1, 2. Sadocsha yauya? (1 Crónicas 12:​22, 26-28 TNM).

 Watskea jui enentaimsakia 340 mil aents iniankasan Davidtian uunt anaikiamu awajsatai tusar iruntrar pujuarmiayi. Hebrón nuntumas nain amiania nuni aishman tetetet ajainia tura nampenamusha nuya warainiak wishiniamusha manaintiu tsawan ainis tumainiamu antukamiayi (1 Crón. 12:39 TNM). Tumamunam Sadoc naartin nisha nui pujumiayi. Ninkia ti nekamuchuyayi tumaitkiusha Jehová nin ti shiir enentaimtimiayi. Tuma asamtai Jehová Sadockan nekamtikramaitji (1 Crónicas 12:​22, 26-28 TNM aujsata). Sadocsha yauya?

² Sadoc naartinkia sacerdote anaikiamuyayi nuyasha sacerdote uuntrijiai Abiatar naartinjiai metek takakmauyayi. Nuyasha ti enentaimin ati tusa tura Jehová warinia wakerimia nuna nekat tusa Jehová yainkiuyayi (2 Sa. 15:27). Aentska nin jintintruat tusa kaut wearmiayi. Nuyasha ashamtsuk warinkisha turiniuyayi. Ju unuimiateamunam nu nekaattaji.

3. a) Urukamtai sapijmiachu atiniaitiaj? b) Yamaisha wari nekaattaj?

³ Yamaiya jui iwianch Jehovan enentaimtuiniana nuna ti nukap itiurchat amajainiawai (1 Pit. 5:8). Jehová iwianchin tura ashi yajauch irunna nuna amuktatna nu tsawan jeamam sapijmiatsuk kakaram atiniaitji (YKan. 31:24). Sadoc sapijmiachuyania ainis atai tusar wari turatniuitiaj nu nekaatai.

YUUS ANAIKIAMU NUKE YAINTA

4. Yuus anaikiana nu yaintai tusar urukamtaiya sapijmiachu atiniaitiaj? (Nakumkamusha iista).

⁴ Kristu aentstikia Yuusa anaikiamuri yaintai tusar sapijmiachu atiniaitji (Mat. 6:33). Yamaiya jui Jehová tana nu umirkatai tusar tura Yuusa chichame etserkatai tusar sapijmiachu atiniaitji (1 Tis. 2:2). Nuyasha ju nunkanam  aents enentaimiainiana ainis enentaimsaij tusar kakartiniaitji (Juaṉ 18:36). Nukap testigos de Jehová ainiana nu kuitchajai nankaamainiak tura warinmansha waitkiainiam ti itiurchat nankaamasaruiti. Tura politicanmansha turutskesh suntarnumkesha wetinian nakitiainiakui sepunmasha enkeawaram ti waitsaruiti.

5. Sadocsha Davidtian yaintaj tusa urukamtai sapijmiachu atiniuya?

⁵ David uunt anaikiamu ajastin asamtai Sadoc nisha pachinkiataj tusa Hebronnum wemiayi. Ninkia maniktaj tusa iwiarnar wemiayi (1 Crón. 12:38 TNM). Davidtian tura Israel aentsun ayamprak maniktinian enentaimniuyayi. Mesetan maniktinian ti unuimiatrachuyash tumainti tumaitkiusha ninkia sapijmiachuyayi.

6. Sadocsha Davidtian iis warinia unuimiatramia? (Salmo 138:3 TNM).

⁶ Sadocsha urukamtai sapijmiachuya? Davidtian iis tura chikitcha nijiai irutra armiania nuna iis unuimiatrauyash tumainti. Davidkia meset akui sapijmiatsuk emtiniuyayi tuma asamtai ashi Israel aents anaikiatniun wakeriarmiayi (1 Crón. 11:​1, 2 TNM). Davidkia Jehová yainkiattawai ainis tuke enentaimniuyayi tura ni nemasri kajerainiamsha Jehovan seauyayi (YKan. 28:7; Salmo 138:3 TNM aujsata). Jehoiadá nuna uchiri Benayasha nuya uuntri anairamu Davidtian yaintatji tiarmiania nusha sapijmiachu armiayi (1 Crón. 11:​22-25 TNM; 12:​26-28 TNM). Ninkia Davidniaka ikiuktinian penkesha enentaimcharmiayi. Nuna iis Sadocsha unuimiatramiayi.

7. a) Sapijmiachu atai tusar yana unuimiatramniaitiaj? b) Videonam ii yachi Nsilu naartin aujmateana nuna wari nekaamam?

⁷ Jehovan umirkattsar sapijmiatsuk warinkish turawaruana aitkiasrik iisha turattsar wakeraji. Jesuska politicanam pachinkiatniun nakitramiayi (Mat. 4:​8-11;  Juaṉ 6:​14, 15). Sapijmiachu atasa Jehová yainkiattawai tuke ainis enentaimniuyayi. Yamaiya juisha nukap natsamaru ainiana nu politicanam pachinkiatniun turutskesha suntarnumkesha wetinian nakitraruiti. Nuna nekaataj tusam jw.org nui iista. a

II YACHI II UMAI YAINKIARTA

8. Wari nankaamakuiya uuntri anairamu ainiana nu sapijmiachu artiniait?

⁸ Jehová enentaimtin ainiana nuka mai yainiai ajatniun wakerin ainiawai (2 Kur. 8:4). Tumaitkiusha ainis turataj tuiniakka sapijmiachu artiniaiti. Ii yachi ii umai meset amunam pujuiniaka warinkisha utsumin ainiawai. Yaksha ikiakatrarat tusar wakerin ainiawai. Yuus papii tura papii Yuusna aujmatainiamuncha utsumin ainiawai. Uuntri anaikiamu ainiana nuka ni yachin ni umain anen ainiawai tuma asamtai itiurchat nankaamasmin ainiayat ni utsumainiamun su ainiawai (Juaṉ 15:​12, 13). Ainis turuiniak Sadoc sapijmiachuyania aitkiasan turuiniawai.

9. 2 Samuir 15:​27-29 nuisha David Sadoc naartinian wari itiurkatta timia? (Nakumkamusha iista).

⁹ David mantamnatin ajas pujumiayi. Ni uchiri Absalón uunt anaikiamu ajas ekemsattsa wakerimiayi (2 Sa. 15:​12, 13). Tuma asamtai Davidkia Jerusalennumia warik pisar wetiniuyayi. David ni takarniuri armiania nuna junis tiarmiayi “Wajakiarar mash pisarártai Apsarúnai̱ya̱ṉka úmkacharminiaitji” tu timiayi (2 Sa. 15:14). Jerusalennumia jinkiarmiania nui Absalón warinia turatta nuna nekaattsa yaksha juaktiniaiti David tu timiayi. Tuma asamtai Sadoc naartinian tura sacerdote armiania nunasha awakeararmiayi (2 Samuir 15:​27-29 aujsata). David  turatarum tusa awakeararmiania nuka mantamnawaij tusar ti anearartiniuyayi. Absalonka aya niniunak enentaimin ti kajen tura anankartiniuyayi. Davidtian maawain tusar nekamainiak pujuarmiania nuna Absalón nekaanka maawarminiuyayi.

10. Sadoc tura chikich aentscha Davidtian itiura uwemtikrarmia?

¹⁰ Davidkia Sadoc tura Husaincha ni enentaimmiania nuna turawarat tusa akupkarmiayi (2 Sa. 15:​32-37). David timiania aitkiasan Husái Absalonkan nawamkamiayi. David maniktinian iwiarnarat tu enentaimias Absalonkan anankeak ame apa achiktasam jutikiamniaitme timiayi. Tura arum Husái ni timiania nuna Abiataran tura Sadocnasha ujakarmiayi (2 Sa. 17:​8-16). Tura nisha iiksan Davidtian ujakarmiayi (2 Sa. 17:17). Jehová yayam Sadoc tura chikich sacerdote armiania nusha Davidtian aini turawar uwemtikrarmiayi (2 Sa. 17:​21, 22).

11. Itiurchat amunam ii yachin ii umain yainkiarat tusar anaitiamkakrin Sadoc ainis atai tusar itiurkamniaitiaj?

¹¹ Itiurchat amunam ii yachin ii umain yainkiarat tusar anaitiamkakrin Sadoc ainis atai tusar itiurkamniaitiaj? Jehová iruntramuri tana nu timiatrusrik najanatniuitji. Ainis itiurchat akuinkia iruntrar pujustai tusar umiktiniaitji. Tuma asamtai Betelnumia turamainiajnia nu najanatniuitji (Isr. 13:17). Uuntri anaikiamu ainiana nuka itiurchat nankaamatsain wari turamniaitiaj tura itiurchat nankaamasmataisha itiurkamniaitiaj nuna emka aujmatkartiniaiti (1 Kur. 14:33; 14:40 TNM). Nuyasha sapijmiatsuk warinkisha turakrisha anearar turatniuitji (Neka. 22:3). Esetrar enentaimsar turin atiniaitji tura antrar nankamsar itiurchatnum enkemkashtiniaitji. Tura aintsan Jehová yainmaktatji tu enentaimsartai. Ninkia chikichkimias enentaimturmaji tuma asa  itiurchat nankaamasarain tusa nakitniuiti. Tura ii yachi ii umai yayainiakrisha anearar turatniun yainmaktatji.

12, 13. Víktor Vitalijiai turawarmiania nuna wari nekaamniaitiaj? (Nakumkamusha iista).

¹² Ucrania nunkanam ii yachin ii umain entsan nuya yurumkancha ejetiarat tusar jimiara ii yachin anaikiarmiayi. Víktor nuya Vitali naartin armiayi. Ii yachi Víktor junis tawai: Yurumak tuin suruinia tusar eakni wekaimiaji. Ii wekaimiajnia nuni tijiuch ipiateamu antuna wemiayi. Ii yachi yurumkan takaku asa ii yachi ii umai yurumawartinian amasmiaji. Tuma asamtai ii yachi ii umaisha ni yurumatniun nukape tsawan takuarmiayi. Ii camionkrin yurumak enkeakur pujarin misil nuni tijiuch iniamiayi tumaitkiusha patichmiayi ainis nankaamasu asan winia yatsurun winia umarun sapijmiakun yaintinian iniaisaij tusan Jehovan nu tsawantin ti aujsamiajai tu tawai

¹³ Ii yachi Vitali junis tawai: Ashamtsuk ti kakartiniuyaji. Yatsurun umarun ni utsumainiamun ejetiartasan emka wemiajna nuinkia 12 horas carron ewekamsamiajai. Jehovan ti seamiajai tu tawai. Ii yachi Vitali naartinkia warinsha turaksha anear turiniuyayi. Ninkia junis tawai: Wi enentaimmian najantsuk penker enentaimsan turatniun yainkiat tusan Jehovan nukape seamiajai. Jintia wesan uunt anaikiarma carrojai wekakrumka nuni wetarum timianum aya nunin wu wemiajai. Ii yachi ii umai pujuiniamunam jean penker iruntrar takakmainian wainiainiakun ti kakarmiajai. Jintia warinkish irununka ankan amajsarmiayi, yurumak irurar camionnum enke wearmiayi, winiasha tura Viktornasha apatkun tura kanartinniasha ama wearmiaji tu tawai.

JEHOVÁ TUKE UMIRKATA

14. Yaksha Jehovainia kanakmiatainkia itiur nekaptain?

¹⁴ Ii shuar tura ii amikrisha Jehovainia aran ajasarmatai waittainti (YKan. 78:40; Prov. 24:10 TNM). Tura nu aentsjai shiir nawamnainiaitkiurkia nekaska ti waitsattaji. Amesha ainis nankaamasuitkiumka Sadoc urukuya nuna unuimiatrata.

15. Sadocsha Jehovan umirkattsa urukamtai kakartiniuya? (1 Akupin 1:​5-10).

¹⁵ David penke uuntchich ajasmiania nui ni uchiri Adonías uunt anaikiamu ataj tusa wakerimiayi, tumaitkiusha Jehovaka David jakamtainkia Salomón uunt anaikiamu atatui tu timiayi (1 Crón. 22:​9, 10 TNM). Sadoc naartinkia Jehovan tuke umirkamiayi. Tumaitkiusha ni amikri Abiatar Adoniasan yainmiayi (1 Akupin 1:​5-10 aujsata). Abiatar ainis turakui Jehovan umirkachmiayi. Sadoc ti kuntuts enentaimsachmiashia. Ninkia Abiatarjai sacerdote asar 40 uwi nankaamas maimtaik takakmasaruyayi (2 Sa. 8:17). Sadocka Abiatarjainkia chicham aarma enketain ju armiayi (2 Sa. 15:29). Maimtaik Davidtian yainkiaruyayi tura Jehovanusha warinmansha maimtaik yaimkiaruyayi (2 Sa. 19:​11-14).

16. Sadocsha yaya ainis atasa wakerimia?

¹⁶ Abiatar Jehovan umirkachmataisha Sadocka Jehovan tuke umirkamiayi. Davidkia Sadocka penkesha ikiurkishtatui tu enentaimtimiayi. Adonías turattsa wakerimiania nuna ujakam Davidkia Salomón uunt anaikiamu ajasat tusarum anaikiatarum tusa Sadockan, Natankan nuya Benayan akupkarmiayi (1 Ak. 1:​32-34). Natán tura chikitcha Jehovan umirin asar Davidtian ikiukcharmiania aintsan ataj tusa Sadoc wakerimiayi (1 Ak. 1: 38, 39). Salomón uunt anaikiamu ajasmiania nui Abiatar takakmamiania nui takakmasat tusa Sadockan apujsamiayi (1 Rey. 2:35 TNM).

17. Amee shuar ame amikrumkesha Jehovainia aran ajasmatainkia Sadoc aintsan ataj tusam wari itiurkatniuitiam?

¹⁷ Amesha Sadoc aintsan atasam wari itiurkatniuitiam? Amee shuar ame amikrumkesha Jehovainianka aran ajasmatai Jehová tuke umirkata (Jus. 24:15). Jehovaka kakartinian yainmaktatui. Ni tuke sea weta. Ii yachi ii umaijiaisha tuke iruntram pujusta. Ni umirkattsam kakamna nui Jehová shiir enentaimturma asa uruma nuisha akirmaktatui (2 Sa. 22:26).

18. Ii yachi ni nuarijiai nankaamasmiania nuna wari nekaamniaitiaj?

¹⁸ Ii yachi Marco ni nuwe Sidsejai nankaamasmari nekaawartai. Jimiara nawantri uunt ajasar Jehovan enentaimtamun iniaisarmiayi. Ii yachi junis aujmateawai: Ii uchirinkia akinsamtain ti anetainti. Itiurchat nankaamasarain tusar warinkisha turutainti. Tuma asamtai Jehovan enentaimtustinian iniaiyainiakuinkia jakamnia enentaimtainti. Jehová iniaitiamsachuitji. Wi majat nekapeakui nuar yaintiawai tura nuar majat nekapeakui wi ikiakajai. Jehová ainis turatniun yainmaji tu tawai. Ii umai Sidse nisha junis tawai: Jehová kakarman amakrin kakaji. Wi penker jintintiachu asarmatai nawantruka Jehovan enentaimtustinian iniaisaruiti tu enentaimiakun itiurchat nekapmiajai. Tumakun Jehovan aujsamiajai. Chikich tsawantin kaer nukape tsawan wainchamiajna nu taruti ewejen yakairui awan naka iiras junis turutmiayi: Sidse nawantrun penker jintintiachu asamtai Jehová enentaimtustinian iniaisaruiti tuka enentaimsaip turutmiayi. Jehová yaintiakui nin warasan enentaimtajai.

19. Uruku atin wakeram?

¹⁹ Jehovaka nin enentaimtuiniana nuka Sadoc aintsan sapijmiachu kakaram arat tusa wakerawai (2 Ti. 1:7). Tumaitkiusha aya ii kakarmarijiai warinkish turamnia enentaimsashtiniaitji antsu Jehová ni yaintiakui nekaska warinkisha turamniaitjai Jehová ainis enentaimsarat tusa wakerawai. Tuma asamtai warinkisha itiurchat wainkiam sapijmiachu ataj tusam Jehová seata. Sadoc aintsan sapijmiachu kakaram atinian ni yainmaktatui (1 Pit. 5:10).