AKANKAMU 30
NAMPET 36 Ii enentai penker ati tusar iimiastiniaitji
Israel aents uunt anaikiamu armiania nuna wari nekaamniaitiaj?
“Nuiṉkia átum péṉkeran túrin tura yajauchin túrincha núnisaṉ Yúsnan takarin tura Yúsnan takarcha ainia nuja̱i̱ akaneamu atakka paant nekaattarme” (MKS. 3:18).
JU UNUIMIATRATTAJI
Yamaiya juisha Jehová amikri tuke atasar wari itiurkatniuitiaj nu nekaatai tusar Israel aents uunt anaikiamu armiania nuna unuimiatratai.
1, 2. Israel aents uunt anaikiamu armiania nuna Yuus papii warintiawa?
Israel nunkanam uuntri anaikiamu armiania nuna Yuus papiinium aujmateawai tura ni iwiakmarincha warinia turawarmia nunasha aujmateawai. a Nuyasha uunt anaikiamu armiania nusha penker ainiayat yajauchin turawarmia nunasha aujmatui. Davidnia aujmattsatai ninkia penker asamtai Jehová junis timiayi ninkia wi tamancha nekas enentaijiai umirtuk wi iismasha ti penker turamai tu timiayi (1 Ak. 14:8). Tumaitiat nuwa nuatnaikiajai tsanin tepesmiayi tura nu nuwan aishrincha maawarat tusa ni chichamprukmiayi (2 Sa. 11:4, 14, 15).
2 Uunt anaikiamu yajauch ainiayat penkera nuna turawarusha irunmiayi. Rehoboam ainis turamiayi. Yajauch asamtai Jehová junis timiayi ninkia yajauchia nuna turimiayi tu timiayi (2 Crón. 12:14 TNM). Israel aentsjainkia maanikiaip ninki ni uuntrin anaikiarat tusam iniaisata Jehová tutai antukmiayi. Nuyasha irutkamu irunmiania nuna ayamprak tura ni aentsrincha ni nemasrijiaisha manikiarat tusa iwiarnararat tusa yainkiarmiayi (1 Ak. 12:21-24; 2 Crón. 11:5-12 TNM).
3. a) Waritia enentaimminiaitiaj? b) Ju unuimiatmanumsha wari nekaattaj?
3 Israel aents uunt anaikiamu armiania nu yajauchia nuna tura penkera nuna najanawaruitkiuisha Jehovasha ya nekassha penkerait nunasha itiura nekaamniuya tu enentaimminiaitji. Nu paant nekaar Jehová shiir iirsat takurkia wari itiurkatniuitiaj nu nekaattaji. Ju unuimiateamunmanka Jehová Israelnum uunt anaikiamu armiania nuna turamurin iiyak warinia iiniuya nuna nekaattaji: nekas enentaijiai ya aneemia nuya tunaa turamun ene enentaimia ajawash tusa iiniuyayi tura aya winiakeash enentaimturea tusa nunasha iiniuyayi.
NEKAS ENENTAIJIAI JEHOVAN ANEARMIAYI
4. Israel aents uuntri armiania nu warinia najanawaru asar Jehovajai iismasha penker armia?
4 Israel aents uuntri armiania nu nekas enentaijiai ane wearmiania nuna Jehovajai iismaka penker armiayi. b Jehosafatka nekas enentaijiai Jehovan umirkattsa wakerimiayi (2 Crón. 22:9 TNM). Yuus papiiniumka nekas enentaijiai Jehovan umirkattsa wakeraka Josiasa aintsan chikichkia penke atsumiayi tu tawai (2 Ak. 23:25). Tura aintsan Salomonsha uuntach ajasmatai yajauchia nuna najana “Uunt Yusan nekas enentái̱ji̱a̱i̱ enentáimtustinian iniaisámiayi” (1 Ak. 11:4). Nuya Abiyam naartinsha Jehovan nekas enentaijiai umirkachmiayi Yuus papiinium tu tawai (1 Ak. 15:3).
5. Nekas enentaijiai Jehová umireakrikia wari itiurkattaj?
5 Nekas enentaijiai Jehová umireakrikia wari itiurkattaj? Jehová nekas anea asar ni enentaimtustiniaitji nuyasha iik wakerusar ainis turatniuitji. Tura aintsan Jehová tuke aneastai tusar kakaki wetiniaitji.
6. Jehová nekas enentaijiai aneastai tusar wari itiurkatniuitiaj? (Nekatai̱n Jintinkiartin 4:23; Matéu 5:29, 30).
6 Yuusan umirkaru Israel aents uuntri armiania nu Jehovan nekas enentaijiai aneyarmiania aintsan atasar wari itiurkatniuitiaj? Jehová aneastinian warinkish iniaisamnia amajtameajnia nu kishmaktiniaitji, warinkish iiyajnia nuisha aneartiniaitji, kuit ti wakerukchatniuitji nuyasha yajauch aentsjai nawamnaikiashtiniaitji. Tura aintsan warinkish yapajiatin akuinkia warik yapajiatniuitji (Nekatai̱n Jintinkiartin 4:23; Matéu 5:29, 30 aujsata).
7. Urukamtai aneartiniaitiaj?
7 Ii enentain yajauchia nu waniawain tusar anearartai. Yuusna nuna tuke najankunka yajauchia nuka enentairuinkia waniashtatui tu enentaimsashtiniaitji. Watskea tsetsekchikcha ajakui tsetsek ajain tusar waiti apentramniaitji nekasapi. Waiti uraimiuitkiuinkia tsetsek ajamniaiti. Waiti apenminiaitiajnia aintsan ju nunkanam yajauch irunna nu ii enentain waniawain tusar warik kishmaktiniaitji. Aya Yuusnak najankur Jehovai weamkattaji tu enentaimsashtiniaitji (Efes. 2:2 TNM).
TUNAAMKARMIANIA NUNA ENE ENENTAIMIA AJASARMIAYI
8, 9. David tura Ezequiassha chicharkaram urukawarmia? (nakumkamu iista).
8 Nuik aujmattsajnia aintsan Davidkia ti tunaamkamiayi. Tumaitiat Natán tunaa najanaitme timiania nuinkia nankaamantu enentaimtumatsuk Davidkia ene enentaimia ajasmiayi (2 Sa. 12:13). Yus Kanta akankamu 51 nui ene enentaimia ajasu asa nuna aarmiayi. Natanjai natsan juakaij tusa turutskesha jakaij tusa ene enentaimia ajasu ainchamiayi (YKan. 51:3, 4, 17).
9 Ezequiassha tunaan najanamiayi. Nankaamantu enentaimin ajasmiayi, ainis turamtai nin tura Judancha tura Jerusalensha Jehová ti kajerkarmiayi tu tawai Yuusa chichame (2 Crón. 32:25 TNM). Urukamtai nankaamantu enentaimsamia? Jehová kuitrintin amajsauyayi, asirio aentsun nupetkatniuncha yainkiuyayi, ti sunkurmakmiania nuisha Jehová tsuarmiayi, ainis yainma asa nankaamantu enentaimsamiashia. Nankaamantu enentaimiu asa Babilonianmaya aentsun ni takakmarin iniaktusmiayash tumainti. Ainis turamtai Isaías chicharkamiayi (2 Ak. 20:12-18). Davidtia aintsan Ezequiassha nankaamantu enentaimtsuk ni turamiania nuna ene enentaimia ajasmiayi (2 Crón. 32:26 TNM). Jehová Ezequiasan ninkia umirtiniuyayi tu timiayi. Yuus papiikia junis tawai: “Nuyá̱ Uunt Yus iisam Esekíassha ni we̱a̱trí̱ Tawit péṉkeran túramia tímiatrusaṉ umikmiayi” tu tawai (2 Ak. 18:3).
Davidtian tura Ezequiasan chicharkarmiayi. Nankaamantu enentaimcha asar ni tunaarinianka ene enentaimia ajasarmiayi. (Párrafo 8 tura 9 nui iista).
10. Uunt anaikiamu Amasiassha chicharkam urukamia?
10 Antsu Amasiaska penkera nuna najanamiayi tumaitkiusha nekas enentaijiai nunaka turachmiayi (2 Crón. 25:2 TNM). Itiuran awajirmia? Edonnumia aentsun nupetkatniun Jehová yainmiania nui arusan Amasiaska nu nunkanmaya antar yuusan enentaimtustinian juarkimiayi. c Tura Yuusna etserin chicharkattsa jearmiasha kajek antuktinian nakitramiayi (2 Crón. 25:14-16 TNM).
11. 2 Kurintiunam 7:9, 11 tana aintsan Jehová tsankurturat takurkia wari itiurkatniuitiaj? (Nakumkamusha iista).
11 Israel aentsnum uunt anaikiamu armia nunanu wari nekaamniaitiaj? Tunaamkarkia ene enentaimia ajastiniaitji tura atak turawaij tusar kakartiniaitji. Uuntri ainiana nu ti itiurchat najanashmanum chichartamainiakrincha wari itiurkatniuitiaj? Jehová kajertawai tura uuntri ainiana nusha kajertuiniawai tu enentaimsashtiniaitji. Israel aents uunt anaikiamu armiania nusha penker ainiakuisha chicharkarmiayi (Isr. 12:5, 6). Iincha chichartamainiakrincha urukatniuitiaj? Nankaamantu enentaimsashtiniaitji nuya yapajniatniuitji tura nekas enentaijiai Jehová enentaimtustin iniaisashtiniaitji. Tunaa najanarsha ene enentaimia ajasakrinkia Jehová tsankurtamprattaji (2 Kurintiunam 7:9, 11 aujsata).
Chichartamkakrinkia 1) nankaamantu enentaimsashtiniaitji, 2) yapajniatniuitji nuya 3) Jehová nekas enentaijiai enentaimtukir wetiniaitji. (Párrafo 11 nui iista). f
AYA JEHOVANAK ENENTAIMTUSARMIAYI
12. Israel aents uunt anaikiamu armiania nu itiurin armia?
12 Uunt anaikiamu Jehová shiir enentaimtiarmiania nuka aya Jehovanak enentaimtu wearmiayi tura chikitcha aitkiasan turawarat tusar yaya wearmiayi. Urutainsha awajin armiayi tumaitkiusha aya Jehovanak enentaimtiarmiayi tura antar yuus nuna amuktaj tusar kakarar warinkisha turin armiayi. d
13. Jehová Acabnasha urukamtaiya umirtichuiti tu enentaimia?
13 Israel aents uunt anaikiamu Yuusan umirkacharmiania nuna wari nekaamniaitiaj? Yajauch ainiayat penkera nunasha najan wearmiayi. Acabsha yajauchitiat Nabot ni makurmanum maawarmatai itiurchat enentaimsamiayi (1 Ak. 21:27-29). Nuyasha Israel aents matsamsarat tusa irutkamun nukap najanamiayi nuyasha Israel aents penker pujuarat tusa mesetnumsha maanik awakmakmiayi (1 Rey. 20:21, 29 TNM; 22:39). Tumaitkiusha Acabka ni nuari utsuamu asa antar yuusan chikitcha enentaimtusarat tusa utsukratkamiayi, nu tunaa najanamiania nuna ene enentaimia ajaschamiayi (1 Ak. 21:25, 26).
14. a) Rehoboamka umirtichuiti Jehová urukamtai tu enentaimtimia? b) Nukap Israel aents uunt anaikiamu armiania nusha warinia turawarmia?
14 Rehoboam naartinniasha aujmattsatai. Ninkia Yuusan umirchauyayi. Unuimiarajnia aintsan ninkia penkera nuna nukap najanamiayi. Tumaitkiusha uunt naamak pujus paantin ajasmiania nui Jehovan iniais antar yuusan enentaimtustinian juarkimiayi (2 Crón. 12:1 TNM). Nuyainia juarki Jehovan enentaimtayat antar yuusnasha enentaimtu wemiayi (1 Ak. 14:21-24). Rehoboam Acabjai nuya chikich uunt anaikiamu armiania nusha Jehovainia aran ajasar chikich yuusan enentaimtiarmiania nuka nukap armiayi. Uunt anaikiamu armiania nuna penkerashit tusa Jehová nekattsa yana aya winiakeash enentaimturea tusa iirniuyayi.
15. Jehovasha urukamtaiya aya winiak enentaimtursarat tusa wakerimia?
15 Jehovasha urukamtaiya aya winiak enentaimtursarat tusa wakerimia? Uunt anaikiamu armiania nuka ni aentsrin Jehovan enentaimtusarat tusar yainkiartin armiayi. Tura aintsan uunt anaikiamu antar yuusan enentaimtuiniak aentsnasha itiurchat amaj wearmiayi tura tunaancha turin armiayi (Os. 4:1, 2 TNM). Nuyasha uunt anaikiamu armiania nu tura Israel aentska Jehovan enentaimtin armiayi. Tuma asamtai antar yuusan enentaimtuiniakka tsanirmainia ainis armiayi tawai Yuusa chichame (Jrm. 3:8, 9). Yaksha tsanirmakka ni nuarin turutskesha ni aishrinkesha nakak itiurchat amajeawai. Tura aintsan yaksha Jehovan enentaimtin ajasu antar religión najanainiamunam warinmansha pachinkiunka Jehovan nakak itiurchat awajeana aintsaiti (Muis. 4:23, 24). e
16. Jehovasha ya penkerait tura ya yajauchit nunasha itiura nekamniait?
16 Iisha wari unuimiatramniaitiaj? Antar religionkan nakitrar aya Jehovak enentaimtustiniaitji tura ni enentaimtustai tusar warinmansha yaimkiatniuitji. Jehovajai iismaka yait penkersha yait yajauchisha nuna aujmatuk Malaquías junis timiayi: “Nuiṉkia átum péṉkeran túrin tura yajauchin túrincha núnisaṉ Yúsnan takarin tura Yúsnan takarcha ainia nuja̱i̱ akaneamu atakka paant nekaattarme” tu timiayi (Mks. 3:18). Tuma asamtai warinmansha unuka asar majat enentaimiakur Yuusaiyanka aran ajaschatniuitji. Jehovainia aran ajasrikia tunaa najaneajnia aintsaiti.
17. Yajai nuatnaikiattaj nuisha urukamtai penker enentaimsatniuitiaj?
17 Natsaitkiumka nuatnaikiatin enentaimmek? Penker iisam nuatkatin turutskesha nuatnaikiatniun Malaquías timiania nu yainmakminiaiti. Jui enentaimsata, yaksha shiir ajau aminiaiti tumaitkiusha Jehovan enentaimtichuitkiuinkia nu aentsun penker aentsuiti Jehová tu enentaimtawash? (2 Kur. 6:14). Nijiai nuatnaikiam Yuus umirki wetinian yainmakminiashit? Salomonka nuwe chikich nunkanmaya armiania nuka shiir ajau ainiaksha Jehovan enentaimtichu armiayi. Tuma asar utsuiniam Salomonka chikich yuusan enentaimtutan juarkimiayi (1 Ak. 11:1, 4).
18. Apa ni uchirin warinia jintintiawartiniait?
18 Uchirtiniaitrumna nu atumi uchiri Jehovan enentaimtustinian wakerukarat tusarum yaunchunia aents uunt anaikiamu armiania nuna jintintiamniaitrume. Uunt anaikiamu ya yajauchit tura ya penkerait Jehová nuna nekattsa winia enentaimtureawash tusa iirniuyayi, nuna atumi uchirisha paant nekaawartiniaiti. Yuusa chichame aujkurmin iruntainiam weakrumin tura Yuusa chichame etsereakrumin atumi uchirisha aitkiasan turatniun unuimiatrartatui. Nuna ainis turawarat tusarum ikiakartarum (Mat. 6:33). Nu turashkurninkia atumi uchirinkia aya atum testigo de Jehová asakrumin nisha testigo de Jehová ajastin enentaimiarminiaiti. Tura ukunmatainkia Yuusna nuna emka najanatniun iniaisarminiaiti turutskesha Jehovainia aran ajasarminiaiti.
19. Yaksha Jehovainia aran ajasu ataksha Jehová amikri ajasminiashit? ( Amesha Jehovai waketkimniaitme tana nuisha iista).
19 Yaksha Jehovainia aran ajasu ataksha Jehová amikri ajasminiashit? Ee, ene enentaimia ajaska ataksha Jehová amikri ajasminiaiti. Nankaamantu enentaimtumatsuk uuntri ainiana nu yainkiarat tusa anturkartiniaiti (San. 5:14). Jehovai waketkittsar kakakrikia atak ni amikri atatji.
20. Israel aents uunt anaikiamu armiania nu Yuusan umirkarmiania aitkiasrik najankurkia Jehovajai iismasha uruku atataj?
20 Israel aents uunt anaikiamu armiania nuna wari nekaaj? Israel aents uunt anaikiamu nekas enentaijiai Jehovan umirkarmiania aintsan aminiaitji. Awajirisha ene enentaimia ajasar yapajiawartai. Nuyasha aya Jehovak enentaimtustiniaitji. Jehová tuke umireakmeka Jehovajai iismaka penker iisma atatme.
NAMPET 45 Yuusru, amin esetran enentaimtiniaitjiame
a Ju unuimiatmanumka Israel nunkanam uuntri armiania nuna aujmakur Jehová iruntramurin ashi uunt naamkaru armiania nuna taji. Judá aentsnum uuntri ajasarusha irunmiayi tura chikichkia Israel aentsun uuntri ajasarusha irunmiayi tura chikichkia Judá aentsnum tura Israel aentsnumsha uuntri armiayi.
b PAANT NEKAATIN: Yuus papiiniumka enentai tana nuka aents ni nekas urukuit nuna aujmatu tawai. Tuma asamtai ni wakerana nuna, ni enentaimiana nunasha nuya warinkish najanatniun unuimiatrana nuna tura warinkish najaneaksha wari enentaijiaiya najanea nunasha tawai.
c Yaunchukka chikich irutkamunam aents matsatainian maanikiar nupetkarka nu aentsun yuusrin enentaimtin armiayash tumainti.
d Asá ti tunaamkamiayi (2 Crón. 16:7, 10 TNM). Tumaitkuisha Jehovajai iismaka penkera nuna najanamiayi Yuusa chichame tu tawai. Yama nankamtaikkia chichaream antuktinian nakitramiayi tumaitkuisha urum ene enentaimia ajasmiayash tumainti. Awajiruitkuisha ni penker turamiania nuna nekaska Jehová iirsamiayi. Asá naartinkia aya Jehovanak enentaimtimiayi tura antar yuus irunmiania nuna amuktasa warinkisha turamiayi (1 Ak. 15:11-13; 2 Crón. 14:2-5 TNM).
e Moisés akatramu chichamnum yama juarmanum jimiar aarma amiania nuinkia chikich yuus tura warinsha Jehovachu enentaimtuschatniuitji tu aarma amiayi (Jiin. 20:1-6).
f NAKUMKAMUN AUJMATU: Uuntri anaikiamu uchipiat Yuusnumia yachin awartiun ti nukap umarain tusa chichareawai. Ii yachi nankaamantu enentaimcha asa chicharkam antuk yapajniawai. Nuna tura Jehovan enentaimtustinian iniaiyatsui.
