1, 2. a) Jesús ni unuiniamuri ainian wari tiarmia? b) Jesusa unuiniamurisha urukamtai tunaamkarmia? (Nakumkamusha iista).

 “Enentáiminkia ti wakeriniaitrume túrasha aya̱shim pimpiruiti” Jesús tu timiayi (Mat. 26:41). a Tunaartiniaitiajnia nuna neka asa Jesús tu timiayi. Tura aintsan wikia penke tunaamkashminiaitjiai tu enentaimsarain tusa ainis timiayi. Ni unuiniamurinkia aminkia penke iniaitiamsashtatji tu tiarmiayi (Mat. 26:35). Jesusa unuiniamurinkia penkera nu najanattsar wakerin armiayi tumaitkiusha itiurchatan wainiainiaksha Yuus tuke umirkattaji tu enentaimiarmiayi. Tuma asamtai Jesús junis timiayi: “Yajauch túramu nupettamka̱i̱j tusarum iwiáa pujusrum Yus seatarum” tu timiayi (Mat. 26:41).

² Jesusan maattsar achikiarmiania nui Jesusa unuiniamurisha wari itiurkarmia? Jesús timiania nuna umikcharmiayi, tuma asar tunaamkarmiayi. Aya neachma itiurchatnum inkiunkar Jesusan ikiukiarmiayi (Mat. 26:56).

3. a) Urukamtai tuke aneartiniaitiaj? b) Ju unuimiatmanumsha wari nekaattaj?

³ Iikia Jehová tuke umirkattsar wakeraji. Tumaitkiusha tunaarintin asar urutainsha tunaa najanamnia enentaimminiaitji.  Tuma asamtai tuke aneartiniaitji (Rum. 5:12; 7:​21-23). Aya neachma tunaa katsuntrachmin wainkiar nui iniaraij tusar Jesús timiania nu iisha umiktiniaitji. Ju unuimiatmanumka nu nekaattaji. Emkaka warinma aneartiniaitiaj nu nekaattaji. Nuya tunaanum iniaraij tusar wari itiurkatniuitiaj nusha nekaattaji. Tura aintsan tuke anearar pujustai tusar wari itiurkatniuitiaj nusha nekaattaji.

WARINMA ANEARTINIAITIAJ?

4, 5. Urutainsha awajiajnia nuka ti tunaachu ainiakuisha urukamtai aneartiniaitiaj?

⁴ Urutainsha awajiajnia nuka ti tunaachu ainiakuisha Yuusaiyanka aran ajastinian juarkimniaitji. Nuyasha neachma ti tunaamkamniaitji.

⁵ Ashi aentsti tunaa najanamnia enentaimminiaitji. Tura chikichkimsar warinma kakartiniaitiaj nu nekaji. Kristu aentska tsanirmawaij tusar turutskesha misu tsanirmamun iisaij tusar kakain ainiawai. Turutskesha chikichkia ni ayashin yajauchi enentaijiai takamasaij tusar kakain ainiawai. Tura aintsan chikichkia nankaamantu enentaimin tura ti kajen aij tusar kakain ainiawai. Turutskesha aentsun ashamtsuk Jehová tuke umirkatai tusar kakain ainiawai. Tuma asamtai Santiago junis timiayi: “Antsu ni wakeramuri̱ji̱a̱i̱ṉ aents tunaan niṉki ikiatmamkaiti yajauch túratniun. Núja̱i̱ṉkia tunaanum útsukmaiti” tu timiayi (San. 1:14).

6. Wari nekaamatniuitiaj?

⁶ Ameja warinma awajiniaitiam nui enentaimsakaitiam? Yuus umirkattsam warinma kakartiniaitiam nu nekayatmek kakarchatniuitjiai tura aintsan wikia tunaamkashtatjai tu enentaimsashtiniaitme (1 Juaṉ 1:8). Yuusan penker umirainiana nusha tunaanum iniaraij tusar anearartiniaiti Pablo tu timiayi (Kar. 6:1). Tuma asamtai warinma awajiniaitiaj nu nekaamatniuitji (2 Kur. 13:5).

7. Urukamtai aneartiniaitiaj nu apatkam aujmattsata.

⁷ Warinma awajiniaitiaj nu nekaamar wari itiurkatniuitiaj? Nu nukap kakartiniaitji. Yaunchukka aents ni irutkamurin penkrar tentakar puju armiayi. Tumaitkiusha ni nemasri waitinmani yupichuch waniawarminiuyayi. Ainis asamtai waitin imiankaska penker wainin armiayi.  Iisha aintsan warinma awajiniaitiaj nu nekaamar nui imiankaska aneartiniaitji (1 Kur. 9:27).

TUNAAMKAIJ TUSAR ITIURKATNIUITIAJ

8, 9. Nekatai̱n Jintinkiartin akankamu 7 nui aishman natsan aujmateana nusha tunaamkaij tusa warinia itiurkatniuya? (Nekatai̱n Jintinkiartin 7:​7-9, 13, 14, 21).

⁸ Tunaanum iniaraij tusar wari itiurkatniuitiaj? Nekatai̱n Jintinkiartin akankamu 7 nui wari nekaamniaitiaj nu iistai. Nui tsanirmamu nuwajai natsa tunaamkamiania nuna aujmateawai. Nekatai̱n Jintinkiartin 7:22 nui nu natsaka warikmas nuwa ukurin patas wemiayi tawai. Tumaitkiusha nu natsaka tunaanum aya neachma iniarchamiayi antsu tunaanum enkemtsuk emka warinia turamia nu nekaatai.

⁹ Nu natsasha emka wari itiurkamia? Yuus papii tawai: “Tura nu áishmaṉsha tsukin jeá nu nuwa̱ pujamunmaani̱ wemai” tu tawai (Nekatai̱n Jintinkiartin 7:​7-9 aujsata). Nu nuwan wainiak peperet ayantar yajani wechamiayi. Nuna turutsuk nu nuwa mejentsat tusa iniaisamiayi. Tura nu nuwa Yuusan shiir enentaimtajai tusa ni turauyania nuna takui anturu ajamiayi. Nu nuwaka Yuusan enentaimtiniaitjiai tusa ainis aujmattsamiayash tumainti (Nekatai̱n Jintinkiartin 7:​13, 14, 21 aujsata). Nu natsa arantia wainiak aran ajasuitkiunka tunaanum iniachayi.

10. Nekatai̱n Jintinkiartin papiinium natsanun aujmateana nuna wari nekaamniaitiaj?

¹⁰ Yaunchuk aishman natsamaru urukamiania ainis iisha ainkiatin jeaji. Urutainsha tunaa najanar aya neachma tunaamkamjai tu enentaimminiaitji. Urukamtai nunasha najanamaj tu enentaimsatin jeaji. Tumaitkiusha amamkesar esetrar enentaimiakrikia itiura nu tunaasha najanamaj nu nekaamatin jeaji. Yajainsha nawamnaikiashtinjiai nawamnaikia asar turutskesha yajauchia nu iistin wakeruku asar turutskesha tuinsha yajauch najantainiam wu asar nuyanchuka internetnumani yajauch irunmanum enkema asar ainis nankaamasminiaitji. Nuyasha Jehová seatin, Yuusa chichame aujsatin, iruntainmasha wetin tura Yuusa chichame etserkatin iniaisa asar nu tunaanum iniamniaitji. Tukeka aya neachma tunaanum enkemchatainti aishman natsa ainis nankaamasmiayi.

11. Tunaa najanawaij takurkia wari itiurkatniuitiaj?

¹¹ Wari nekaaj? Ayatek tunaa kishmakchatniuitji antsu tunaanum ajunmarminiaitiajnia nusha kishmaktiniaitji. Salomón natsa tunaanumia iniarmiania nuna aujmatas amik nuna jintinkratamiayi. Nu nuwanun aujmatuk ni jintini weme menkakaip Salomón tu timiayi (Neka. 7:25). Nuyasha junasha timiayi: “Chíkich nuwa̱ je̱e̱ní̱ peṉké wekasaip antsu nuni̱ṉkia wétsuk yajá menaṉtia” tu timiayi (Neka. 5:​3, 8). Warinkish najanma yajauchichuitkiuisha tunaanum ujunkratamniaitkiuinkia nuka nakitratniuitji b (Mat. 5:​29, 30 TNM).

12. Jobsha tsanirmawaij tusa waritmia? (Job 31:1 TNM).

¹² Warinkish tunaanum ajunmarminiaitiajnia  nu kishmaktai takurkia Job turamiania aitkiasrik najanatniuitji. Ninkia chikich nuwan yajauch enentaijiai iisaij tusa junis timiayi: “Winia jirujai chichaman najanaitjiai” tu timiayi (Job 31:1 TNM aujsata). Jobka nu chichaman umiak tunaanum iniarchatniuyayi. Iisha aintsan warinkish tunaanum ajunmarminiaitiajnia nu penke nakitratniuitji.

13. Enentaimiajnia nuisha urukamtai aneartiniaitiaj? (Nakumkamusha iista).

¹³ Nuyasha enentaimiajnia nuisha aneartiniaitji (Jiin. 20:17). Chikichkia yajauchia nu enentaimiamuka yajauchia nu najanchakrikia warinchuiti tu enentaimniush irunniuiti. Tumaitkiusha aintsachuiti. Yajauchia nu najanatin enentaimiakrikia enentaimiajnia nu najanatin ti wakerittiaji. Iik wakerusar iik itiurchat amajmamminiaitji. Aya neachma yajauch enentaimiakrisha wari itiurkatniuitiaj? Ainis enentaimiakrikia warik kishmaktiniaitji tura penkera nui enentaimsatniuitji. Nu turakur yajauchia nu wakerukchattaji tura tunaanum iniarchattaji (Jir. 4:8; Kurs. 3:2; San. 1:​13-15).

14. Tunaanum iniaraij tusar nuyash wari itiurkatniuitiaj?

¹⁴ Tunaanum iniaraij tusar nuyash wari itiurkatniuitiaj? Jehová turameajnia nu umiakrikia tuke penker pujuttaji tu enentaimsatniuitji. Jehová umirkatai tusar ii enentaimiajnia nu, ii wakerajnia nusha penker arat tusar tuke kakartiniaitji. Nu turakur shiir enentaimsattaji.

15. Penkera nu wakeriniaitkiurkia urukattaj?

¹⁵ Yajauchia nu nakitrar penkera nu wakeruktiniaitji (Amus 5:15). Nu turakrikia tuke penkera nu najanattsar wakerittiaji. Tura tunaamkaij tusar warinkisha najanashtatji. Nuyasha aya neachma tunaa najanamnia wainkiarkia warik nakitrattaji.

16. Yuusna nu, nu nukap yaimiakrikia urukattaj? (Nakumkamusha iista).

 ¹⁶ Penkera nu wakeruktinian wari yainmakminiaitiaj? Warinmansha Yuusna nu, nu nukap yaimkiatniuitji. Iruntramunam tura Yuusa chichame etserkattsar weakur Jehová umirkattsar nu nukap kakartatji. Nu turakur tunaa turamnia enentaimsashtatji (Mat. 28:​19, 20; Isr. 10:​24, 25). Aintsan Yuusa chichame aujkur nui amamkesar enentaimiakrikia yajauchia nu nakitrar penkera nu wakeruktatji (Jus. 1:8; YKan. 1:​2, 3; 119:​97, 101). Jesussha junis timiayi: “Yajauch túramu nupettamka̱i̱j tusarum iwiáa pujusrum Yus seatarum” tu timiayi (Mat. 26:41). Yuus tuke aujsatniuitji, nu turakrikia ninkia yainmaktatji tura aintsan iisha Jehová waramtiksattsar ti wakerittiaji (San. 4:8).

TUKE ANEARARTAI

17. Pedro warinma yapajniattsa kakartiniuya?

¹⁷ Warinkish awajiajnia nui yapajniatin yupichuch aminiaiti tumaitkiusha warinmansha yapajniatin itiurchatcha aminiaiti. Pedrosha ainis nankaamasmiayi. Ninkia aentsun ashamniuyayi. Aentsun ashamak Jesusnaka nekatsjai timiayi (Mat. 26:​69-75). Antsu chikich tsawantinkia judío aentsu uuntri pujuiniamunam ashamtsuk Yuusa chichamen etserkamiayi (Tur. 5:​27-29). Tura nukap uwi nankaamasu ai Kristu aents judío armiania nuna ashamak chikich Kristu aentsjai judío acharmiania nujai yurumatniun iniaisamiayi (Kar. 2:​11, 12). Ainis asamtai Pedro warinma yapajniatniuya nuna nekaamamiayi. Nuna yapajiattsa tuke kakaki wetiniuyash tumainti.

18. Yajauch turutai iniaisamu nunaka tuke iniaisaitjiai urukamtai ainis enentaimsashtiniaitiaj?

¹⁸ Iisha aintsan warinmansha yapajniaki wetin aminiaiti. Ii yachi junis aujmateawai: Yaunchukka misu tsanirmamun iiniuyajai tumaitkiusha 10 uwi nuna iitsuk puja asan yaunchuk iniaisamjai tuma asan atakka penkesha iischatniuitjiai tu enentaimsamjai. Tumaitkiusha aya neachma misu tsanirmamun iistinian  wakerukmiajai tu tawai. Ii yachinkia kakaki wemiayi. Ninkia amukatin jeamam kakaran katsunki wetiniaitjiai tu enentaimmiayi. Ni nuari tura uuntri anairamu ainiana nusha misu tsanirmamu iisain tusar wari itiurkamniait nuna nijiai aujmattsaruiti.

19. Yajauch wakeramu nupetkattsar kakakrikia tunaanum iniaraij tusar wari itiurkatniuitiaj?

¹⁹ Yajauch wakeramu nupetkattsar kakakrikia tunaanum iniaraij tusar wari itiurkatniuitiaj? Jesuska iwiaa pujustarum timiayi. Iisha nu turatniuitji. Jehovan penker umirki weakmesha tunaanum ajunmarminiana nusha kishmakta (1 Kur. 10:12). Tunaanum iniaraij tusam najanatniuitmena nu najankim weta. Proverbios 28:14 TNM junis tawai: “Tuke anermak pujana nu aentska warawiti” tu tawai (2 Ped. 3:14 TNM).

ANEARAR PUJAKRIKIA URUKATTAJ

20, 21. a) Tunaanum iniaraij tusar anermak pujakrikia urukattaj? b) Kakakrinkia Jehovasha iincha itiurtamkattaj? (2 Kurintiunam 4:7).

²⁰ Tunaanum iniaraij tusar anermak pujakrikia urukattaj? Jehová tana nu umireakrikia tuke shiir enentaimsattaji antsu tunaa najankurkia ishichik tsawan waratainti (Isr. 11:25; YKan. 19:8). Jehovaka winia enentaimturainiak shiir enentaimsarat tusa najatmaitji (Naṉ. 1:27). Nu turakrikia itiurchat enentaimsashtatji tura uruma nuisha tuke iwiaku pujuttaji (1 Ti. 6:12; 2 Tim. 1:3 TNM; Jud. 20, 21 TNM).

²¹ Tunaarintin asar Yuus umirkatniuka yupichuchichuiti. Tumaitkiusha Yuus umirkatin jeaji. Winia umirtukarat tusa Jehovaka tuke yainkratniuiti (2 Kurintiunam 4:7 aujsata). Jehovaka warinkish katsuntrarat tusa ni kakarmarijiai yainmaktatji. Tura iisha aintsan tunaanum iniaraij tusar kakartiniaitji. Nu turakrinkia Jehová seam ni kakarmarin amastatji (1 Kur. 10:13). Jehová yainmakrin tunaanum iniaraij tusar anearar wekasattaji.