Aujin ainia nu anintruiniamu
Isaías 60:1nam TNM nuwanu aujmateana nunasha yanak ta, tura wari tajai tusa nantaktia newar ajata ta?
Isaías 60:1 TNM junis tawai: “Nantaktia nuwa, newar ajata, tsapniurmeka tarutrami. Jehovaka ni tsapniurijiai tsapin amajtamsattawai” tu tawai. Nuwa tana nunaka Sionkan tawai, nuka Jerusalenkaiti. Jerusalenka Judá matsatkamuriyayi (Is. 60:14 TNM; 62:1, 2 TNM). a Jerusalenka Israel matsatkamun iniakmawai. Judío aents urutai Jerusalennumsha waketkiarmia tura Jehová enentaimtustasarsha itiurkarmia? Isaías turunatniun timiania nu uminiuak? Nu jimiar anintramu yamai nekaattaji.
Judío aents urutai Jerusalennumsha waketkiarmia tura Jehová enentaimtustasarsha itiurkarmia? Judío aentska Babilonianam 70 uwi jukimiu pujuarmiayi. Nu tsawantainkia Jerusalén tura Jehová enentaimtutainkia emeskamuyayi. Medos tura persa aents Babilonian akintruk pujuarmiania nui Israel aentska ataksha nunken waketkiar Jehovan enentaimtusarminiuyayi (Ists. 1:1-4). 537 Jesuska taatsain judío aents 12 aentsnumia armiania nu waketrarmiayi (Is. 60:4 TNM). Waketrarmiania nu Jehovan tankun maawar aestutan nankaamawarmiayi, nampernash najantan juarkiarmiayi tura Yuus enentaimtutaincha iwiartan juarkiarmiayi (Ists. 3:1-4, 7-11; 6:16-22). Ainis najanainiak Jehová enentaimtamun paantin awajsarmiayi. Chikich aents Jehová nekachu armiania nu itiurkara Jehová enentaimtusartiniait nuna nekaawarmiayi.
Isaías turunatniun timiania nuka aya Jerusalennuman uminkiamiayi. Nukape Israel aents armiania nuka Jehovan enentaimtustinian iniaisarmiayi (Nee. 13:27; Mks. 1:6-8; 2:13, 14; Mat. 15:7-9). Arum Jesusnasha nakitrarmiayi (Mat. 27:1, 2). 70 uwi jeamtai ataksha Jerusalén tura Yuus enentaimtutai jeasha emeskarma juakarmiayi.
Jehová yaunchuk ainis nankaamastatui timiayi (Tan. 9:24-27). Isaías akankamu 60nam nui ashi aarma iruneana nuka Jerusalennum timiatrusan uminkiattawai tusanka Jehová tichamiayi.
Isaías turunatniun timiania nu uminiuak? Ee, uminiui. Antsu juinkia nuwanun tana nuka yakinian Jerusalenkan tawai. Yakinia Jerusalén tana nusha wariniak ta? Yakinia Jerusalén tana nunaka nayaimpiniam Jehová umirkaru matsatainiana nuna tawai. Pablo nunanu aujmatuk ninkia ii nukuriya aintsaiti timiayi (Kar. 4:26). Uchirinkia Jesús tura 144mil Kristu aents ainiawai. Tura nuisha Pablosha pachitkiawai nisha nayaimpiniam pujutniuiti. Nayaimpiniam pujusartinkia “nación santa” tura “Israel de Dios” tutainti (1 Ped. 2:9 TNM; Gál. 6:16 TNM).
Itiurka yakinia Jerusalén nantaya nuke tura newar ajaya nuke ajasmia? Ju nunkanam ni uchiri nayaimpiniam weartin pujuarmiania nujai turamiayi. Isaías akankamu 60nam turunatniuya nujai apatkar nekaawartai.
Kristu aents nayaimpiniam weartin armiania nu apóstoles jakarmatai Yuusan enentaimtustinian nakitraru ainiana nu waitian jintinkratainiakui kiritniua ainis amunam pujuinia asar Yuusna najanattsar nankaamawarmiayi (Mat. 13:37-43 TNM). Antar religión Uunt Babilonia yaruakma ainis matsamiarmiayi. Nuka amukatin tsawantin amukatniuyayi. Nu amukatin 1914 juarnakmiayi (Mat. 13:39, 40 TNM). Tura 1919tin jukimiu ainis pujuarmiania nuyanka ankan ajasar nukap Yuusna najanki wearmiayi. Nusha itiurka turawarmia? Nekaska nukap Yuusa chichame etsertan nankaamawarmiayi. b Ainis aitkiainiakui ashi aents Yuusnan jintiamu nekaaki wearmiayi tura aintsan chikich ju nunkanam nayaimpiniam weartin pujuarmiania nusha Isaías 60:3 TNM nui tawai uunt anairamu ainiawai. Nush nekaaki wearmiayi (Apu. 5:9, 10).
Ukunmatainkia Kristu aents nayaimpiniam pujuartatna nuka tsapin ajana ainis ti nukap Yuusnan nekaawartiniaiti. Kristu aents nunka pujuinia nayaimpiniam weartin mash wakarmatainkia yamaram Jerusalén ana nui pachitkia ajasartatui. Ninkia Jesusa anajmarmari 144 mil anairamu Yuusna takarin ajasartiniaiti (Apu. 14:1; 21:1, 2, 24; 22:3-5).
Yamaram Jerusalenka Isaías 60:1 TNM tana nu uminkiattawai (Isaías 60:1, 3, 5, 11, 19, 20 TNM tana nu Apukarípsis 21:2, 9-11, 22-26 nui tana nujai apatkam iista). Ju nunkanam matsatkamu Jerusalennum anaikiamu aa wemiania aintsan nayaimpinmasha yamaram Jerusalén Kristujai akupma atatui. Apocalipsis papii yamaram Jerusalén Yuusnumia nayaimpinmaya taarun wainkiamjai tana nunasha wariniak timia? Nunaka nunka pujuinia wainkiartatjai tusa timiayi. Yuus papii yamaram Jerusalenkan aujmatuk junis tawai: “Nu tsáapniji̱a̱i̱sha ashí nuṉkanmaya̱ shuar wekasartatui” tu tawai. Tura tunaanumia jatainmayasha ankan ajasartatui (Apu. 21:3, 4, 24). Isaías tura chikich Yuusna etserin armiania nu ashi iwiarnartatui tiarmiania nu uminkiattawai (Tur. 3:21). Nuka Jesús anaikiamu ekemsamiania nunia iwiaratniuka nankaamaiti. Mil uwi amunamunam nui mashiniu iwiarnamuka amukattawai.
a Isaías 60:1nam la Traducción del Nuevo Mundoka Sion turutskesha Jerusalén aatsuk nuwa tu aararuiti. Uruamtai aintsash najanawaruit? Hebreo chichamjainkia nantaktia newar ajata tura amajtamsattawai tana nuka nuwa tana ainis tau asamtai aararuiti. Nuwa tu aararuana nunaka aujainiakka nekas nuwachun tana nuna nekaawarat tusa tu aararuiti.
b 1919 uwitin Yuusna najantan juarkiarmiania nunanu Ezequiel 37:1-14 TNM tura Apocalipsis 11:7-12nam TNM aujmateawai. Ezequiel timiayi Kristu aents nayaimpiniam weartinkia nukape tsawan kiritniunam pujamurinkia iniaisar ataksha Yuusnan takakmatan juarkiartatui timiayi. Tura Apocalipsis papiinium aujmateawai ii yachi warumchik nayaimpiniam weartin antrar sepunam jukimiu jiintrarka Yuusna takakmaki weartiniuyania nunanu aujmateawai. 1919tin warumchik ii yachi tajinia nu esetar enentaimias penker takakmau tu anaikiarmiayi (Mat. 24:45 TNM; La adoración pura de Jehová: ¡por fin restaurada!, pág. 118 tana nu iista).
