Yuusa chichamen aararmiania nu, nu chichamnak awainkiarsha aa wearmiayi. Urukamtai ainis turawarmia nuna nekaawartai:

Urutai aantramia. Yaunchuk Israel aents matsamiarmiania nuinkia chikichkimsar Yuusa chichamen takucharmiayi. Yuusa chichamen Yuus enentaimtutai jeanam aujainiakui antuktai tusar irun wearmiania nui antu wearmiayi (Muis. 31:​10-12). Untsuri aents iruntrar pujuinia asarmatai penker antukchamnia a wemiayash tumainti (Nee. 8:​2, 3, 7). Tumaitkiusha warinia kajinmatkichartiniuya nuna awakeasan aujainiakui Israel aentska kajinmatchau armiayi. Tuma asar ni iwiakmarincha antukma nuna turin armiayi tura nekaska umiktin chichaman aujainiakka nu chichamnak awakekiar aujsartin armiayi (Riw. 18:​4-22; Muis. 5:1).

Itiur aantramia. Yuus papiinmanka nampet najanamu nukap irunui. Salmos, El Cantar de los Cantares nuya Lamentaciones papii nui ainis aarma ainiawai. Yuus papiinium nampet najanamu irunna nuinkia atak awakeasrik nampestin najanamu irunui. Nuka nampet warimpia imiankaska aujmatea nuna jintinkratmiayi, tura nu nampetan nampenak kajinmatcha armiayi. Nuna nu nukap nekaatai tusar Salmo 115:​9-11 TNM nui tana nu aujsatai, nui tawai: “Maa, Israela, Jehová yainkiattawai tu enentaimsata. (Amin yainmana nuka nuya ame tantarmeka niyaiti). Maa Aaronka jeen pujarmena nuisha Jehová yainkiattawai tu enentaimsatarum. (Amin yainmana nuka nuya ame tantarmeka niyaiti). Jehová arantatirmeka Jehová yainkiattawai tu enentaimsatarum. (Amin yainmana nuka nuya ame tantarmeka niyaiti)”. Nu nampetan nampenak warintia tinia nampea nuna awakeki nampenak nampestinian neka wearmiayi.

Urukamtai aantramia. Yuusa chichamen aararmiania nuka aents warinia nekaawarat tusar wakeriarmia nunaka awakekiar tu wearmiayi. Numpa yuatniuka urukamtai yajauchit nuna Israel aents nekaawarat tusa Moisés awakeki awakeki timiayi. Ayashi iwiakmarinkia numpaiti, Jehovaka nuna nekaawarat tusa wakerimiayi (Riw. 17:​11, 14). Nuyasha numpa yuashtiniaiti tusar Kristu aentsnasha ataksha tiarmiayi (Hech. 15:​20, 29 TNM).

Yuus papiinmanka warinkisha awakeasan aarma iruneawai tumaitkiusha awakeki awakeki tu pujuarat tusa aarchamuiti. Jesussha junis timiayi: “Yus áujeakmesha ántram atak awaiṉkim nuke áujsaip” (Mat. 6:7). Nuyasha Yuus wakerana nu seattsar waritminiaitiaj nunasha jintinkratamiayi (Mat. 6:​9-13). Jehová aujkur nu chichamak awakekir awakekir seachuitji, tumaitkiusha ii wariniua aujsattsar wakeraj nuka awakekir timiniaitji (Mat. 7:​7-11).

Yuus papiinium awakekir aarma irunna nuka ti penkeraiti. Jehová penker pujuarat tusa warinkisha jintinkrateak awakeki awakeki tiniuiti (Is. 48:​17, 18 TNM).