1. Jehová nuatnaiyamuncha urukamtaiya amakrattsait?

 Jehovaka “warau Yuusaiti” tuma asa iincha waras pujuarat tusa wakerawai (1 Tim. 1:11 TNM). Iwiaku pujuiniak warasar pujuarat tusa warinkisha nukap amasuitji (San. 1:17). Nuatnaiyamuka Jehová amakrattsamuiti. Aishman nuwajai nuatnaiyainiak anenaistatji, arantuknaittiaji tura penker wainniaikiattaji tu tiniu ainiawai. Ti shiir amajnainia asar ti warau ainiawai (Neka. 5:18).

 2. Nukap nuatnaikiaru ainiana nu yamaiya juisha itiur pujuinia?

² Nuatnainiak tiaruana nuna nukap aents umichu ainiawai. Tuma asar waras pujuiniatsui. Organización Mundial de la Salud nui takakmainia junis tiaruiti: Nukap aishman ainiana nu ni nuwen katsumin ainiawai, katsekin ainiawai tura kuntuts enentaimtikin ainiawai tu tiaruiti. Chikich aents pujuiniakui penker wainniua ainis ajausha tura jimiarchik pujuiniakka ni nuarin waitkiausha aishman irunui. Nuyasha nuatnaikiaru ainiana nuka ni aishri internetnumani misu tsanirmamun iiyakui itiurchatan wainin ainiawai.

 3. Aishman ni nuwen urukamtaiya waitkiau arminiait?

³ Aishmansha urukamtaiya ni nuwen waitkiau ainia? Apari ni nukurin katsumun iiyasua tsakararu asar nuwa katsumkatniuka penkera ainis enentaimiarminiaiti. Tura chikichkia nekas aishman ataj takurkia nuwaka nupetrukain tusar iniaisashtiniaitji tu enentaimin ainiamunam tsakararush arminiaiti. Tura aintsan kajen ain tusar jintintiashma tsakararusha arminiaiti. Tura chikichkia warinmansha misu tsanirmainiamun iin asar aya tsanin tumatniun wakerin arminiaiti nuyasha nuwanka aya tsanin tumattsaran wakerin ainiawai. COVID-19 juarnakmiania nuyainia nu itiurchatka tui tuinsha ainis nankaamawai. Aishmanka  ni nuwen itiurchat amajsashtiniaiti.

 4. Kristu aents nuatkaru ainiana nusha urukamtai anearartiniait?

⁴ Chikich aents nuwan itiur enentaimtuinia ainis enentaimtusaij tusar Kristu aents nuatkaru ainiana nuka anearartiniaiti. a Urukamtai anearartiniait? Ni enentaimiainiana aitkiasan najanawaij tusar anearartiniaiti. Romanmaya Kristu aentsun Pablo timiania nui watskea enentaimsartai. Nuinkia Kristu aents nayaimpiniam weartin ainiasha irunmiayi. Romanam Kristu aents matsamiarmiania nuna Pablo junis timiayi: “Yamaiya jui aents urukainia anin atin iniaisatarum” timiayi (Rom. 12:​1, 2 TNM). Romanmaya Kristu aentscha chikich aents turiarmiania ainis turatniun juarkiaru asarmatai Pablo ainis timiayi. Tuma asarmatai Pablo atum enentaimiarmena nuka tura atum najantrumna nuka iniaisatarum Pablo tu timiayi. Pablo timiania nunaka nuatkaru ainiana nusha yamaiya juisha nui enentaimsartiniaiti. Chikich aents nuwan itiur enentaimtuinia aini enentaimiainia asar Kristu aentsuitiat ni nuwen waitkiasha irunniuiti. b Aishman ni nuwen itiur enentaimtiarat tusa Jehovasha wakera nu anintramuka ju unuimiatmanum Yuusa chichame aarma ana nui nekaamniaitji.

 5. 1 Pítiur 3:7 nui tana aintsan aishman ni nuwencha itiurkatniuit?

⁵ (1 Pítiur 3:7 aujsata). Nuatkaru ainiana nunaka Jehová ni nuwen arantukarat tusa wakerawai. Yaksha arantakrikia nu aentsjai warinkish najankur arantamujai turattaji. Aishman ni nuwen aranta asa ashi warinkish turaksha arantamujai turattawai. Ju unuimiateamunmanka aishman ni nuwen arantuktasa warinia turatniuit nu nekaattaji. Tumaitkiusha wari najanmana nuwasha penker enentaimcha ainia nu emka nekaattaji.

ATUMI NUWE ITIURCHAT ENENTAIMTIKSAMNIA NAJANAWAIRAP

 6. Aishman ni nuwen katsumin ainiana nuna Jehovasha itiur iiniait? (Colosenses 3:19 TNM).

⁶ Katsumeamu. Katsumkartin ainiana nunaka Jehová penke nakitniuiti (Sal. 11:5 TNM). Tura nekaska aishman ni nuwen katsumniunka Jehová penke nakitniuiti (Mks. 2:16; Colosenses 3:19 TNM aujsata). 1 Pítiur 3:7 nui tana aintsan aishman ni nuwen waitkiakuinkia Yuus nu aentsun nakitrattawai. Jehová nu aents seamsha anturkashminiaiti.

 7. Ipisiunam 4:​31, 32 nui tana aintsan aishman ni nuwencha warintia tichartiniait? (Paant nekaatin tana nuisha iista).

⁷ Katsekeamu. Aishman ni nuwen kajerak katsekniusha  c irunniuiti. Ipisiunam 4:​31, 32 (aujsata) tana aintsan katsekmakur chara chara ajamunka Jehová penke nakitniuiti. Aishman ni jeen ninki pujusar ni nuwencha itiur amajea nunasha Jehová mash iiniaiti. Aishman ni nuwen kajerak katsekeana nuka aya ni nuwen itiurchat amajtsui antsu Yuusa amikri ajasman iniaisamniaiti (San. 1:26).

 8. Internetnumani misu tsanirmamu irunna nunasha Jehová itiur iiya?

⁸ Warinmansha misu tsanirmainiamu iiyamu. Warinmansha misu tsanirmainiamu irunna nunasha Jehová itiur iiya? Muijmiai iiyawai. Aishman nuatka internetnumani misu tsanirmamun iiyaka Jehová amikri achamniaiti tura ni nuwencha arantatsui. d Aishman nuatka aya ni najanmajain ni nuwen arantukchatniuiti antsu ni enentaimmiajaisha ni  nuwenka arantuktiniaiti. “Shuar nuwa̱n iis wakerukka ni enentái̱n tsanirmayi” Jesús tu timiayi (Mat. 5:​28, 29). e

 9. Aishman ni nuarijiai tsaninkiar tumainiak ni nuarin itiurchat enentaimtikin ainiana nuna Jehovasha itiur iiniait?

⁹ Aishman ni nuwejai tsaninkiar tumainiak ni nuwe itiurchat enentaimsamnian turashtiniaiti. Aishman ni nuarijiai tsaninkiar tumainiak waitsamnian tura imiancha ainis yajauchin enentaimtiksamnia nuna turat tusar ni nuarin utsu ainiasha irunniuiti. Ainis turamunka Jehová penke nakitiawai. Aishman ni nuwenka aneasmajai, waitnentamujai shiir amajsat tusa Jehová wakerawai. Nuyasha ni nuwe itiur enentaimia nunasha arantukat tusa wakerawai (Ipi. 5:​28, 29). Kristu aents nuatka jui aujmatna nuna ainis turaitkiunka itiurkamniait? Ni enentaimmian tura ni najanman yapajiattsasha itiurkamniait?

AISHMAN NI NUWEN ITIURCHAT AMAJSATNIUN INIAISATTSA ITIURKAMNIAIT

10. Nuatkaru ainiana nusha Jesusnan warinia nekaawarminiait?

¹⁰ Aishman ni nuwen itiurchat amajsatniun iniaisattsa itiurkamniait? Jesús urukuya aitkiasan turattsa kakartiniaiti. Jesuska chikichkiksha nuatkashmiayi tumaitkiusha ni unuiniamurin itiur wainniuya aitkiasan aishmansha ni nuwen penker wainkiarminiaiti (Ipi. 5:25). Jesús ni unuiniamurin itiurniuya tura nijiai aujmatainiaksha itiur aujmatniuya aitkiasan aishman ni nuwen turattsar itiurkarminiait nuna nekaatai.

11. Jesussha ni unuiniamuri armiania nunasha itiur wainniuya?

¹¹ Jesús ni unuiniamurinkia aneasmajai tura arantamujai penker wainkiarmiayi nuyasha kajekmajai imiancha ainiana ainis penkesha tichamiayi. Jesuska ni unuiniamurijiai nankaamas kakarmaitkiusha ashamprukarat tusa warinkisha turichuyi. Antsu nankaamantu enentaimtsuk warinmansha yaya wearmiayi (Juaṉ 13:​12-17). Ni unuiniamuri armiania nuna: “Wi kajechu asan tura péejchach enentáimin asamtai Winí̱ winirum unuimiártarum. Kame kijinian Wi súajrumna nu achikrum jukitiarum. Winia chichamur ántakrum umirtakrumniṉkia átum enentáimin ayamprattarme” tu tiarmiayi (Mat. 11:​28-30). Warik kajechu ainiana nuka kakarmachu asar warik kajechu ainiawai tichamniaitji antsu kajek warinkish turutsuk warinkisha katsuntratniun jeawai.

12. Jesús chikich aentsjai aujmateaksha urukniuya?

¹² Jesuska yanaksha ikiakartasa tura penker enentaimtikrattsa shiir ajamujai tu wemiayi. Jesuska ni unuiniamurinkia kajekmajai penkesha tichamiayi (Ruk. 8:​47, 48). Nin kajeriarmiania nu katsekeamsha ninkia katsekkacharmiayi (1 Pit. 2:​21-23). Katsekainiamsha takamatcha juakmiayi (Mat. 27:​12-14). Nuatkaru ainiana nusha nuna unuimiatrarminiaiti.

13. Aishman ni nuarijiai warijiainsha peekma ainis asa warinia turashtiniait? (Matéu 19:​4-6; nakumkamusha iista).

¹³ Jesús ni unuiniamuri armiania nuna atumin nuwe anankawairap tu tiarmiayi. Ni apari Jehová timiania nuna taku aishman ni nuwejai tsanin chikichik ayashtiniak ajastatui timiayi (Matéu 19:​4-6 aujsata). Griego chichamjai nuna takunka aishman nuwajainkia warijiainsha peekma ainis ainiawai tusa tu tawai. Warijiainsha peekma ainis asar aishmankesha turutskesha nuwaksha itiurchat amajkartusmatainkia maimtek waitin ainiawai. Aishman ni nuwen ti arantakka warinmansha misu tsanirmainiamun iischattawai. Misu tsanirmamun iistinian nakitia asa warik peperet ayantartatui (YKan. 119:37). Ni nuarinchun iisaij  tusa ni jiijiai chichaman najaneana ainis turiniaiti (Job 31:1 TNM).

14. Aishman ni nuwejai penker pujuttsa tura Jehovajaisha penker pujuttsa itiurkatniuit?

¹⁴ Aishman ni nuwen kajerak yajauch chicharniuitkiunka tura katsumniuitkiunka ni nuwen arantuktasa nuya Jehová amikri atasa yapajniatniuiti. Yapajniataj takunka itiurkatniuit? Emkaka yapajniatniuana nuna nekamatniuiti tura Jehovajainkia warinkisha uukmaka atsana nunasha nekatniuiti (YKan. 44:​20, 21; Ecl. 12:14 TNM; Isr. 4:13). Ni nuwen waitkiamun iniaisatniuiti yajauch iniakmamman yapajiatniuiti (Neka. 28:13). Nuyasha nekas enentaijiai ene enentaimia ajas ni nuwencha waitkiasuitiajmena nui tsankurturta titiniaiti tura Jehovancha tsankurturta titiniaiti (Tur. 3:​19, 20). Yajauch enentaimmia yapajiatin tura chichamurjaisha tura najanmarjaisha itiurchat amajkartusaij tusa Jehovan seatniuiti nuya yapajniatin wakeramu enentai surusta tu seatniuiti (YKan. 51:​10-12; 2 Kur. 10:5; Jir. 2:​12, 13). Yuusan seak aitkiasan turattsa kakartiniaiti. Nuyasha katsekmaktinniasha turutskesha kajekan warinkisha turawaij tusa aneartiniaiti (YKan. 97:10). Nuyasha uuntri anaikiamu ainiana nujaisha warik aujmattsatniuiti. Uuntri anaikiamu ainiana nuka aneasmajai aujsartatui (San. 5:​14-16). Atak yajauchin turawaij tusa warinia itiurkatta nuisha enentaimsatniuiti. Aishman nuatka internetnumani misu tsanirmamun iiyakka nisha aitkiasan yapajniatniuiti. Yapajniattsa kakamna nui Jehová yainmaktatui (Sal. 37:5 TNM). Tumaitkiusha ayataik ni nuarin itiurchat amajsamniana aya nunaka turamun iniaisashtiniaiti antsu ti arantuktiniaiti. Aishman ni nuwen ti arantuktasa itiurkamniait nu nekaatai.

AISHMAN NI NUWEN TI ARANTUKTASA ITIURKAMNIAIT

15. Aishman ni nuwen aneakka warinia turatniuit?

¹⁵ Aneakum warinkisha turata. Aishman ni nuwen anea asa tuke tsawan warinkisha turincha irunniuiti (1 Juaṉ 3:18). Kristu aents nuatka ainiana nuka ni nuwen miniaksartiniaiti tura ewejnum enkescha wekasartiniaiti.  Nuyasha aneajme tusa turutskesha penkerak pujam tusa mensajenmani aar akupkartiniaiti. Urutainsha ni itiur enentaimta nuna papiichinian aar susamniaiti. Aishman ni nuarin ainis turakka ni nuwen ti arantawai nuyasha maimtek ti anenaisarminiaiti.

16. Aishman ni nuwen shiir enentaimtamuncha urukamtaiya titiniait?

¹⁶ Ti shiir enentaimtamna nu ame nuwem titia. Aishman ni nuwen urukamtai ti shiir enentaimta nuna titiniaiti. Ainis tutainkia ni nuwesha shiir enentaimsattawai. Aishmanka warinmansha yainmena nui yuminsajme ni nuwen tu titiniaiti (Col. 3:15 TNM). Nuwaka ni aishri nekas enentaijiai arantamka shiir enentaimsattawai tura anentawai nuyasha arantureawai tu enentaimsattawai (Neka. 31:28).

17. Aishman ni nuwen arantakka itiurkatniuit?

¹⁷ Wait aneastiniaiti tura arantuktiniaiti. Aishman ni nuwen aneakka ti shiir enentaimtiniaiti tura Jehová nuarnaka surusuiti tu enentaimniuiti (Neka. 18:22; 31:10).Tuma asa penker wainniuiti nuyasha ti shiir enentaimta asa jimiarchik pujusarsha arantamujai warinkisha tiniuiti. Tura aintsan ni nuwejai tsanin tumaksha aitkiasan turiniaiti. Nuyasha ni nuwejai tsanin tumaksha ni nuari itiurchat enentaimtiksamnian turat tusa utsuchuiti. f Tura aintsan aishmanka yajauchia nunaka najananka itiurchat enentaimsamniaitjiai tu enentaimias yajauchin najanawaij tusa kakartiniaiti (Tur. 24:16).

18. Nuatka ainiana nusha warinia tuke turawartiniait? ( Aishman ni nuwen aranta asa juna turamniaiti tana nuisha iista).

¹⁸ Atumi nuwe arantuktai tusarum warinkish najanearmena Jehová nuna iiyak warawai. Atumi nuwe itiurchat enentaimtiksamnia najantsuk arantamujai wait aneasrum ti aneastarum. Ainis turakrumka atumi nuwe nekas anea asarum tura shiir enentaimta asarum aini turattarme. Atumi nuwe aranta asarum penker wainiakrumka Jehová amikri tuke atatrume (YKan. 25:14).