1. Yus Kanta 15:​1-5 nui tana nusha itiur yainmaj?

 Nuik atsakamutin unuimiatramajnia nuinkia Jehová akmakmarin pujuinia ainis pujuiniana nuka ni amikri arminiana nuna nekaamji. Tumaitkiusha itiura Jehová amikri tuke aminiaitiaj? Yus Kanta akankamu 15 nu anintramunka nekaatniun yainmakminiaitji. Nuinkia Jehová amikri tuke atai tusar itiurkatniuitiaj nuna aujmatui (Yus Kanta 15:​1-5 aujsata).

2. David akmakman timiania nuisha warinia taku ainis timia?

² Yus Kanta akankamu 15 yama juaruk junis tawai: “Maa, Uunt Yusá, Ame Shiir Awajtai̱ Je̱e̱mincha [Ame akmakmarmincha TNM] ¿yaki pujusaint? Ámin akantúkma náintrumincha ¿ya pujusminiait?” (YKan. 15:1). “Ame akmakmarmincha” David ainis timiania nuinkia Gabaón nunkanam Yuus enentaimtutai jea akmakma aminia nuna timiayash tumainti. “Ámin akantúkma náintrumincha” timiania nuka Sion naintian Jerusalennum amiania nuna timiayash tumainti. Nui chicham aarma enketai apujsattsa akmakmiayi, jea penker jeammam ainis akmakmiayi (2 Sa. 6:17).

3. Yus Kanta 15 tana nusha urukamtai penker nekaatniuitiaj? (Nakumkamusha iista).

³ Untsuri Israel aentska Yuus enentaimtutai jeanam nui takakmascharmiayi. Chicham aarma enketai amiania nuisha penkesha waniacharmiayi. Tumaitkiusha ashi Israel aents Jehovan umiriarmiania nuka Yuusa amikri ajasarminiuyayi. Tumainiak Yuus akmakmarin pujuinia ainis armiayi. Iisha nu wakeraji. Yus Kanta 15 nuinkia Yuusa amikri tuke atai takurkia uruku atiniaitiaj nuna aujmatui.

 ESETRAR NAKA WEKAKUR NEKASA NUJAI METEK TURAWARTAI

4. Yuusa amikri ataj takurkia ayataik imiantin nukechuiti urukamtai ainis taji? (Isaías 48:1 TNM).

⁴ Yus Kanta 15:2 nui “ya esetar naka wekaak nekasa nuja̱i̱ métek túrana nu” Yuusa amikrinti tawai. Wekasatin nuya turatin tana nuka ainis najanki weamun tawai. Yuus papiinium nakak wekasatniun aujmateana aintsan wekasamniashit? Ee, nuka turamniaitji. Tunaartiniaitiatar ni umirkatai tusar kakakrinkia Jehovaka nakak esetrar weka asakrin shiir enentaimturmastatji. Yuusai sumamsar imiantin aya nukechuiti. Yaunchukka ashi Israel aentska Jehová amikri acharmiayi. Chikichkia Yuusa naarin pachi wearmiayi tumaitkiusha nekas enentaijiainkia turicharmiayi (Isaías 48:1 TNM aujsata). Yuusan nekas enentaimtustasar wakeriarmia nuka Yuus taman nekaawar umin armiayi. Yamaisha aintsan Yuusa amikri ataj takurkia aya imianir testigo de Jehová ajastin nukechuiti. Antsu nekasa nujai metek turukir wetiniaitji. Wari turakria ainis turattaj?

5. Esetar naka wekaak nekasa nujai metek turana nu aentscha warinia najanniuit?

⁵ Esetar nakak wekaak nekasa nujai metek turana nuka aya iruntramunman wechaiti (1 Sa. 15:22). Kristu aentstikia Yuus tuke umirkatai tusar kakartiniaitji. Iik pujakrisha nuisha Yuus tuke umirkatniuitji (Neka. 3:6; Ecl. 12:​13, 14 TNM). Ashi warinmansha Jehovaka umirkatniuitji. Jehová anea asar ainis turatniuitji. Ainis turakrinkia nisha anenmastatji (Juaṉ 14:23; 1 Juaṉ 5:​3, 4).

6. Yaunchuk Yuus umirkamujai aya nujai ni amikri achamniaitji tusasha Israernum 6:​10-12 nuisha wari ta?

⁶ Niniu warinkish najanaitiajnia nunaka Jehová ti shiir iiyawai. Tumaitkiusha  aya yaunchuk umirkamujai Jehová amikri achamniaitji. Israernum 6:​10-12 (aujsata) nui ainis tawai. Yaunchuk umirkaitiajnia nuna Jehovaka kajinmatchaiti. Tumaitkiusha tuke umirtukarat tusa wakerawai. Yawetsuk Jehovanu takakrikia ni amikri tuke atatji (Kar. 6:9).

II ENENTAIJIAI NEKASA NU CHICHAU ARTAI

7. Ii enentaijiai nekasa nu chichau atasar wari itiurkatniuitiaj?

⁷ Yus Kanta 15:2 nui tana aintsan Yuusa amikri ainiaka ni enentaijiai nekasa nuna chichau ainiawai. Ashi warinmansha waitrichu, anankartichu atiniaitji. Jehová ainis arat tusa wakerawai (Isr. 13:18). Yuusa chichamenka junis tawai: “Warí Uunt Yuska yajauchin enentáimtinia núnaka muí̱jiawai, antsu esetar wekainia núnaka nekas péṉker amikri̱ya nútikias shiir enentáimtuiniawai” tu tawai (Neka. 3:32).

8. Urukua achatniuitiaj?

⁸ Ni enentaijiai nekasa nuna chichauka Yuusan umiru nuke ajachuiti antsu ninki pujaksha Yuusnaka tuke umirniuiti (Isa. 29:13). Yuusan umirua nuke ajatniuka penkerchaiti. Iikia ainis turatin nakitiaji. Yaksha ainis turatniuncha itiura nankaamamniait? Jehová tana nu umirkatin nekasash penkerait tu enentaimsatniun juarkimniaiti (San. 1:​5-8). Urutainsha warinkish yajauchin ishichik ishichik najanki nuka yajauchichuiti tu enentaimias tunaan najanamniaiti. Ainis turak tukeneas Yuusan enentaimta ainis ajamniaiti (Ecl. 8:11 TNM). Antsu iikia ashi warinmansha anankartichu tura waitrichu atiniaitji.

9. Jesús Natanael naartinian nekaamiania nui nankaamasmiania nujaisha wari nekaamniaitiaj? (Nakumkamusha iista).

⁹ Penker enentai takaku atinkia penkeraiti. Felipe ni amikri Natanael naartinian Jesusan nekaat tusa jukimiania nui wari turunamia? Jesuska Natanael naartinian yaunchukka wainkiachuitiat junis timiayi: “Ju̱ shuar iistarum. Ti péṉker  Israer shuaraiti. Peṉké anaṉkartichuiti” tu timiayi (Juaṉ 1:47). Jesús ni unuiniamuri anankartichu armiania nuna nekauyayi. Tumaitkiusha Natanaelnaka penke anankartichun nekaamiayi. Natanael naartinkia iiya aintsan tunaartiniuyayi tumaitiat penke anankartichuyayi. Penker enentain achiaku asamtai Jesús shiir enentaimtimiayi. Natanael naartinian itiur enentaimtimia aitkiasan iincha enentaimturmakrinkia shiir enentaimsamniaitji.

10. Ii chichajnia nujai urukamtai chikich aentscha itiurchat amajsashtiniaitiaj? (Sántiak 1:26).

¹⁰ Yus Kanta 15 nui tana nuka chikich aentscha itiur awajsartiniaitiaj nuna aujmateawai. Yaki Jehová akmakmarin pujumniait nuna aujmatuk Yus Kanta 15:3 junis tawai: “Tsanumcha ni írutkamuri̱ncha itiurchat awajcha tura niin ayam pujuiniana nunasha itit awajcha nu nui̱ṉkia pujusminiaiti”. tu tawai. Ii chichajnia nujai chikich aents itiurchat awajsamniaitji nu turakrikia Jehová amikri achattaji (Sántiak 1:26 aujsata).

11. a) Tsanumeakrikia chikich aentscha itiurkamniaitiaj? b) Testigo de Jehová tsanumeaka urukamniait?

¹¹ Yus Kanta 15 nuinkia tsanumin ainian aujmattsayi. Yaksha tsanumeakrikia ni naarin natsan ujukamniaitji. Imianniuitiat tsanumpratniun iniayachuka testigo de Jehová achamniaiti (Jrm. 17:10).

12, 13. Nekaamatsuk wari turakria ii amikri natsan ujukamniaitiaj? (Nakumkamusha iista).

¹² Yus Kanta 15:3 nui Jehová akmakmarin pachitkiana nuka chikich aentsnasha itiurchat awajchaiti tura ni amikrincha natsan ujuchuiti tu tawai. Wari turakria ii amikri natsan ujukamniaitiaj?

¹³ Awajeamuri aujmateakrikia nekaamatsuk yaksha natsan ujukamniaitji.  Ii umainkia precursor ajasman iniaisamniaiti. Nuatnaikiaru Betelnumia jinkiarminiaiti. Tura aintsan uuntri anaikiamun turutskesha yaimin anaikiamun ninkia anaikiamua nunaka iniaisayi tu etserkarminiaiti. Yajauchin najana asa iniaisayi tusar yajainsha aujmatkini wekaishtiniaitji. Urukamtai iniaisarma nuka iikia nekaachminiaitji. Nuyasha ju kajinmatkishtiniaitji: Jehová akmakmarin pachitkiana nuka chikich aentsnasha itiurchat awajchaiti tura ni amikrincha natsan ujuchuiti.

YUUSAN UMIRAINIANA NU SHIIR AWAJSARTAI

14. Jehová akmakmarin tajinia nui pujasha ya aentsua netset nunasha itiura nekaamniait?

¹⁴ Yus Kanta 15:4 nui tawai Yuusa amikri ainiana nuka netse aents ainiana nuna nakitniuiti tawai. Aents netsesha itiura nekaamniaitiaj? Iik nuka nekaatniuka jeatsji. Iijiai iismaka shiir ajausha tura majat ajausha irunniuiti. Jehová ya aentsun netse ainiawai ta nu aents iisha nakitratniuitji (1 Kur. 5:11). Tunaan najanu pujuttsar wakeruiniana nu aentska nakitratniuitji, nuyasha ii jintinkrateajnia nuna wishikkiartuiniana nu aentska nakitratniuitji, tura tunaa najanawarat tusar utsukratainiana nusha nakitrartiniaitji (Neka. 13:20).

15. Wari turakria Jehová umirainia nu shiir awajsarminiaitiaj?

¹⁵ Yus Kanta 15:4 nuinkia Yuusan umirin ainiana nu aents shiir awajsatniuitji tawai. Tuma asarmatai shiir amajsatai tusar tura arantuktai tusar warinkisha turiniaitji (Rum. 12:10). Nusha itiura ainis turamniaitiaj? Yus Kanta 15:4 nui ya Jehová akmakmarin pujumniait nuna aujmatuk junis tawai: “Yus íimmianum jú̱naka nekas umiktatjai tusa niṉki itiurchat awajmámkasha yapajcha nu nui̱ṉkia pujusminiaiti” tu tawai. Juna turattajai tusar chichakuitiajnia nu umiachkurkia chikich aentscha waitkiasartatji (Mat. 5:​34-37). Nuatnaikiaru ainiana nu tuke anenaisartatji tiarmiania nuna umikiarat tusa Jehová wakerawai. Nuyasha uchirtin ainiana nu ni uchirin warinkisha najanatniun tuiniakka umikiarat tusa Yuuska wakerawai. Yuus anea asar tura aentscha anena asar ii tajinia nu umiktai tusar kakaji.

16. Chikitcha wari najankuria ii yachi ii umai shiir awajsarminiaitiaj?

¹⁶ Jehová amikri ainiana nu shiir awajeakrikia ii jeen ipiawartatji tura tsanka atatji (Rum. 12:13). Warasar nankaamastai tusar warinkish najankur ii yachi ii umai ipiainiakrikia, ii yachi ii umai tura Jehovasha ti aneasartatji. Ainis turakur Jehová aintsan najanji.

KUIT TI WAKERISHTINIAITJI

17. Yus Kanta 15 nuisha kuitniasha urukamtai aujmatea?

¹⁷ Yus Kanta 15 nui tawai Jehová akmakmarin pujana nuka kuitian ikiamuk nukap patatkam awanturkitia tichaiti tura umitmakchan itiurchat awajsattsa kuitian achichuiti tu tawai (YKan. 15:5). Yus Kanta 15 nuisha kuitniasha urukamtai aujmatea? Aya neachma kuit ti wakeruktin juarkimniaitji. Ainis turakrikia chikitcha itiurchat awajsarminiaitji tura Yuussha nakitrampramniaitji (1 Ti. 6:10). Yaunchukka ni yachi ni umainkesha kuitian ikiainiak nukap kuit patatkam awanturkitia tu wearmiayi. Chichaman iwiarniusha umitmakchan  umitmakuiti titi tusa kuit akiam achi wearmiayi. Nu ainis turamun Jehová penke nakitiawai (Ezeq. 22:12 TNM).

18. Warintia animiasminiaitiaj? (Israernum 13:5).

¹⁸ Kuitian ti wakeriniashitiaj tusar enentaimsatniuitji. Juni animiasartai: Aya kuitniuman tura warinkish sumaktasan wakerajna nuin tuke enentaimsan pujajak? Yaksha kuitian ikiatsamtai warik awaketsuk pujukaitiaj? Kuitian takakkunka nankaamantu enentaimniukaitiaj? Tsanka atinian tujinniukaitiaj? Yatsur turutskesha umar kuitrintin ainiana nuna kuitian ti wakerin ainiawai tu enentaimniukaitiaj? Kuitrincha ainiana nunaka pachitsuk aya kuitrintin ainiana nujain shiir amajnaisattsan wakerinkiaitiaj? Iikia Jehová akmakmarin pujajnia ainis pujaji, nuyainia jinkishtiniaitji. Kuit ti wakerij tusar aneartiniaitji. Nu turakrinkia Jehovasha penke iniaitiamsashtatji (Israernum 13:5 aujsata).

JEHOVAKA NI AMIKRI AINIANA NUNA ANENAITI

19. Yus Kanta 15 nui tana nunasha urukamtai Jehová umikiarat tusa wakera?

¹⁹ Yus Kanta akankamu 15 amuamunam junis tawai: “Ju̱na mash túrinia nu Yusai̱ya̱ṉka peṉké umuchkiachmin pujustatui” tu tawai (YKan. 15:5). Yus Kanta akankamu 15 nui tana nuna uminiak penker pujuarat tusa Jehová wakerawai. Nu umiakur penker pujuttaji tura Jehovasha yainmaktatji (Is. 48:17 TNM).

20. Jehová akmakmarin pujuiniana nusha uruma nui urukawartata?

²⁰ Jehová akmakmarin tuke nui pujuiniana nuka uruma nui penker pujuartatui. Nayaimpiniam weartin ainiana nu Jesuska nayaimpiniam pujuarat tusa ni iwiarkaiti (Juaṉ 14:2). Antsu chikich Kristu aentska Apukarípsis 21:3 tana aintsan ju nunkanam ti penker pujuartatui. Jehová ni akmakmarin wayawarat tusa ipiatmaitji tuma asamtai ti waraji.