakamur enentaimtursatarum timiayi. Jesús jakamun najanmanum pachinkiurkia Jehová tura Jesús yuminkiainiaji (Ruk. 22:​19, 20).

 2. Ju akantramunmasha warimpia unuimiatrattaj?

² Ju uwitinkia Jesús jakamuka sábado 12 de abril nui enentaimtustatji. Nu tsawan jeat tusar nakasar pujaji. Nu nantutinkia Jehová tura Jesús turawarmia nui esetrar enentaimsatniuitji. Ju akantramunmanka Jesús jakamia nui enentaimsar Jehová tura Jesús uruku ainia nu nekaattaji. Chikich unuimiatrattajnia nuinkia Jehová nuya Jesusjai turawarmiania nu itiur yainmaj tura urukamtai yuminsartiniaitiaj nusha nekaattaji.

 JEHOVÁ URUKU ASA NI UCHIRIN IIN AKUPTURMAKMIAJ

 3. Chikichik aents jaka nukape aentsun uwemtikramniashia? (Nakumkamusha iista).

³ Jehovaka penkera nuna turin asa ni uchirin akupturmakmiaji (Muis. 32:4). Urukamtai nuna turamia. Adán Yuusa umirkachu asamtai Adankainia jintra asar tunaa nuya jatai jurumakniuitji (Rum. 5:12). Jehová jatainmaya nuya tunaanumia uwemtikiarturtasa ni uchirin akupturmakmiaji. Tumaitkiusha chikichik aents jaka nukape aentsun uwemtikramniashia. Apóstol Pablo junis timiayi: “Núnisaṉ chikichik áishmaṉ umirkachmaja̱i̱ untsurí tunaarintin ajasármiayi. Tura chikichik áishmaṉ umirkamuja̱i̱ untsurí shuar péṉker awajnásarmiayi” (Rum. 5:19; 1 Ti. 2:6). Chikichik aents tunaamkarmia nui aentstikia tunaarintin asar jatainti tunaanumia nuya jatainmaya uwemtikiarturtasa chikichik aents tunaartichu Yuusan umirkatniuyayi.

 4. Adanka uchiri uminiakuisha tuke iwiaku pujusarat tusa Jehová urukamtai iniasashminiuya?

⁴ Aentstikia tunaartin asar Jehová Adanka uchiri uminianka tuke iwiaku pujusarat tusa urukamtai iniaisashmia tu enentaimsamniaitji. Jehová nuna turakuinkia Adanka tunaamkachua nunis ayi tura ni uchirisha tunaartichu ainis arayi. Tumaitkiusha Jehovaka aya penkera nunak turiniaiti.

 5. Jehovaka aya penkernak turiniaiti urukamtai taji?

⁵ Jehová Adanka uchiri tunaartin ainiayat tuke pujusarat tusa iniaisamtainkia aents itiura enentaimsarminiuya. Jehovasha penkera nunaka turichuapitia tu enentaimsarminiuyayi. Nuyasha ni chichakmarin nekasash umikiat tu enentaimsarayi. Jehovaka ni uchirin aneayat iini jakat tusa iniaisamiayi nuna tura asamtai Jehovaka aya penkernak turiniaiti taji.

 6. Jehová ti anenmaji urukamtai taji? (1 Juaṉ 4:​9, 10).

⁶ Jehovaka nekaska ti anenkrata asa ni uchirin akupturmakmiaji (Juan 3:16 TNM; 1 Juaṉ 4:​9, 10 aujsata). Jehová aents tuke iwiaku pujusarat tusa nuya ni iruntramurin pachitkia arat tusa ni uchirin akupturmakmiaji. Adannaka tunaamkamtai Jehová ni iruntramurinia jikmiayi. Adán tunaamka asamtai Yuusa iruntramurin pachitkia akinchatainti. Jesús iini jakamia nui yaksha Yuusa umireakka ni iruntramurin pachitkia ajasminiaiti. Jesús iini jaka asamtai Jehovasha ii tunaarin tsankurtampramniaitji nuya ni amikri ajasminiaitji. Tura  chikich Yuusa umirainiajai shiir nawamnairar pujusminiaitji. Jehová nekas ti anenmaji (Rum. 5:​10, 11).

 7. Jesusan waitkiainiakui urukamtai Jehová ayamprukchamia?

⁷ Jehovaka anenkrata asa ni uchirin waitkiainiakuisha katsuntramiayi. Satanaska aents Yuusa umirainia itiurchatan wainkiarka Yuusnaka umirkachartatui tu tiniuiti. Aents itiurchatan wainkiarsha nekas umirtukarminiaiti tusa Jehová Jesusan waitias jakat tusa iniaisamiayi (Job 2:​1-5 TNM; 1 Pit. 2:21). Jesusan aents wishikiainiam nuya suntar awatainiam tura maawar numiniam ajintiainiam Jehová nayaimpiniam pujus mash wainmiayi. Nuya ni uchiri waitias jaan wainkiamiayi (Mat. 27:​28-31, 39). Jehovaka nuna wainiuk ni uchirin ayamprukminiuyayi. Jesusan aents chicharainiak: “Wátsek, Yus nekas Nin aneakka uwemtikrati” tiarmiayi (Mat. 27:​42, 43). Jehová ni uchirin yainmatainkia Jesús iini jakachayi tura aentstisha tunaanumia nuya jatainmaya uwemprachaji. Jehová aents uwemprarat tusa ni uchiri waitias jakat tusa iniaisamiayi.

 8. Jehová ni uchiri waitiakui itiur enentaimsamia? (Nakumkamusha iista).

⁸ Jehová ni uchiri waitias jakat tusa iniaisaitkiuisha Yuuska anenkratchaiti tuka enentaimsashtiniaitji. Jehovaka anenkratin asa niiya anin najakrataiti tuma asamtai iisha anenkratniuitji. Yuusa chichamen tawai aents yajauchin najanainiak Yuusan kuntuts enentaimtiksarmiayi (YKan. 78:​40, 41). Yuus Abrahankan chicharuk ame uchiram maata timiayi (Náṉ. 22:​9-12; Isr. 11:​17-19). Abrahán ni uchirin maattsa pujuras kuntuts enentaimchamiashia. Jehovasha ni uchirin waitkiasar mainiakui itiurak enentaimpramia? Ti kuntuts enentaimpramiayi. (Internetnum jw.org enkemam video Ejemplos de fe: Abrahán [parte 2] tana nu iista).

 9. Rúmanam 8:​32, 38, 39 nui Jehová anenkrata asa warinia turaiti ta?

⁹ Ii amikrinkia turutskesha ii shuarka Jehová anenmajnia timianuka anenkratcha ainiawai (Rúmanam 8:​32, 38, 39 aujsata). Tuke iwiaku pujuttsam wakeratsmeash. Jehovasha tuke iwiaku pujui tusa wakerawai. Yuus tunaarun tsankurturat tusam wakeratsmeash. Jehovaka tunaarmin tsankurturmartasa wakerawai. Jehová ni uchirin akupturmakmiaj nui yuminkrusarat tusa wakerawai. Nuya umirtukarat tusa tura nekas Jesús jarutramkamiaji tu  enentaimsarat tusa wakerawai. Jehovaka anenkrata asa ni uchirin akupturmakmiaji. Nunka shiiram ajasmatainkia Yuus najankamu iiyakur ti anenkratniuiti tu enentaimsattaji (Ecl. 3:11 TNM).

JESÚS URUKAMTAI IINI JARUTRAMKAMIAJ

10. a) Jesús jatsuk warinma enentaimmia? b) Jesús ni aparin paant awajsattsa warinia turamia? ( Jesuska jaamam Yuusa umirkamiayi nuna tura Jehovan paant ujukamiayi tana nusha iista).

¹⁰ Jesuska aents ni aparin penker enentaimtusarat tusa wakerawai (Juaṉ 14:31). Jesús yajauchin najaneawai tura Yuusan arantatsui aents tuiniakui Jesuska apar yajauch juaktatuapi tu enentaimias junis timiayi: “Winia Aparu, Wi túrunatniua nu nusháa iwiaramniaitkiuiṉkia ju̱ wáitsatniua nu tsaṉkatrukaip” tu timiayi (Mat. 26:39). Jesuska jaamam Yuusa umirak ni apari naari Jehovan paant amajsamiayi.

11. Jesús anenkrata asa warinia turamia? (Juaṉ 13:1).

¹¹ Jesuska ashi aentsun anea asa nuya ni unuiniamurincha anea asa ni iwiakmarin surumakmiayi (Neka. 8:31; Juaṉ 13:1 aujsata). Jesuska ju nunkanam pujus ti waittsatniuyania nuna tura waitkiasam jakatniuyania nunasha nekamiayi. Tumaitkiusha Jesuska nekas Yuusa chichame etserkamiayi nuya jintinkratamiayi tura chikichniash yainmiayi. Jesús jasattuk ajas ni unuiniamuri nawen nijiatrarmiayi tura ikiakararmiayi nuyasha jintintiawarmiayi (Juaṉ 13:​12-15). Jesús numiniam ajintiamu pujus kasan chicharuk ju nunkan shiiram amajsattajna nui amesha pujuttame tu ikiakarmiayi. Nuyasha Juankan chicharuk winia nukur penker iirtusta timiayi  (Ruk. 23:42; 23:43 TNM; Juaṉ 19:​26, 27). Jesuska aentsun anea asa yainmiayi nuya ni iwiakmarin surumakmiayi.

12. Jesús yamaisha itiur yainmaj?

¹² Jesuska chikichki jarutramkamiaji tumaitkiusha tuke yainkratniuiti (Rum. 6:10). Yamaikia Jesús uuntri anaikiamuiti, Sumo Sacerdote ajasuiti nuya Yuusa iruntramuri emtiki juawai (1 Kur. 15:25; Ipi. 5:23; Isr. 2:17). Nayaimpiniam weartin ainian tura nunka pujusartinniasha jurtiniaiti. Ti waitsatin tsawan amuwatsain nunaka turatniuiti (Mat. 25:32; Mar. 13:27). a Jesuska Testigos de Jehová takatrin chichamprin ainian winia umirtuinian penker wainkiarat tusa yainiaiti (Mat. 24:45 TNM). Jesuska mil uwi uuntri anaikiamu pujuttana nuisha tuke yainmaktatji. Jehová ni uchirin ni iwiakmarin surumakat tusa akupkamiayi. Jesuska nunakka turachuiti yamaisha tuke yaimki weawai.

JEHOVANU TURA JESUSNA NUKAP NEKAKI WETA

13. Jehová Jesusjai turawarmia nui urukamtai esetrar enentaimsatniuitiaj?

¹³ Jehová tura Jesús turawarmia nui esetra enentaimkiumka nekas Jehová Jesusjai anenmainiajiapi tu enentaimsattame. Jesús jakamu enentaimtustin nantutinkia Yuusa chichame Jesusna aujmatu aujsamniaitme. Akantramuri nukap aujsaip antsu ishichik aujsam esetra enentaimkim weta. Aujeakum urukamtai Jehová Jesús aneastiniaitiaj nui enentaimsata. Ame nekamu chikitcha ujakarta.

14. Yus Kanta 119:97 tana nunisrik Jehovanu tura Jesusnasha nekaki wetasar wari turatniuitiaj? (Nakumkamusha iista).

¹⁴ Imiannimiu nukap tsawan achiakkumsha Yuus urukamtai aya penkera nuna turiniait nuya anenkrata asa warinia turait, urukamtai ni uchirin akupturmakuitiaj nusha tuke nekaki wetiniaitme. Itiurkamea nu turamniaitiam? Papii Yuusna najankamu iruneana nu unuimiatrata. Yuusa chichame aujeakum nekaachmeka nukap Yuusna papii irunna nui unuimiatram Jehovanu nuya Jesusna wari nekaam nui esetra enentaimsata. Nuyasha ni urukamtai anenmainiaj  nuisha enentaimsata (Yus Kanta 119:97 aujsata).

15. Yuusa chichame unuimiatratin urukamtai iniaisashtiniaitiaj?

¹⁵ Ame nekattsam wakeramu wainkiashmesha aujsatin tura unuimiatratin iniaisaip. Yuusa chichame unuimiamuka kuri eajnia aintsaiti. Aents kurin eainiaka nukape tsawan pujurin ainiawai. Nuna urukamtai turin ainia. Kuri uchichisha ti kuitiaiti. Yuusa chichame jintinkratmaka kurincha iniankasaiti (YKan. 119:127; Neka. 8:10). Tuma asamtai Yuusa chichame unuimiatratin turutskesha aujsatin iniaisaip (YKan. 1:2).

16. Jehovajai tura Jesús turawarmia aintsarik iisha wari turatniuitiaj?

¹⁶ Unuimiatkum pujusam juna umiktajai tu enentaimsata. Jehovaka tuke penkeran najanniua nuna tura metekrak iikratniuana nunash turawaintiaj tu enentaimsata. Jesuscha waitiayat ni aparin umirkamiayi nuya chikichniasha yainmiayi. Amesha nunismek turata. Aents Jesús jakamia nuna nekaawar uwemprarat tusam etserki weta.

17. Chikich akankamunmasha wari nekaattaj?

¹⁷ Jesús iini jarutramkamiajnia nu nekaar Jehovasha tura Jesuscha ti aneasartatji. Aneamka nisha aintsan anenmasartatji (Juan 14:21; Sant. 4:8). Jesús iini jakamia nu nekaamij takurkia Yuus papii najankamu irunna nu unuimiatkir wetiniaitji. Chikich akankamunmanka Jesús iini jaka asamtai wari urukattaj nuya Jehová itiurkaria yuminsatniuitiaj nusha nekaattaji.