AKANKAMU 3
NAMPET 35 Wari imiankaska turatniuit nu nekamawartai
Warinsha najankum Jehová waramtiksamnia najanata
“Jehová arantakrikia neka atatji nuya Jehová enentaimna aintsarik enentaimsattaji” (PROV. 9:10 TNM).
JU UNUIMIATRATTAJI
Warinsha najankur tuit penkera tuit yajauchia nu nekaar esetrar enentaimsar penkera nu turawartai.
1. Wari turattsaria penker esetrar enentaimsatniuitiaj?
Kashi kashinin wari najanattaj nu esetrar enentaimsatniuitji. Wari najanattaj nu yupichuch turamniash iruneawai. Wari yuataj, urutma ekemsamunma kanartataj nu turatniuka yupichuchiti. Antsu chikichniumka juna turatjai tusar penker enentaimsar turatniuitji. Penker pujustai tusar nuya ii shuarsha penker pujuarat tusar nuyasha Yuus enentaimtustai tusar esetar enentaimsatniuitji. Penkera nu najankurkia penker pujuttaji tura ii shuarsha penker pujuartatui nuya nekaska Jehová shiir enentaimtiksattaji (Rum. 12:1, 2).
2. Penkera nu najanattsar wari turatniuitiaj?
2 Penkera nu najanattsar wari turatniuitiaj? Wari najanattaj nu penker nekaatniuitji. Ii turattaj nuna Jehová itiurak enentaimsat nuisha enentaimsatniuitji. Warinkish najanattsar nuna turakur itiurak nankaamastaj tu enentaimsatniuitji. Penkera nu tura yajauchia nu nekaattsar wari itiurkatniuitiaj nusha nekaattaji (Neka. 2:11).
WARI NAJANATTAM NU PENKER NEKAATA
3. Urukamtai wari najanattam nu amamkesam penker nekaatniuitiam apatkam aujmattsata.
3 Urukamtai wari najanattaj nu penker nekaatniuitiaj. Watskea jui enentaimsata: yaksha jaak tsuamatainiam wenti. Tsuakratin tsuakan sutsuk wari sunkurna achiakea nuna penker nekaratniuiti. Amesha aintsamek warinsha turattaj takumka amamkesam emka penker nekaatniuitme. Nusha itiurkamea turamniaitiam.
4. Nekatai̱n Jintinkiartin 18:13 tana aintsan penker nekaatasar wari turatniuitiaj? (Nakumkamusha iista).
4 Anintrakmeka wari turattam nu penker nekaattame. Watskea ju enentaimsata: Nampernum ipiatmawarainti. Ipiatawarainia nui weminiashitiaj tusam nampera najanu junisam aniasminiaitme: Tuimpia najanattarum. Urutainia najanattarum. Ya pujuartata. Nampernumsha ya emtiki jukittia. Nu nampernumsha wari najanattarum. Awartiush atatuak. Ainis anintrusmeka nu nampernum pujumniashitiaj tusam esetram enentaimsattame (Nekatai̱n Jintinkiartin 18:13 aujsata).
Anintrusam mashi nekaata. (Párrafo 4 nui iista). a
5. Warinkish turutsuk warinma enentaimsatniuitiam?
5 Anintrusam nekaamka wari nankaamasminiait nui enentaimsattame. Nu nampernum aents Yuusa chichame umiktinian nakitin nui pujutniuitkiuinkia turutskesha awarin atatkuinkia nu nampernum yajauchin turawarminiaitkiuinkia nui wetameash (1 Pit. 4:3). Turasha nu tsawantinin Yuusa chichame etserkatniuitkiui turutskesha iruntramu atiniaitkiuish itiurkatamek. Wari nankaamasminiait nui amamkesam enentaimkiumka penkera nu turattame. Wari nankaamasminiait nu ame nekaamsha Jehovasha warintiak enentaimia nuisha enentaimsata (Neka. 2:6).
JEHOVASHA WARINTIAK ENENTAIMSAT NUI ENENTAIMSATA
6. Sántiak 1:5 tana nui enentaimsar urukamtai nekatai seatniuitiaj?
6 Ame enentaimmena ainis enentaimsattsan wakerajai tusam Yuus seata. Yuuska seatkurminkia nekatain amastatajrume tawai (Sántiak 1:5 aujsata). Jehová nekatairijiai ii najanattajnia nuna ni itiurak iiya nu nekaattaji.
7. Jehová enentaimna nu itiur nekaamniaitiaj nu apatkam aujmattsata.
7 Yuus yainkiata tu seamka itiura yainmakat nui enentaimia pujuta. Watskea tuinsha jeam menkakainme. Tui weamna nui jeattsam yaksha nui puja neka asa nekapturata tutai jintintrameakui amamkesam anturkattame. Jehovajaisha nunisam turamniaitme. Ame nekatairam surusta tu seam ni chichame itiura yainma nui amamkesam enentaimsata. Chikich akantramunam aujmattsaji nampernum wetasar itiur enentaimsatniuitiaj nu Yuusa chichamen nampernum yajauchin najanainiamunam pachinkiairap nuya aents yajauchijiai nawamnaikiairap tana nui enentaimsatniuitji. Nuyasha emka Yuusna najanatniuitiajnia nuisha enentaimsatniuitji (Mat. 6:33; Rum. 13:13; 1 Kur. 15:33).
8. Warinsha penker nekattsam wakerakmeka wari turatniuitiam? (Nakumkamusha iista).
8 Warinsha penker nekaattsam wakerakmeka wari turatniuitiam? Yaksha testigo de Jehová Yuusnum tsamakaru ainia yainkiata juna nekaattsa wakerajai timiniaitme. Nekaska amek penker esetram unuimiatramniaitme. Yuusna papii najankamu nukap iruneawai. Guía de estudio para los testigos de Jehová nuya Textos bíblicos para la vida cristiana tana nui unuimiatramniaitme. Jui enentaimsata: penkera nu najankumka Jehová waramtiksattame.
Jehová itiur enentaimia nui enentaimsata. (Párrafo 8 nui iista). b
9. Ii najanmajai Jehová shiir enentaimtiksattsar wari turatniuitiaj? (Efesios 5:17 TNM).
9 Ii najanmajai Jehová shiir enentaimtiksattsar wari turatniuitiaj? Emkaka Jehová penker nekaatniuitji. Proverbios 9:10 TNM nui tawai Jehová enentaimna aintsarik enentaimsatniuitji. Yuus enentaimna aintsarik enentaimsattsarkia ni urukuit nu tura warinia turatta nuyasha warinia wakeriniait tura warinia nakitniuit nu nekaatniuitji. Juni enentaimsata: turattajna nuna Jehová shiir enentaimtursatpiash (Efesios 5:17 TNM aujsata).
10. Aents tuiniana nuinkia enentaimtsuk urukamtai Yuus warintia enentaimia nui enentaimsatniuitiaj?
10 Jehová wakerana nu najankurin ii shuarkesha turutskesh ii amikrinsha imian iirmacharminiaitji. Watskea jui enentaimsata: Aents nawantri achiaku ni nawantri penker pujusat tusa wakera asa aishman Yuusna ti takakmachunak kuitriniuitkiuinkia ni iniumkata tinti. Nu aishman Yuusnan ti takakmachuitkiunka ni nuarin Yuusnum kakarat tusa ikiakartimpiash. Yamaikia Jehová itiurak enentaimia nu nekaatai. Yuusa chichamen Matéu 6:33 nui junis ikiakatmaji: Emka Yuusna najanatarum turamji. Ii apari turutskesh chikich aents shiir enentaimtiksattsar wakerakrisha imiankaska Jehová shiir enentaimtiksatniuitji.
WARINKISH NAJANKUM ITIUR NANKAAMASMINIAITIAM NUI ENENTAIMSATA
11. Filipenses 1:9, 10 TNM tana aintsan wari nekaria penkera nu najanattaj?
11 Yuusa chichame tana nui enentaimsam tunak turawaintiaj tusam esetram enentaimsata (Filipenses 1:9, 10 TNM aujsata). Warinkish najanattsam enentaimkiumka juna najankunka yajauchiniash turutskesh penkernash najanataj tu enentaimsata. Warinkish najanattsar wariksha turamniaitji tura chikichniumka amamkesar enentaimsarsha turamniaitji. Yajauchia nu tura penkera nu nekakrikia warinkish penker enentaimsar najanattaji.
12, 13. Takat wainkiam warinma enentaimsatniuitiam?
12 Ataksha apatkar aujmattsatai. Takat eanme tura jimiara takat wainkiamsha junisan enentaimsamniaitme: Warinma takakmastataj tura urutma tsawanta takakmastataj nuya nui takakmastin arankait nuisha enentaimsatniuitme. Takat jimiar wainkiamu penkeraitkiui ju takatnum penker akirkartatui tu enentaimsainme. Tumaitkiusha juisha enentaimsatniuitme.
13 Nui takakmakun iruntramunam wetinian ankantan takutjash. Wi shuar utsumainiamun susarminiashitiaj turutskesha Yuusnancha jintiatniun ankantan takutjash tu enentaimsata. Aintsam enentaimkiumka kuitian nukap waitmaktaj tu enentaimtsuk nekaska amee shuar utsumainiana nui tura emka Yuusna najanattsam enentaimsattame. Ainis turakminkia Jehová yainmaktatui.
14. Chikich yajauch enentaimtiksaij tusar warintia enentaimsatniuitiaj?
14 Penker enentaimsar turakrikia aya iiniuk enentaimsashtatji antsu chikitcha yajauch enentaimtiksaij tusar nuisha enentaimsattaji (Filip. 1:10 TNM). Nuyasha itiur iwiarmamprattaj tura urukua entsartataj nuisha enentaimsatniuitji. Ii wakeramu entsartasar wakerimniaitji tumaitkiusha chikich itiurak enentaimsat nuisha enentaimsatniuitji. Esetrar enentaimniuitkiurkia chikich enentaimmiarisha arantukartatji. Anenkratniuitkiurkia aya iiniuk enentaimtsuk chikitcha shiir enentaimsarat tusar wakerittiaji (1 Kur. 10:23, 24, 32; 1 Ti. 2:9, 10). Chikich aneakrikia tura arantakrikia warinsha turattsar esetrar enentaimsattaji.
15. Warinsha najantsuk emka warinma enentaimsamniaitiam?
15 Warinsha najanattsam enentaimkiumka wari nankaamasminiait nui enentaimsata. Jesús junis jintinkratamiayi: Warinsha najanattsa wakerajna nuna umikminiashitiaj tu enentaimsatniuitrume timiayi (Ruk. 14:28). Warinsha turakun urutma tsawantak pujursataj, wariniak utsumtiaj tusam enentaimsata. Nu turatin yupichuchiash arutramat nuisha enentaimsata. Turattamna nuna amee shuarsha yainmakarat tusam nijiai aujmattsarta. Urukamtai nusha turatniuitiam? Chikichjai aujmatkumka wari najanamniaitiam nu nekaamniaitme. Nuyasha amee shuar amesha warintia enentaimiam tu aniasam amamkesam anturkamka nisha yainmakartatui (Neka. 15:22).
ESETRAM ENENTAIMKIUMKA PENKERA NU NAJANATTAME
16. Penkera nu najanattsam wari itiurkatniuitiam? ( Penkera nu turattsar wari turatniuitiaj tana nuisha iista).
16 Ju unuimiatrajnia timiatrusmek najankumka penker turattame. Warinkish najanattsar wari turatniuitiaj nu nekaame nuya Yuusa chichame warintiawa nusha nekaame. Jehová shiir enentaimtiksamnia najanata. Yamaikia penkera nu najanamniun Yuus seata.
17. Penkera nu najanatniun Jehová itiur yainmaj?
17 Warinsha yaunchuk penker najanaitkiumsha jui enentaimsata. Ame nekatairmijiainkia turachuitme antsu Jehová nekatairijiai turaitme. Aya Jehovak neka atinian, esetra enentaimsar turatniun yainmaktatji (Neka. 2:1-5). Jehová yainmakui penkera nu najanattame (YKan. 23:2, 3).
NAMPET 28 Itiurkaria Jehová amikri ajasminiaitiaj?
