Nicolas tura ni nuwe Celinejai chikich congregacionnum wearat tusar Betelnumia chichaman akuptukarmiayi. Ainis tuiniam urukawarmia nuna aujmatainiak junis tiarmiayi: Yama nankamtaikkia ti waramiaji tumaitiatar ii amikri ikiukin asar kuntuts enentaimmiaji. Yama jear pujumiajnia nui ii yachi ii umaijaisha shiir amajnaimiaji tumaitkiusha ii nekas amikri ainis enentaimtichmiaji tu tuiniawai. a Amesha ainis nankaamakmesha wara warat enentaimtiasam itiurkamniaitiam? Chikich congregacionnumia tarmatai iisha itiur yainkiarminiaitiaj? Chikich aentscha wari turakmea ikiakarminiaitiam tura chikich aentscha itiur ikiakatmararminiait?

UNUIMIATKATTSAM ITIURKATNIUITIAM

1. Jehová yainkiattawai tu enentaimsata (YKan. 37:5). Ii umai Japonnumia Kazumi naartin 20 uwi ni congregacionrin pujumiayi tumaitkiusha ni aishrin aran takakmau tusa akupkarmatai nisha metek wemiayi. Ni iwiakmarin Jehová iisti tusa itiurkamia? Ninkia junis tawai: Nuinki nuinki enentaimmian tura sapijmiakmiajna nuna mash Jehovan ujakmiajai tura wiki pujajna ainis enentaimmiancha ujakmiajai. Ninkia tuke ikiakatramiayi tu tawai.

Jehová yainkiattawai tu enentaimsatniuncha wari yainmaktata? Arakka entsajai tura nunka warinkish irunna nujai tsakawiti aitkiasan Jehová yainmaktatji tu enentaimiamuka aintsaiti. Juarmanum Nicolasna aujmattsajnia nuka Abrahán, Jesús tura Pablosha turawarmiania nui enentaimsamiayi. Ninkia Yuus wakeramun umiktai tusar warinkisha ikiukiarmiayi. Ii yachi nui enentaimias  winiasha aitkiasan Jehová nekas yainkiattawai tu enentaimsamiayi. Yuusa chichame tuke unuimiatniuitkiumka ainis warinmansha ame iwiakmarmin warinkish yapajniakuisha katsuntrattame nuyasha aran wetatmena nuisha ame unuimiaruitmena nujai ii yachi ii umai ikiakararminiaitme.

2. Ii yachi ii umai apatkam iischatniuitme (Ecl. 7:10 TNM). Jules Beninnumia shiak Estados Unidosnum wemiania nuinkia nunia aentsu pujutairinkia chikich armiayi tawai. Ninkia junis tawai yanaksha nekaanka winia pujutairun mashiniun ujakchatniuashitiaj tu enentaimniuyajai tu tawai. Ninkia ainis turichu asa majat enentaimmiayi tumak yajainsha chichastinian nakitmiayi. Tumaitkiusha nu nunkanmayan ii yachi ii umain nekaki weak tu enentaimmianka yapajiamiayi. Ninkia tawai ashi aentsti metekraketajnia nuna nekaamiajai, aents turuiniamuri arantukartiniaitji tu tawai. Ii yachi tana aintsan yaunchuk ii pujumiajnia nui nu congregacionnumia uruku armia nui enentaimsar yamai pujajnia nuisha uruku ainia nujai apatkar enentaimsashtiniaitji. Anne-Lise naartin precursora junis timiayi: Ikiukmiajna nunak wainkiattsan shiakchaitjiai antsu wi nekashman nekaattsan tawitjiai tu timiayi.

Uuntri ainiana nusha yaunchuk pujuarmiania nui congregacionnum uruku armia nuna tura yamai pujuiniana nui congregacionnum uruku ainia nuna apatak enentaimsachartiniaiti. Warinkisha metektaku najanchasha arminiaiti tumaitkiusha nuka yajauchichuiti. Warinkish tutsuk nu congregacionnum itiur najanin ainia nu nekaatniuitji (Ecl. 3:​1, 7b TNM). Juni najanatniuitji tutsuk ii najanmajai chikitcha jintintiawarminiaitji (2 Kur. 1:24).

3. Warinmansha pachinkiata (Jir. 1:27). Aran shiakar wetin yupichuchichuiti, yama jeakmek iruntainiam wetiniaitme. Ii yachi ii umai waitmainiachkunka itiurkan yainmakarat? Lucinda ni jimiara nawantrijiai Sudafricanam yama jeawar itiurkarmia nuna aujmatuk junis tawai: Winia congregacionrui warinkish najanarmiania nui mash pachinkiattsan kakarmiajai Yuusnumia kaerjaisha mashiniujai Yuusa chichamen etserkattsan jinkittsan kakarmiajai tura iruntainmasha ewejrun takuin aujmat wemiajai nuyasha ii jeen iruntrar Yuusa chichamen etserkattsar jinkiarat tusar tsankatkarmiaji.

Yamaram congregacionnnum pujakum Yuusnumia yatsumjai tura Yuusnumia umaimjai Yuusna nu najanattsam kakakmeka shiir enentaimsattame tura chikitcha shiir enentaimsartatui. Anne-Lise naartinian uuntri armiania nu mashiniu Yuusnumia kaimjiai etserkata tu tiarmiayi. Ninkia junis tawai: Ainis najanu asan warik unuimiatkamiajai tu tawai. Japimkiatniunam tura iruntai jea iwiaratniunam yaimiakminkia ame congregacionrumin shiir warasam pujamna nuna chikitcha nekaawartatui. Warinmansha pachin ajakmeka yamaram congregacionrumin pujakum shiir nekaptiatme.

4. Chikitcha amikrum ajasarat tusam kakarta (2 Cor. 6:​11-13 TNM). Ii yachi ii umai warinmansha yayakrikia warik ni amikri ajastatji. Tuma asamtai Yuusnumia yatsum tura Yuusnumia umaimsha penker nekaattsam iruntramu juartsain  tura iruntramu amukamtaisha nijiai aujmattsarta. Ni naari nekaramka kajinmatkip. Shiir ajakminkia tura ni naari kajinmatchakminkia ame amikrum ajastasar wakeriartatui.

Tuke neasam shiir ajawa nuke ajaip. Antsu nekas ame urukuitmena aitkiasmek ata. Lucinda turamiania ainis turata, ni junis tawai: Ii umai ii kai ii jeen ipia wearmiaji, nu tura asar yamaikia ii amikri ti nukap takakeaji tu tawai.

CHIKICH AENTSJAI SHIIR AWAJNAISARTAI

Nukap ii yachi ii umai yanaksha nekainiashmanum iruntainiam waniatniun natsamin ainiawai. Tuma asamtai yaksha ame congregacionrumin tamatai yaintaj tusam itiurkamniaitiam? Apóstol Pablo junis timiayi: “Tuma asamtai chíkich shuarja̱i̱sha shiir awajnáisatarum. Kristu núnisaṉ Yusan shiir awajsat tusa iincha shiir awajtámsamiaji” tu timiayi (Rum. 15:7). Uuntri ainiana nusha Jesús turamiania aitkiasan turuiniak yama tarun shiir enentaimtiksattsar yainkiarminiaiti ( Chikich congregacionnum wetatkurkia wari itiurkatniuitiaj tana nui iista). Yama taruana nu shiir enentaimsarat tusar uchisha tura uuntcha warinkish turawarminiaiti.

Yama taruana nu shiir enentaimtiksattsar ii jeen ipiamniaitji tura warinmansha yainminiaitji. Ii umai ni Yuusnumia kai arantia taun ni pujumia nui nekaamtikiattsa jukimiayi, tuinsha wetaj tusa wari trenna tura wari busna achikminiuya nuna jintintiamiayi. Ii umai yama tamiania nuka ainis turam shiir enentaimpramiayi tura warichik unuimiatkamiayi.

JEHOVAI NU NUKAP WEAMKATTAME

Chikich congregacionnum wetasam iwiarnakmeka itiurchat enentaimtsumeash? Watskea jui enentaimsata, chinki yama akiniaka ni pasunkenia jinkitniun ashamminiaiti tumainiak nanaktin juarkinkia nanak yaja wetatui. Aintsan yaksha chikich congregacionnum weakka nui pujuiniana nujai shiir amajnaisatniun itiurchat iimniaiti. Tumaitiat chinki aran nanaktinian unuimiateana aintsan chikich congregacionnum wenana nusha nui pujusar  unuimiatkarka Jehovanun warinmansha ti nukap yainkiarminiaiti. Nicolas ni nuari Celinejai junis tuiniawai chikich congregacionnum pujuttsar weakrikia warinkish nukap unuimiatramniaitji. Iikia chikich aentsjai chikich nunkanam pujusar ti penker ajau atin unuimiatramiaji tu tuiniawai. Jean-Charles ni nuarijiai ni uchirijiaisha urukawarmia nuna aujmatuk junis tawai: Chikich congregacionnum pujuttsar wemiajnia nui ii uchirisha Yuusna nu nukap turatniun juarkiarmiayi. Ii nawanchirinkia iruntramunam iniakmam wearmania nui nisha pachinkiatniun juarkimiayi. Ii uchirincha Yuusa chichame etserin ajasat tusar anaikiarmiayi tu tawai.

Yuusna yaimkiattsam aran shiakam wetin jeachkumka wari itiurkamniaitiam? Nuin pujakmesha ju aujmatna nu turakmeka chikich congregacionnumia tawana aintsamek shiir enentaimtiatme. Jehová yainkiattawai tu enentaimsata. Yamaram congregacionnum pujamna nui warinmansha pachin ajattsam chikichjai Yuusa chichame etserkattsam aujmatiarta. Yamaram amikrum wainkiarta tura amikrum takakmena nujai nu nukap shiir amajnaisata. Yama taruana nu turutskesha utsumainiana nu yaintiasam wari itiurkamniaitiam? Kristu aentstikia anenkratin atiniaitji tuma asamtai anenkratin asar chikich aents yayakrikia Jehovai weamkattaji (Juaṉ 13:35). Ainis najanmaka Jehovajainkia ti shiiraiti (Isr. 13:16).

Itiurchatan wainiainiaksha nukap Kristu aentska aran jeawarsha unuimiatkaruiti tura ti waras pujuiniawai. Amesha aitkiasmek turamniaitme. Anne-Lise junis tawai: Chikich congregacionnum yaimiuttsan jean chikich aentsun nekaitjiai tu tawai. Kazumi naartincha junis tawai: Chikich congregacionnum weakrikia Jehová nekas yainkratniuana nu paant nekaamamniaitji tu tawai. Jules naartincha junis tawai: Nukap amikrun achiaku asan yamaikia irar ainis enentaimtsujai. Unuimiatkan puja asan junia weaknaka itiurchat nekapminiaitjiai tu tawai.